2014年12月17日

Spotify Preview for Linux 嘛有予 Fedora 專用的包裝

Spotify 是一个免費收聽音樂專輯的串流音樂放送軟體,老刀舊年捌介紹過,想欲知影 Spotify 是啥物?請參考這篇舊報導:你今仔日敢有 Spotify?

雖然 Spotify 官方猶袂推出 Linux 平臺的正式版本,毋過已經有 Spotify Preview for Linux 應用程式提供予 Linux 用戶先試用。但是真可惜,現此時的 Spotify Preview 是予 Debian/Ubuntu 專用,親像老刀這款使用 Fedora 的老朋友來講,雖然會當改用網頁版本的 Spotify 來聽歌,但是功能上並無直接使用 Spotify 應用程式遮爾方便。

好佳哉網路上已經有高手重新包裝 Spotify Preview 予 Fedora 專用,這个「非官方包裝」是 64 位元版本 (x86_64),支援 Fedora 19, 20 佮上新的第 21 版。對佮意聽歌的 Fedora 用戶來講,絕對是一定愛鬥入的軟體矣!我對家己的 Fedora 21 Workstation 掠一張 Spotify Preview 的畫面貼踮下跤:

spotify_preview

有興趣的朋友,請來去參觀怹的說明吧。

2014年12月11日

Fedora 21 Workstation 啟動 gcin 拍字的撇步

予逐家等誠久的 Fedora 21,終於佇 12/9 推出矣!這擺 Fedora 21 針對用戶需求,推出 3 種版本:Cloud、Server 佮 Workstation。老刀因為共 Fedora 21 當做桌面系統的關係,無需要做伺服器,所以選擇 Fedora 21 Workstation,安裝光碟嘛對 4.6 GB 縮減來到 1.4 GB,真正使用的時陣,會當感覺真正有比 Fedora 20 閣較順。

上新的 Fedora 21 Workstation 採用 GNOME 3.14.2 桌面介面,可惜附佮佇內底的中文輸入法是 iBus 酷音,對拍慣勢行列輸入法的老刀來講,實在需要改換 gcin 矣!

f21

根據 Fedora 官方網站的說明,想欲使用「非 iBus」的輸入法框架(親像 gcin)的朋友,會當參考看覓。老刀來共步數寫踮下跤:

頭先,拍開「設定值」的「鍵盤」,入去「輸入」標簽共「切換到下一個輸入來源」佮「切換到上一個輸入來源」停用:

keyboard

紲落來,入去「地區和語言」,共「輸入來源」內底佮 iBus 有關係的輸入法攏總關掉,只賰「英語」:

locale

拍開「終端機」視窗,拍入下跤這逝(無包括頭前的 $ 提示字元),共 GNOME 的 X Keyboard extenson 關掉:

$ gsettings set org.gnome.settings-daemon.plugins.keyboard active false

拍入 su 取得 root 權限了後,閣再拍入下跤這逝(無包括頭前的 # 提示字元),就會使鬥入 gcin:

# yum install gcin*

若有必要,共 iBus 規个刣掉嘛是真讚,會當減少衝突的機會:

# yum erase ibus

重新開機了後,就會當佇 im-chooser 啟動 gcin 矣!

im-chooser

2014年12月2日

來去開箱:Actiontec ScreenBeam Mini2 無線顯示接收器

IMAG0333

老刀使用 Nexus 7 (2013) 平板電腦已經一冬外,這臺平板電腦雖然輕便,毋過用纜線外接螢幕方面,一直是大弱點。好佳哉這馬一寡行動裝置已經有支援 Miracast 佮 Intel WiDi,只要拍開 WiFi 無線網路,就會當共行動裝置的畫面放送佇 HDMI 螢幕抑是投影機。

老刀頂禮拜收著訊動科技 (Actointec) 寄來 ScreenBeam Mini2 無線顯示接收器樣品,伊支援 Miracast 佮 Intel WiDi 傳輸協定,佮 Nexus 7 配對了後,共 Powerpoint 簡報佮影片無線輸出予投影機放送,取代又厚又重的筆電,實在是真理想。

詳細的開箱過程佮使用心得,已經貼佇分站老刀烏白耍,歡迎逐家來去參觀。

2014年11月23日

11/8「Adonit 揮灑創意—領略真實觸動」新品發表體驗會活動紀實

DSC_1261

老刀受著好朋友阿鑫佮麥客迷俱樂部的邀請,來到臺北市金山南路的 Moso Space 參加「Adonit 揮灑創意—領略真實觸動」新品發表體驗會。這擺 Adonit 臺灣代理商艾品科技邀請仝款是老刀好朋友的 AKS,佮似顏繪畫家阿超先生來現場展示 Adonit 產品佮 Adobe Ink & Slide 佇製作插畫、人物畫的方便性。

想欲進一步瞭解這个活動佮老刀個人感想的朋友,歡迎來去分站老刀烏白耍參觀。

2014年11月14日

Android 系統收 CJK Unicode 罕用字:為也?不為也?

幾若冬以前,老刀捌以「𨑨迌」為例,論斷蘋果牌瀏覽器 Safari 對 CJK Unicode 漢字的支援性,有興趣的朋友,歡迎來複習下跤這 2 篇文章:

是按怎欲用這 2 字來做試驗?其實是有原因佇咧:「𨑨」的 Unicode 內碼是 U+28468,是屬於 Unicode 3.1 定義的中日韓統一表意文字擴展 B 區 (CJK Ext-B) 字集;「迌」的 Unicode 內碼是 U+8FCC,屬於逐款主流作業系統攏有支援的 Unicode 2.0 字集。因為有一寡定定用著的臺語字是收錄佇 CJK Ext-B 字集內底,所以若想欲正常讀臺語文章,這是誠重要的基本條件!Windows Vista 以後的系統,CJK Ext-B 字集收錄的字碼,攏總囥佇「新細明體Ext-B」內底,Unicode 2.0 字集收錄的字碼,是囥佇「新細明體」。所以看「𨑨迌」敢會當佇系統內底正常顯示,就差不多知影系統佮軟體處理 Unicode 的相容性如何。

這擺老刀共 Android 系統本身當作試驗對象,利用手頭現此時使用的 Android 裝置,來試看覓「𨑨迌」2 字敢有正常顯示出來。我共所用硬體佮系統拍踮下跤:

  • Nexus 7 WiFi (2013):採用 CyanogenMod 11 M11 (Android 4.4.4 KitKat) 佮 Google 這個月初推出的官版Android 5.0 Lollipop。
  • HTC One M8:採用 HTC Sense 6.0 (Android 4.4.4 KitKat)。
  • ZTE Amazing A6:改刷米柚 MIUI V5 (Android 4.2.1 Jelly Bean)
  • (共好厝邊借來的)紅米 Note:MIUI V5 (Android 4.2.2 Jelly Bean)

相容性的結果:

cm11m11 htc_m8
▲Nexus 7 / CyanogenMod 11 M11 (Android 4.4.4):變做四角箍仔 ▲HTC One M8 / Sense 6.0 (Android 4.4.4):正常顯示
lollipop miui_v5
▲Nexus 7 (Android 5.0):正常顯示 ▲ZTE Amazing A6 / MIUI V5 (Android 4.2.1):變做四角箍仔
Screenshot_2014-11-14-21-53-54  
▲紅米 Note / MIUI V5 (Android 4.2.2):無字,變做空格  

會當發見平平是 Android 4.4.4 KitKat,CyanogenMod 11 M11 的系統字型無支援 CJK Ext-B,但是 HTC Sense 6.0 就有支援,合理的推測是:Android 4.4.4 共 Android 5.0 本身攏會當正常處理 CJK Ext-B 的系統字型,精差看系統「字型」敢有支援爾爾。另外,小米公司的米柚系統 (MIUI) 佇這个部分,猶有加強空間。

2014年11月13日

CyanogenMod 11 M12 釋出(閣有官方發布 CyanogenMod 12 的消息)

Screenshot_2014-11-13-20-26-07根據 CyanogenMod 今仔日發表的新聞稿,怹終於釋出根據 Android 4.4.4 (KitKat) 開發的第 12 个月版本:CyanogenMod 11 M12。這个版本並無來重大的新功能,主要是修正安全性佮改善穩定性。這版嘛已經共佇頂個月發現 SSLv3 的 POODLE 安全性問題修正好勢,CyanogenMod 建議用戶趕緊來去更新系統;老刀推薦利用系統內底的「CyanogenMod 更新」功能(請參考頂懸的圖),予更新的過程自動化。另外,老刀建議你的 Android 裝置採用 TWRP Recovery,功能毋但強,佮 CyanogenMod 相容性嘛上好。

另外,這篇新聞稿嘛正式宣布根據 Android 5.0 (Lollipop) 所發展的 CyanogenMod 12 開發進度,而且佇 11 月底抑是 12 月初就會釋出 CyanogenMod 12 nightly 系列,真正是天大的好消息矣!

【老刀按:昨暗老刀才佇遮貼講 CyanogenMod 12 第一个月版本 (M1) 佇明年 1~2 月推出的可能性,看來已經臆著 7、8 分】

2014年11月12日

gcin for Android 嘛有予 Android 5.0 (Lollipop) 專用的版本

gcin-android因為進前老刀佇 gcin for Android 官網討論版反映一寡問題,作者 eliu 通知講已經更新好勢。拄才入去掠 gcin for Android 更新版的時陣,發見怹嘛有推出予 Android 5.0 (Lollipop) 專用版本。因為老刀已經暫時共 Android 5.0 開發版本對 Nexus 7 內底刣掉,所以真無彩,無通來試驗 gcin for Android 5.0 (Lollipop) 專用版本有啥無仝。

已經升級 Android 5.0 的朋友,敬請來去 gcin for Android 官方討論版掠轉來鬥看覓,歡迎來遮留字發表意見,說明這个專用版有啥物新功能。

2014年11月11日

CyanogenMod 12 已經恬恬仔進行開發

CM12 in Progress

就親像 CyanogenMod 進前的承諾仝款,怹佇 Google 正式釋出 Android 5.0 的日子,就會啟動 CyanogenMod 12 的開發工作。現此時入去觀視 CyanogenMod 官網的原始碼,已經會當看著 cm-12.0 的分支,真正是一个好消息。頂頭的圖,是現此時 Nexus 7 WiFi (2013) 原始碼的更新進度

話講翻頭,CyanogenMod 12 M1(第 1 个月版本)啥物時陣會正式推出?按照 CyanogenMod M 系列「月版本」一個月一擺的更新頻率佮這馬的開發進度,老刀個人推斷佇明年 1~2 月推出的可能性誠大。逐工暗時更新的 nightly 系列,應該有機會冗早出來佮逐家相見。敢真正親像老刀斷言,時到便知。

2014年11月10日

刷刷樂教學之 1:想欲耍小米手機?台哥大 Amazing A6 鬥入米柚系統 (MIUI V5) 也會使!

Screenshot_2014-11-08-09-15-52[3]老刀昨昏佇分站「老刀烏白耍」貼了這篇文章,予當咧使用台哥大 Amazing A6 朋友參考。這支手機 2 冬前拄推出的時陣,算做是 C/P 真好的手機,現此時退休落來,煞變做導航機兼𨑨迌物仔,提來刷機鬥入小米手機特製的米柚 (MIUI) 系統,當做小米手機來使用,嘛是真讚的代誌。

想欲知影老刀按怎來鬥入米柚系統,入來老刀烏白耍看覓便知分曉。

2014年11月6日

試食「棒棒糖」Android 5.0 (Lollipop)

Screenshot_2014-10-25-11-01-20Google 已經正式推出附佮 Android 5.0 (Lollipop) 作業系統的 Nexus 6Nexus 9,並且宣布 Nexus 系列其他產品的系統更新連鞭就會推出。老刀等袂赴怹釋出予 Nexus 7 專用的 Android 5.0 正式版,先來試食「棒棒糖」:鬥入 Google 佇 10 月底釋出的 Android 5.0最終開發者預覽版本 (Final Developer Preview),版本號碼是 LPX13D。

鬥入 Android 5.0 的過程中一切順利,除了全新的開機動畫以外,新的介面果然媠閣好用,速度嘛緊,可惜電子郵件 app 設定袂好勢,毋知啥物原因一直當掉(希望正式版會當修正好勢),其他並無發見重大問題。Android 5.0 的 OTG (On-The-Go) 佮 4.4.x 版仝款,並無支援儲存裝置(親像 USB 隨身碟),若想欲解除這个封印,就愛先鬥入 SuperSU 取得 root 權限,紲落來入去 Google Play 商店掠 StickMount 轉來鬥,就會當解決這个問題矣。Android 5.0 內底隱藏一个親像 Flappy Bird 的𨑨迌物仔(用足緊的速度,連紲揤「版本號碼」幾若下就會當進入),實在有夠歹過關,請參考下跤的圖,耍足久攏是 0 分,哈哈!

Screenshot_2014-10-25-12-36-11因為收電子批信的功能對老刀誠重要,耍二、三點鐘以後,老刀就決定暫時告別 Android 5.0,來共 CyanogenMod 11 M11 灌倒轉來。無想到悲慘的代誌就來發生:佇咧鬥 Android 5.0 的時陣,伊恬恬仔共老刀進前備份佇 /sdcard 的系統備份包括 revovery 攏總擲㧒捔,老刀一時不查就共 Android 5.0 洗掉,這聲慘矣,Nexus 7 內底無系統備份,本身嘛已經無會當開機的 Android 系統,這臺平板電腦就按呢強欲變做無路用的「磚仔角」。只好祭出最後手段:佇 Wiindows 7 PC 拍開「命令提示字元」,利用 adb 佮 fastboot 指令共 recovery 佮 CyanogenMod 刷機入去 Nexus 7 內底,真好佳哉無閣再節外生枝,一切順序。

Google 這禮拜已經正式公開 Android 5.0 的原始碼計畫 (AOSP),釋出真濟程式碼,包括 CyanogenMod 12 內底的一寡第三方 Android 5.0 系統升級計畫應該會佇紲落來的幾個月內推出,請大家斟酌老刀的後續報導。

2014年10月11日

CyanogenMod 11 M11 推出!

Screenshot_2014-10-08-20-11-32CyanogenMod 是根據 Android 所發展,是現此時規模上大、用戶上濟的智慧手機佮平板電腦系統發展計畫。怹透過開放原始碼的方式,開發出真濟 Google 原本 Android 所無的附佮(增強)功能,按照一個月一擺的速度,佇 10/8 推出 CyanogenMod 11 的第 11 个月版本 (M11)。正手爿的畫面,是老刀的 Nexus 7 鬥入 CyanogenMod 11 M11 的畫面。

根據官方網站的新聞稿,主要的新功能有:

  • 支援新機種:三星 Galaxy S4 Active (jactivelte), Galaxy S4 SK I-9506 (ks01lte), Galaxy S5 GSM (klte), Galaxy Tab 10.1 (picassowifi) 佮 Galaxy Player 4.0 (ypg1),重新支援 Galaxy Relay 4G (apexqtmo)。
  • 新增點 2 下「通知列」抑是「螢幕鎖定區」關掉螢幕的功能。
  • 分享行動網路,會當顯示啥人連線入去你的 WiFi 熱點。
  • 翕相機:支援慢速快門。
  • 更新一寡地區的存取點名稱 (APN) 資訊。
  • 錯誤修正。包括:揤一下音量鍵跳 2 級、LG G2 的 GPS 佮 NFC、安全性的問題……等。

另外一點佇官網並無寫著,愛報予眾朋友知影的代誌:根據朋友 Sam Lin 回報,這擺CyanogenMod 11 M11 終於支援 Miracast,透過 WiFi,就會當共影片抑是相片放送佇鬥有 Miracast 接收器的電視頂頭,對厝內底有家庭劇院設備的朋友來講,真是天大的好消息!

若想欲查 CyanogenMod 敢有支援你的 Android 裝置,會當來遮參考,老刀建議有興趣的朋友來刷機鬥入 CyanogenMod 試看覓。

2014年10月10日

C/P 值,敢遮爾要緊?

kingmax64

「C/P 值,敢遮爾要緊?」相信真濟朋友攏有仝款問題。這擺老刀就用親身經驗,來共逐家說分明。

老刀手機號碼合約到期,想講原本使用超過 2 冬的 HTC One X 手機,電池已經無啥夠力,所以趁著 7 月底簽手機號碼新合約的時陣,順紲購入佮有 microSD 插座的 HTC One M8,按呢老刀二十幾冬來所蒐藏的搖滾經典就會當全部囥入去手機內底,變做一台真讚的隨身聽兼點唱機,上下班通勤聽歌嘛較袂無聊。

問題來矣:到底用佗一牌記憶卡才好?老刀佇購物網站斟酌誠久,選擇了讀取速度 80 MB/s、C/P 值真讚的勝創 (Kingmax) 64 GB microSD 卡,無想到是災難的開始。

Screenshot_2014-10-10-15-36-46為著好好利用 64 GB 空間,老刀共 40 GB 音樂收藏攏總傳入去 Kingmax microSD 記憶卡,賰 24 GB 予手機翕相使用(請參考倒手爿的設定畫面),應該妥當矣。大約一個月後的早時,老刀就像普通時按呢佇車內欣賞「車廂搖滾」,毋過這擺聽甲一半音樂煞雄雄定去,記憶卡竟然讀無資料!慘矣,到底發生啥物代誌?

彼工下班了後,趕緊共 Kingmax microSD 用讀卡器接 PC 檢查看覓,好佳哉資料攏佇咧,所以就備份內底的相片佮音樂,紲落來想欲共伊 format 一切歸零,竟然失敗;用「檔案總管」佮所有資料成功刣掉、拔卡,閣再插入讀卡器「啥物?全部資料攏總轉來矣!」就親像我毋捌刣掉任何資料仝款,結果是:

手機讀袂出來、PC 嘛刣袂掉,真正慘矣!

送修?若想欲做「陳冠希」,請趕緊。好佳哉老刀並無翕「彼種姿勢」的習慣,最後嘛是提去送修解決,等 2 禮拜了後,換轉來頂懸相片這个全新品(填單後送,Kingmax 並無提供當場換新,這是另外一个缺點),我毋知影這片新的 Kingmax 記憶卡會當閣擋偌久,毋過後擺若歹去,我應該會看破去訂一片 SanDisk 吧!

經過這擺經驗,結論是:

  1. 絕對毋通翕「姿勢足奇怪」的相片佇手機內底!除非你想欲做「陳冠希」。
  2. 買記憶卡,袂使干焦看 C/P 值,提供隨時換新的保固服務更加要緊像 Kingmax 按呢愛等 2 禮拜,對用戶無夠體貼,真正予人失望。

以上,提供予眾朋友參考。

2014年10月4日

收著捐款新臺票 1,000 箍,感謝丞宏先生

今仔日收著彰化的丞宏先生贊助本站新臺票 1,000 箍,真正感心!逐家的支持,是老刀繼續拍拚的動力。

2014年9月24日

「捐助本站」的功能,已經修正好勢

多謝丞宏先生報予老刀知影,因為 PayPal 的政策改變,本站的「捐款」的功能早就無法度正常運作。雖然老刀無閒工課,遮爾久無法度來貼新的文章,但猶原有誠濟熱心的朋友恬恬仔來遮共「老刀烏白講」情義相挺,真是足感心。為著報答逐家恩情,共「捐款」的功能修理好勢,是一定愛作的代誌矣。

老刀這擺改用 PayPal「購物車」系統來重新製作捐款功能,先選擇捐款(對「點頭感恩」新臺票 100 箍,到「五體投地」新臺票 10,000 箍,攏總 5 款級數),揤「加到購物車」了後,就會當入去 "View Cart"(檢視購物車)修改數量佮金額,抑是直接用信用卡佮 PayPal 口座(帳號)匯款。

逐家若拄著本站有功能無正常,抑是有任何意見,敬請來共老刀回報一下,勞力!

2014年9月6日

使用 10 个數字鍵拍字的「永九輸入法」

昨日佇本站的留言版內底,有朋友 Jack 報予老刀知影「永九輸入法」的官方部落格,老刀特別入去斟酌一下,發見這个輸入法佮老刀進前推薦的行列 10 數字輸入法仝款,攏是用 0~9 的數字鍵拍字,應該真適合佇手機內底使用。有興趣的朋友,會使入去怹的官方部落格參考看覓。

根據永九輸入法官方部落格的說明,這个輸入法猶當咧開發當中,好消息是這馬已經完成文字編碼。作者朱正宗先生嘛已經開發 Windows 版本免費予逐家掠轉去鬥。現此時永九輸入法已經公開的資料有:

老刀嘛希望朱先生趕緊開放原始鍵碼對照表格,予有興趣的朋友共永九輸入法移植入去 gcinOpenVanillaLIME HD 等其他平台的輸入法框架,佇 Linux、OS X 佮 Android(凡勢閣再加上 iOS 8)平台內底使用。根據永九輸入法使用手冊,這个輸入的版權聲明全文是:

永九輸入法,受著作權法保護,一切權利依著作權法規範。任何人在不以利用,永九輸入法做為「營利目的」的原則下,授權免費使用。(除著作人及著作人另外授權,任何人僅能使用永九輸入法,做為文字輸入之工具。任何人不得將永九輸入法,之全部內容或部份內容,做為產品或置於產品內,提供他人營利使用。除此之外,任何人皆可免費且自由使用,永九輸入法。

如需商業授權,請洽著作人:朱正宗 E-mail: f90ime@gmail.com

關於永九輸入法拆字原則,請有興趣的朋友點入去頂懸的使用手冊參考。老刀共永九輸入法共「行列10」輸入法初步比較一下,寫踮下跤:

  永九輸入法 行列10數字輸入法
拆字種類 字根 字根
組字鍵位 0~9,攏總 10 个 0~9,攏總 10 个
字根揤鍵數目 1 字根 1 鍵 1 字根 1~2 鍵
每字上濟組字鍵數 5 4
字根分類 分作筆劃碼、字根連結、組合碼、外型碼 4 款,按照逐款字根分類落去編數字碼 按照 10 个基本筆劃,直接對字根落去編數字碼(佮行列30仝款)
支援片語輸入
全形英數字輸入 支援
支援漢字字數/字集 不明 27,489 字,支援 CJK Ext-A 字集(Unicode 3.0)

老刀認為永九輸入法直接支援片語輸入、一字上濟 5 碼(字根),是伊的優勢。但是想欲記憶伊的字根分類佮編碼,看起來並毋是一時三刻就有法度;行列 10 的優勢是伊非常系統化的字根編碼,使用者並毋免記足濟物件、就會當連鞭入門,配合 LIME HD 的聯想字典內建詞庫,拍字嘛有影真方便。到底佗一款較適合佇手機使用,就交予各位看官家己來作選擇吧。

2014年6月23日

CyanogenMod 的上新發展 (6/19)

根據CyanogenMod 6/19 發表的新聞稿,本來欲佇 7 月釋出的 CyanogenMod 11 M8 版,將欲跳過 Android 4.4.3,換做修補 OpenSSL 破空好勢的 Android 4.4.4。每日更新的 nightly 系列,佇 6/19 了後嘛已經是 Android 4.4.4。

佇支援的機型方面,新增下跤幾款:

  • Sony Xperia Z2 D6502、D6503、D66506 佮 D6543。
  • LG P880。
  • 小米 2。
  • Oppo Find 7a。
  • 一加 (OnePlus) One。

主要的修正佮新增功能有:

  • 修正 VPN 的問題。
  • 受著保護的 (protected) app 會袂閣再出現佇應用程式清單。
  • Trebuchet 新增「搜尋」面板。
  • 新的通知欄模式「Heads Up」,對今仔日開始的 nightly 系列就有支援。伊提供漂浮式的 (floating) 通知,另外嘛提供「毋通打擾」(Do no Disturb) 的模式,選擇無愛予 Heads Up 干擾的應用程式。
  • 掠螢幕畫面的時陣,會當隨選擇敢欲分享予朋友觀看。
  • 重新組織的「設定」面板。

想欲知影進一步的消息,請參考 CyanogenMod 的新聞稿

2014年6月5日

CyanogenMod 11 的上新發展

定定咧 Android 裝置刷機的朋友,大部分應該攏聽過 CyanogenMod 這套現此時支援上濟 Android 週邊的第三方韌體。採用 CyanogenMod 的上大好處,是內底已經附佮足濟原本 Google 官方並無提供的的增強功能,老刀這陣當咧使用的 Nexus 7 平板電腦,佇頂個月初,嘛已經鬥入 CyanogenMod 11 M6(第 6 个「月版本」;CyanogenMod 嘛有另外提供逐工更新的「日版本」系列)。

CyanogenMod 最近佇官網發表這篇新聞稿,介紹怹的上新功能,予有興趣的朋友參考:

  1. 主題選擇器使用介面 (Theme Chooser UI)。一寡主流的桌面系統(親像 Windows)已經有提供類似功能,這馬 Android 裝置鬥入 CyanogenMod 了後,嘛會使來家己亂舞一下。
  2. 主題樣板。CyanogenMod 毋但已經作好一寡主題樣版,嘛提供予你家己製作主題的工具。相關的說明文件 CyanogenMod 官方當咧製作,未來會陸續補上。
  3. 大幅修改的「計算機」。新增的功能包括:漂浮式的計算機、支援 Google Glass、支援方程式、面板會當重新排列、揤鍵振動、小工具更新等功能。
  4. Trebuchet 的更新(老刀按:Trebuchet 是 CyanogenMod 的啟動程式介面)。
  5. 性能模式的設定檔 (performance profiles):包括「省電」、「低電量」佮專為𨑨迌物仔設計的「高執行效能」設定檔。
  6. 作業系統核心:予 CyanogenMod 佇低量記憶體裝置(附佮比 512 MB RAM 閣較少的記憶體)切換主題會閣較順,另外嘛包括新增支援 FFMPEG,藍牙方面嘛有改進等等。
  7. 支援的週邊裝置:新增 HTC One (M8)、三星 Galaxy Tab Pro 8.4、Galaxy Note 8.0 LTE、LG G2 Docomo 等。

上頭的新功能佇 5 月份的「日版本」已經有提供,紲落來,嘛連鞭會當佇將欲推出的 M7「月版本」頂懸親身體驗。

2014年5月20日

OpenVanilla 行列輸入法鍵碼表 0.71 更新

誠久無更新行列輸入法的鍵碼表矣。頂擺老刀按照行列輸入法官網公布的 2013A 版(修正 CJK Ext-C/D 的部分)更新 gcin 行列輸入法鍵碼表 0.42 版了後,竟然袂記得順紲更新 OpenVanilla 的部分。好佳哉今仔日雄雄想起,所以作了這个更新,新版本鍵碼表的版號是 0.71。

這擺更新的所在,老刀已經講甲真清楚,就是更新 CJK Ext-C/D 的部分;也就是講,你若無用著這个所在,其實無升級嘛無差矣。

老刀以 OpenVanilla 1.0.10 版為例,共升級鍵碼表步數寫佇下跤:

  1. 掠落 0.71 版鍵碼表,共伊改名做 array30.cin。
  2. 拍開 Finder 視窗,揤 Command+Shift+G,紲落來佇「前往檔案夾」對話框內底拍入「~/Library/Input Methods/」(請注意大、小寫字母愛拍著)了後揤落「前往」,就會當揣著 OpenVanilla 應用程式。
  3. 用滑鼠揤正手爿點選「顯示套件內容」,紲落來入去 /Contents/Resources/DataTables/Array 檔案夾(請注意大、小寫字母愛拍著),共內底的 array30.cin 用新版鍵碼表崁掉。
  4. 登出 OS X 閣再登入,就大功告成矣!

140520-0002

▲正手爿點選 OpenVanilla,揀「顯示套件內容」

140520-0003

▲替換 array30.cin

關於 OpenVanilla 行列輸入法鍵碼表的詳細說明,請參考 Hyperrate 討論版的說明

2014年5月5日

旅行良伴四合一:4/26「Gigastone Smart Box A4 智慧分享體驗會」活動紀實

這擺老刀趁著 T 客邦公布「Gigastone Smart Box A4 智慧分享體驗會」的活動訊息的機會,來去報名參加,嘛得著 T 客邦應允邀請怹佮立達國際 (Gigastone) 於 4/26 下晡 2 點佇莉蓮會館合辦的體驗會。

想欲知影詳情,歡迎來去分站老刀烏白耍參考。

DSCF0312

2014年3月29日

外星人登陸:Nexus 7 (2013) 鬥入 CyanogenMod 11

Screenshot_2014-03-29-10-58-16

老刀這臺 Nexus 7 二代機使用到今已經半冬,我對這个平板的規格佮性能,是真正滿意矣。猶毋過較可惜的所在,是 OTG (On-The-Go) 支援只做一半:接鍵盤、滑鼠無問題,但是並無支援 USB 隨身碟等儲存媒體。因為這个功能對我實在真需要,只好來走揣第三方社群推出的解決方式。

參考了現此時第三方社群的進度,毋管是 CyanogenMod 11 抑是米柚 (MIUI) V5 攏真讚。考慮再三了後,我選擇 2014/3/8 推出的 CyanogenMod 11 M4(M 系列是逐個月推出一版,"M4" 表示是月版本的第 4 號)。

當然囉,包括 Nexus 7 在內的任何 Android 裝置若想欲鬥入第三方的 ROM,解鎖、root 佮更新 Recovery 是一定愛做的代誌。改機了後,這馬這臺 Nexis 7 除了完整支援老刀上想欲愛的 OTG 以外,嘛享有 root 的優點佮 CyanogenMod 增加的附屬功能佮改進,親像修改 Android 畫面下跤的導覽列 (Navigation Bar),予 "Menu" 鍵重出江湖(請參考倒手爿的圖)。

註:

  1. 為何 OTG 對我遮爾重要?因為公司的 MIS 毋允准佇辦公室的 PC 鬥入 MTP 驅動程式,所以並無法度共 Nexus 7 佮 PC 直接連線;若想欲共資料對辦公室的 PC 傳入來 Nexus 7,只好利用 USB 隨身碟佮外接硬碟矣。
  2. 解鎖、root 改機是毋是會失去保固?這是一定的(現此時干焦有小米公司對解鎖、root 改機的小米、紅米手機提供保固)。好佳哉有 NRT (Nexus Root Toolkit) 會當一鍵還原,萬一若欲送原廠維修的時陣就真好用。

2014年2月15日

gcin 行列輸入法鍵碼表 0.42 更新

今仔日老刀閣再更新 gcin 行列輸入法鍵碼表,版號是 0.42。主要是修正這幾个所在:

  • 配合行列輸入法官網公布的 2013A 版,修正 CJK Ext-C/D 部分對照表。
  • 遵照行列輸入法規格書,改回 w+8 順序符號組的對照表。

這擺改版了後,一寡所在愛小可仔注意一下:

  1. w+8 順序(數字)符號組上尾 3 字是杭州數字的十、二十佮三十 (U+3038, U+3039, U+303A)。佇這个版本,我按照行列輸入法規格書的說明,重新共怹改轉來,就親像我較早佇 2008 年製作的早期鍵碼表仝款。
  2. 因為微軟細明體並無收錄這 3 个字(干焦收錄異體字「十、廾、卅」),這个所在佇較早版本的鍵碼表內底,我是用微軟的異體字代替;這擺按照行列輸入法規格書的定義改轉來了後,使用者必須家己變更 gcin 候選字的顯示字型,若無,gcin for Windows 可能無法度正確顯示這 3 个字。
  3. 建議 Linux 使用者掠安裝花園明朝字型 (HanaMinA+HanaMinB) 來鬥;鬥好了後,gcin for Linux 應該就會當正確顯示這 3 个字。

詳細的說明,請參考這个所在

2014年1月30日

祝福逐家新春快樂趁大錢

今仔日是舊曆三十(除夕),老刀佮往年仝款,欲轉去南部過年。先佇遮祝福大家新春快樂趁大錢。

期待馬年再相見!

2014年1月18日

「行列10」拆字加速心得分享

老刀佇 gcin 的官方討論版 (hyperrate) 貼這篇文章,當做予「行列30」輸入法用戶想欲轉換去「行列10」輸入法的參考。全文轉貼來遮:

這一層樓的由來,是順應這一篇文章 http://hyperrate.com/thread.php?tid=29926#29926 網友提議而生。自己想想看,這樣也不失為一個大家相互討論、求取增進拆字速度的好方法。

所以,就由我先起個頭吧。

我認為「行列10」的拆法加速的關鍵如下:

  1. 搭配好的詞庫絕對必要。因為每個中文字最多拆 8 個數字,如果詞庫在使用者輸入最前面 3 個數字就先將字篩選出來,當然可以大幅增進打字的速度。目前的最新版 gcin for Android 2.61「行列10」搭配詞庫有些問題(常會使 gcin 當掉,所以必須被迫關閉詞庫),所幸還有 LIME HD 可用:LIME HD 它具有頗完整的詞庫,加上它會將使用者常拆的中文字序自動移前,所以真正打中文字時很少按超過 4 個數字。
  2. 因為每一個行列字根在「行列10」中代表 2 個數字,我從「行列30」剛轉換到「行列10」時,是心中默念每組 2 個數字(即 1 個行列字根,包括 1單、2單……等標準字劃)如拆「我」字時,心中則默念 (9- 94 26),字自然就拆解出來了。
  3. 練習打破「上、中、下」的概念,做到中文字「完全數字化」,也就是記住每個行列字根的最末一筆。所幸在學習「行列30」之初,這樣的訓練其實已經根深蒂固,所以轉換過程並沒有花太多時間。

「行列10」我常用於上、下班通勤時上網(臉書、LINE)之用。當右手握著吊環,只剩左手持手機,只要打開進入「行列10」模式,在只使用左手拇指「一指神功」的狀況下仍能有平均每秒 1 字、每分鐘約 60~70 字的速度,再加上「行列10」數字按鍵大,可減少按錯鍵的機率,個人覺得「行列10」整體輸入速度是遠勝於以前手機使用注音輸入。

當然囉,若你真有把握在字鍵面積頗小的「行列30」模式下,仍能將每個字根位置按得準確無比,那就繼續使用「行列30」吧;畢竟「行列30」每按一個鍵位就相當於「行列10」打 2 個數字,所以「行列30」相對之下效率較佳。只是我個人認為小鍵實在很不好按,這也是為何我在手機上用「行列10」,而平板上用「行列30」打字的主要原因。

你若有學習「行列10」的撇步抑是個人心得,嘛歡迎去遐留落意見,逐家互相討論、互相成長,作伙來提升拍字速度吧!

全新部落格「老刀烏白耍」開站

今仔日老刀作一个重要決定:將欲開分站「老刀烏白耍」,未來是收藏老刀開箱/測試文章的所在;毋但老刀以後寫的開箱/測試文章攏總會囥佇遐,已經貼佇本站的開箱/測試文章,後擺有閒嘛會沓沓仔共怹搬過去。

歡迎逐家共恁對新網站的意見留予老刀知影(毋管是留意見佇遮,抑是佇新網站,攏總會使),逐家的意見是老刀進步的動力。

2014年1月14日

對 gcin for Android 鬥入輸入法

今仔日 gcin for Android 已經推出 2.60 版,發展到今,佮較早的版本相比已經進步足濟。因為 gcin 支援足濟款中文輸入法,但是並毋是所有用戶攏用會著遮爾濟;所以為著欲節省逐家 Android 裝置的記憶空間,gcin for Android 對 2.60 版開始干焦內建注音/詞音中文輸入法爾爾。也就是講:想欲使用別款中文輸入法(倉頡、大易、行列……),就愛家己掠轉來鬥矣。

頭先,來確認你 gcin 的版本吧。請拍開「設定 > 應用程式 > gcin」,檢查版本敢是 2.60 抑是閣較新的版本:

Screenshot_2014-01-13-22-48-36

若是,佇咧 gcin 揀中文輸入法的時陣,應該只賰注音/詞音入法會當揀爾爾。就親像下跤這个畫面:

Screenshot_2014-01-13-23-13-54

若想欲增加別款輸入法,揤軟體鍵盤頂懸的「工具/設定」(佇所有應用程式的清單內底揤「gcin 輸入法工具」嘛會使),然後佇下跤畫面的「編輯輸入法列表」點一下:

Screenshot_2014-01-13-22-50-14

紲落來,共想欲掠轉來鬥的輸入法頭前四角箍仔拍一个勾,揤「下載」了後,點落「儲存」就成功矣。(鬥好勢的輸入法,會以青色標示 .gtab 檔案名稱)

Screenshot_2014-01-13-22-50-28

最後,愛會記得入去「設定 > 語言與輸入設定 > gcin」變更你的內定輸入法。

【補充】若想欲知影 gcin for Android 的改變紀錄,請入來這个所在參考。