2010年9月27日

Mac Pro 的 ATI Radeon X1900 XT 顯示卡嘛出包矣

根據蘋果公司 9/24 公布的這篇技術支援文件,對 2006 年 8 月開始到 2008 年 1 月中間出廠、採用 ATI Radeon X1900 XT 顯示卡的 Mac Pro 電腦,若是拄著畫面歪膏揤斜的時陣,可能就適用蘋果公司的延長保固方案。這擺受著影響的顯示卡,序號上尾 4 个號碼帶有 "V6Z”(請參考下跤的圖),你的 Mac Pro 若是採用這款顯示卡,但是並無出現畫面歪斜,就暫時無免換顯示卡。

TS3420-ati_graphics--001-mul

受著影響的顯示卡,序號上尾 4 个帶有 “V6Z”【圖片來源:蘋果公司網站

你的 Mac Pro 顯示卡若是「中獎」,請共顯示卡剝落來(毋知影怎樣剝顯示卡的朋友,請參考這篇說明),提去蘋果公司的授權維修服務商免費更換一片新顯示卡。這个延長保固計畫的有效期間是對「Mac Pro 購買日期的三冬內」抑是「到 2011 年 1 月 31 日為止」,以保固時間上久的計算方式為準。

2010年9月22日

予 Android 手機專用的「行列注音輸入法 1.0 版」使用心得

真濟人知影老刀是行列輸入法的愛用者。老刀迎接 HTC Desire 入門到今已經超過 4 個月,雖然伊的 Android 2.2 系統誠好用,但可惜一直揣無實用的行列輸入法環境(老刀家己是使用 LIME 3.0.9 掛入 LIME 行列 30 數字版拍漢字,算做是「半个」行列輸入法),雖然 LIME 作者答應欲佇未來的版本正式支援行列輸入法,毋過現此時想欲佇 Android 手機使用行列輸入法拍字,總感覺有淡薄仔遺憾。

今仔日網友 cwy01 佇 Mobile01 網站宣布講:伊已經開發出予 Android 手機專用的「行列注音輸入法」(請參考這篇介紹專文),看來一寡行列輸入法的愛用者已經咧「自力救濟」開發 Android 手機專用的行列輸入法環境,對所有行列用戶來講,當然是真讚的消息。這擺老刀就閣再親身試看覓,提供第一手的使用心得報予逐家知影。

行列注音輸入法就親像伊的名仝款,就是提供「行列」佮「注音」2 種輸入法表格的 Android 輸入環境。只要你佇 Android Market 頂頭拍「行列注音」做關鍵字,就會當揣著安裝程式;紲落來只要按照 Mobile01 網站的介紹專文,應該就會當瞭解伊的操作方式。這套軟體提供的行列輸入法介面已經接近規格書所寫的標準,提供了「行列標準鍵盤」佮「行列簡易」2 款螢幕鍵盤。毋但按呢爾爾,嘛收錄新酷音輸入法詞庫的簡化版;利用這个內建詞庫,會當予逐家減少拍字的時間。另外,行列輸入法「w+數字鍵」輕鬆拍入標點符號的功能,佇行列注音輸入法嘛保留落來(揤牢「空白鍵」2 秒),真正是袂歹用。

毋過現此時的行列注音輸入法 1.0 版猶有一寡缺點:

  1. 英文鍵盤毋是主流的 QWERTY 型式,佮大部分朋友來講,有適應上的困難。【9/23 補充:1.1 版已經提供支援 QWERTY 鍵盤】
  2. 而行列簡易鍵盤的數字鍵,並毋採用標準電話數字鍵的型體。若是改用標準電話鍵盤排列,應該可使增進拍入漢字的效率。【9/23 補充:1.1 版已經採用標準電話數字鍵的型體】
  3. 行列注音輸入法提供的行列輸入法 array30.cin 版本是舊版(只支援 big-5 範圍)。若會當改用支援 Unicode 2.0 字集(如「堃」即屬於此範圍)的鍵碼表,實用性一定會大大增加。舊版鍵碼表佇拍入標點符號的功能頂懸,漏列了一寡符號(親像①②③……等),因為行列注音輸入法使用了舊版鍵碼表,所以嘛是有漏列符號的問題。【10/11 補充:現此時的 1.4 版已經支援到 unicode 3.0 範圍,漏列的符號嘛已經補足】

雖然如此,至少行列注音輸入法提供了實用行列輸入法環境,而且作者嘛已經答應欲改進老刀頂懸所講的問題,後一版的行列注音輸入法,真正是予人期待矣。

老刀祝福逐家中秋節快樂!

一年一度的「全民烘肉節」又閣來矣。老刀佇遮祝福逐家烘肉、月餅配柚仔食飽飽食適量就好;食傷多有損健康喔】,中秋賞金領甲飽!

老刀因為這幾天無閒共手頭的數百片搖滾音樂 CD 專輯,利用 iTunes 10 數位化建檔的關係,消失了幾若工。暫時無法度提供資訊新聞報予逐家知影,若有不週的所在,敬請原諒。

2010年9月8日

對「𨑨迌」2 字,閣再論 Safari 對 Unicode 漢字的支援

iTune 10 vs. Safari 5.0
蘋果公司昨昏推出 Safari 5.0.2 for Mac/Windows 新版。老刀進前捌特別針對 Safari for Windows 佮 Unicode 漢字的支援做過幾若擺試驗,這擺 5.0.2 新版推出,當然愛閣再來試驗一擺。毋過真可惜,結果嘛是仝款予人失望。以「𨑨迌」這 2 个字來講,其中「𨑨」這字(屬於 Unicode 3.1 範圍)佇 Safari 5.0.2 for Windows 內底,無論是佇正手爿頂面的 Google 搜尋抑是佇網頁內底,攏總變做四角箍仔(佮較早的版本相仝),真是一點仔都無進步。

毋過真奇怪,佇蘋果公司無偌久進前推出的 iTunes 10 for Windows 頂懸,「𨑨迌」2 字顛倒是正確現出。敢講 iTunes 10 佮 Safari 5.0.2 是用無仝款的 API 所開發?仝間公司的軟體會按呢做,真正是予人厚疑猜矣。

你若有興趣想欲複習老刀較早所做的試驗,歡迎來參考下跤這幾篇報導:

2010年9月6日

NVIDIA 推出予筆記型電腦專用的 GeForce 400M 系列圖形處理器

NVIDIA 頂禮拜五佇德國柏林發表上新的圖形處理器 GeForce 400M 系列。這个專門予筆記型電腦專用的系列,包括中階的 GeForce GT 445M, 435M, 425M, 420M 佮 415M,猶閣有高階的 GeForce GTX 470M 佮 460M。

佮桌頂電腦用的 GeForce 400 系列圖形處理器仝款,400M 系列嘛是採用 Fermi 核心,支援 DirectX 11。根據 NVIDIA 的講法,400M 系列會當提供使用者增強的網頁瀏覽、耍 game,以及觀賞藍光影片等;包括提供高畫質 (HD) 影片傳去 Facebook 緊 5 倍的速度,嘛提供上緊到 10 倍超高速度予你耍 StarCraft II(星海爭覇2)。

根據 NVIDIA 官方部落格的報導,包括宏碁 (Acer)、華碩 (Asus)、三星 (Samsung)、聯想 (Lenovo) 在內的協力廠商,嘛已經仝步推出採用新款 400M 系列圖型處理器的筆電【老刀按:來臆看覓,後一代的蘋果 MacBook 佮 MacBook Pro 敢會採用 400M?】。想欲進一步瞭解關於 400M 系列圖形處理器的性能佮規格,歡迎來去 NVIDIA 的產品網頁

2010年9月4日

gcin for Windows 提供 64 位元 beta 試用版

老刀佇 Windows 下跤誠愛用的漢字輸入法環境 gcin,昨暗終於推出 64 位元 beta 試用版,對有咧使用 64 位元版本 Windows Vista 佮 Windows 7 的朋友來講,應該是天大的好消息;另外,因為 Windows Vista 佮 Windows 7 系統提供的「大易」佮「行列」輸入法介面頂頭一直有問題無解決,所以對這 2 種輸入法的用戶來講,gcin for Windows 64 位元版的推出,嘛是解決怹問題的終極解答。

gcin for Windows(32/64 位元)會當來遮掠,鬥入 64 位元 Windows 專用的 gcin 的步數是:

  1. 先鬥 gcin-inst.exe,這是包括 32 位元輸入法主程式在內的 gcin 輸入法環境安裝程式。
  2. 鬥入 gcin-ime64.exe,共頂懸 32 位元版輸入法主程式,替換做 64 位元版輸入法主程式。

若對使用 gcin for Windows 有任何建議抑是回報問題,歡迎來去 gcin for Windows 官方討論版

【註:老刀是 gcin 行列輸入法表格的製作者,若是對行列輸入法部分若有任何問題,嘛歡迎直接佮我討論喔!】

2010年9月2日

蘋果公司的 9/1 產品發表會實況錄影

蘋果公司一如預料,佇 9/1 召開的發表會中發表了新的 iPod 系列,包括 iPod TouchiPod nanoiPod shuffle,加上 Apple TV。作業系統 iOS 4.1 (予 iPhone 佮 iPod Touch 專用)、iOS 4.2(iPad 專用),佮 iTunes 10。蘋果公司已經共這擺產品發表會錄影囥佇 Apple Events 網頁。有興趣的朋友,歡迎來去觀賞。

2010年9月1日

Adobe 正式推出 Lightroom 3.2、DNG Converter 6.2 佮 Camera Raw 6.2 更新

就佇 Adobe Labs 網站釋出 Lightroom 3.2 RC、DNG Converter 6.2 RC 佮 Photoshop Camera Raw 6.2 RC 的 3 禮拜後(請參考老刀進前這篇報導),Adobe 終於正式推出予 Windows 佮 Mac OS X 平台使用的 Lightroom 3.2、DNG Converter 6.2 佮 Camera Raw 6.2 更新程式。有需要的朋友,歡迎來去 Adobe 公司下載網頁掠轉來鬥。