2010年8月31日

ATI-AMD 推出顯示卡驅動程式 Catalyst 10.8 更新

AMD 頂禮拜已經推出新版驅動程式 Catalyst 10.8 for Windows/Linux 更新檔,老刀建議有咧使用 ATI Radeon HD 系列顯示卡的朋友掠落來更新

Catalyst 10.8 for Windows 新增加的功能有:

  • 支援 OpenGL ES 2.0:佇瀏覽支援 OpenGL ES 2.0 規格網頁的時陣,會當充分利用著 3D 顯示加速的快感。
  • 新的視訊品質預設選項(佇「圖形設定」內底的「影像」內底,選「所有設定」)。
  • 佇 Quad ATI CrossFireX 下跤,ATI Eyefinity 的效能會得著真大進步。
  • 佇咧耍 StarCraft II(星海爭覇2)的時陣,已經會當使用反鋸齒 (anti-aliasing) 的功能。

Catalyst 10.8 for Linux 新增加的功能有:

  • 支援 SUSE Linux Enterprise Desktop (SLED)/SUSE Linux Enterprise Server (SLES) 第 11 版的 SP1 更新。

Catalyst 10.8 for Windows/Linux 除了頂懸的新功能以外,一寡已經佇舊版發見著的問題嘛已經修正。想欲閣較了解關於 Catalyst 10.8 的消息,歡迎參考 ATI-AMD 的版本公告:

2010年8月30日

予 HTC Desire 專用的 Android 2.2 系統更新檔:有好有歹

Android 2.2 Update for HTC Desire

HTC 有了頂擺 Hero 手機系統升級的歹經驗,這擺推出予 HTC Desire 專用的 Android 2.2 (Froyo) 系統更新就誠細膩矣。雖然這个更新佇頂禮拜五就已經推出,毋過一來老刀禮拜六、禮拜日攏總無閒,二來予「Mobile01 白鼠黨」先試鬥一下看反映按怎,應該是較安全的作法。好佳哉 Mobile01 白鼠黨的反映親像袂䆀【註:敢若嘛有一寡人佇升級系統了後拄著問題】,所以今暗老刀就決定親身來做升級實驗矣。

老刀的 HTC Desire 這幾工佇 Android 2.1 系統下跤,不時跳出正手爿這个提醒做系統升級的畫面,揤「確定」了後就自動進行系統(韌體)升級,經過差不多 5 分鐘(韌體更新中央,有經過幾擺關機閣再自動重開)就完成矣。

Android 2.2 版主要的新功能有:

  1. 應用軟體佮 JavaScript 執行的速度較順、較緊。
  2. 共應用軟體徙去 SD 卡。
  3. 開放 3G 無線網路(熱點)佮電腦共用。
  4. 支援漢字語音輸入(用喙講就會當出字,需要無線網路連去 Google 伺服器)。
  5. HTC 新提供「手電筒」工具,利用翕相機的閃光燈變做是手電,猶有 3 段光度控制。

另外老刀嘛發見更新成功了後,系統所占的記憶體空間有較省。雖然如此,我嘛有發見一个缺點:手寫輸入敢若支援 big-5 範圍的佮一部分 unicode 2.0 的漢字爾爾(親像「堃」就寫袂出來;原本佇舊系統有支援 CJK Ext-B 範圍的數萬字 Unicode 3.1 漢字集),凡勢是因為 HTC 共這幾萬个漢字的筆劃紀錄擲挕掉,所以有法度空出來遮爾濟記憶體空間吧【老刀註:這點真正是大大退步,甚至比 iPhone 的手寫輸入閣較慘】;好佳哉會使利用 LIME 輸入法解決一部分問題。

下跤這段影片,是 Google 官方對 Android 2.2 系統的介紹:

2010年8月22日

MacBook Pro:按怎提出(抑是鬥入)記憶體

蘋果公司佇上新一批更新的技術支援文件內底,這篇技術文件增加了 2010 年的上新機種說明。範圍包括 2008-2010 年各種型體的 MacBook Pro 拆殼提出(抑是鬥入)記憶體的步數。對真濟朋友來講,應該有參考的價值。所以佇遮引出來,提供逐家參考。

老刀補充一點:關於蘋果佇這篇文件內底所寫「官方講法」的記憶體容量規格,其實袂當代表彼款 MacBook Pro 上大支援的記憶體容量。老刀建議你入去 OWC 的 MacBook/MacBook Pro 記憶體專頁(雖然並無一定愛共怹訂購記憶體),但是入去遐查著的記憶體容量規格,應該就是你 MacBook Pro 的真正「肚量」矣。

2010年8月21日

關於 Mac OS X 的 64 位元核心上定定問著的問題 (FAQ)

蘋果公司上新一批推出的技術支援文章內底,這篇的技術支援文件提供了真濟人想欲知影關於 64 位元系統核心的問題解答。包括了:

  • 我欲按怎知影當咧執行 64 位元系統核心?
  • 執行 64 位元系統核心,對定定使用的應用軟體有啥物影響?
  • 按怎佇 32 位元核心佮 64 位元核心之間切來切去?
  • 按怎揣出佗一个系統延伸程式 (extension) 是 32 位元?【老刀註:延伸程式佇大部分的場合內底,就是驅動程式】
  • 佗幾款蘋果電腦產品本底就使用 64 位元核心?

2010年8月18日

Mac Pro & Mac mini 快速入門:Mac 新手指南

今仔日蘋果公司更新了這篇 Mac Pro 佮 Mac mini 專用的技術支援文件。對進前趁蘋果台灣分公司購物網站標毋著價數、搶著 Mac mini Server 的新手來講,這篇入門文章應該會當替怹解決大部分的問題。

補充一下:想欲複習蘋果官方 iMac 專用的技術支援文件,點這篇 iMac 快速入門:iMac 新使用者指南就著矣(雖然版本有淡薄仔舊)。

2010年8月17日

OpenVanilla 0.9.1 for Mac 推出

包括老刀在內,真濟人愛用的輸入法工具 OpenVanilla 已經推出 0.9.1 版,這个新版有下跤 2 種版本:
  • Mac OS X 10.5 (Leopard)/10.6 (Snow Leopard)
  • Mac OS X 10.4 (Tiger)
這个 OpenVanilla 新版除了(終於)提供漢文介面以外,根據計畫主持人 lukhnos 的說明,嘛修正下跤 2 个所在:
  1. 佇 Mac OS X Snow Leopard 頂懸,螢幕保護程式要求輸入密碼的時陣,輸入法並無正確切換去英數字模式的問題。
  2. 佇 PowerPC 機器頂懸,無法度使用 generic 模組的問題。 
想欲掠轉來鬥,請揤這个所在

2010年8月16日

QuickTime 7.6.7 for Windows 更新

蘋果公司頂禮拜五推出予 Windows XP/Vista/7 專用的 QuickTime 7.6.7 更新,主要是修正佇咧放送影片的時陣,可能會發生程式結束抑是無正常執行程式碼的安全性更新(請參考這篇說明)。

老刀建議有咧使用 Windows 的朋友,趕緊揤頂懸的連結掠安裝程式轉來鬥吧。

2010年8月14日

蘋果牌三號充電電池,其實就是三洋 Enerloop?

baterie 蘋果公司頂個月底推出附佮 6 粒三號充電電池的 Apple Battery Charger 了後,引起全世界真濟人的興趣。因為蘋果公司家己並無生產電池,到底電池是啥人代工,真是予人真厚疑猜矣。

捷克網站 SuperApple.cz 針對這个問題做了試驗【老刀註:若看無捷克文,會使參考 Google 的英文翻譯】。怹共包裝內底的 6 粒電池其中 4 粒提出來做充/放電試驗的結果(包括電壓-放電時間(請參考正手爿的圖)、工作電壓、總電量、電池內阻等),發見佮日本三洋牌 Enerloop 電池(產品番號 HR-3UTG)十分相近,差不多會當講是仝一款電池。毋過怹犧牲 1 粒電池共伊拆開觀視,並無發見任何廠商的標誌。

SuperApple.cz 嘛公布了怹共 Apple Battery Charger 佮蘋果牌電池拆開過程所翕的相片,雖然相片真濟,但是嘛誠精彩矣。有興趣的朋友,會使去遐參考看覓

2010年8月11日

微軟公司推出一寡 Mac 系列軟體的更新

微軟公司今仔日推出一寡 Mac 系列軟體的更新檔,包括:

根據微軟公司的說明,主要是針對安全性的問題做更新。有需要的朋友,請家己點頂懸的連結去掠轉來鬥吧。

2010年8月10日

Adobe Lightroom 3.2 佮 Photoshop Camera Raw 6.2 已經咧欲完成

Adobe 今仔日佇 Adobe Labs 網站正式釋出 Lightroom 3.2 RCPhotoshop Camera Raw 6.2 RC,提供逐家免費試用。除了 Lightroom 3.2 新增加共相片直接傳入去 Facebook 的功能以外,Lightroom 3.2 RC 佮 Camera Raw 6.2 RC【老刀註:包括予 Photoshop CS5 專用的外掛程式 (plug-in) 佮 DNG Converter】攏有新增加支援一寡翕相機(包括最近上時行的 Sony Alpha NEX-3/NEX-5),並且嘛更新鏡頭資料庫。按照軟體界的慣例,RC (Release Candidate) 是正式版本推出進前的最後一个試用版;所以嘛代表正式版的軟體,應該無偌久就會推出矣。

Lightroom 3.2 佮 Camera Raw 6.2 有提供 Windows 佮 Mac OS X 平台的版本。想欲試用的朋友,請點頂頭的連結入去掠來鬥吧。

2010年8月9日

免錢的虛擬機器軟體 VirtualBox 3.2.8 推出

Oracle 頂禮拜五推出免錢的虛擬機器 (Virtual Machine, VM) 軟體 VirtualBox 3.2.8 版。這个版本主要是修正舊版的程式錯誤,親像虛擬記憶體管理、圖形介面、USB 等。想欲進一步知影新版修正了啥物所在,請參考怹的改版紀錄

VirtualBox 有提供 Windows、Mac OS X、Linux、Solaris/Open Solaris 平台的版本,歡迎逐家入去 VirtualBox 的下載網頁掠轉來鬥

2010年8月4日

Magic Trackpad for Windows Boot Camp 驅動程式已經予人破解!

蘋果公司頂禮拜發表新款的指標輸入裝置 Magic Trackpad 雖然是針對 Mac 用戶設計,而且蘋果公司嘛特別推出予 Boot Camp 環境專用的 Windows 32/64 位元驅動程式,毋過真可惜,看怹並無拍算欲支援其他非蘋果牌的 Windows PC 電腦。

好消息佇遮:米國 UNEASYsilence 公司已經對 Windows Boot Camp 版本的 Magic Trackpad 驅動程式升級檔內底,共其中驅動程式的部分分離出來,單獨囥佇怹公司的網站予逐家掠。所以咧,一般的 Windows PC 鬥入這份驅動程式了後,嘛會當使用 Magic Trackpad 矣。

所以,老刀真正會使等 Magic Trackpad 一引進台灣,就捾一台轉來用。到時陣敬請期待我的實用心得喔。

2010年8月2日

JailbreakMe 2.0:隨時破解/復原你的 iPhone

有 iPhone 的朋友應該攏真歡迎這款破解工具。JailbreakMe 2.0 的用途,就是予你不管時攏會使破解(抑是復原)你的 iPhone 韌體(只要你徙一支手指頭仔就好,真正有夠簡單)。唯一的要求是:毋通共 iOS 版本號碼升級超過 4.0.1 版,這是現此時 JailbreakMe 2.0 支援的上新 iOS 版本。

想欲試看覓嗎?請用你的 iPhone 連去 JailbreakMe 網站吧,祝你成功喔!【老刀按:我只是報這个入口予你,毋通問我欲按怎用 JailbreakMe,因為我家己是用 HTC Desire 啦,哈哈】

2010年8月1日

iTuber:專門掠 YouTube 影片的工具軟體

最近老刀收著來自德國 Xnet Communications GmbH 公司(也就是出品 Captain FTP 的公司)通知,來試用怹上新的產品 iTuber(1.2 版),結果是真正滿意,所以特別共逐家介紹一下。

iTuber 的功能,就是予你共影片傳去佇 YouTube,嘛會當共 YouTube 影片掠轉來,以 .mp4 視訊格式囥佇你的 Mac 電腦內底(抑者是用 .mp3 音訊格式,掠影片內底的聲音部分)。

使用 iTuber 的方式嘛真簡單,就親像 Mac OS X Finder 的方式:「拖」字訣。請參考下跤這 4 段官站提供的影片就會當了解:


傳去佇 YouTube


對 YouTube 掠視訊影片轉來


對 YouTube 掠影片內底的音訊部分


iTuber 嘛支援蘋果牌遙控器

根據老刀這幾工的試驗,除了少數有版權保護的影片以外,差不多 90% 的 YouTube 影片攏會使利用 iTuber 掠落來。你若想欲佇 YouTube 頂頭掠影片抑者是聲音轉來保存,iTuber 應該是真方便的工具。

iTuber 是定價 20 箍米金(16 箍歐元)的共享軟體,原廠提供 30 工的全功能試用;想欲試用 iTuber,你需要 Mac OS X 10.5 (Leopard) 以上的系統。