2012年12月31日

愛會記得更新你的 Java for OS X

佇 Mac OS X 10.6 (Snow Leopard) 進前的系統,因為系統內底已經附佮 Java,所以觀視 Java 網頁並無問題;毋過 OS X 10.7.3 (Lion) 以後的系統並無附 Java,一寡利用新版 Java 7 製作的網頁,就無法度閣再顯示。今仔日老刀就拄著這个問題。

原來老刀幾若冬來,對舊版系統一路升級起來到 OS X 10.8 (Mountain Lion),早就慣勢「毋免去更新 Java」的歹習慣(因為 OS X「軟體更新」自動會去掠新版),結果 Java 版本無順紲更新,當然會出問題。解決的方式真簡單,就是去 Java 官網掠 Java 7 轉來鬥:

java_download

鬥好了後,佇 Firefox 的網址列拍入「about:plugins」檢查一下,會當發見 Java 7 Update 10 已經鬥入系統內底,更新成功!

java for mac

Java 官網內底已經有提供 Mac Java 7 上定定見著的問題說明網頁,老刀建議 OS X 10.7/10.8 的用戶,有閒罔參考一下。

2012年12月24日

Fedora 18 上市已經進入倒數

明年 (2013) 正月初八十五就是老刀向望誠久的 Fedora 18 正式推出的日子,真正希望彼个日子趕緊到位。先來看 Fedora 18 有啥物重大更新:

  • 系統核心 (kernel) 3.6.0。
  • Windows 8/Fedora 雙重開機(現此時無支援 Windows 8 快速開機)。
  • 全新改寫的 anaconda 系統安裝程式。
  • 新增支援 FedFS 檔案系統。
  • httpd 2.4.3-1。
  • vsftpd 3.0。
  • Samba 4.0
  • 桌面介面:提供 CinnamonGNOME 3.6KDE 4.9MATEXfceSugar,攏總有 6 種選擇。
  • Perl 5.16。
  • Python 3.3。

Fedora 18 這馬已經進入 beta 試驗階段,若想欲體驗 Fedora 的上新功能,會當佇遮掠轉來鬥。另外,你想欲進一步知影 Fedora 18 更新啥物所在,歡迎去參考怹的釋出公告 (Release Note)。

【1/5/2013 補充】根據 Fedora 官網提供的消息,Fedora 18 推出日期已經延後到 1/15。

2012年12月23日

加裝 USB 乙太網路卡,予 Android 電視棒上網閣較順!

KY-RD9700

使用過 Android 電視棒的朋友,應該攏知影伊到底有偌讚:坐佇客廳,拍開大螢幕電視來上網,目睭攏無親像坐踮電腦螢幕頭前的彼款壓力。雖然老刀的 UG802 佮其他的 Android 電視棒仝款,攏支援無線網路 (Wi-Fi),毋過若想欲予上網閣較順,其實買一个 USB 乙太網路卡來鬥,會閣較好用喔!

昨暗老刀去光華商場,開 240 箍臺票共 USB 乙太網路卡(型號是 KY-RD9700)紮轉去阮兜,鬥入去 UG802 電視棒、接好網路線,就隨會當使用,毋免另外鬥驅動程式。開機了後,入去 Android「設定」,佇 Ethernet 項目拍勾仔就好。連線若有成功,佇正手爿的上下跤,就會出現 Ethernet 的圖示,就親像這張圖按呢:

android_ehernet

UG802 利用乙太網路上網了後,連線速度佮 Wi-Fi 相比有足大的進步,尤其是佇咧看 YouTube HD 影片的時陣,真正是讚矣!有 Android 電視棒的朋友,老刀建議親身來試看覓。

2012年12月18日

Siri 佮 Google Maps 互相溝通的撇步

對 iPhone 的用戶來講,這篇報導應該有參考的價值。iPhone 的 Siri 語音助理預設使用蘋果家己的地圖,毋過現此時這个蘋果牌地圖實在譀古,定定共人報去錯誤的地點,所以使用 Google Maps 來代替,較袂予你氣心惱命矣。

欲予 Siri 佮 Google Maps 互相溝通的步數誠簡單,就是佇你問 Siri 問題的落尾,加上 "in transit"。親像按呢:

"take me to the nearest [目的地] via transit"

因為老刀並無使用 iPhone,頂懸的方法對 Siri 的漢語版本敢仝款有效,就請有 iPhone 的朋友鬥相報一下。原作者嘛有提供 YouTube 影片來說明:

2012年12月12日

(暫時)再會吧,Yahoo! 奇摩輸入法!

受著一寡朋友歡迎的「Yahoo! 奇摩輸入法」,將欲暫時共逐家講再會矣!根據 Yahoo! 今仔日公布的消息,「Yahoo! 奇摩輸入法」將佇 2013 年 1 月 15 日開始停止提供服務,嘛對仝日開始終止客服技術支援佮功能意見回報。Yahoo! 奇摩輸入法對彼工開始,正式提供予開放原始碼 (open source) 社群使用,網址是 https://github.com/yahoo/KeyKey

其實,老刀個人認為這是一个好的開始。按怎講咧?

我並無否認 Yahoo! 奇摩的「好打注音」比微軟新注音來講是有較好拍,毋過 Yahoo! 奇摩輸入法的唯一好處嘛干焦按呢爾爾。比起老刀愛用的 gcin 來講,雖然仝款攏支援匯入 .cin 輸入法鍵碼表,但功能只有做一半。就親像:

  1. 無支援 CJK Ext-B/C/D 漢字集。準講原始的 .cin 有包括 CJK Ext-B/C/D 漢字的鍵碼定義,匯入 Yahoo! 奇摩輸入法的時陣嘛攏總直接跳過,當做無看見。結果就是「泛用」輸入法表格失效。而且使用「Yahoo! 奇摩輸入法」內底的注音(包括好打注音 )、倉頡、簡易等輸入法拍字,嘛攏總對 CJK Ext-B/C/D 漢字無法度。
  2. Yahoo! 輸入法支援「匯入 .cin 輸入法表格」的功能,干焦完成一部分。有一部分 .cin 輸入法表格的規定,佇 Yahoo! 輸入法並無實作。

上慘的所在,就是 Yahoo! 奇摩輸入法是根據早就停止開發的 OpenVanilla for Windows 所改寫,所以閣按怎變,也是變無蠓。老刀佇足久以前,捌寫批予 Yahoo! 奇摩輸入法的開發團隊,建議怹加入對行列輸入法的支援(原本 OpenVanilla 有支援行列輸入法,所以提 OpenVanilla 程式碼來改予 Yahoo! 奇摩輸入法使用,應該是簡單的代誌)。毋過真可惜,結果完全予人失望:除了收著官式回答(親像「感謝你的來批,阮已經共你的問題交予開發人員」這款)以外,完全無回應;至少「欲」抑是「毋」嘛小可應一下吧?

所以就予咱逐家暫時共 Yahoo! 奇摩輸入法講「再會」吧!等明年初 Yahoo! 奇摩輸入法提供予社群使用了後,有興趣的高手攏會當改寫伊並且加添新的功能;對使用者來講,絕對是好代誌。你講著抑毋著?

2012年12月10日

更新你的 gcin for Fedora 17(版本:2.7.9)

gcin279

雖然 Fedora 17 的預設漢字輸入法是使用 iBus,毋過臺灣人 eliu 所創作、符合臺灣人使用習慣的 gcin,一直是老刀佇 Fedora 17 內底使用的漢字輸入法。想欲共 Fedora 17 鬥入 gcin 嘛真簡單,只要拍開「新增/移除程式」了後,佇倒手爿頂懸拍入 "gcin" 揤「尋找」,就會當揣著 4 个檔案(32 位元系統):

  • gcin-1.6.1-3.fc17.i686.rpm
  • gcin-gtk2-1.6.1-3.fc17.i686.rpm
  • gcin-gtk3-1.6.1-3.fc17.i686.rpm
  • gcin-qt4-1.6.1-3.fc17.i686.rpm

抑是(64 位元系統)

  • gcin-1.6.1-3.fc17.x86_64.rpm
  • gcin-gtk2-1.6.1-3.fc17.x86_64.rpm
  • gcin-gtk3-1.6.1-3.fc17.x86_64.rpm
  • gcin-qt4-1.6.1-3.fc17.x86_64.rpm

攏總共怹拍勾仔了後,入去「輸入法選擇器」內底選定 gcin,然後趕緊登出系統,閣再登入就會當開始使用 gcin 矣。可惜附佮佇 Fedora 17 內底的 gcin 1.6.1 版本實在傷舊。凡勢您已經知影 gcin 的作者 eliu 已經編好予 Fedora 17 使用的 32 位元 (i686) gcin 2.7.9 套件,其實 eliu 最近嘛已經編好予 64 位元 (x86_64) Fedora 17 專用的 gcin 2.7.9,請逐家入來這个所在掠轉去鬥。

想欲升級 gcin 2.7.9 真正簡單。掠轉來 4 个新版 .rpm 套件了後(預設囥佇 ~/download),佇「終端機」內底拍入:

  • su
  • (拍入你的 root 密碼)
  • yum update gcin*.rpm
  • (揤 "y" 更新 gcin 版本)

紲落來,你就會當發見 gcin 版本已經變做 2.7.9 矣(請參考下跤這張圖)。

gcin_install

2012年12月4日

Flash Player for Android 恬恬仔更新版本

pre_ics雖然 Adobe 官方宣布 Flash Player for Android 對今 (2012) 年 8 月 15 日開始就對 Play Store 落架,嘛袂閣再提供更新;事實上,程式錯誤的修正 (bug fix) 猶是恬恬仔進行。今仔日老刀發見 Adobe 提供予使用者掠 Flash Player 各種歷史版本的網頁內底,予 Android 平台使用的 .apk 安裝檔版本已經有更新版:

  • Flash Player for Android 4.0,版號 11.1.115.27。
  • Flash Player for Android 2.x/3.x,版號 11.1.111.24。

掠落來 .apk 安裝檔了後,愛會記得共「設定」的「應用程式」內底的「未知的來源」項目拍勾仔,然後你就會使利用 ES 檔案瀏覽器(抑是仝類的軟體)鬥入這个 .apk 安裝檔。

想欲知影你的 Android 手機(抑是平板電腦)的 Flash Player 是佗一版,會當對「設定」的「應用程式」項目內底,點選「管理應用程式」內底的 Flash Player,就會使查著你所安裝的版本。頂懸這張圖是老刀共 HTC Desire 的 Flash Player 更新到上新版本 11.1.111.24 了後所掠的畫面,提供予逐家參考。

【12/31/2012 更新】Adobe 又閣再恬恬仔更新版本矣。現此時上新的版本是 11.1.115.34 (for Android 4.0) 佮 11.1.111.29 (for Android 2.x/3.x)。

2012年12月3日

予 RK3066 處理器專用的 Ubuntu Linux!

現此時真濟大陸出品的 Android 低價平板電腦佮電視棒,攏採用瑞芯公司的 RK3066 處理器(包括 2 个 Cortex-A9 核心)。對這馬開始,這款物件已經有 Android 以外的選擇:已經有國外的高手 (AndrewDB) 共 Ubuntu Linux 12.10 移植來予 RK3066 處理器使用

根據作者的說明,這个版本有下跤的特色:
  • 以 Ubuntu 12.10 作為基礎,採用 XFCE 桌面。
  • 雙重開機系統(保留原本的 Android 系統)。
  • 支援 HDMI 1920x1080 @60Hz (1080p) 影音。
  • 處理器工作頻率,上懸支援到 1.6GHz。
  • 支援 USB 滑鼠、鍵盤佮外接硬碟。
  • 這陣猶無支援內建 Wifi 。毋過有支援採用 Realtek, Ralink, ASIX 佮 SR9700 無線網路晶片的 USB 網路棒。
對這幾个特色看來,應該有鬥來耍的價值;凡勢老刀另工就會提客廳這支 UG802 來灌雙系統試看覓。當然囉,嘛歡迎你共鬥入使用的感想報予老刀知影。

2012年12月2日

OpenVanilla 行列輸入法鍵碼表 0.7 版釋出

昨昏老刀共 OpenVanilla 行列輸入法鍵碼表閣做一擺更新,版本是 0.7。這个新版主要是增加對中日韓 (CJK) Ext-C/D 字集範圍的支援。我共伊囥佇這个所在,有需要的朋友,歡迎家己掠轉來鬥看覓。

袂曉鬥入的朋友嘛毋免煩惱。這个新版已經予 OpenVanilla 開發小組收入,連鞭將欲推出的 OpenVanilla 更新版本 (1.0.3) 內底,就會包括這个新版本。

【12/03/2012 補充】OpenVanilla 1.0.3 對今仔日開始,已經釋出予逐家掠。網址是 https://github.com/downloads/lukhnos/openvanilla/OpenVanilla-Installer-Mac-1.0.3.zip

2012年11月28日

Firefox 18 beta 支援蘋果 MacBook Pro「視網膜螢幕」

Firefox 17 正式版才推出無偌久,後一个版本 Firefox 18 就已經進入 beta 階段。根據 mozilla 網站公布的 Firefox 18 釋出公告,Firefox 18 beta 佇 OS X 10.7/10.8 已經有支援 MacBook Pro 的視網膜螢幕 (Retina Display)!

雖然老刀的 2011 版 MacBook Pro 13” 並無有配備視網膜螢幕,無法度親身試驗;所以佇遮共逐家報告這个好消息,嘛歡迎有視網膜螢幕 MacBook Pro 的朋友掠轉來試看覓,並且共心得貼出來佮逐家分享。

2012年11月26日

Android 電視棒𤆬來「視訊+網路」革命

2012 年 7 月臺灣全面放送數位電視節目了後,老刀嘛趁這个機會,共厝內電視機升級為有支援 HD 畫質的液晶電視機。看著電視機頂頭的 HDMI 端子,應該是愛好好來利用矣。想著會當上網路的 Smart TV 正當時行,加上對岸阿陸仔推出誠濟 Android 電視棒的產品,就訂一支來耍看覓矣。

UG8022012 後半冬,總部設踮深圳的瑞科美 (Rikomagic) 公司推出 MK802 打開國外市場的名聲了後,對岸佇 Android 電視棒這方面的進步實在有夠精彩,逐個月攏有足濟新產品上市。毋但 MK802 佇 3 個月內就推出第 2 代 (MK802 II) 佮第 3 代 (MK802 III),其他牌子每 1~2 禮拜就有新產品推出,就親像老刀手頭這支 Ugoos 公司所推出的 UG802 仝款,寸尺嘛真小,只有 2 粒 4 號電池的長度爾爾(請參考正手爿這張相片)。

老刀這支 UG802 是 9 月初推出,當時是第一支有配備雙核心處理器(瑞芯RK3066)的「新產品」,而且有 1GB RAM、4 GB ROM,內建 MicroSD 讀卡器,內建 Android 4.0.3/4.0.4。毋過這 2 個月以來,主力機種已經有支援藍牙、配備 8 GB ROM,系統嘛升級做 Android 4.1.1/4.1.2(親像 Ugoos 紲來推出的 UG007 佮 UG802 II、瑞科美的 MK802 III,猶閣有製造商不明的 MK808 佮 iMito MX1 等)。

老實講,老刀認為 UG802 是無成熟的產品。可能是為著欲搶市推出,毋但外殼組立有一寡問題,上重要的是 WiFi 信號接收袂穩定,而且放送 YouTube 影片的畫面佮聲音嘛無仝步。好佳哉米國的高手 (Finless Bob) 利用 MK802 III 的 ROM 為基礎,改造來予 UG802 使用,毋但已經解決「WiFi 信號接收」佮放送影片「影片畫面佮聲音無仝步」的問題,而且嘛已經 root,會當使用系統的完整功能。UG802 改造了後(採用 Finless Bob ROM v1.6),佇「安兔兔」3.0.1 版得著 7,519 的懸分。

antutu3

有興趣進一步瞭解的朋友,老刀推薦你參考下跤的所在:
雖然老刀普通時較無咧耍對岸阿陸仔的 3C 產品,毋過今年 9 月到今短短 3 個月,硬體產品就有遮爾大進步。老刀進一支使用了後,嘛真正感受著阿陸仔的山寨實力;照這款範勢,今年底抑是明年初應該著會出現四核心、16 GB ROM 的「超級機種」,嘛是有可能的代誌。所以佇遮寫這篇文章來予逐家參考,嘛希望國內的廠商重視、經營這个市場,予咱臺灣人嘛會當使用家己本土的產品。

2012年11月24日

這站仔老刀走去佗位?咧創啥?

真正是真久無轉來遮,來佮逐家見面矣。一寡朋友可能會想無:愛講臺語的老刀走去佗位咧?這站仔老刀除了猶原做工課無閒以外,身軀已經操出淡薄仔狀況,真正是愛好好歇睏。

逐家攏知影:「愛變 3C 商品」一直是老刀的興趣。本站歇睏幾個月的時間內,其實老刀嘛加減有變一寡新𨑨迌物仔。紲落來,就來共逐家報告:

  1. HTC One X 手機(進前使用的 HTC Desire,現此時交予室友繼續使用)。這個月初共系統升級 Android 4.1.1 (Jelly Bean),真正是順、袂發燒又閣省電;現此時 iPhone 系列猶原毋是老刀考慮的對象。
  2. HD 數位電視。臺灣電視節目 7 月全面數位化,當然是愛來換一台支援 HD 數位節目的電視矣。
  3. UG802 電視棒,這是來自對岸中國的新產品。透過數位電視的 HDMI 端子,逐家來予數位電視升級變做會當上網路、看影片、放送 MP3/AAC 音樂、上時行的「智慧電視」吧!雖然原裝的 UG802 應該是趕工搶市的產品,出現了一寡問題。老刀共原廠所佮的 Android 4.0.3 系統換掉,改鬥入米國人為伊特別調整的 ROM,順紲共系統升級做 Android 4.1.1,問題毋但攏總修整好勢,嘛變閣較順、閣較讚。

暫時寫到遮,老刀會不定時轉來共逐家報導上新的消息。

蘋果重新販賣 Mac OS X 10.6 Snow Leopard 盒仔裝,新臺票 590 箍

雖然 Mac OS X 10.8 Mountain Lion 賣了真贊,可惜是無實體光碟的電子版本。最近佇蘋果公司線頂商店最近已經重新販賣舊版的 Mac OS X 10.6 Snow Leopard 盒仔裝,訂價新臺票 590 箍(包括運費)。

對採用 32 位元 Intel CPU 的中古 Mac 機種來講,這是升級系統的最後機會。特別提供有需要的朋友參考看覓。

2012年5月22日

6/3 下晡 2 點,相招來去臺中參加 fedora 17 發行派對!

Fedora 是真濟人愛用的老牌 Linux distro 之一。今年 5/29 將欲推出上新的第 17 版。 fedora project 官方嘛將欲佇 6/3 佇臺中市的黑貓月亮咖啡館(臺灣臺中市西屯區大墩 20 街 111 號)舉辦 「Fedora 17 發行派對」,歡迎有興趣的朋友逐家來做伙去鬥鬧熱。

路頭無熟的朋友,請參考下跤這張地圖:
點遮看閣較大張的地圖

想欲瞭解進一步消息,請入來這个所在看覓。

另外報告逐家一个好消息:fedora 漢化小組最近已經佇 Facebook 頂頭成立 fedora 中文社團,嘛歡迎對 fedora 中文版有興趣的老朋友、新朋友做伙來交陪。

2012年3月28日

OS X Lion 欲按怎連入去舊版無支援 Unicode 的 SMB 伺服器?

頂禮拜蘋果公司發表這篇技術支援文件,對一寡網管來講,可能是救星降臨矣!請繼續觀視落去便知分曉。

頭先,檢查你的 system.log 敢有親像下跤這款的紀錄:

smb_smb_negotiate: Support for the server SERVER_NAME has been deprecated (PreXP), disconnecting
若是有,請拍開「終端機」,然後拍入:

sudo sysctl -w net.smb.fs.kern_deprecatePreXPServers=0
了後,重新開機就成功矣。另工想欲改倒轉來的時陣,請閣再進入「終端機」下跤拍入:

sudo sysctl -w net.smb.fs.kern_deprecatePreXPServers=1

2012年3月25日

HTC Desire 專用的 Runnymede AIO 6.1.1 推出!

Runnymede 6.1.1老刀手頭這支 2 歲的 HTC Desire 手機,因為燒佇主機板頂懸的主記憶體傷少,所以並無法度鬥偌濟軟體;毋過這支手機若有改過 ROM,利用速度緊的的記憶卡(親像 Class 6 以上)割一寡空間來予 Android 系統當做主記憶用,這支 Desire 就會當「完全進化」,克服記憶體無夠的缺點。

現此時改予 HTC Desire 專用的 ROM,已經有足濟版本。有相欲瞭解的朋友,歡迎你去參觀 XDA DevelopersHTC Desire 討論版。老刀家己用 Runnymede AIO 系列的 ROM 已經真久(雖然中央嘛捌換改過別種版本),昨暗怹推出 Runnymede 6.1.1 版,主要是共 6.1 版的 INT2SD-M 的問題修正好勢,可惜老刀家己試驗 INT2SD-M 了後,感覺猶是換轉來 INT2SD-S 上蓋順【註】,特別提供有 HTC Desire 的朋友參考一下。

關於 HTC Desire 改 ROM 機的方式,真濟朋友已經有討論過。對這个部分較生疏的朋友,老刀建議你用 google 查一下,應該就會當揣著足濟相關資料。

註:

  1. INT2SD 是共記憶卡劃予 Android 系統使用的幾種技術之一,有分 INT2SD-M (Mass) 佮 INT2SD-S (Speed) 2 種。
  2. Runnymede AIO 現此時支援共軟體搬入去 SD 記憶卡的技術,有:APP2SD(Android 系統內建的技術)、AD2SDX、INT2SD-S (Speed) 佮 INT2SD-M (Mass),攏總 4 款。

2012年3月24日

有閒來「?」(兼「教育部臺灣客家語書寫推薦用字」介紹)

下跤這幾段字是教育部國語會新聞稿,順紲予想欲瞭解客話的朋友參考看覓:

「有閒來?!」、「正來?!」這是客家人最親切的問候語之ㄧ,通常用在道別時,互邀對方再度來訪,等同於國語的「再見」。「?」字乍看之下讓人不解其意,但翻閱教育部「臺灣客家語書寫推薦用字」,就可同時知道它的意義、用法以及在客家語各腔調中的讀音。

「?」,四縣腔客家語說liau(ㄌㄧㄠ),有休息、遊玩或是拜訪之意。例如「?天穿」,就是指在正月二十「天穿日」當天放下工作、休養生息。而春暖時分,許多人也藉此開始到處「遊?」(遊玩)。表示「玩、休息」意義的「?」,亦曾見「料、聊、嬲」等不同的書寫方式。為使客家語言文字化,以利其保存,並讓教學者有所依循,教育部從文字形音義的歷史、文獻的記載,以及是否容易學習等面向斟酌,推薦書寫用字供大眾參考使用,「?」即其中之一。

面對看似陌生的「?」,或是其他如「閒亍亍」(空閒)、「蹶山」(爬山)等字詞,如何使用電腦打字是一大問題。有鑒於此,教育部於100年推出「臺灣客家語拼音輸入法」。使用者不需費心猜想文字的國語注音,或拆解文字結構,而是以輸入客家語拼音的方式來打字。輸入法的推出,除可達到客家語字、音合併學習的效果之外,也有助於提升使用客家語思考的思維能力。「臺灣客家語拼音輸入法」以桃紅色標示屬於「臺灣客家語書寫推薦用字」的文字,讓使用者容易辨別、學習。

更多「臺灣客家語書寫推薦用字」,以及「臺灣客家語拼音輸入法」,可至教育部國語推行委員會網站下載,網址是:http://www.edu.tw/MANDR/content.aspx?site_content_sn=12694,歡迎民眾多加利用,學習客家語言。

可惜文章內底一寡關鍵的字攏變做「?」,教育部想欲推廣母語(包括臺灣閩南語佮客家語)的熱情我是真瞭解啦,毋過網站猶咧用過時的 big-5 編碼,足儕漢字無法度現出,真正是予人看笑詼,毋知影怹頭殼內咧想啥?

2012年2月26日

行列輸入法 for gcin (v0.40) 新版

雖然這个消息來了有淡薄仔晏,猶是來共大家報一下:

我根據行列輸入法發明人廖明德大兄 2 月初發表的 2012-A 版對照表,製作了支援 Unicode 6.0 中日韓 (CJK) 漢字集的新版行列輸入法 gcin 模組 (v0.40)。有需要的朋友,家己去掠來用吧!

有一寡代誌,是你佇鬥入這个新版進前,應該愛知影的:

  1. 附佮佇 gcin 內底的行列輸入法大字集 ar30-big,是支援 Unicode 3.1 中日韓漢字集(CJK Ext-B) 的規格。
  2. 想欲看著 Unicode 6.0 範圍的漢字(Unicode 內碼 U+2A700-U+2B734 佮 U+2B740-U+2B81F,也就是 CJK Ext-C/D),你需要共電腦鬥入支援 Unicode 6.0 漢字的字型(親像花園明朝字型,2012/2/2 版本)。