2015年4月19日

佇 OS X 使用 WebATM:中華郵政佮臺灣銀行

講起臺灣的銀行界,雖然怹網路銀行有提供 WebATM 轉數服務,毋過這个方面一直是微軟 Windows 系統佮 Internet Explorer (IE) 上奢颺的所在:除了使用 IE 以外,並無支援其他瀏覽器。差不多 7、8 冬前,使用 iOS 系統的蘋果 iPhone、iPad 時行了後,使用蘋果 Mac 電腦的用戶嘛愈來愈濟,漸漸拍破微軟獨家的局面,誠濟間銀行終於思考愛照顧 Mac 用戶所使用的 OS X 系統,親像玉山銀行的 WebATM,就是臺灣頭一間支援 OS X 系統的 WebATM。嘛是因為按呢,老刀熟似真濟 Mac 用戶的朋友,紲變做是死忠的玉山銀行客戶。

雖然老刀嘛想欲辦玉山銀行口座,可惜怹分行無夠濟,想欲去銀行寄付,對我來講並無遐爾方便。我上捷往來的銀行就是臺灣銀行佮中華郵政(郵局):臺灣銀行是逐個月薪水入數的經濟來源、中華郵政是就近領零星所費的口座,這 2 間對我來講是足要緊,好佳哉這 2 間銀行的 WebATM 最近攏開始支援 OS X,老刀就共 OS X 設定的方式寫踮下跤,你若拄好是這 2 間銀行的客戶,而且佮我仝款是 Mac 用戶,按呢就罔參考一下。

開始前的準備

  1. IC 晶片讀卡機:只要揀一款有支援 OS X 的讀卡機就會使。老刀使用虹堡科技的 EZ100PU 讀卡機,這款應該是臺灣使用上濟的讀卡機,佇 3C 賣場應該會使用一百外箍新臺票買著,愛會記得先共晶片讀卡機接去 Mac 的 USB 埠,並且共 OS X 驅動程式鬥予好勢。
  2. OS X 系統:建議使用 OS X 10.6 以後的版本;老刀使用 OS X 10.10.2 版。
  3. 瀏覽器:老刀使用 Firefox 37 for Mac 佮 Safari 8.0.3 for Mac。

使用中華郵政 WebATM

頭先,來去中華郵政 WebATM 網站,先共 WebATM 元件掠倒轉來。

150418-0001

揤倒手爿上下跤的「下載安裝元件」,佇跳出來視窗內底選擇「WebATM 元件下載-Mac OS X」,掠倒轉來的檔案名稱是 TRUSTATMPOST.dmg。

150418-0002

拍開 TRUSTATMPOST.dmg,共下跤的 npTRUSTATMPOST.plugin(也就是中華郵政的 WebATM 元件) 拖入去邊仔的 Plugins 替身內底就完成矣,因為 Plugins 是受著系統保護的檔案夾,你需要拍入 OS X 系統管理者帳號。

150418-0007

若發現無法度共 npTRUSTATMPOST.plugin 拖成功,請拍開「系統偏好設定」的「安全性與隱私」,佇「允許從以下來源下載的 App」項目選擇「任何來源」了後,應該就會當共 npTRUSTATMPOST.plugin 拖入去 Plugins 矣。

150418-0014

揤「登入」了後,就會出現讀卡機的型號 CASTLES EZ100PU(你的 Mac 若有接一臺以上的晶片讀卡機,會當佇這个畫面揀紲落來將欲使用的讀卡機)。

150418-0003

直接揤正手爿青色的「登入Login」,就出現要求你拍入晶片卡密碼的畫面:

150418-0004

紲落來就進入 WebATM 的畫面,就親像你人咧真正的 ATM 頭前操作仝款。

150418-0005

使用臺灣銀行 WebATM

想欲使用 Firefox 37 for Mac 入去臺灣銀行 WebATM,現此時並無法度進入,會去予銀行踢出來:

150418-0015

改用 Safari 8.0.3 入去臺灣銀行 WebATM,原來是老刀猶袂鬥入 WebATM 元件的關係:

150418-0009

參考倒手爿上頂懸的「新手上路」的說明,原來現此時干焦支援 Safari 佮 Opera 瀏覽器爾爾,真正奇怪?【老刀按:理論上,平平攏是 plugin 架構,應該有法度予 Firefox 使用才著,毋知影為何欲拒絕 Firefox 用戶進入?】毋管如何,先來共臺灣銀行的 WebATM 元件掠倒轉來鬥吧,檔名是 npBOTATM_106.pkg。

150418-0010

拍開 npBOTATM_106.pkg,雖然伊寫著干焦支援 Mac OS X 10.6 (Snow Leopard),但根據老刀試驗,這个 WebATM 元件佇 OS X 10.10.2 功能正常,所以繼續鬥落去就著!

150418-0011

若發現無法度共 WebATM 元件鬥成功,請仝款拍開「系統偏好設定」的「安全性與隱私」,佇「允許從以下來源下載的 App」項目選擇「任何來源」了後,應該就會當成功鬥入 WebATM 元件。

150418-0014

鬥好勢了後,就會當進入臺灣銀行 WebATM 矣!

150418-0016

2015年4月2日

佇 Fedora 頂頭設定 HP 印表機:利用 hplip

服務老刀超過 10 冬的全友 Microtek ScanMaker V6USL 掃瞄器終於無法度閣再硬楗落去,決心來去訂一臺會當掃瞄、列印、傳真的事務機來替換。選擇誠久了後,終於揀 HP Officejet Pro 6830 這臺,支援有線/無線網路,予厝內底逐台電腦、手機、平板攏總會使掃瞄佮列印的好物。因為較早毋捌用過 HP 事務機,特別來去 HP 官網研究一下,發現怹有開放源碼 (open source) 的 HP Linux Imaging and Printing (hplip) 計畫,而且好消息是伊已經附佮佇老刀使用的 Fedora 21 Workstation 內底,真正有夠讚矣!

雖然附佇 Fedora 21 Workstation 內底的 hplip 3.14.10 版本毋是上新(現此時 hplip 上新版本是 3.15.2),老刀並無拍算欲追求上新版本,畢竟系統附這个版本佇內底,表示相容性一定是沒問題,就共我鬥入 hplip 的過程寫踮下跤予逐家參考看覓吧(一方面是免驚後擺升級 Fedora 22 重灌系統的時陣放袂記,會當倒轉來複習)!

想欲鬥入 hplip,愛先拍開「終端機」,佇內底拍入下跤的指令:

sudo yum install pyqt4 hplip-gui
hp-setup

紲落來就會出現下跤的畫面,表示已經成功進入 hplip 設定:

hp-setup1

▲選擇連接電腦的使用介面

老刀選擇無線網路的方式連接,按呢厝內底所有的桌頂電腦、筆電、手機、平板攏總會使共用 HP Officejet Pro 6830。這咧時陣 hplip 會提醒你用 USB 纜線連接電腦佮 6830 事務機,予電腦會當掠著正確的印表機型號;連鞭 hplip 設定好勢了後,你就會當拆掉 USB 纜線矣。另外,hplip 嘛會提醒你鬥入 hplip 驅動程式(老刀按:家己提醒鬥家己,真正有夠奇怪?),因為電腦佇鬥入 Fedora 21 Workstation 的時陣應該就順紲鬥入 hplip,所以直接揤「取消」就會使,毋免閣再鬥一擺。

wireless-setup

▲選擇用無線網路連接

wireless-setup2

▲已經掠著 HP Officejet Pro 6830

wireless-setup3

▲選擇欲連接的無線網路基地台 (AP)

printers

▲設定好勢就會出現 2 臺「印表機」:一臺是正港的印表機,另外一臺是傳真機 (Fax)

f21

▲欲設定 HP Officejet Pro 6830 事務機,會使透過 HP Device Manager

hp-device-manager

▲HP Device Manager 的畫面

老刀最後補充一點:想欲查 hplip 對 HP 印表機全產品的相容性,會使入來這个所在喔!