2015年9月16日

OpenVanilla 行列輸入法表格 0.75 更新

佮昨日更新的 gcin 行列輸入法表格 0.45 版仝款,嘛是根據行列輸入法官網修正的特別碼 V201509 版進行修正。老刀建議 OpenVanilla 的使用者來遮掠新表格(有 array30.cin 佮 array-special.cin 攏總 2 个檔案),參考內底的方式家己來更新。

2015年9月14日

gcin 行列輸入法表格 (ar30-big.cin) 0.45 更新版

這个 0.45 版是配合行列輸入法官網修正的行列特別碼 (V201509),並無做其他的更新。老刀歡迎有興趣的朋友入去遐參考看覓。根據 gcin 作者 eliu 通知,0.45 新版 ar30-big.cin 行列輸入法表格已經收入 gcin 的原始碼內底,後一个 gcin 版本就會支援這个新表格。

予 OpenVanilla 使用的行列輸入法新表格愛閣小等一下,等我修整好勢就會公布。

2015年9月11日

行列輸入法特別碼更新

今仔日行列輸入法官網釋出上新版的「特別碼」表格 (V201509),主要是刣掉佮 Unicode 漢字本字重碼的特別碼,這个版本並無增加新的特別碼。

雖然老刀普通時干焦使用著行列輸入法的「一、二級簡碼」爾爾,並無咧用特別碼拍字,但猶原佮行列輸入法發明人廖明德先生合作更新這个版本,佇咧 Windows(XP 以上)、OS X 佮 Linux 攏支援的 Unicode 環境內底拍漢字的時陣,就會使節省一寡揀字的時間,對拍字速度嘛加減仔有幫助。

老刀明仔載應該會使用這个版本,來更新 OpenVanilla 佮 gcin 的行列輸入法表格,敬請期待!