2010年12月12日

行列數字輸入法將欲推出!

猶會記得今年初老刀佇本站發表這篇「看報導『查打通用輸入法』有感」嗎?共漢字化做 1234567890 攏總 10 个數字鍵,特別適合佇手機頂頭使用,看來真正是袂䆀。毋過代誌經過到今咧欲一冬,發明人劉端陽先生並無這一步公開查打通用輸入法的規格、嘛無官方網站,我看應該真濟朋友已經強欲共伊放袂記矣。有想欲體驗用數字拍入漢字的朋友,其實你猶有另外一个選擇,就是將欲推出的「行列數字輸入法」。

「行列數字輸入法」是對佇個人電腦頂懸通用的行列 30 鍵版輸入法(後壁我用「行列輸入法」來代表「行列 30 鍵版輸入法」)演變而來。行列數字輸入法拆解漢字的方式佮原本的行列輸入法攏總仝款,只是共字根化作代碼爾爾;親像拍 (01) 2 个數字代替字根「日」(對應電腦鍵盤的 P 鍵)。雖然一个漢字上濟愛揤 8 个號碼,毋過大部分的漢字用 4~5 个數字就會當拍出。老刀真光榮受著行列輸入法發明人廖明德先生的邀請,除了加入行列數字輸入法的試用計畫以外,嘛負責包裝鍵碼對照表的部分。最近將欲正式推出的行列數字輸入法,會使用下跤 2 个版本釋出:

  • 支援 Unicode 3.0 範圍,攏總 27,489 字的「A 版」,也就是「中日韓統一表意文字延伸 A 區」(Ext-A)。
  • 支援 Unicode 3.1 範圍,攏總 76,798 字的「B 版」,也就是「中日韓統一表意文字延伸 B 區」(Ext-B)。【老刀按:Windows Vista 佮 Windows 7 內底的「新細明體-ExtB」,就是屬於這个範圍的字型】

因為並毋是個人電腦、PDA 佮手機的系統攏全面支援 Ext-B 漢字,所以 A 版佮 B 版推出了後,逐家會當按照需要鬥入適合的版本。

行列數字輸入法現此時已經接近完成階段:漢字的部分已經完成,只賰全形標點佮符號的字根位置猶袂確定。老刀已經利用 LIME 共行列數字輸入法鬥入去 HTC Desire 內底(應該所有使用 Android 系統的手機攏適用),使用一禮拜以來感覺真讚(已經完全取代我較早推薦使用的「行列注音輸入法」矣)。想欲知影進一步的消息,請繼續注意本站的報導。

有興趣想欲瞭解、學習行列輸入法的朋友,嘛歡迎來去參考行列輸入法官網的行列教室單元。

1 則留言:

周強國 提到...

行列數字輸入法早在三年前已發明出來了。本人是個很差勁的推銷員。到現在還沒路推廣出去。您有意要合作去推廣嗎? 瑞士周強國