2010年10月23日

Fedora 14 推出吉日進入倒算

隨著預定的推出日期 (2010/11/02) 愈來愈近,全新的 Fedora 14 實在真予人期待矣。

佮較早的版本仝款,Fedora 14 新版系統當然有引進真濟新功能。其中老刀感覺其中上讚的新功能有:

  • 系統核心 (kernel) 版本 2.6.35。
  • man-db:取代 man 變做 Fedora 14 的輔助說明介面。
  • KDE 4.5。
  • MeeGo Netbook UX 1.0:特別適合佇小筆電佮行動上網裝置 (Mobile Internet Devices, MID) 的系統架構佮使用者環境。
  • gnome-applet-remmina:客端遠端桌面工具,支援 RDP, VNC, NX, XDMCP 佮 SSH。
  • gnome-gmail:gnome 桌面佮 Gmail 終於結合矣。
  • eekboard:全新的虛擬鍵盤介面。
  • ibus-handwrite:iBus 這馬已經支援手寫漢字輸入矣。
  • systemd:新的系統階段管理工具 (session manager),取代 upstart。
  • OpenSCAP:支援 SCAP (Security Content Automation Protocol) 協定。
  • 支援 D 程式語言,這是 C 佮 C++ 程式語言的進化版(Fedora 14 提供 LLVM D 語言編譯器佮函式庫)。
  • gcc 4.5 編譯器。
  • NetBeans IDE 6.9 Java 軟體開發環境。

想欲進一步瞭解關於 Fedora 14 的新功能,請參考怹的釋出公告

2010年10月20日

行列輸入法的新發展

誠久無來報告關於行列輸入法的新發展矣。老刀最近這幾天共行列科技公司廖明德通幾若張批信,其中廖先生共老刀透露伊有拍算重新製作行列數字鍵對照表的計畫。意思就是講,利用 0~9 這 10 个數字鍵(親像 PC 鍵盤正手爿數字的部分、標準手機鍵盤等)以行列輸入法拍字,將變做是可能的代誌。老刀當然正面肯定這件代誌繼續發展落去,而且已經準備欲製作予 OpenVanilla 佮 gcin 專用的行列數字輸入法的 .cin 輸入法鍵碼表格矣。另外,批信內底嘛提著現此時佇 Android 智慧手機系統頂懸,利用行列輸入法拍入漢字的方法。

下跤是老刀今日寫予廖先生的批信內容:

廖先生:

前信您提到關於在 Android 手機使用行列輸入法的事情, 正好我所用手機是使用 Android 的 HTC Desire,而且目前已經有善心人士製作了蠻棒的「行列注音輸入法」(請參考 Mobile01 這一篇討論),使得在 Android 手機上面得以使用接近於實體鍵盤的打字速度。如果您也有 Android 手機,我極推薦您使用這個。

在「行列注音輸入法」尚未推出之前,我是透過 LIME 輸入法環境(LIME 採類似 OpenVanillagcin 的作法,是允許使用者自行外掛 .cin 鍵碼表的輸入法環境)再掛入行列30數字輸入法 (array30num) 的方式達成。array30num 只取行列輸入法的數字部分,舉例而言,3^, 3-, 3v 全部以數字鍵 3 表示,所以「行」字取「9113」、「列」字取「173」,雖然重覆字增加了,但搭配 LIME 內建詞庫的輔助,使用上也算方便。

欣聞您打算釋出行列數字的鍵碼對照表,我非常樂見此事發展。至少在 PC 上面可以完全使用數字輸入文字,而且也大大增加將行列輸入法植入各家手機系統的可行性(如 iPhone 的 iOS、Nokia 的 Symbian 和成千上萬的 Java 手機系統等)。同樣地,我也樂意將它改寫成 OpenVanilla 和 gcin 可用的 .cin 表格,讓有興趣的朋友們多一道選擇。

老刀  敬上

2010年10月11日

Mac OS X 10.6 Mail 收發電子批信的故障診斷

對網際網路無蓋熟似,而且拄開始改換使用 Mac OS X 作業系統的生手來講,想欲設定 Mail 來收發電子批信,可能是一場惡夢矣。

好佳哉蘋果佇 Mail 內底提供了「連線診斷」的功能(佇「視窗」->「連線診斷」內底),透過「青燈」佮「紅燈」,就會當幫助使用者揣出可能發生問題的設定所在。想欲知詳情,請參蘋果公司頂禮拜推出的這篇技術支援文件

2010年10月5日

Magic Trackpad 開箱大典

頂禮拜蘋果台灣分公司開放佇線上商店網站販賣 Magic Trackpad 了後,老刀當然愛把握這个機會拍落訂單(佇 9/30 暗時 11:30),蘋果亞洲公司透過協力國際快遞公司 TNT,佇 10/4 中晝已經共 Magic Trackpad 現貨對新加坡送來老刀手頭。扣掉 10/2~10/3 拜六佮禮拜日貨運公司歇假,等於干焦 3 个工作天就收著貨,佮網站所講的「7 个工作天」相比,應該愛共怹比大頭拇。

包裝內底有:Magic Trackpad 本體、包括正體漢文在內的「快速入門」國際版、保固書、藍芽管理證書。就當老刀想講欲準備 3 號電池鬥入 Magic Trackpad 的時間,發見蘋果公司佇出廠的時陣,就已經預裝 2 粒永備鹼性電池(請參考下跤這張相片),所以一開箱就隨會當使用,真正是貼心。廢話減講,紲落來老刀就以身邊的 iMac,來共逐家報告試用過程吧。

拍開 iMac 的藍芽功能、並且揤 Magic Trackpad 電源,iMac 連鞭就會當掠著 Magic Trackpad(現出 "Apple Wireless Trackpad")【毋知影這敢是蘋果公司佇 Magic Trackpad 猶未上市時陣的內部號名?】,並且自動完成配對。紲落來利用 Mac OS X 10.6.4 的「軟體更新」共 Magic Trackpad 和多點觸控式軌跡板更新 1.0 掠轉來鬥入系統,重新開機了後,「系統偏好設定」內底會增加一个「觸控式軌跡板」項目。無毋著,這个所在就是提供你自訂 Magic Trackpad 功能的所在。

佇這个「觸控式軌跡板」系統偏好設定內底,蘋果公司提供予使用者自訂「單指」、「雙指」、「三指」佮「四指」手勢的功能,配合怹提供真清楚的解說影片,使用起來,一點仔攏無困難矣。 有這个功能強大的 Magic Trackpad 了後,歹用的 Apple Mouse 滑鼠就是加出來的「廢物」矣;當然是愛共這隻「鳥鼠」拆掉,節省寶貴的桌頂空間啊。

老刀當然並無共使用 Windows 的朋友放袂記,嘛仝款佇 Windows XP SP3 下跤佮 Magic Trackpad 配對使用(想欲瞭解老刀是按怎佇 Windows PC 下跤配對使用的朋友,會當參考我進前這篇文章)。毋過真可惜,雖然 Magic Trackpad 佇電腦鬥入驅動程式了後嘛是會當使用,毋過因為蘋果並無提供親像 Mac OS X 下跤彼款方便的自訂工具,所以 Magic Trackpad 等於只是一隻普通的滑鼠爾爾,真正是無彩這个好物。

這擺老刀所翕的開箱相片,抱括佇 Mac OS X 10.6.4 佮 Windows XP SP3 使用 Magic Trackpad 的螢幕畫面,攏已經囥踮我的 flickr 相簿內底,歡迎逐家來去參觀。