2011年9月20日

LIME HD 已經有 Facebook 粉絲團矣!

佇 9/16 的 LIME HD Team 的餐會內底,逐家討論著欲開 Facebook 粉絲專頁的計畫,終於實現矣。LIME HD 的 Facebook 粉絲專頁今仔日已經正式推出,嘛歡迎眾好朋友來去遐捧場、指教。

2011年9月19日

LIME HD Team 廬山真面目

頂禮拜六 (9/17) 中晝,老刀受著 LIME HD Team 主持人 Art Hung 的邀請,來到臺北市衡陽路的喫茶趣做伙食一頓。久仰大名的 LIME HD Team 成員,終於見著怹的廬山真面目矣。

IMAG0002

對正手爿到倒手爿:Sam、Caca Lin、Jeremy Wu、Art Hung 佮 Julian Chen。啊老刀走去佗?原來佇咧翕相矣。人講有圖有真相,老刀在場是有圖為證:

IMG_20110917_125328

老刀激這个面腔敢若淡薄仔奇怪?原來是這碗麵傷過好食矣。

佇食飯中間,Jeremy Wu 提出伊的 HTC 手機,內底已經鬥入咧欲推出的 LIME HD 3.6.0 版,共逐家展示 3.6.0 版的新功能。Art Hung 嘛「秀」出 LIME HD 佇 Android Market 的網頁後台,展示現此時全世界鬥入佮使用 LIME HD 的狀況。另外,嘛講著 LIME HD 將欲開 Facebook 粉絲專頁的計畫。

IMAG0008 IMAG0014
手機變做 Android 尪仔遙控器 紀念品:小身 Android 尪仔佮光爍爍的 LED 鎖匙鏈仔

Sam 提供伊新買的大隻遙控 Android 尪仔,當場組立予逐家𨑨迌。這隻 Android 尪仔是利用 Android 手機做遙控器,而且猶閣支援語音聲控喔

聚會佇真歡樂的氣氛中間結束,期待後一擺的相會。最後,大小身 Android 尪仔佮 LIME 當然愛做伙來泡茶矣。

IMAG0011

2011年8月28日

「老刀烏白講」需要你的幫助:本站徵求志工作者

這个想法一直囥佇老刀心內誠久矣。這幾個月以來工課傷過無閒,實在是無法度定定提供高品質的報導予大家欣賞。所以反過來想,若會當共本站「老刀烏白講」變做臺語愛好者共同創作的所在,其實嘛是真讚的代誌。

老刀希望志工作者的加入,會當拍破「老刀烏白講」題材長久以來偏重 3C 方面的局面(毋通怪老刀,因為我愛靠這途食飯),轉型變做臺語的專業網站。當然我若有閒,嘛會閣再轉來共我上新的心得報予逐家知影(尤其是行列輸入法相關的消息)。

關於共同作者的資格,並無啥物限制。愛遵守的規定嘛真簡單:

  1. 一定愛有 Google 帳號。因為本站建立佇 Google 的 blogger 服務的關係,你一定愛先登入 Google,才會當佇遮寫文章。
  2. 使用臺灣教育部的臺灣閩南語推薦用字(攏總 700 字)佮臺灣閩南語常用詞辭典的範圍創作文章;這是本站的特色,敬請你一定愛配合。
  3. 文章題材不拘,但希望你會當提供「普通級」的文章;「限制級」(18 歲以下不宜)的題材盡量避免。
  4. 最後這點毋是強制要求,毋過你若時間會使配合,上好是逐禮拜提供 1 篇以上。

老刀無啥物會當共你答謝你的參與,唯一會當做的,就是利用本站倒手爿網路廣告的淡薄仔收入(現此時的流量看來,逐日有 1.5 箍新臺票收入),定期請你食一頓好料。有興趣應徵的朋友,歡迎你來到老刀的噗浪網頁留一个私人訊息予我,並且註明你的 E-mail 信箱,予老刀會當揣著你。

最後,老刀先佇遮感謝你對本站的熱情佮協助,希望逐家做伙來予「老刀烏白講」變閣較好。

2011年8月27日

OpenVanilla 行列輸入法表格 0.60 更新

這擺老刀終於嘛共 OpenVanilla 行列輸入法更新完成。這个 OpenVanilla 行列輸入法 0.60 版表格更新的所在,佮頂一篇 gcin 行列輸入法表格 0.30 版仝款。

想欲掠新版表格轉來鬥,抑是想欲進一步瞭解這个版本更新了啥物所在,請入來遮參考

2011年8月22日

gcin 行列輸入法 v0.30 更新

感謝網友 oversky 的通報。老刀今仔日共 gcin 行列輸入法表格更新到版本 v0.30。這个版本修正 2 个所在:

  • 依照行列輸入法官網發布的 2008A 版對照表重新定義特別碼。
  • 更正一、二級簡碼(佮 Windows XP/Vista/7 行列輸入法的簡碼,是仝一个版本)。

詳細的說明,請參考這个所在

掠檔的連結佇遮:

老刀嘛順紲共 LIME HD 的行列輸入法模組修正好勢,傳予 LIME HD 的作者 Art Hung,應該連鞭就會正式更新。關於 OpenVanilla 行列輸入法的部分,因為老刀猶咧改一、二級簡碼檔案,會稍慢幾工更新。

【08/27/2011 補充】現此時的 LIME HD 3.5.0 已經內建上新版的行列輸入法表格;OpenVanilla 行列輸入法的使用者,老刀共更新的方法寫佇遮,請逐家動手更新。

2011年8月7日

OS X 10.7 (Lion) 漢字支援程度大體檢

ExtB老刀佇「T客邦」投稿發表這篇新文章,其實算是舊底「鑿破 Mac OS X 10.6 的大雞胿(2):騙鬼的 Unicode 支援」這篇的續集。結果咧,當然是 OS X 10.7 這隻戇獅仔無啥進步矣。

想欲觀視老刀按怎做這个試驗,歡迎逐家來去 T 客邦參考

2011年7月2日

蘋果公司再度更新怹的 OS X Lion Up-to-Date 計畫網頁

蘋果公司今仔日再度更新 OS X Lion Up-to-Date 計畫網頁,寫著:

所有於 2011 年 6 月 6 日當日或之後於 Apple 或 Apple 授權經銷商購買合格之全新 Mac 系統的消費者,均可透過 Mac App Store 下載 OS X Lion 的最新升級程式,而毋須額外付費。使用者必須於購買 Mac 電腦的 30 天內請求下載其最新升級程式。於 2011 年 6 月 6 日至 Lion 在 Mac App Sore 上市當日期間購買之合格的 Mac 電腦的消費者,將可於 Lion 正式推出的 30 天內進行請求下載。

請於 Lion 在 7 月上市時返回本頁面,以取得如何請求下載你的 Lion 軟體的詳細資訊。

根據一寡「地下網站」流出來的 OS X Lion GM 版看來,正式推出的日期應該近了,按蘋果公司佇禮拜二推出新產品的慣例看來,7/5 敢是正式推出的日子,時到便知。

2011年6月30日

關於 Apple Thunderbolt 纜線 (2.0 m)

蘋果公司對昨昏開始,已經佇怹的線上商店開放 Apple Thunderbolt 纜線 (2.0 m) 的訂購服務;怹仝日嘛囥一篇技術支援文件,專門介紹這條纜線。親像 Thunderbolt 纜線「支援頻寬上大到外濟?」、「纜線發燒敢是正常?」等問題,你攏會使踮遐揣著答案。

尤其是最近想欲買 Thunderbolt 週邊的朋友,絕對愛來參考這篇:

關於 Thunderbolt 至 Thunderbolt 接線 (2 m)

2011年6月19日

ATI-AMD 推出 Catalyst 11.6 顯示卡驅動程式

AMD 佇禮拜四推出上新版的 Catalyst 11.6 顯示卡驅動程式,這个新版本的新功能有:

  • AMD Steady Video:提高放送影片的穩定度(現此時干焦支援特定款的顯示卡)。
  • 提高放送 YouTube 影片畫面的穩定度 (Image Stabilization)。【老刀按:邊仔這个英文詞,予我想著 Canon 鏡頭的「防手振」功能,若是放送影片會當「防手振」,應該是真讚啦】
  • 用 Microsoft Media Player 佮 AMD Radeon HD 6000 系列顯示卡解碼 MPEG-4 part 2 影片的時陣,提供硬體加速。

效能改善:佇咧耍一寡𨑨迌物仔,親像 Crysis, F1 2010, Far Cry 2, HAWX, 佮 Unigine OpenGL 測試的時陣,𤆬來 5%-10% 的效能提升。另外,嘛解決舊版本佇 Windows 7, Vista 佮 XP 頂頭的一寡問題。

想欲知影進一步的說明,歡迎來去 AMD 的釋出公告參考。

佮較早仝款,Catalyst 11.6 嘛有予 Linux 專用的版本,而且怹的 Linux 版本驅動程式的釋出公告干焦說明按怎鬥入/刣掉這个驅動程式爾爾,無關於新版功能的介紹。

2011年6月8日

中華電信 ADSL 佮「光世代」毋但升速,價數閣再降!

根據中華電信今仔日發布的新聞稿,ADSL 佮「光世代」用戶毋但主動升速,而且對今年 (2011) 8 月初 1 開始閣再落價。遮爾讚的消息,當然愛報予逐家知影矣。

老刀共新聞稿的全文轉貼佇下跤:

中華電信歡慶建國百年,並響應政府推動全民數位生活,特別感恩回饋廣大客戶,經國家通訊傳播委員會 (NCC) 通過,接續 99 年 8 月至 11 月 ADSL 升速不加價之後,再度推出 HiNet 光世代大幅降價又升速方案,包括 HiNet ADSL 最低速率、8M 及光世代之客戶,預計將近 300 萬戶受惠,HiNet 光世代之客戶更享頻寬升級及資費調降之雙重優惠。

一路走在國內電信發展最前面的中華電信,為縮短數位落差、因應數位時代的挑戰,除積極推動數位高畫質 MOD,並全力投入寬頻網路的基礎建設,使網路的速度更快、品質更好、價格更低,讓數位生活成為國民的基本權利,因此針對 ADSL 入門門檻速率再度升級,不僅費率自 96 年起連續四年調降 X 值外,在頻寬方面,繼去年由 256K/64K 免費升速為 512K/64K 後,本次再提升頻寬為 1M/64K,經兩度升速後,下行頻寬提升已近四倍,全民由 K 速率邁入 M 速率。

中華電信表示,為配合政府「數位匯流發展方案」中,2015 年高速寬頻指標「80% 家戶可接取 100Mbps 有線寬頻」及「光纖用戶達 600 萬戶」之政策目標,推出高速率服務及調降租費,可望提升客戶租用意願,加速光纖用戶成長,達成政府政策目標,亦針對光世代高速上網產品特別大幅度調降費率。本次費率調整中,HiNet 光世代 20M、50M 及 100M 降幅均達 30% 以上,其中 50M 調降幅度達 41.23% 為最高,每月僅需 999 元(電路費 539 元,上網費 460 元),較原費用整整少了 701 元;而對於甫自 5 月 23 日推出之 HiNet 光世代 20M 及 50M 促銷方案客戶,中華電信主動自降價方案公告實施日起,依新費率計收電路及上網費用。

  此次資費調降又升速方案,中華電信表示,相關配合作業已積極進行中,除 ADSL 最低速率升速預定於 8 月 1 日實施【註】外,光世代升速於接獲主管機關通傳會核准函後,將正式展開,預估三個月即可全面完成,相關訊息請撥服務電話 123 或於中華電信網站 http://www.cht.com.tw 查詢。

中華電信HiNet ADSL及光世代電路月租費、上網費調降及升速表

【2011/06/24 註】根據中華電信公司網站發布的消息,這个方案已經佇 2011/06/22 生效。

2011年6月7日

蘋果公司將訂佇 7 月公布 OS X 10.7 Up-to-Date 方案

今仔日蘋果公司大頭家 Steve Jobs 佇 WWDC 2011 大會內底,終於正式宣布將佇 2011 年 7 月推出新一代的作業系統 OS X 10.7 (Lion)。其實自從幾個月前,老刀就一直咧關心這件代誌的發展,因為近來可能有買筆記電腦的需要,搪著新舊系統交接的時陣,蘋果公司若會當早一工發布 OS X 10.7 Up-to-Date 方案,買電腦嘛會較放心。

蘋果公司網站隨著 OS X 10.7 發表,今日仝步推出 OS X 10.7 (Lion) 的 Up-to-Date 官方網頁,可惜愛等到 7 月才會公布進一步的消息。毋管如何,這站仔定時入去遐,看上新的 Up-to-Date 方案就著矣!

2011年5月30日

LIME HD 3.2.0 正式釋出,內底有支援行列輸入法(行列30)佮行列10鍵數字輸入法(行列10)

想欲佇 Android 行動裝置(手機、平板電腦)頂懸使用行列輸入法的朋友,今仔日有一个大消息欲報逐家知影:昨暗正式推出的 LIME HD 3.2.0,已經共「行列30」佮「行列10」列入支援的輸入法名單。

因為老刀這幾冬替 OpenVanillagcin 製作行列輸入法表格,LIME HD 的作者 Art Hung 揣著老刀,提出怹當咧開發 LIME HD 3.2.0 新版的計畫,而且拍算欲共「行列30」佮「行列10」2 種版本的行列輸入法列入支援,老刀身為 Android 手機的用戶,當然真歡喜看著這件代誌來發展。除了「行列30」佮「行列10」以外,LIME HD 3.2.0 嘛支援倉頡、快倉、大易、注音、輕鬆,嘛保留 1 个予使用者家己「自建」輸入法的空間。下跤這 2 張圖,是 LIME HD 3.2.0 使用「行列30」佮「行列10」輸入法的畫面:

fig13 fig14
▲ LIME HD 行列輸入法(行列30)佇「行列+數字列鍵盤」模式 ▲LIME HD 行列10鍵數字輸入法(行列10)

這幾工老刀佮 LIME 作者 Art Hung 密切通批,除了共測試過程中發見的問題報予 LIME HD 開發小組修正以外,嘛提供一寡後紲的改版建議。

老刀已經共這幾工測試 LIME HD 3.2.0 的心得,另外貼佇「T客邦」Android 萬用輸入法環境:LIME HD 3.2.0 新版第一手報導這篇文章,歡迎逐家來去參考一下。

【2011/06/04 補充】關於 LIME HD 的使用方法,NetKidz 網站(嘛是 LIME 開發小組的成員)的「LIME-HD 中文輸入法正式發佈、介紹與設定應該嘛是讚的參考資料,老刀歡迎逐家有閒去遐讀看覓。

2011年5月22日

教育部 100 年閩南語語言能力認證 6 月 10 日開始報名

想欲知影你閩南語程度修鍊到啥物境界的朋友,會使來參考這篇教育部新聞稿

教育部將於 100 年 9 月 17 日舉辦閩南語語言能力認證考試,自 6 月 10 日上午 9 時起至 6 月 30 日下午 5 時止受理網路報名,不限資格全民皆可報考,名額以 5,000 名為限,敬請把握。

教育部表示,為鼓勵全國大眾學習閩南語,凡對閩南語有興趣者皆可報考本次認證考試,透過準備考試的過程,讓民眾瞭解自身閩南語的能力,進一步探究閩南語文化,並喚起對本土語言的重視,將語言和文化傳承下去。除現職教師與教學支援人員外,教育部特別鼓勵社會新鮮人與工作上有語言需求的民眾參加認證考試,多擁有一張語言能力證照,增加自身職場競爭力。

教育部閩南語語言能力認證係採一次考試依分數分級,共分為基礎級、初級、中級、中高級、高級與專業級,考試方式以筆試及口試進行,題型包含閱讀測驗、聽力測驗、聽寫測驗、口語測驗四部分,總分 500 分,分數達 151 分以上者,將由教育部依各級別授予證書。

本次認證考試由靜宜大學承辦。自 100 年 5 月 18 日起,可親至教育部員工消費合作社、教育部中部辦公室警衛室、靜宜大學警衛室、國立成功大學警衛室、國立東華大學美崙校區警衛室、國立臺灣師範大學警衛室共6處購買簡章。為利加速瞭解報名流程,民眾可自 5 月 18 日起至閩南語語言能力認證網站(http://web.pu.edu.tw/~taigi)或教育部網站(http://www.edu.tw/mandr/index.aspx)免費下載簡章。考試詳情可電洽服務專線:(04)26315725、(04)26328001轉19110、19111。服務信箱:taigi@pu.edu.tw

2011年5月20日

Fedora 15 "Love Lock" 將欲推出

距離 5/24 將欲推出 Fedora 15(代號 Love Lock)的日子愈來愈近,這个新系統實在真予人期待。

佮前一版 (Fedora 14) 比起來,這擺 Fedora 15 的改變會當講是誠大。其中上重要的所在,應該就是使用者介面變做 GNOME 3(嘛會使選擇 KDE 4.6 抑是 XFCE 4.8)佮使用 GTK+ 3.0 函式庫。應用軟體方面,有 Firefox 4.0 瀏覽器、Libre Office 3.3.0(毋知影敢會附佮這个月初新推出的 3.4.0 版?)想欲詳細瞭解 Fedora 15 的新功能,會使來參考這个所在

現此時 Fedora 官方網站已經收錄關於 Fedora 15 的相關文件:

另外,嘛已經有 Fedora 15 beta 會當掠來試用。已經鬥入 Fedora 15 beta 的朋友,佇後禮拜新版正式推出了後,會使利用線上更新的方式,來共升級變做正式版。

【老刀按】

  1. 其實我閣較關心 gcin 包入去 Fedora 15 的狀況。若是 gcin 趕袂赴包入去 Fedora 15,對老刀來講,想欲佇新系統頂頭拍漢字,就無像這陣 Fedora 14 遮爾順序矣。
  2. 我家己猶未鬥 Fedora 15 beta,主要是我慣勢鬥正式的版本。老刀會按照進前的慣例,佇 Fedora 15 正式推出了後,冗早共伊鬥予好。結果如何,時到便知分曉。

2011/05/16 新版花園明朝 (HanaMin) 字型,支援完整的 Unicode 6.0 漢字!

感謝網友 Pektiong 通知,上新版 (2001/05/16) 的花園明朝字型,已經共原本欠一部分字的 CJK Ext-B 漢字補滇。現此時支援的漢字數佮非漢字(親像日本片假名、漢字部首等)的總數,已經來到 75,616 字;HanaMin 現此時已經完整支援中日韓統一表意文字,以及延伸 A, B, C 佮 D 區 (CJK Ext-A, B, C & D),也就是佮 Unicode 6.0 所定義的全部漢字相容!

HanaMin 新版因為收錄的字數傷濟,已經拆做 2 个字型:HanaMinA.ttf 佮 HanaMinB.ttf。

  • HanaMinA 收錄 31,603 字,包括:非漢字 1,091 字、漢字 28,880 字(包括中日韓統一表意文字佮 Ext-A)、IVD 異體字 1,632 字。
  • HanaMinB 收錄 47,082 字,包括 CJK Ext-B/C/D。

想欲用電腦處理臺語字(包括福佬字、客家字),這个 HanaMin 字型是一定愛來鬥矣!

2011年5月15日

gcin 行列輸入法 ar30-big.cin v0.22 更新訊息

今仔日重新提 ar30-big.cin 出來檢查,發見 w+8 順序(數字)符號組最後 3 个(十、卄、卅)毋知啥原因煞變做亂碼,所以閣再釋出 0.22 更新版。這个 ar30-big.gtab 表格 0.22 版是我利用 gcin for Windows 所做,但是提來予 gcin for Linux 使用,應該是無問題。

【老刀按】今仔日 (5/16) 更新的 gcin 1.6.4 pre7 已經附佮這个版本的行列輸入法,佇遮感謝 gcin 作者 eliu 的緊跤手。

2011年5月14日

用 Magic Trackpad 寫正體佮簡體漢字

老刀使用 Magic Trackpad 超過半冬,現此時這个好物已經完全取代原本鬥佇 iMac 的滑鼠,伊的好用,真正毋免佇遮加講。其實 Magic Trackpad 嘛提供用手指頭仔寫漢字的功能,毋過老刀利用 OpenVanilla 加上行列輸入法拍漢字實在順序,所以 Magic Trackpad 這个功能,老刀是攏無機會使用著伊。

蘋果公司最近更新了這篇技術支援文件,對想欲利用 Magic Trackpad 寫漢字的朋友(尤其是對無練過漢字輸入法的朋友來講),應該是一篇真讚的參考文章,所以佇遮推薦一下。

【老刀按】根據老刀試用 Magic Trackpad 寫漢字的心得,佇正體漢字方面,雖然辨識程度佇水準以上(佮佇 iPhone 抑是 iPad 頂頭寫字比起來,應該攏差不多),可惜只限 big-5 範圍爾爾;佇咧寫 Unicode 2.0 以上的漢字的時陣,毋但是辨識率差真濟,欠字(系統有字,但是寫了送袂出彼字,可能是系統記錄的手勢資料傷少)的情形會當講是誠普遍。但至少佇常用字的部分,佇一般使用的場合就有夠矣。

2011年5月11日

AMD 推出 Catalyst 11.5 顯示卡驅動程式(毋通共 Hotfix 放袂記)

AMD 今日推出上新版的 Catalyst 11.5 驅動程式。

Catalyst 11.5 新版改善 Hydravision 的 HydraGrid 功能、解決一寡 Windows 7 下跤的問題,親像:

  • HDMI 8 聲道功能佮 PowerDVD 相衝。
  • MPEG-2 轉 H.264,以及 H.264 轉 AVCHD 問題。

想欲掠來鬥的朋友,請入去 AMD 的掠檔專頁;想欲進一步瞭解 Catalyst 11.5 完整的介紹,請參考怹的釋出公告

毋過 AMD 佇釋出 Catalyst 11.5 的仝日,嘛針對 Windows 7 佮 Windows XP 推出了 Catalyst 11.5a Hotfix,修正了一寡所在:

  • 多重 H.264 轉 MPEG-2 藍光影片的問題。
  • 滑鼠游標袂順。
  • 利用內建 DDR3 記憶體的 AMD Radeon HD 6000 系列顯示卡,佇 DirectX 9 模式耍𨑨迌物仔的時陣,螢幕畫面閃爍的問題。

關於 Hotfix 的進一步說明,會當來參考這个所在(內底有掠檔的連結)。

最後,Catalyst 11.5 嘛有予 Linux 專用的版本,掠檔網頁佇遮

2011年5月5日

收著捐款新臺票 1,000 箍,感謝你!

今暗收著桃園黃文全君贊助本站新臺票 1,000 箍,老刀佇遮共你說一聲感謝。尤其老刀 4 月毋但工課無閒加上人咧養病,無法度定定佮逐家分享上新的 3C 消息,這个時陣來收著捐款,真正是特別感心。

你的熱情,是我繼續拍拚落去的動力。

2011年5月4日

FAT32、NTFS、exFAT,記憶卡愛按怎格式化?

最近老刀佮 T 客邦合作,佇遐推出了這篇文章,嘛受著真大迴響。雖然彼篇題目已經寫明「記憶卡愛按怎格式化」,毋過老刀嘛有提家己的 Seagate Barracuda 1.5 TB 外接硬碟出來開刀(格式化),寫出我的試驗感想,歡迎逐家來去參考。

老刀個人建議適合上濟人使用的檔案系統:Windows 系統內接硬碟用 NTFS(Linux 系統內接硬碟用 ext4、Mac OS X 系統內接硬碟用 HFS+)、外接硬碟用 exFAT,記憶卡(親像 SDHC)用 FAT32。叢集 (cluster) 欲訂偌大,建議參考我彼篇文章結論了後,就以你家己的需要決定吧。

2011年4月27日

LIME 將欲支援行列輸入法

老刀前工收著 LIME 的作者 Art Hung 來批:

您好我是 LIME IME 的作者,謝謝您製作的行列字根 For LIME,讓許多的網友可以更方便的在 Android 手機上輸入中文。 最近有不少的使用者要求我們將行列輸入法加入 LIME IME 當中,我們近期的改版也預計將這一個部份加入。您製作的字根表相對於原始 array30.cin 便利許多,更符合 Android 手機上輸入的需求,不知是否將您的字根表加入預載資料庫當中呢。

期待您的回覆~ 關於 LIME 輸入法的部份亦歡迎您給予我們指教~ 感謝~

其實對支援 CJK Ext-B 漢字範圍【佮 Unicode 3.1 相容】、攏總 70,207 个漢字的行列輸入法來講,想欲佇記憶體空間有限的 Android 智慧手機內底使用「完整版」的行列輸入法,其實是有淡薄仔食力。親像「行列注音輸入法」來講,甚至無提供完整的 Unicode 2.0 漢字範圍(所以替「行列注音輸入法」改一版支援完整的 CJK Ext-A 範圍【佮 Unicode 3.0 相容】的專用鍵碼表,請參考這个所在)。這擺 LIME 將欲支援行列輸入法,而且真正是一个好消息。

根據 Art Hung 共老刀透露,下一版的 LIME 將會當予使用者選擇共輸入法資料庫囥入 SD 記憶卡,所以對支援漢字數濟的行列輸入法來講,著會當解決食手機記憶體傷濟的問題矣。

紲來若有進一步的消息,老刀會繼續來共逐家報導。

2011年4月19日

身體健康真正足重要,請逐家愛保重

這站仔老刀因為破病,佇厝內歇睏了幾若工,好佳哉這陣已經好甲差不多。最近天氣厚變化,老刀佇遮請逐家愛特別注意身體健康,毋通去寒著矣。

2011年4月3日

蘋果公司最後一擺更新「Mac OS 9 系統錯誤碼」的技術支援文件

2001 年 3 月蘋果公司推出 Mac OS X 系統了後,原本的 Mac OS 9 系列作業系統(現此時叫做 Mac OS Classic)佇 2001 年 12 月推出 Mac OS 9.2.2 了後,就無閣再更新。老刀家己佇 2001 年底決心刣掉 Mac OS 9,共 Mac OS X 當做 Mac 唯一的作業系統了後,就已經無機會予 Mac OS 9 共我「擲炸彈」矣。

雖然時過 9 冬,猶有一屑仔 Mac OS 9 用戶猶未完全轉換 Mac OS X,蘋果公司猶原更新了關於 Mac OS 系統錯誤代碼的參考資料,對猶咧接著 Mac OS Classic 掔炸彈的朋友來講,這 3 篇文章是幫助你揣出解決問題的重要線索。

隨著 Steve Jobs 共 Mac OS 9 送入棺材,這回是蘋果公司更新這 3 篇文章的最後一擺。佇這篇文章上後壁,老刀請逐家複習這段經典喪禮:

2011年3月26日

使用 Sun Weblog Publisher 佇 Linux 寫部落格文章

老刀一直咧走揣適合佇 Fedora 14 使用的 Linux 部落格編輯器,可惜到今並無揣著親像微軟 Windows Live Writer 這款,遮爾好用的軟體。聽講 OpenOffice.org Writer + Sun Weblog Publisher 的組合,佇 OpenOffice.org 升級到 3.3 版以後,已經解決了相衝的問題,趕緊來共 Sun Weblog Publisher 掠轉來試看覓,果然會當正常使用矣。

其實老刀較早進前嘛捌灌過 Sun Weblog Pubilsher,毋過較早的 OO.o Writer 2.x 版佮 Sun Weblog Publisher 一直相衝,並無法度使用。這馬看起來, Oracle 公司已經解決了這个問題。

佇猶未揣著真正好用的 Linux 部落格編輯器進前,暫時就按呢用一陣吧。

2011年3月24日

PC 回神矣!

老刀強欲送去修理的技嘉 GA-965P-DS3 主機枋終於回神矣,真是好佳哉。就予老刀共逐家報告修理的過程:

開機無螢幕畫面,嘛無嗶聲的電腦,佇搶救幾若工全無法度的狀況之下,老刀決定「放棄」,等老刀共主機枋頂頭的介面卡拆了了,準備欲進一步剝電源線的時陣,無張持去揤著電源供應器的開關,結果主機枋竟然佇這个時陣發出嗶聲,老刀頭一擺感覺這个嗶聲是遮爾好聽,真正是又驚又喜。

趕緊閣再共介面卡一片一片鬥轉去主機枋,開機了後仝款是無螢幕畫面、嘛無嗶聲。這時陣老刀心內已經有譜:主機枋並無故障;問題是出佇介面卡頂頭。紲落來共介面卡全拆了了,一擺插一片來開機檢驗,無偌久就揣著一切的攏是 1394 介面卡咧變怪。共這片 1394 介面卡剝落來了後,開機完全沒問題。我提另外一片 1394 介面卡(備品)來替換了後,這馬電腦已經完全正常矣。

修理電腦、掠出問題,嘛是愛靠淡薄仔運命吧;若無去揤著電源,恐驚我永遠毋知影欲按怎救回這臺 PC。這擺我若剝主機枋去技嘉修理,結果應該是白了錢兼白了工吧。

2011年3月23日

Firefox 4.0 正式推出!

最近這幾工,逐間廠商之間當咧進行瀏覽器更新大戰:頂禮拜有 Internet Explorer 9,今仔日 Opera 11Firefox 4.0 嘛相連紲推出,加入這場瀏覽器大戰。其中老刀家己上愛用的瀏覽器,應該是 Firefox 系列。

Firefox 4.0 上大的進步,應該就是全新改寫、比 Firefox 3.6 速度緊 6 倍的 JavaScript 引擎 JägerMonkey,另外猶閣有:
  • 予你避開網路廣告 Do-Not-Track (DNT) 功能。
  • 支援 DirectX 9 (Windows XP)、DirectX 10 (Windows Vista/7) 佮 OpenGL (Mac OS X) 的 3D 繪圖加速,而且 OpenGL for Linux 的版本連鞭就會推出。
  • 支援 2D 繪圖加速 (Windows 7)。
  • Firefox Sync,佇數台電腦佮行動裝置內底,仝步你的密碼佮設定檔。
  • 支援 HTML5 視訊佮表格控制的語法。
想欲進一步瞭解 Firefox 4.0 改進了啥物所在,歡迎參考新版的釋出公告
因為老刀 PC 歹去,暫時無法度鬥入 Windows 佮 Linux 平台的 Firefox 4.0,現此時只賰 iMac 會當試用。新的 4.0 版速度真正是令老刀足滿意。可惜佇咧掠檔案的時陣,並無法度自動叫出 iGetter 進行管理;iGetter 將欲推出的新版本將會解決這个問題。佇問題猶未解決進前,請外掛 FlashGot 這个 Firefox 附加元件來叫出 iGetter 掠檔。

2011年3月22日

歹去的 PC,再會吧!

真久無入來拍文章;毋知影的朋友,凡勢叫是老刀困佇日本受難矣。其實是老刀厝內上定定用著的 PC 歹去,這幾暗下班佇厝攏咧搶救電腦,真正是艱苦。

現此時這台電腦(內底有 Windows XP SP3 佮 Fedora 14 雙系統)開機無螢幕畫面、嘛無發出警示的嗶聲,我看主機枋(技嘉 GA-965P-DS3 Rev. 2.0)歹去的可能性誠大。搶救幾天全無進展,紲落來就交予技嘉原廠去處理吧。

好佳哉老刀猶有 iMac 會當用,毋過老刀嘛暫時無法度發表 Windows 佮 Fedora Linux 相關使用心得。佇主機枋猶未修理好勢進前,請天公伯仔保庇 iMac 千萬毋通共我出包矣!【老刀按:你若有仝等級、會當支援我的 Core 2 Quad 2.4GHz (Q6600) 處理器的主機枋想欲借我暫且應急,老刀先佇遮共你說一聲多謝】

2011年3月7日

2008 年末以後出廠的 MacBook 佮 MacBook Pro,佇 Mac OS X 10.6 下跤有支援 8GB 記憶體!

按照蘋果官方網站提供的 MacBook 佮 MacBook Pro 產品規格,除了 2009 年中以後出廠的 MacBook Pro 有支援 8GB 記憶體以外,2008 年末以後出廠的 MacBook 佮 MacBook Pro 上濟支援到 4GB (2GB+2GB) 抑是 6GB 記憶體 (4GB+2GB)。現此時記憶體價數已經夠俗,對定定需要處理相片佮編輯影片的朋友來講,若會當共記憶體空間加到上大(當然是 8GB 上好),佇做工課的時陣,絕對會使共電腦發揮上讚的效能。今仔日 OWC 公布這篇教你按怎拍破蘋果官方規格限制的「秘笈」,老刀當然佇遮佮逐家分享一下。

根據 OWC 的試驗發現,MacBook 佮 MacBook Pro 是毋是支援 8GB 記憶體,愛看韌體版本決定。蘋果公司針對 MacBook 佮 MacBook Pro 推出的「EFI 韌體更新」有 2 个版本,其中干焦較新版本的韌體有支援 8GB 記憶體;也就是講,只要你共手頭的 MacBook 佮 MacBook 的 EFI 更新到上新版本,自然就支援 8GB 記憶體矣。毋過因為已經利用舊版 EFI 韌體更新程式升級韌體版本的蘋果筆電,佇「軟體更新」內底並無法度現出新版的 EFI 韌體更新;所以咱需要做的是掠新版 EFI 更新程式來家己升級韌體。

按怎做?請利用下跤的步數:

頭先,請確定你的蘋果是這幾款:

  • MacBook 13.3″ 2.0GHz 佮 2.4GHz
  • MacBook Pro 15″ 2.4GHz 所有機種
  • 有 ExpressCard 插槽的 MacBook Pro 15″ 2.53GHz(2008 年末)
  • 有 ExpressCard 插槽的 MacBook Pro 15″ 2.8GHz(2008 年末)

紲落來,檢查 Boot ROM 版本

  • MacBook Pro 機型識別碼是 MacBookPro5,1,Boot ROM 版本應該愛更新到 MBP51.007E.B05。
  • MacBook 機型識別碼是 MacBook5,1,Boot ROM 版本應該愛更新到 MB51.007D.B03。
  • 機型識別碼毋是頂懸這 2 款的 MacBook 佮 MacBook Pro,並無需要更新 EFI 韌體。

若是你的 MacBook 抑是 MacBook Pro 的 Boot ROM 版本號碼比頂懸這 2 款閣較舊,你就需要更新 EFI 韌體:

更新 EFI 韌體了後,請共你的 Mac OS X 系統升級到 10.6.6

2011年3月5日

關於 iMac 佮 MacBook Pro 的 SD/SDXC 插槽

蘋果公司最近更新了這篇技術支援文件,對 SD 佮 SDXC 使用的基本觀念解說了真明,是值得囥佇身軀邊、隨時參考的好文章,所以老刀特別佇遮推薦一下。

2011年3月1日

Boot Camp:佮 64 位元版本 Windows 相容的 Mac 電腦名單

想欲知影你 Mac 的 Boot Camp 環境敢有支援 64 位元版本的 Windows Vista 佮 Windows 7 系統?今仔日蘋果公司更新這篇技術支援文件,就有你欲愛的答案。

下跤的機種會當佇 Boot Camp 下跤使用 Windows Vista、Windows 7 Home Premium、Windows 7 Professional,抑者是 Windows 7 Ultimate:

  • MacBook Pro(13 吋,2009 年中)以後
  • MacBook Pro(15 吋,2008 年初)以後
  • MacBook Pro (17 吋,2008 年初)以後
  • Mac Pro(2008 年初)以後
  • iMac(21.5 吋,2009 年尾)
  • iMac(27 吋,2009 年尾)
  • iMac(27 吋,4 核心,2009 年尾)
  • MacBook(13 吋,2009 年尾)以後
  • iMac(21.5 吋,2010 年中)
  • iMac(27 吋,2010 年中)
  • Mac mini(2010 年中)

下跤的機種,干焦支援 32 位元佮 64 位元的 Windows 7 Home Premium、Windows 7 Professional 抑者是 Windows 7 Ultimate,毋過並無支援 Windows Vista 佮 Windows XP:

  • MacBook Pro(2011 年初)
  • MacBook Air(2010 年尾)

對上新的 MacBook Pro 佮 MacBook Air 只賰支援 Windows 7 看來,後壁推出的新款 Mac 電腦的 Boot Camp 環境,Windows 7 應該是唯一的選擇。【老刀按:這篇文件並無說明我現此時使用的 iMac(20 吋,2008 年初)到底支援佗一款 Boot Camp 環境,應該是愛家己親身試驗了後才會知影矣】

2011年2月26日

教育部「臺灣閩南語漢字輸入法 v2.0」嘛有 Mac 版本!

教育部佇舊年 6 月推出免費予 Windows 佮 Linux 系統專用的「臺灣閩南語漢字輸入法 v2.0」了後(請參考老刀舊年這篇報導),佇這個月嘛推出了予 Mac 專用的版本。舊曆過年收假到今,因為老刀作穡無閒的關係,紲來袂記得共這个好消息報予逐家知影。關於「臺灣閩南語漢字輸入法」的介紹,教育部網站已經有詳細說明

「臺灣閩南語漢字輸入法」是由教育部委託,由研發「嘸蝦米輸入法」的「行易有限公司」承作,專為「臺灣閩南語漢字」量身打造的輸入法。只要依「臺灣閩南語羅馬字拼音方案」輸入臺羅拼音,就會列出所有對應的漢字供使用者選字,就像注音輸入法一樣,只是把「國語注音」換成「臺灣閩南語拼音」,打字時便可免除轉譯成華語音讀的困擾。

想欲掠來鬥入的朋友,請老刀建議你先來參考教育部的 Mac 版安裝手冊

2011年2月25日

Intel 公開 Thunderbolt 新規格

隨著蘋果公司發表附佮超高速 Thunderbolt 傳輸介面的新款 MacBook Pro,Intel 嘛仝日公布 Thunderbolt 的規格(較早叫做 Light Peak)。

按照 Intel 公布的規格看來,有 PCIe 10 Gbps 速度的 Thunderbolt 傳輸介面 ,是 USB 3.0 的 2 倍,接頭佮 DisplayPort 相容;按照 Intel 網站提供的示意圖來看,較簡單講,Thunderbolt 就是同時支援 PCIe 佮 DiaplayPort 的新傳輸協定。所以 Thunderbolt 會當傳輸影片畫面、聲音、硬碟資料,等於是一个會當接電腦螢幕、電視機、數位錄影機、外接硬碟櫃等週邊裝置的通用傳輸介面。Thunderbolt 佮 FireWire (IEEE 1394) 仝款,攏是利用串接的方式佮週邊裝置相接(逐串上濟支援 6 台週邊),而且是直接供電,相信對用慣勢 FireWire 的 Mac 用戶來講,應該無啥困難。

現此時已經有蘋果、喬鼎資訊 (Promise Technology, Inc.) 佮 LaCie 宣布欲推出支援 Thunderbolt 的週邊。隨著 Intel 佇個人電腦界的影響力,相信支援 Thunderbolt 規格的週邊名單,佇幾個月內就會大量增加。雖然如此,老刀猶是希望 USB 3.0 佮 Thunderbolt 會當做伙存在佇電腦內底啦(看來這點 Mac 用戶是無望矣)。

2011年2月24日

微軟正式推出 Windows 7 佮 Windows Server 2008 R2 Service Pack 1

雖然老刀家己並無使用 Windows 7(猶停留踮有淡薄仔年歲的 Windows XP SP3,並無升級),建議使用微軟上新系統的朋友,趕緊去掠轉來鬥吧。

2011年2月22日

Mac Pro (Early 2008) 的 ATI Radeon HD 2600 XT 顯示卡延長保固計畫

蘋果公司最近這篇技術支援文件寫著:2008 年 1 月到 2010 年 5 月中間購買的 Mac Pro 專用 ATI Radeon HD 2600 XT 顯示卡,有可能會出現螢幕畫面歪斜抑是無去的狀況。萬一若去拄著,會當去蘋果授權維修服務商換一片新顯示卡吧!

符合這个更新專案的條件是:

  1. 「中標」的顯示卡:條碼對上後壁算倒轉來 4 个字母是 YPU/YPV/1M4/1M5/29H/29G 起頭(上尾是任何一个字母抑是數字)。
  2. 保固期間:對你買電腦日期開始 3 冬,抑是 2011 年 7 月 31 日為止(以較久的日期為準),蘋果公司會繼續評估延長保固日期的必要性。

蘋果公司佇仝一工嘛修改對 ATI Radeon X1900 XT 顯示卡的延長保固(請參考老刀進前這篇報導)。蘋果公司改變的所在,是提掉適用延長保固專案顯示卡的條碼限制。意思應該是講:任何一片 Mac Pro 專用的 ATI Radeon X1900 XT 顯示卡攏總符合交換條件矣。

2011年2月21日

AMD 推出 Radeon 顯示卡驅動程式 Catalyst 11.2

AMD 動作誠緊,這擺 Catalyst 11.2 推出,距離頂一版 11.1 才 3 个禮拜爾爾,應該拍破有史以來的紀錄矣。身為 Radeon 顯示卡的愛用者,老刀照例來介紹一下這版改變了啥物所在:

Catalyst Control Center 的新功能:

  1. 紋理過濾 (Texture Filtering) 更新。
  2. 格狀控制 (Tessellation Controls):支援 Radeon HD 5000 佮 6000 系列顯示卡。
  3. 「消除混疊」的「型態過濾」功能,正式支援佇 Radeon HD 5000 系列顯示卡使用。
  4. 放送藍光 3D 影片的時陣,支援設定影像品質(現此時干焦支援 Radeon HD 6000 系列)。
  5. 改善效能。佇 Radeon HD 5000 系列(單片顯示卡)拍開「各向異性過濾」,並且關掉「消除混疊」之下,耍「決勝時刻:黑色行動」(Call of Duty: Black Ops) 有 11% 的效能提升;耍「蝙蝠俠:阿卡漢姆瘋人院」(Batman: Arkham Asylum) 的時陣,嘛有 4% 的效能提升。

這个新版當然嘛有修正一寡舊版本的問題。想欲進一步瞭解的朋友,請參考 Catalyst 12 for Windows 的釋出公告。另外有一點嘛欲報予逐家知影:Catalyst 11.2 嘛有推出予 Linux 專用的版本,可惜對怹 Linux 版釋出公告揣了半晡,就是毋知影更新了啥物所在。

想欲更新 Catalyst 版本的朋友,會當來去 AMD 官方網站掠轉來鬥。

2011年2月10日

按怎佇 Mac OS X 下跤拍開 root

今仔日蘋果公司更新了這篇真有參考價值的技術支援文件,介紹按怎佇 Mac OS X 歷代系統下跤拍開 root,並且使用 root 的功能。啥貨是 "root"?這份技術支援文件對 root 有真詳細的解說:

名為 "Root" 的使用者是 UNIX 型作業系統中的特殊使用者,擁有讀取和寫入檔案系統所有區域的權限。Root 使用者應該只用於處理特定的管理或監視作業。以 Root 使用者身分完成作業後,您應登出 Mac OS X,再以一般或管理者帳號重新登入。如果您不常使用 Root 存取,則您應將其停用。

老刀建議 Mac OS X 的用戶有閒加減罔讀一下,因為你有一工早慢用會著。

2011年2月2日

老刀祝福逐家萬事如意,新春大趁錢

一冬一擺的正月假期又閣來矣。先佇遮祝福逐家萬事如意,新春大趁錢,生理接袂離,考試攏第一,樂透得頭支……,其他留予逐家添吧。

小等老刀就欲駛車轉去高雄過節,嘛希望春節「候鳥」一族的朋友,交通順利利,平安去過年。

2011年1月30日

AMD 推出 Radeon 顯示卡驅動程式 Catalyst 11.1

頂禮拜 AMD 推出上新的 Radeon 顯示卡驅動程式 Catalyst 11.1。這个新版主要是增加支援上新的 Radeon HD 6x00 系列顯示卡,而且佇一寡𨑨迌物仔(親像 F1 2010惡靈勢力 Lefe 4 Dead 2)有 8-17% 不等的效能提升,而且嘛解決原本佇 Windows 7/Vista/XP 下跤的小毛病。想欲閣較詳細瞭解關於 Catalyst 11.1 的說明,請參考 AMD 的釋出公告(Windows 版)。

AMD 嘛推出 Catalyst 11.1 的 Linux 版本。可惜佇老刀寫這篇文章的時陣,AMD 猶袂公開 Linux 版的釋出公告,這陣暫時毋知影這个版本更新了啥物所在(毋過 Radeon HD 6x00 系列顯示卡,確定有支援矣)。

想欲更新 Catalyst 版本的朋友,歡迎來去 AMD 公司網站掠來鬥。

2011年1月18日

佇 Fedora 14 頂頭鬥入 ATI-AMD Catalyst 10.12 顯示卡驅動程式

其實老刀家己對 ATI-AMD Catalyst for Linux 並無啥有信心,原因是老刀較早(幾個月前)捌佇鬥入 ATI-AMD Catalyst 驅動程式的過程中失敗,害 Linux kernel(系統核心)規个歹去,變做愛重灌系統。毋過因為 Fedora 14 系統附佮的 ATI 顯示卡驅動程式無蓋四配,佇現出螢幕畫面的時陣一直攏有一寡小問題,佇「忍無可忍」的狀況之下,決心閣再來換一擺顯示卡驅動程式。

老刀這擺參考 RPM Fusion 的說明,先佇 Fedora 14 頂頭共 RPM Fusion 的基本環境設定好勢,老刀使用下跤的步數,試一擺就成功矣:

  1. 拍開「終端機」(佇「應用程式」的「系統工具」內底)。
  2. 佇「終端機」內底拍入 su,並且共系統密碼拍入,變做 root 權限。
  3. 拍入 yum install kmod-catalyst,共 Catalyst 驅動程式模組鬥入系統。
  4. 修改 /etc/inittab,共上尾逝的 id:5:initdefault: 改做 id:3:initdefault:【老刀註:系統開機了後直接入去 X11 圖形介面環境(親像 GNOME, KDE 這款)的朋友,才需要做這个動作;開機出現命令列(抑就是 console)的 Linux 環境,請直接跳過這步】。
  5. 重新開機,用 root 登入系統。
  6. 拍入 catalyst-config-display enable
  7. 拍入 new-kernel-pkg --kernel-args=nomodeset --mkinitrd --dracut --update $(rpm -q --queryformat="%{version}-%{release}.%{arch}\n" kernel | tail -n 1) 重編系統核心設定【老刀註:拍入了後,可能愛留一寡時間予電腦處理】。
  8. 若有必要,會使共 /etc/inittab 的設定改倒轉來 id:5:initdefault:,予系統使用 X11 圖形介面當做預設的使用環境。
  9. reboot 重新開機,大功告成!

頂頭第 6~7 步的指令傷過長,為著減少拍毋著的機會,老刀共怹貼入去「純文字檔」內底,另外共伊號名做 use_radeon(囥踮 /home 內底),所以佇第 5 步登入系統了後,就會當用 sh use_radeon 來代替這 2 个步數。

趕緊來試一下 ATI Catalyst Control Center 完全正常,真好佳哉!
Catalyst Control Center 

老刀的 ATI-AMD Radeon HD 5450 顯示卡佇改換原廠驅動程式了後,顯示的效能有誠大進步,而且 Compiz 的 3D 螢幕特效嘛終於正常使用,真正有夠讚!

2011年1月16日

Plantronics Savor M1100 頂級藍牙耳機使用心得

頂禮拜六 Plantronics 部落客體驗會結束了後,我徵得經典公關公司同意,將體驗會中試耍的 Savor M1100 提轉來試用幾工(其實我較興趣的是 BackBeat 903+ 這款)。老刀一如慣例,佇遮共這款旗艦藍牙耳機的使用心得寫出,提供予有興趣「攻頂」的朋友參考看來。

詳細的使用心得,請參考分站老刀烏白耍的報導

IMG_0150

IMG_0155

2011年1月13日

「Plantronics 部落客體驗會」紀實

感謝好朋友阿鑫(沒錯,就是麥客迷俱樂部的發起人那一位)提供我這个消息,並且邀請我參加頂禮拜六 (2011/01/08) 舉辦的 Plantronics 部落客體驗會。在應允之後,就隨接到經典公關公司的 Ryan Chang 先生用心安排佮聯絡。

活動詳情,請來去分站老刀烏白耍參觀。

IMG_4507

2011年1月10日

老刀烏白講 2010 年終排行榜

其實老刀佇 2010 年規年通天攏咧無閒(讀者若有心注意一下,2010 年所寫的文章攏總才 96 篇,看會出來老刀真正是足無閒),辛苦度過一冬了後,按照本站的慣例,發表年終的排行統計是一定愛的矣!

佮舊年仝款,老刀透過 OnsStat 這个網站流量分析工具,統計 2010/01/01 到 2010/12/31 期間眾讀者瀏覽本站的狀況,取頭前 5 名。老刀嘛發見一寡真趣味的結果,特別佇遮報予逐家知影:

  1. 凡勢因為 2010 年寫較少篇的關係,佇 2010 年所寫的文章竟然無半篇上榜 。「AMD-ATI 更新顯示卡驅動程式 Catalyst 8.4」這篇老刀佇 2008 年所寫的冠軍文章(2009 年退步一名得著亞軍),來到 2010 年猶有法度奪回冠軍,真正有夠長壽。另外,「線上漢文/台文字典查詢」是本站自排行榜統計開始,頭一篇介紹台文的文章上榜,嘛代表本站受著研究台文的朋友重視的程度。
  2. 佇作業系統排行榜,Windows 毋但是遙遙領先,而且佮 2009 年相比上升了 6.12%,顛倒是 Mac OS X 用戶的比例退步 6.57%。因為佮一般介紹 3C 的網站比起來,本站有較注重佮 Mac 相關的報導,所以會有這款結果,實在誠予老刀意外。
  3. 因為入來本站迌的朋友是 Windows 用戶占上濟,瀏覽器排行榜予 Internet Explorer 占著冠軍,應該是預料中的代誌。毋過 2009 年 Internet Explorer 佮 Firefox/Mozilla 差不多是平分秋色,2010 年 Internet Explorer 領先的局面就已經真明顯矣。另外,Google Chrome 瀏覽器雖然這擺維持佇第 4 名,但是已經對 3.17% 進步到 8.90%,應該是瀏覽器排行榜上大的驚喜吧?

這馬就來公布名次:

■上受著歡迎的文章(人客利用蒐尋引擎觀視幾擺)

名次

舊年名次

文章

幾擺

1

2

AMD-ATI 更新顯示卡驅動程式 Catalyst 8.4

1,533

2

-

Adobe 予 64 位元 Linux (x86_64) 專用的 Flash Player plugin(官版更新)

962

3

-

免費的 x86 虛擬機器 (VM)

902

4

-

Seagate/Maxtor 硬碟韌體更新的總整理

754

5

-

線上漢文/台文字典查詢

680

■作業系統(人客使用系統所占比例)

名次

舊年名次

作業系統

百分比

1

1

Windows

66.95%

2

2

Mac OS X

28.15%

3

3

Linux

2.87%

4

-

iPhone

0.49%

5

-

Android

0.09%

■瀏覽器(人客使用瀏覽器所占比例)

名次

舊年名次

瀏覽器

百分比

1

2

Internet Explorer

38.17%

2

1

Firefox/Mozilla

26.29%

3

3

Safari

23.40%

4

4

Google Chrome

8.90%

5

5

Netscape Navigator

1.32%

■人客對佗來(國家排行)

名次

舊年名次

國家/地區

百分比

1

1

臺灣

64.55%

2

2

香港

9.96%

3

3

米國

4.21%

4

-

澳門

0.44%

5

5

英國

0.38%

最後,嘛歡迎有興趣的朋友來複習進前年度的排行榜(2009 年2008 年2007 年)。

2011年1月8日

Mac App Store 慘遭破解!

佇蘋果公司前幾工推出的 Mac OS X 10.6.6 更新內底,上重要的新功能,應該就是 Mac App Store 矣。蘋果公司利用這个新功能,想欲共 iOS App Store 成功的經驗閣再一擺佇 Mac OS X 頂懸重現,野心會使講是誠明顯。Mac App Store 提供 Mac 用戶購買軟體真方便的管道,而且是附佮踮作業系統內底,一定會對一寡網站(親像 Download.comMacUpdate 這款)來誠大壓力;Mac App Store 到時若經營成功,其他網站業者目空一赤,逐家就會使「徛懸山看馬相踢」,來看控告蘋果公司違反拖辣斯 (anti-trust) 官司的好戲矣;是好是䆀,就留予時間證明吧!

頂頭 Mac App Store 的爭議暫且囥一邊,來看這篇來自 Gizmodo 的消息:一个叫做 Dissident 的駭客宣布講,怹已經開發號名叫做 Kickback 的軟體,會當破解 Mac App Store 內底的應用軟體(予對 Mac App Store 掠轉來的軟體會當鬥入去別台電腦)。毋過這位大兄嘛講著,怹支持正版、合法軟體,為著欲鼓勵軟體開發者共閣較濟好用的軟體囥佇 Mac App Store 提供逐家購買,創造一个方便的商業平台,除非蘋果公司佇 Mac App Store 內底囥了傷濟垃圾軟體,怹才會考慮共 Kickback 釋出(至少佇今 (2011) 年 2 月以後)。可見「盜亦有盜」,良心原在矣。

下跤是 Dissident 發表的原文:

We don't want to release kickback as soon as the [Mac App] Store gets released. I have a few reasons for that.

Most of the applications that go on the Mac App Store [in the first instance] will be decent, they'll be pretty good. Apple isn't going to put crap on the App Store as soon as it gets released. It'll probably take months for the App Store to actually have a bunch of crappy applications and when we feel that it has a lot of crap in it, we'll probably release Kickback.

So we're not going to release Kickback until well after the store's been established, well after developers have gotten their applications up. We don't want to devalue applications and frustrate developers.

雖然這馬反拖辣斯官司猶未出現,毋過蘋果公司佮駭客中間的攻防戰爭已經上演;逐家猶原會使「徛懸山看馬相踢」,搬椅條來看這齣好戲矣。

【老刀按:其實猶閣有別款方法。老刀尊重智慧財產權,所以無佇本站貼出破解的方法。拍算欲「以身試法」的朋友,請用 google 一下,應該真簡單就會使揣著「偷食步」的方式】