2010年11月20日

AMD 釋出 Radeon 顯示卡驅動程式 Catalyst 10.11

AMD new icon AMD 這禮拜推出新版 Radeon 顯示卡驅動程式 Catalyst 10.11(想欲試看覓的朋友,請入來官方網站),升級了後,佇 Windows 7/Vista/XP 系統內底的顯示卡驅動程式佮 Catalyst Control Center 版本號碼是 8.791。正手爿是頂一版 (10.10) 佮新版 (10.11) 的安裝程式圖示,AMD 併購 ATI 公司過遮濟終了後,終於共商標「正名化」矣(雖然老刀感覺原本的 ATI 圖示媠較濟)。

這个新版主要是修正頂一版佇 Windows 7/Vista/XP 的一寡問題(親像修正佇 Windows 7/Vista 內底拍開 Aero 特效的情形下跤,執行全螢幕 DirectX 9 應用軟體會當機的問題)。根據 AMD 的講法,下跤這幾款筆記型電腦因為佮官方(公版)的 Catalyst 10.11 有相容性的問題,並無建議更新;建議使用者等候筆記型電腦廠商推出 Catalyst 10.11 的 OEM「客製版本」:

  • 任何一款佇 Catalyst 10.11 驅動程式釋出以後才推出的新型筆記型電腦。
  • 使用 Intel 晶片組,會當切換使用圖形處理器 (GPU) 的筆記型電腦(親像 Apple MacBook Pro 的 2010 年款,就屬於這類)。
  • 東芝 (Toshiba) 牌筆記型電腦。
  • 新力 (Sony) 牌的 Vaio 筆記型電腦。
  • 國際牌 (Panasonic) 牌的筆記型電腦。

根據 AMD 的講法,Radeon HD 5800 系列顯示卡(單片卡)加上 ATI CrossFireX 佇新版驅動程式下跤處理 BattleForge浩劫殺陣3 (S.T.A.L.K.E.R. – Call of Pripyat) 畫面,會當𤆬來 3%-5% 的效能改進。想欲進一步瞭解關於這个新版的說明,請參考 AMD 的版本釋出公告

另外,AMD 嘛推出予 Linux 系統專用的 Catalyst 10.11 驅動程式,這个驅動程式必須踮 X.Org 6.7 抑是閣較新版的圖形環境使用。毋過佇老刀寫這篇文章的時陣,AMD 並無說明 Linux 版本驅動程式新功能佮改進的所在。

2010年11月15日

Mac mini(2010 年中):HDMI 定定拄著的問題

新款 Mac mini(2010 中推出的型體) 親像便當盒仔的尺寸,囥踮客廳毋但無占空間,而且提供 HDMI 端子,是用來作客廳視聽/控制中心的誠好選擇。想欲利用 Mac mini 的 HDMI 佮視聽設備(電視、DVD 放送器、擴大機等)相接的時陣,蘋果公司這篇技術支援文件應該是真讚的參考文件。

特別佇遮報予逐家知影,希望對想欲佈置家庭劇院的朋友有小可仔幫助。

2010年11月6日

台灣的網路金融服務,需要閣再加油啦!(看台灣工銀證券的「e 麥客」軟體有感)

最近台灣工銀證券推出專門予 Mac OS X 專用的股票網路下單軟體「e 麥克」,佇 Mac 用戶內底引起轟動(Mobile01 有「e 麥客」發表會的詳細報導)。老刀身為 Mac 用戶,當然真歡喜 e 麥客軟體出現,並且真正向望這款軟體以後會愈來愈濟;可惜按照這幾冬來逐間公、民營銀行的「網路銀行」佇支援 Mac OS X、Linux、iOS 佮 Android 等「非 Windows 系統」的進度看來,我看是「緊睏較有眠」啦。按怎講咧?

台灣 99% 的「網路銀行」(玉山銀行是唯一例外)所提供的 WebATM 服務,只要是佮晶片讀卡機有關係的功能,攏總愛佇微軟的 Windows 系統加上 Internet Explorer 瀏覽器才會當達成;閣較正確的講法,是 WebATM 網頁內底使用著微軟的 ActiveX 語法。對其他電腦系統(親像 Mac OS X 佮 Linux)的用戶來講,想欲用晶片金融卡繳錢、轉數,根本是毋免數想的代誌。老刀捌踮 2006 年的時陣寫過批信去行政院長信箱,建議政府機關提供的網路服務,應該愛顧慮著「非 Windows 用戶」的方便性(想欲瞭解這段歷史的朋友,歡迎你入來遮抑是這个所在參考),並且建議先對公營金融行庫開始改善,來引導民營銀行跟進;可惜這陣時間來到 2010 年,情況佮 4 冬前相比,會當講是完全仝款,真正予人失望。

好佳哉現此時電腦的速度愈來愈緊,已經會使佇 Mac OS X 佮 Linux 內底開虛擬機器 (Virtual Machine) 執行 Windows 系統佮 Internet Explorer 瀏覽器。雖然嘛是解決問題的方式,毋過用戶愛另外攢一筆錢來購買 Windows 系統,等於是變相懲罰非 Windows 用戶的「微軟稅」。毋知影啥物時陣才使完全脫離 Windows 的「魔掌」,毋知影是「無奈」抑是「感慨」?總講一句:台灣的網路金融服務,真正是需要閣再加油啦!