2010年5月29日

ATI-AMD 推出顯示卡驅動程式 Catalyst 10.5

ATI-AMD 佇 5/26 正式針對 Windows 佮 Linux 平台推出上新版的驅動程式 Catalyst 10.5(點遮入來掠)。新版增加的功能有:

Windows 版:

  • 佇 ATI Radeon HD 3000/4000 系列頂懸,支援 120Hz 的螢幕更新率。
  • ATI Overdrive 改善:支援的 ATI Redeon HD 圖形顯示器連接多重螢幕的時陣,會當完整支援的超頻功能。

Linux 版:

  • 支援 SLED/SLES (SuSE Linux Enterprise Desktop/Server) 11 SP1 early look。

想欲瞭解 Catalyst 10.5 閣較詳細的說明,請參考怹的版本公告:

2010年5月27日

Fedora 13:頭一手的使用報導

Fedora 13Fedora 13 已經佇台灣時間 5/25 暗時 10 點正式推出。因為發見有一寡鏡射站 (mirror site) 已經「偷走」先開放予人掠的關係,官方 10 點正式開放的時陣,其實老刀已經咧欲共 x86_64 平台的 DVD .iso 檔掠了;我共 Fedora 13 鬥好勢矣的時陣,猶袂到暗時 10 點半,跤手真緊,叫我第一名啦!
因為較早鬥入 Fedora 12 的 Pentium 4 舊電腦,現此時已經變做文書機,這擺老刀鬥入 Fedora 13 的電腦設備是:
  • 處理器:Intel Core 2 Quad (Q6600), 2.4GHz。
  • 記憶體:4 GB。
  • 顯示卡:ATI-AMD Radeon HD 5450,1GB DDR3 顯示記憶體。
  • 硬碟機:Seagate Barracuda 7200.9 160GB SATA (ST3160812AS)。
鬥入系統的過程真緊,半點鐘以內就會使鬥好勢。進入系統了後,試用一寡 Fedora 13 新加入的功能了後,下跤是老刀感覺佮前一版 (Fedora 12) 較無仝款的所在:
  1. 色緻管理:正式支援 ICC 格式的色緻管理檔案。你會使進前佇 Windows 抑是 Mac OS X 所製作的 ICC 檔案直接提出來予 Linux 使用,予螢幕、掃瞄器、印表機佮翕相機的色緻會當保持仝款。【佇「系統」->「偏好設定」-> Color Profiles】
  2. 漢字輸入法:預設提供 iBus 佮 X compose table 二个輸入法,可惜 iBus 老刀實在用袂慣勢,X compose table 是用來拍入拉丁文佮特殊符號的,並毋是漢字輸入法;老刀加灌入 gcin 來代替 iBus。【老刀按:gcin 是附佮佇 Fedora 13 的套件之一,毋過預設並袂鬥入電腦,需要使用者家己動手鬥】
  3. 漢字字型:增加「文泉驛正黑」、「文泉驛等寬正黑」、「文泉驛點陣正黑」3 个字型。
  4. 字元對應表:漢字的部分,已經會當對應中日韓表意文字擴充 A, B, C 區(也就是 Ext-A、Ext-B 佮 Ext-C 字型)。
  5. 郵件帳號設定:已經對 Evolution 分出來,單獨變做一个工具。【佇「系統」->「偏好設定」->「電子郵件設定值」。
  6. Shotwell Photo Manager:淡薄仔成蘋果公司 iPhoto 的軟體,用來處理匯入的數位相片,取代原本所用的 F-Spot。【「應用程式」->「美工繪圖」】
  7. 磁碟公用程式:這个新加入 Fedora 的工具實在有夠讚,佇 Linux 下跤管理內/外接接硬碟佮 USB 隨身碟,已經變做是真簡單的代誌。
  8. OpenOffice.org 3.2:因為鬥入 Fedora 是選擇「軟體開發」毋是預設 Graphical Desktop(圖形桌頂電腦)的關係,OpenOffice.org 佇 Fedora 13 並無共伊鬥入去,煞變做愛家己動手。無像較早的 Fedora 佇鬥好的時陣,OpenOffice.org 就己經踮系統內底等你叫伊出來用矣。
想欲知影所有的新功能,歡迎去參考 Fedora 13 的版本公告
另外,網路開講軟體佮 Fedora 12 仝款是用 Empathy(版號 2.30.1),支援 AIM/MSN/GTalk/Yahoo 視訊語音開講。毋知影頂一版檔案傳送的問題敢改好勢?另日老刀會來試看覓。

今暗暫時就報告到遮,請待紲落來的報導。

2010年5月22日

佇 VirtualBox 3.2.0 for Windows 頂懸鬥 Mac OS X 10.6 (Snow Leopard)

原本是叫做 Sun VirtualBox 的免錢虛擬機器軟體,因為 Sun Microsystems 公司去予 Oracle 規个買去,紲來改名號做 Oracle VM VirtualBox。Oracle 佇 5/18 宣布 3.2.0 更新版已經推出矣。

這擺新的 3.2.0 版,上主要的新增功能佮改進有:

  • 試驗性的支援 Mac OS X Server 客端【老刀按:「客端」就是「鬥佇虛擬機器內底的系統」】。
  • 佇 64 位元的「主端」【老刀按:「主端」就是「用來鬥 VirtualBox 的系統」,一般講來,也就是你揤電腦電源開機了後,所進入的系統】頂懸,支援動態調整記憶體的使用量(Oracle 共這个功能叫做 "memory balloning");
  • 64 位元的「主端」支援「頁面融合 (Page Fusion)」,會當共仝款性質的虛擬機器(親像數个執行 Windows XP 的虛擬機器)所占的記憶體空間合做伙,予上少的記憶體空間會當執行上濟的虛擬機器數量。
  • 佇 Linux 佮 Windows 客端,支援處理器的「熱插拔」。也就是講,你會當佇虛擬機器當咧進行的時陣增加抑是減少「虛擬處理器」的數目。
  • 佇支援 VT-x/AMD-V 的處理器佮 64 位元客端頂懸,VirtualBox 會使用大記憶體頁面,以提升虛擬機器的性能。
  • Windows 客端支援多重螢幕。
  • 3D 顯示支援 OpenGL 2.1。
  • 支援將欲推出的 Fedora 13。

想欲閣較知影 VirtualBox 3.2.0 更新的所在,請參考怹的更新紀錄

老刀想講:既然 VirtualBox 已經支援 Mac OS X Server 客端,按呢共 Mac OS X 10.6 (Snow Leopard) 鬥佇 VirtualBox 的虛擬機器內底,應該嘛是無問題。所以家己來試鬥一下,果然成功。下跤是我鬥入 Mac OS X 10.6 的畫面,來予逐家參考一下:

VirtualBox 3.2

SnowLeopard on VirtualBox

鬥入 Mac OS X 客端的過程佮一般鬥入 OSX86 的方式攏差不多,想欲進一步了解的朋友,請入來遮留字討論。

2010年5月18日

共 iPhone 佮 iPod Touch 超頻的絕招

真濟人知影 iPhone 3G 處理器的工作時脈是 600MHz、iPhone 3GS 是 833MHz,毋過蘋果公司可能是為著省電、降熱的目的,佮怹降頻到 412MHz 佮 600MHz。根據 Gadgets DNA 這篇報導,號名叫做 hackulo 駭客發表了共 iPhone 佮 iPod Touch 處理器回復原本工作時脈的步數:

  1. /System/Library/System/System Configuration/PowerManagement.bundle/ 檔案夾。
  2. 揣著號名叫做 com.apple.SystemPowerProfileDefault.plist 的檔案。
  3. 共頂懸的檔案改名(親像 SystemPowerProfileDefaultbak.plist),刁工予你的 iPhone/iPod Touch 袂認得伊(另工若想欲回復原廠設定,共伊改名倒轉來應該就會使)。
  4. 重新開機,大功告成!

雖然按呢會使加速你的 iPhone/iPod Touch,毋過有了電(電池較無擋頭)、過熱的副作用。是毋是欲超頻,你家己決定吧!

【老刀按:我家己無 iPhone/iPod Touch,並且我最近共 HTC Desire 娶入門,正式徛踮 Android OS 這爿。若是共 iPhone/iPod Touch 耍歹去,毋通來揣我啊】

2010年5月15日

5/14 老地方冰果室聚會紀錄


MAQ Core i7 展示
原由 Gontera 上載

這禮拜五老地方冰果室的例行聚會,特別請到已經一站仔無看著的 Ascent 來展覽 Core i7 處理器的 MAQ 電腦,利用 Photoshop CS 5、Steam 等軟體,予逐家看著 Intel 上新處理器的威力。

老刀紮著新買的 HTC Desire 手機參加這場聚會,嘛利用伊試翕了幾張相片(新手機的第一擺翕相,就獻予老地方冰果室矣),老刀特別共原圖貼踮我的 Flickr 相簿內底,提供有興趣的朋友參考。

朋友阿勇拄拜託朋友對米國紮轉來 iPad 3G,並且嘛佇現場開箱拆包裝,來予逐家「鼻芳」一下。這擺的例行聚會,煞變做是上新、上熱門的 3C 商品展覽會矣,哈哈。

想欲知影這擺聚會的相關討論,請來去老地方冰果室交流區,嘛歡迎逐家去遐留落你的意見。

2010年5月10日

5/07 老地方冰果室聚會紀錄

頂禮拜五暗時佇滴咖啡(伊通店)舉辦的老地方冰果室例行聚會,這擺閣再請著「敗家網」的代言人利得彙小姐來獻唱歌曲做伙娛樂。捧著伊的福氣,親像老刀的好朋友阿鑫,佮環遊世界轉來的香港羅先生等一寡足久無出現踮滴咖啡的朋友猶閣倒轉來矣。

這擺利得彙小姐演唱的曲目有:

  1. 不想他啦
  2. 目光
  3. 不要你的我
  4. 愛陪
  5. My Flower

攏總 5 調歌曲。老刀嘛勉勵利小姐「愛做真正的 rocker,毋通做假影的 rocker (fake rocker)」,繼續實現真正的搖滾精神。好朋友 Alex Tsai 的朋友,佇 pub 駐唱英國人 David Wig 嘛答應另工欲來滴咖啡,表演搖滾音樂來佮逐家鬧熱一下【老刀按:佮 David 開講了後,知影伊真佮意搖滾名團 AC/DCMotörhead,實在期待伊的表演】。

老刀這擺閣再紮著翕相機來錄影,毋過因為 Canon PowerShot A720 IS 並毋是啥物專業的錄影機,畫質若有較䆀,請多多包涵。其他的影片攏已經囥佇我的 YouTube 頻道,歡迎逐家入來看我的錄影喔!

關於這擺聚會的討論佇遮

2010年5月4日

Fedora 13 已經開始進入倒算

Linux 的牌子遮爾濟款,Fedora 一直是老刀上愛用的版本。佇 Fedora 12 推出將近半冬了後,Fedora 的第 13 版(代號叫做 Goodard)將欲佇 5/18 正式問世【已經改佇 5/25 推出!】

Fedora 13 主要的重大功能有:

  • 自動鬥入印表機驅動程式。
  • 自動鬥入語言套件。
  • 重新設計的使用者帳號工具。
  • 校正螢幕佮掃瞄器的色緻管理【老刀按:這个功能真讚,終於會當有接近 Mac OS X 的水準矣】。
  • 試驗性的支援 nVidia 顯示卡頂頭的 3D 顯示【老刀按:ATI Radeon 系列的 3D 顯示,對 Fedora 13 開始正式列入支援】。
  • 利用 Internet 鬥入 Fedora 的新步數:利用新網站 http://boot.fedoraproject.org/ 所提供的開機磁碟映像 (boot image),你會使利用包括 USB 隨身碟、CD、DVD、軟碟片在內的媒體開機,並且自動開始鬥入系統的過程。
  • NFS 的更新。
  • Zarafa 群組軟體。
  • Btrfs 檔案系統支援「還原點」。【老刀按:Btrfs 是 Linux 系統 ext2/ext3/ext4 磁碟格式的「接班人」,將是後一代的 Linux 磁碟格式。雖然對 Fedora 12 開始就支援 Btrfs,但是佇 Fedora 13 內底,Btrfs 猶原是試驗階段】
  • Netbeans 6.8 已經支援 Java EE 6 的完整規格。

想欲了解關於 Fedora 13 閣較詳細的說明,歡迎來去參考怹的版本公告

最後,對 PowerPC 的朋友來講可能愛失望矣,因為 Fedora 13 干焦支援 x86 佮 x86_64 硬體平台爾爾。按照怹的說明,因為 PowerPC 已經毋是主流的硬體平台,所以開發團隊並無閣再編製 PowerPC 專用的版本。怹嘛歡迎有興趣的朋友去加入 PowerPC 特別愛用者俱樂部 (PowerPC Special Interest Group),來訂造家己的 PowerPC 套件。

2010年5月1日

蘋果恬恬推出 iTunes 9.1.1.12 修正更新

iTunes 9.1.1.12

蘋果公司今仔日恬恬仔推出 iTunes 9.1.1(版本號碼:9.1.1.11) 的修正更新,解決 128kbps AAC 格式的音樂無法度佇 iPhone 內底出現歌詞的問題(請參考蘋果公司討論版)。更新了後,版本號碼變做是 9.1.1.12。

已經鬥入 iTunes 9.1.1 的朋友,若是你的 AAC 格式音樂放歌詞的需要,請重新去蘋果網站重掠 iTunes 轉來鬥吧。