2013年12月21日

按怎佇 Fedora 20 鬥入 Adobe Flash Player

Fedora 20 已經佇 12/17 正式共逐家見面。因為採用全新製造、親像 Google Play 商店使用方式的 GNOME Software 作為軟體鬥入佮升級的圖形介面程式,所有已經無法度按照較早按呢,佇 GNOME 內底直接鬥 Adobe Flash Player;也就是講,你這馬只賰「終端機」 (terminal) 的鬥入方式會當使用。

利用「終端機」鬥入 Adobe Flash Player 的方法,請參考這篇報導。好佳哉你毋免真正拍入這一寡指令,利用「複製/貼上」共指令一擺一逝貼入去「終端機」,紲落來揤 Enter 送出指令就好。愛注意有 Adobe Flash Player 有分 32 位元佮 64 位元的版本,指令有淡薄仔無仝款,請按照你使用的 Fedora 20(32 位元抑是 64 位元),鬥入適合的 Adobe Flash Player 版本。

2013年11月29日

Android 4.4 (KitKat) 升級之路:有好空,嘛有歹空

Screenshot_2013-11-29-19-50-34這幾工老刀共這馬早就退休、已經 3 歲、咧作床頭音響(收聽網路電台放送)的老古董 HTC Desire 提來創 Android 4.4 (KitKat) 升級計畫。這回使用 Nikez 的版本,對改換 4.0 系統開始「翕相機畫面會亂跳」的老問題,這擺已經修理好勢,老刀嘛趁暗時有閒,漸漸共伊調整到上好的狀況。佮進前刷 Android 4.3 (Jelly Bean) 相比較,好親像換一支新手機仝款;所以老刀推薦猶有咧使用 HTC Desire 的朋友,攏來試鬥看覓。

想欲試驗的朋友,老刀建議先插入去 Class 10 速度的 microSD 記憶卡,切 1~1.5 GB 的空間(我佇 4ext Recovery 內底切)作 /sd-ext 來予 KitKat 囥 Apps。

毋過另外一方面,老刀使用無到 2 個月的 Nexus 7 (2013) 升級 KitKat 猶袂一禮拜,昨暝睏去(無關機)了後,透早起來就發見無法度叫精神來,今仔日中晝只好提去華碩皇家俱樂部報修,紲落來有 5~7 工袂當閣再使用。利用 Google 查 "Nexus 7 2013 wake up" 一下,我的 Nexus 7 應該毋是唯一出問題的「機王」,而且是真普通的現象(親像這篇),阿彌陀佛。

毋知影華碩修理的品質如何?雖然 Nexus 7 內底無啥物重要資料,但是我更加煩惱怹利用我的 Nexus 7 偷收批。無法度,因為叫袂精神,無法度共內底的帳號清掉;現此時只賰「燒香求媽祖保庇」一條路爾爾,唉!

2013年11月10日

按怎佇 OS X 讀寫 Android 裝置?敢有法度?

真濟朋友攏知影老刀是拒絕使用 iOS 裝置(親像 iPhone 佮 iPad)的鐵齒 Mac 使用者。我使用 HTC One X 手機超過一冬半,佇 OS X 內底有 HTC Sync Manager for Mac 會當佇 OS X 內底仝步相片、影片佮音樂;功能上,是完全無輸 iTunes 佮 iOS 裝置。

毋過,敢有法度佇 OS X 共資料寫入去 Android 裝置,抑是對 Android 裝置共資料掠出來囥佇 OS X 的硬碟內底,就親像佇 Windows 按呢?真簡單,利用 Android 官方提供的 Android File Transfer 就會使(支援 Android 3.0 以後的系統)。

頭先,打開你的瀏覽器,連接 http://www.android.com/filetransfer 入去 Android 的官方網站,看著大大粒的 Download Now 就共伊揤落去掠 .dmg 檔案拍開了後,閣再共 Android File Transfer 軟體拖入去「應用程式」檔案夾,就已經鬥好勢矣。

131110-0001

拍開 Android File Transfer 了後,應該就會當看著 Android 裝置內底的物件(親像下跤這張圖,就是老刀 HTC One X 手機 /sdcard 的檔案)。紲落來,你會當共檔案對 Finder 視窗拖入去你的 Android 裝置,抑是對 Android 裝置拖出來桌面佮 Finder 任何一个檔案夾。

131110-0002

若無出現 Android 裝置的視窗,請入去「設定」的「USB 電腦連線」內底,共 MTP 拍勾就好矣。

Screenshot_2013-11-10-23-06-47

2013年10月31日

噗浪 (Plurk) 推出官方版的 Android App

Screenshot_2013-10-31-22-41-26眾噗友的福利來矣!今仔日社群網站噗浪 (Plurk) 推出第一个 Android App,現此時已經會當對 Google Play 商店掠轉來鬥,iOS 的噗友愛稍等一下,後一季怹就會接紲推出 iOS App。 

這个 Plurk App 的特色,根據噗浪官方部落格的說明,老刀來轉貼佇下跤:

噗浪團隊特別為這支手機應用程式(App)在伺服器端做了許多效能優化,且全程使用SSL加密通訊,保障通訊隱私及帳號安全。同時也提供了許多不同於其他非官方程式的功能,包含:

  • 登入與註冊:使用者可以平順的登入或註冊帳號、更一致化的操作體驗。
  • 即時訊息通知:新訊息不漏接,且展開每一則訊息都可以即時討論及看到立即的回覆。
  • 匿名訊息:讓使用者可以在自己的朋友圈匿名抒發自己的心情。
  • 自訂表情符號:除了原有的表情符號之外,更可以使用許多充滿創意的自訂表情符號,並針對不同解析度的手機調整可視度(visibility),以確保在各手機間可以獲得相同且合適大小的視感。
  • 休眠模式:體貼的靜音功能,讓使用者在休息時間不收到訊息干擾。
  • 節省流量模式:開啟節省流量模式可以減少載入時間軸時間並減少消耗3G頻寬。
  • 防盜安全模式:手機遺失時,使用者只需要透過 Web 端停止授權,噗浪 App 即自動登出並清除所有登入、訊息資訊。
  • 智慧快取:全新打造的智慧快取模式,會自動判斷使用者的所在網路,盡量節省自伺服器下載重複的圖片、圖像及檔案。使用者在沒有網路的狀態下,也可以輕鬆瀏覽離線版本的對話與討論。

除此之外,噗浪團隊十分專注在使用者體驗上 (User Experience) 的調試與順用度 (usability),在使用者體驗的部分除了智慧快取、防盜安全及許多細微的細節都投入許多時間仔細測試、調試,例如,在網路切換、上網速度極慢的人潮眾多地區,會使用智慧快取及即時偵測網路,以確保使用者可以瀏覽離線的內容,而不需要等待網路連線。

噗浪技術總監沈成達表示,10月31日推出的程式為第一次公開測試版本(Public Beta),技術團隊表示目前仍有許多功能還在開發當中,將於未來一個月內陸續推出,歡迎噗友踴躍下載測試,並提供改進意見給噗浪。

心動不如馬上行動,趕緊掠來試看覓就著矣!

2013年10月29日

OS X 10.9 (Mavericks) 的漢字支援:猶原欠字嚴重

較早老刀捌報導過歷代 OS X 佮漢字支援程度的比較,親像下跤這幾篇:

頂禮拜 OS X 10.9 (Mavericks) 推出了後,老刀照常來做一擺漢字支援的試驗,但是真可惜,蘋果公司佇這方面一點仔攏無進步矣。

MavericksCJKExtB

▲中日韓統一表意文字延伸 B 區 (CJK Unified Ideographs Extension B),字碼範圍 U+20000-2A6DF,欠字嚴重。

MavericksCJKExtC

▲中日韓統一表意文字延伸 C 區 (CJK Unified Ideographs Extension C),字碼範圍 U+2A700-2B734,攏總無字。

MavericksCJKExtD

▲中日韓統一表意文字延伸 D 區 (CJK Unified Ideographs Extension D),字碼範圍 U+2B740-2B81D,仝款欠字嚴重。

MavericksCJKSup

▲中日韓相容表意文字補充 (CJK Compatibility Ideographs Supplement),字碼範圍 U+2F800-2FA1F,嘛是嚴重欠字。

你的文件若欲使用著頂頭 OS X 欠字的部分,就需要另外灌其他字型(親像老刀介紹過的日本花園明朝字型);另外補充一點:你所用的輸入法嘛愛支援 CJK Ext-B/C/D,才會當直接拍出來。

老刀真正希望蘋果公司會當趕緊推出系統字型的更新版,來補足遮爾濟欠字。

2013年10月17日

VirtualBox 4.3 推出!

進前無偌久,老刀才介紹 Parallels Desktop 9 for Mac 虛擬機軟體 (Virtual Machine) 爾爾,伊的主要對手之一、免錢的 VirtualBox,已經佇昨昏推出 4.3 版。VirtualBox 舊版用戶抑是想欲體驗伊的新朋友,攏會使入來這个所在掠轉去鬥。

VirtualBox 的好處除了免錢以外,就是跨平台矣:支援 Windows、OS X、Linux 佮 Solaris 攏總 4 款系統平台。這擺的 Virtual 4.3 版是屬於重大更新,提供足濟功能的改進,親像:

  • 改寫 VT-x 佮 AMD-V 程式碼,大大改善效能。
  • 快速鍵管理。
  • 支援掠畫面影片。
  • 新增支援模擬 USB 觸控裝置。
  • OS X 版:有限度的支援 OS X 10.9 (Mavericks)。
  • Windows 版:修正 USB 2.0 週邊插入 USB 3.0 埠了後,並無法度使用的問題。

想欲瞭解完整的改進佮更新內容,歡迎去參考怹的更新紀錄

2013年10月13日

Yahoo! 奇摩部落格服務將欲關店

今仔日收著 Yahoo! 奇摩寄來這張批信:

親愛的Yahoo奇摩部落格用戶:

提醒您,Yahoo奇摩部落格將於2013年10月30日進入全站唯讀模式,進入唯讀模式後,您原本在Yahoo奇摩部落格帳戶中的資料與使用空間不會受到影響。然而您的Yahoo奇摩部落格將無法再新增文章、上傳相片到相簿中,且無法編輯原本帳戶中的資料(包括修改、刪除),而訪客將無法留言,但仍可以照常瀏覽至2013年12月26日服務終止為止。

進入唯讀模式後,我們會持續提供用戶資料備份、下載、輕鬆搬家與回報新網址的服務,至2013年12月26日服務終止為止。建議您立即行動,以避免於期限截止前來不及備份下載檔案或完成輕鬆搬家。

若您已經完成搬家,建議您可向我們回報新家網址,在2013年12月26日服務終止後半年內,我們會將造訪Yahoo奇摩部落格舊網址的網友自動轉址到您新家的首頁。

服務終止網站入口 http://tw.blog.yahoo.com/eol

此為Yahoo奇摩部落格的服務事宜通知,您無須回覆此信。

Yahoo奇摩部落格團隊 敬上

想起 2006 年 10 月 16 日「老刀烏白講」佇 Yahoo! 奇摩部落格開站以來,到今已經 7 冬。雖然部落格早就已經搬來 blogger,Yahoo! 彼爿嘛已經足內無開,毋過這擺怹通知我愛趕緊去做備份,嘛是愛共怹最後講一擺:讚!更加證明本站當初離開 Yahoo! 奇摩,是正確的決定。

永別矣,Yahoo! 奇摩部落格,祝你一路好行。

2013年10月6日

你今仔日敢有 Spotify?

頂個月 (9/24) 正式向臺灣推出服務的 Spotify,佇短短 2 个禮拜的這馬,已經強欲取代老刀電腦內底的 iTunes,變做是拍開電腦第一个愛開的軟體。究竟伊是有啥物款的魔力矣?

使用 Spotify 佮 iTunes 無仝款的所在,是你電腦內底並無需要有歌曲的 MP3 (.mp3) 抑是 AAC (.m4a) 電腦檔,只要用網路連線入去 Spotify 網站,就有予你永遠聽袂了的國內外藝人音樂專輯,而且完全合法!既然遮爾好空,到底欲按怎使用 Spotify 呢?

你唯一愛做的代誌,就是連接 Spotify 網站(https://www.spotify.com/tw/)註冊會員,建議直接使用 Facebook 帳戶;無 Facebook 帳戶的朋友,嘛會使利用 E-mail 註冊。

spotify-1

Spotify 的音樂播放器有提供「網頁版」佮「應用程式版」2 種,註冊了後,雖然 Spotify 會自動引導你去掠 Spotify 應用程式(目前有提供 Windows 佮 OS X 平台的版本),你隨時會當拍斷掠應用程式的動作,以後用網頁版收聽就會使。

Spotify 的網頁播放器:

spotify-2

Spotify 的應用程式播放器:

spotify-4

若欲比較「網頁版」佮「應用程式版」的功能,當然是應用程式較好用矣;除了放送歌曲以外,會使利用 Spotify 應用程式共你當咧收聽的歌曲抑是專輯、歌單,透過 Facebook、Twitter 分享予眾親情、朋友知影。

Spotify 提供的服務有「免費版」佮逐個月新臺票 149 箍的「付費版」2 款。免費版干焦支援網路串流放送,而且每隔 2、3 調歌就愛聽一小段廣告;付費版的音樂除了有比免費版閣較好的音質、袂出現廣告以外,而且會當予你共歌曲掠落囥佇電腦、平板電腦抑是智慧手機(有支援 Android、iOS)內底來離線收聽。

透過 Spotify,無論是上新推出的專輯,抑是幾十冬無聽著的懷念老歌,攏總會使佇電腦內底重現。眾位朋友,趕緊來佮老刀做伙聽歌吧!

2013年9月25日

Parallels Desktop 9 使用心得分享

現此時個人電腦的中央處理器效能,逐年攏進步誠濟(感謝 Intel 和 AMD),而且記憶體攏用 GB 計算,價數嘛直直落。所以,透過虛擬化技術,共個人電腦資源提出一部分來作虛擬機 (Virtual Machine),近幾年來,變做是真受著電腦玩家歡迎的代誌。

老刀有幸受著邀請,佇真正出名的 Parallels Desktop 9 虛擬機軟體將欲佇臺灣正式上市進前提著試用權利,特別寫了這篇報導,有興趣的朋友,歡迎來去我的老刀烏白耍參觀看覓

130919-0001

2013年9月16日

ZIPPY BW7050 一對三紅軸藍牙鍵盤開箱分享

DSC_0775

工作上定定需要處理大量文書資料,對於逐工離不開電腦的老刀來講,揀一个適合的鍵盤,毋但長時間拍字的時陣,會當減輕揤鍵袂爽快的感覺,嘛降低了發生手指頭仔和腕部傷害的風險。

收著 Zippy(新巨企業)寄來 BW7050 一對三紅軸藍牙鍵盤樣品,當然愛來寫開箱報告矣。我已經共開箱全文貼佇分站老刀烏白耍內底,敬請逐家來去參考看覓,嘛歡迎留落你的寶貴意見。

2013年8月31日

「BenQ 家庭雲,電視上網精靈體驗會」活動紀實

老刀有幸受著邀請,參加 2013 年 8 月 24 日佇臺北市莉蓮會館里仁廳,由 T 客邦佮 BenQ 合辦的「BenQ 家庭雲,電視上網精靈體驗會」。坐上主辦單位佇捷運後山埤站 4 號出口準備好的專車,出發囉!

詳細的活動詳情,請參考分站老刀烏白耍的報導。

DSC_0619

2013年6月6日

新竹「創意倉庫」開店一遊

5/25 禮拜六這天,是好朋友熊老闆創意思考數位生活館「創意倉庫」的開店吉日。老刀受著熊老闆佮阿清兄的邀請,佮真濟朋友作伙來去鬥鬧熱。

活動圓滿成功,給大家比個讚啦!

位於新竹市信義街 68 號 3 樓(誠品書店 3 樓,接近新竹火車頭)的創意倉庫現場,展示了創意思考公司代理的商品,親像老刀進前介紹的高品質「帥包」、日本松葉製作所精製的 iPhone 原木保護殼仔、Aiaiai 耳機、Kensington 軌跡球、Targus/Solis/Timbuk2 電腦包……等 3C 週邊精品,現場是真正鬧熱滾滾!

創意思考公司嘛有專屬購物網站,內底有閣較濟週邊精品,推薦有興趣的朋友入來參觀看覓。

哇,人山人海!

除了商品展示,當日親像奕之華、老貓等一寡部落客名人,嘛來到現場展示怹收藏的精品,親像老貓手頭這臺 Magic Cube 投影鍵盤,真正予逐家大開眼界。

鍵盤專家老貓示範 Magic Cube 投影式鍵盤

老刀這擺對現場紮一包 Shuai M-1 Series Messenger XS「小帥包」轉來,這个小帥包是頂回老刀推薦 13” Shuai 信差包的縮小版,囥入 10” 平板電腦拄拄好。另工若有閒,閣再寫一篇專文介紹予逐家參考。

這工所翕的精彩相片,攏總囥佇 flickr 相簿內底,逐張相片攏標註文字說明,歡迎逐家有閒入來「看圖講故事」喔。

2013年5月23日

佇 OS X 製作記憶體磁碟 (RAM Disk)

前一站仔記憶體的價數直直落,雖然最近有小可仔起價,但是佮 20 冬前 1MB 新臺幣 1,000 箍比起來,嘛是俗有夠濟。因為資料佇記憶體讀寫的速度比硬碟緊數十倍,所以利用 RAM Disk 暫時囥一寡暫存資料,對提升電腦效能來講,絕對是有幫助(尤其是配合 CPU 需要大量運算,親像利用 Photoshop 算圖的時陣)。

根據這篇報導,逐家只需要拍開 OS X「終端機」(佇「應用程式」的「工具程式」檔案夾內底),拍入下跤的指令:

diskutil erasevolume HFS+ 'RAM Disk' `hdiutil attach -nomount ram://XXXXX`

頂懸的 XXXXX 是 RAM Disk 磁碟區塊大小 (block size),共你想欲製作 RAM Disk 空間(以 MB 為單位)乘以 2,048。抑就是欲製作 4 GB RAM Disk,「XXXXX」就愛拍入 8388608 (4,096*2,048):

diskutil erasevolume HFS+ 'RAM Disk' `hdiutil attach -nomount ram://8388608`

請參考下跤這張螢幕畫面:

130523-0002

RAM Disk 用煞,欲按怎結束?真簡單,佮退出 USB 隨身碟仝款,共伊拖入去「垃圾檔」,抑是滑鼠右鍵點一下 RAM Disk,揀退出嘛是會使。

2013年5月19日

D-Link 802.11ac 全球最快雲路由!網友體驗會紀實

網際網路自從 1970 年代開始,發展到今已經進步誠大。對一開始的軍事用途,沓沓仔發展來去學術教育、電子商務佮近年上熱門的行動通訊頂懸。影音資料透過網際網路「雲端化」的成功關鍵,佇咧暢通的網路頻寬,而傳輸速度高達 1Gbps 以上的 802.11ac 無線網路協定,絕對是雲端化明日之星。老刀今仔日頭一擺受邀參加 T 客邦友訊科技 (D-Link) 合辦的體驗會,實在親身見證無線網路科技變遷的上好機會。

詳細的體驗過程,請參考分站老刀烏白耍的報導

035

2013年4月7日

微軟 4/9 將欲停止支援 Office 2008 for Mac

除了臺灣微軟公司將欲佇 4/8 停止臺灣地區的 MSN Messenger 服務以外,根據微軟公司官方部落格的消息,Office 2008 for Mac 嘛將欲佇 4/9 停止支援。微軟公司建議使用者繼續訂購包括 Office 2011 for MacOffice 365 服務

微軟公司提供逐家掠 Office 2008 for Mac 更新檔服務,將佇明 (2014) 年 4 月 19 日停止。

2013年3月31日

「帥」(Shuai) 信差包,有影真帥!

老刀當咧使用的 Targus 電腦包雖然好用,這幾冬綴著我東征西討(出差、旅遊),雖然已經建立革命情感,毋過規年通天使用之下,磨損、破皮在所難免。趁著出差去新竹之便,順紲前往代理 Targus 的創意思考總部拜訪老朋友熊老闆,走揣後一个革命伴侶。看著標示「帥」(Shuai) 的新產品 M1 Messenger(信差)13” 電腦包落地海報,藍色佮柑仔色相佮,媠媠的外型予人印象深刻(嘛有灰紅款式)。最後雖然是熊老闆出差並無相搪,畢竟是將「帥包」紮轉來厝矣。

想欲知影老刀的使用心得,歡迎來去分站老刀烏白耍參觀。

2013年2月9日

祝逐家新春快樂、萬事如意

又過了一年,毋知影逐家新年有啥物願望?先祝福逐家新春快樂、萬事如意,中樂透、發大財,食予飽飽,好好歇睏。

這擺老刀嘛是佮頂年仝款,轉去高雄過年,希望真緊就會當轉來,閣再為逐家報導上新的消息。

2013年2月5日

蘋果 Mac Pro 將佇 2013 年 3 月停止對歐洲出貨

根據 MacWorld UK 的報導,蘋果公司確認對今年 2 月 18 日開始就無閣再接受歐洲經銷商的 Mac Pro 訂單,並且對 3 月 1 日開始停止對歐洲出貨。想欲訂 Mac Pro 的歐洲朋友,時間已經無濟,欲訂趁緊!

這擺造成 Mac Pro 停止對歐洲出貨的原因,是怹無通過 IEC 60950-1 標準的修正條文,包括連接埠的電氣保護佮風扇的安全防護性。因為修正條文將佇 3 月 1 日生效,仝日開始蘋果公司將無法度共 Mac Pro 出貨予歐洲。

受著影響的國家,包括:奧地利、比利時、保加利亞、賽浦路斯、捷克、丹麥、愛沙尼亞、芬蘭、法國、德國、希臘、匈牙利、愛爾蘭、義大利、拉脫維亞、立陶宛、盧森堡、馬爾他、荷蘭、波蘭、葡萄牙、羅馬尼亞、斯洛伐克、斯洛維尼亞、西班牙、瑞典、英國、克羅埃西亞、冰島、蒙特內哥羅、塞爾維亞、馬其頓、土耳其、列支敦士登、挪威、瑞士。

2013年2月2日

Oracle 推出 Java 7 Update 13,趕緊去更新!

Oracle 公司昨昏針對最近一直出包的 Java 7,推出了上新的更新版。這擺仝款是安全性的重大更新,老刀建議逐家趕緊去掠來鬥

2013年1月27日

AMD 推出顯示卡驅動程式 Catalyst Software Suite 13.1

等了誠久,AMD 終於推出上新版的驅動程式 Catalyst Software Suite 13.1,距離頂一版推出的日期已經有 3 個月。新版驅動程式支援 AMD Radeon HD 5000/6000/7000/8000 系列的顯示卡,Windows 版本包括下跤的套件:

  • AMD 顯示卡驅動程式 9.012 版。
  • HydraVision™ for Windows Vista® 佮 Windows® 7。
  • Southbridge/IXP 驅動程式。
  • AMD Catalyst™ Control Center 9.012 版/ AMD Vision Engine Control Center 9.012 版。

新版本的推出,主要是改善佇一寡𨑨迌物仔頂懸的效能問題(尤其是使用 AMD Radeon HD 7000 系列顯示卡的時陣)。另外,Catalyst Software Suite 13.1 嘛有予 Linux 專用的版本,支援下跤這幾種發行版 (distro):

  • Red Hat Enterprise Linux suite 5.7, 5.8, 6.2 佮 6.3。
  • SUSE Linux Enterprise 10 SP4 佮 11 SP2。
  • OpenSUSE 11.4 佮 12.1。
  • Ubuntu 12.10。

想欲進一步瞭解改進啥物所在,請參考怹的 Release Note:

2013年1月21日

佇 Fedora 18 鬥入 gcin,真歹鬥!

Fedora 18 預設採用的 GNOME 3.6.2 桌面系統,利用 iBus 作為拍入漢字的輸入法框架。鬥好 Fedora 18 了後,已經會使利用酷音輸入法(親像微軟「新注音輸入法」彼款,以注音輸入法為基本、智慧選字的輸入法)拍漢字;毋過老刀用行列輸入法拍漢字已經 20 冬,現此時欲叫我改用酷音,實在有夠艱苦。所以改鬥支援行列輸入法的 gcin,變作是老刀上頭先愛做的代誌。

雖然欲鬥入 gcin 並無啥問題,但是想欲共 gcin 叫出來用,就是一个大問題。根據 Fedora 18 Release Note 的 3.4.1 節講著:
On the GNOME Desktop, im-chooser is now deprecated except in fallback mode and with non-ibus input methods, since GNOME 3.6 supports ibus as the default input method system.【因為 GNOME 3.6 支援 iBus 作為預設的輸入法系統,所以 GNOME 桌面頂頭,除了佇後備模式並且採用非 iBus 的輸入法以外,im-chooser(輸入法選擇器)並無作用】
敢講想欲佇 GNOME 3.6.2 使用 gcin 就無可能?解決的方式寫佇 Fedora 18 Release Note 3.4.1 節的落尾一逝:
If you want to use non-ibus input method such as fcitx and uim etc., remove the ibus package from the system first and restart the desktop. im-chooser will get back to work on even GNOME.【若想欲使用非 iBus 的輸入法(親像 fcitx 佮 uim 這款),對系統內底刣掉 iBus 並且重新啟動 GNOME 桌面了後,im-chooser(輸入法選擇器)將會回復運作】
所以寫到遮,逐家應該知影欲按怎鬥入 gcin 矣:
  1. 拍開「軟體」,揣著 iBus 的主程式了後,共勾仔點掉(請參考頂頭的圖)。
  2. 紲落來,Fedora 18 會提示你刣掉其他的附屬套件;攏總共怹刣去就著。
  3. 參考老刀進前這篇文章,共 gcin 鬥入。
  4. 趕緊更新你的 Fedora 18 系統(這步真重要。若無更新系統,「輸入法選擇器」無法度記憶你所揀的輸入法系統)。
  5. 重新開機了後,入去「輸入法選擇器」指定 gcin 作為你使用的輸入法系統。

2013年1月14日

請趕緊更新你的 Java 7 (for Windows/OS X)

今仔日 Oracle 果然推出上新的 Java 7 Update 11,主要是針對最近公布的重大安全問題,嘛拍破怹推出更新版的周期(可見這个問題有偌嚴重)。老刀建議逐家趕緊去 Java 官網掠轉來更新!

想欲這一步瞭解的朋友,會當來參考這篇報導

2013年1月5日

Adobe Creative Suite 2 (CS2) 開放予眾人掠免錢!

根據 Adobe 官方網站的說明,怹已經對 2012 年 12 月 13 日開始,停止 CS2 系列產品佮 Acrobat 7 的啟用伺服器。所以若拄著 CS2 用戶欲移轉授權佇別臺電腦使用的時陣,將會因為軟體啟用失敗,造成無法度使用。解決的方式是:

  1. 先解除 Acrobat 7 抑是 CS2 系列軟體的安裝。
  2. 重新掠大量授權版本的 Adobe 軟體(需要用 Adobe ID 登入,Adobe 下載網址有提供軟體序號),鬥好了後免啟用就會當直接用。

因為 Adobe ID 會當免費申請,所以 Adobe 網站的下載網址,等於是免費共 CS2 系列軟體送予逐家使用。有這款好空,當然愛報予逐家知影!

佇老刀寫這篇文章的時陣,Adobe 英文版網頁已經提供 CS2 全系列軟體(有包括予 Windows 佮 Mac 平臺的專用版本)的下載網址;中文版網頁現此時干焦提供 Acrobat 7.x/8.x 的部分,其他的 CS2 系列軟體,這幾工內應該就會陸續公布。