2015年10月24日

OkidoKey Lite:免錢的 iOS 漢字輸入法 App,有支援行列輸入法鍵盤

這幾冬來,蘋果 iPhone 佮 iPad 系列實在是真時行,毋過蘋果採用的 iOS 系統內底並無附佮行列輸入法,雖然 iOS 8.0 以後的系統支援第三方輸入法鍵盤,但因為這一寡 App 作者本身毋是行列輸入法的使用者,用系統本身的 QWERTY 英文鍵盤實在佮行列輸入法足袂四配。對真濟想欲佇 iOS 下跤使用行列輸入法的「果粉」朋友來講,無一个合用的行列輸入法鍵盤,實在是予人氣身惱命。

老刀最近佇 iOS 下跤試用一寡有支援行列輸入法的第三方輸入法鍵盤,發見免費的 OkidoKey Lite 有上好的基礎架構:毋但會當讀入 OpenVanilla 的 .cin 輸入法表格,而且逐个輸入法表格會使指定欲佮佗一款軟體鍵盤(親像注音鍵盤、倉頡鍵盤、大易鍵盤……),精差欠一个行列鍵盤爾爾。老刀寫批佮 OkidoKey Lite 的作者 Ethan Liu 聯絡,佇伊熱心幫助下,真正好用閣免費的行列鍵盤就按呢出現矣!

array-ipad

現此時 OkidoKey Lite 猶袂支援行列輸入法的一、二級簡碼,我當咧佮 Ethan Liu 參詳,凡勢行列簡碼有機會加入嘛無的確。

來貼幾張 OkidoKey Lite 的畫面,歡迎有興趣的朋友來去掠來鬥看覓。(怹嘛有功能較強的付費版本:OkidoKey,價數是 150 新臺票)

IMG_0003

IMG_0004

【10/31 補充】因為行列鍵盤是 OkidoKey Lite 1.1.0 釋出了後才加添,所以軟體內底附的行列鍵盤猶原是英文字鍵,你需要佇頂懸的「可用鍵盤配置」點選「行列」順紲向下跤拖一下,也就是予 OkidoKey Lite 上官網去更新上新版的「行列鍵盤」配置檔。

沒有留言: