2010年3月29日

Fermi 顯示卡:nVidia GTX 400 系列來矣!

猶會記得老刀舊年 11 月這篇 nVidia Fermi 圖形處理器袂赴佇今年底推出講著,新一代的 Fermi 圖形處理器將延後到今 (2010) 年第 1 季推出吧?便看第 1 季就欲結束,nVidia 真正佇接近月底的 3/26 推出以 Fermi 為核心的 GTX 480/470 圖形處理器

nVidia 共 GTX 480 定位做頂級旗艦。對伊的性能看來,應該會當滿足𨑨迌 3D game 的爽度;GTX 470 是定位佇中階頂懸。根據 nVidia 官方網站公布的資料,GTX 480 佮 470 的規格是:

  GTX 480 GTX 470
CUDA處理器核心 480 448
繪圖時脈(MHz) 700 MHz 607 MHz
處理器時脈(MHz) 1401 MHz 1215 MHz
材質填充率(億/秒) 42 34.0
記憶體時脈(MHz) 1848 1674
標準記憶體配置 1536 MB GDDR5 1280 MB GDDR5
記憶體介面頻寬 384-bit 320-bit
記憶體頻寬(GB/秒) 177.4 133.9
NVIDIA SLI®-ready技術 2-way/3-Way 2-way/3-Way
支援GeForce 3D Vision 支援 支援
NVIDIA 3D Vision Surround Ready 支援 支援
NVIDIA PureVideo®技術 HD HD
NVIDIA PhysX™-ready技術 支援 支援
NVIDIA CUDA™技術 支援 支援
Microsoft DirectX 11 11
OpenGL 3.2 3.2
匯流排支援 PCI-E 2.0 x 16 PCI-E 2.0 x 16
通過Windows Vista認證 支援 支援
最高數位解析度 2560x1600 2560x1600
最高VGA解析度 2048x1536 2048x1536
標準顯示器接頭 Mini HDMI/
2 个 Dual Link DVI
Mini HDMI/
2 个 Dual Link DVI
多重螢幕支援 支援 支援
HDCP 支援 支援
HDMI 支援 支援
HDMI音訊輸入 內部 內部
最高GPU溫度 105℃ 105℃
最高繪圖卡功耗(W) 250 W 215 W
最低系統功耗需求(W) 600 W 550 W
額外電源接頭 6-pin & 8-pin 6-pin & 8-pin

國外硬體的專業網站,親像 TweakTownGuru3D 已經共 GTX 480/470 做了非常詳細的紹介佮性能評比。想欲進一步了解的朋友,歡迎來去參考看覓。另外,台灣的硬體廠商嘛真配合,仝步推出 GTX 480/470 的新顯示卡。想欲趕緊體驗新產品的威力嗎?銀票加準備小可仔吧!

2010年3月27日

蘋果優仕八德店一日遊

DSC08155

早時佮好朋友「麥客迷俱樂部」的阿鑫佇 iChat 開講,講著欲去蘋果今仔日開始試賣的 Apple Premium Reseller (APR) 蘋果優仕八德店參觀。老刀想講天氣遮呢好,乾脆就對汐止騎車過去(對汐止一路往西,直直行 13.6 km 就到位矣【按:我車頂有鬥碼表】),順紲共咧欲生鉎的身軀練一下。

到優仕的亭仔跤拄著嘛是老朋友的頭家 Randal ,伊親切擛手叫我共車仔牽入去,發見朋友美童 (Prettyboy) 兄已經佇內底咧鬥相共,伊嘛利用手頭的 Sony Alpha 700 共我翕了正手爿這張相片。聽 Randal 講,我是開店以來頭一个共車仔牽入去停的人,搶著這个「頭香」,老刀嘛感覺真光榮矣。

老刀嘛隨身紮著細台的 Canon PowerShot A720 翕相機,佇店內底做一寡影像紀錄。老刀揀其中一寡貼佇下跤予逐家參考一下:

IMG_0178

IMG_0201

IMG_0175

IMG_0176

IMG_0174

IMG_0190

IMG_0198

2010年3月24日

利用「預覽程式」共一寡 PDF 檔案合併做一个

蘋果公司這篇技術支援文件提供了這个真實用的撇步。這个功能原本我叫是干焦會使佇商業版的 Acrobat Standard/Professional 使用,沒想到附佮佇系統的「預覽程式」就做會到,實在愛來共蘋果呵咾一下,老刀嘛借這个所在報予逐家知影。
  1. 用「預覽程式」拍開逐个你想欲合併的 PDF 檔案。
  2. 共頂懸逐个「預覽程式」視窗的「側邊欄」攏總叫出來(顯示方式 -> 側邊欄 -> 顯示側邊欄)。
  3. 選「縮覽圖」模式(顯示方式 -> 側邊欄 -> 縮覽圖)。
  4. 共逐家 PDF 頁面的縮覽圖拖做伙(你嘛會當拖動 PDF 檔案的頁面縮覽圖,來調整前後頁)。
  5. 拖好勢了後,揀「檔案 -> 儲存為...」共你調整好的 PDF 存檔。

2010年3月18日

拍開 Mac OS X 10.6 對 NTFS 磁碟的原生支援

雖然 Mac OS X 自足久以前就支援 NTFS 磁碟格式(Windows XP/Vista/7 預設的磁碟格式),可惜除非你鬥入第三方的 NTFS 驅動程式(親像免錢的 NTFS-3G,抑是改良的商業版 Tuxera NTFS for Mac),若無,你的 Mac 只會當讀內底的資料(無法度寫入),講起來算是支援一半爾爾。

其實佇上新版的 Mac OS X 10.6 (Snow Leopard) 已經「恬恬仔」支援的 NTFS 磁碟寫入功能。毋過可能是為著保持相容性抑是穩定性的關係,蘋果公司並無針對這點特別說明(所以老刀講怹是「恬恬仔」做矣),想欲了解拍開這个限制的做法,會使參考 MacUknow 這篇「10.6限定 - 開啟原生NTFS讀寫支援」。毋過看來敢若真費氣?

免驚,老刀介紹你這帖 SL-NTFS 2.0.1。共伊掠轉來鬥了後,佇你的「系統偏好設定」內底應該會當揣著 SL-NTFS。共伊拍開,將會出現下跤的畫面:

SLNTFS

SL-NTFS 提供了較簡單、好用的管理介面;透過這个工具,想欲控制你的 NTFS 磁碟就毋是困難的代誌矣。

2010年3月14日

予 gcin for Windows 支援 CJK 統一表意文字擴展 B 區 (Unified Ideographs Extension B) 的撇步

gcin 現此時已經變做我佇 Windows XP 所用的唯一漢字輸入法介面矣。因為 gcin 採用 Pango 文字顯示引擎,佇預設的狀況下跤,Windows 版 gcin 的揀字窗並無法度現出 Ext-B 範圍的漢字,準講你的輸入法表格有對應著 Ext-B 的漢字嘛是仝款。

好佳哉 gcin 官方討論內底,已經有人貼出解決的方法:就是佇 %USERPROFILE% 系統變數表示的資料夾內底增加一个號名做 .pango.aliases 的純文字檔,並且共伊加入這逝:

MingLiU = "MingLiU,MingLiU-ExtB,simsun"

重新執行 gcin 了後,gcin 的揀字窗就會當正確現出 Ext-B 漢字矣。

為著予逐家會當閣較方便使用 gcin,老刀已經寫好批次檔 ext-b.bat,掠轉來執行了後,你的電腦就會自動替你做好頂懸的代誌。下跤這張圖,就是 ext-b 的執行畫面:

Ext-B for gcin

2010年3月12日

行列輸入法(40 鍵版)for gcin

gcin 原本是佇 Linux 下跤發展的輸入法介面,幾個月前 gcin for Windows 測試版一推出,連鞭就變做老刀佇 Windows XP 下跤一定愛使用的輸入法介面。就親像 Mac OS X 頂懸有 OpenVanilla 仝款,gcin 提供一个開放框架,予使用者囥入家己訂做的輸入法,真正是方便。

真濟朋友攏知影老刀是行列輸入法的用戶。因為上早(第一代)的行列輸入法是 40 鍵的版本,著欲改善行列輸入法的拍字效率,行列科技公司共伊改良做 30 鍵的版本,嘛已經推廣真久矣(第一代的 40 鍵版干焦出現佇倚天中文爾爾,自從 Windows 3.1 以後的系統內底所佮的行列輸入法攏是 30 鍵版),毋過佇網路頂頭定定有人問著「佗位會當揣著行列輸入法 40 鍵版」的問題,可見猶有一寡人有需要。老刀共進前替 OpenVanilla 所做的行列輸入法 40 鍵版表格提出來,修改做會使予 gcin 接受的輸入法表格.cin 原始檔佇遮),佇 Windows XP 試用到今猶無發現問題(佇 Linux 下跤應該嘛會當照常使用)。

有需要的朋友,請共 array40.gtab 掠落來囥踮 C:\Program Files\gcin\table\ 內底(以 Windows XP 為例),然後用「記事本」修改 C:\Program Files\gcin\table\gtab.list【老刀註:拍開小看一下,應該就知影欲按怎改矣】,重新啟動 gcin 了後,就會當使用這个行列輸入法 40 鍵版矣。想欲進一步了解的朋友,請來去 gcin 的官方討論版參考這篇文章

2010年3月6日

Mac 的 CD/DVD 㧎片欲按怎解決?

這个問題應該是真濟拄入門的 Mac 用戶定定會問著的問題。解決的方式雖然真濟,凡勢你我所使用的步數就無仝款。今仔日 OWC 部落格文章整理出解決問題的逐个步數,真正有夠精彩,其中有幾步是我原本毋知影的方法,老刀感覺真有參考的價值。所以特別共怹轉貼佇下跤:

  • 開機的時陣共滑鼠(倒手爿的鍵)抑是觸控板揤牢咧。
  • 開機的時陣共 Option 揤牢咧,螢幕會顯示你想欲用來開機的磁碟。這个時陣揤鍵盤頂懸的「退片」鍵,應該會當共 CD/DVD 退出來。
  • 用「目標磁碟」模式開機(揤 T 開機,螢幕會現出 Firewire 的標仔),然後揤「退片」鍵。
  • 用 open firmware 模式開機(揤 Command+Option+O+F),拍入 eject cd 等待 CD/DVD 退片,紲落來拍入 mac-boot(註:這步干焦適合佇 PowerPC 處理器的 Mac)。
  • 清除 PRAM(揤 Command+Option+P+R 開機莫放,到聽著第 2 聲為止),電腦會再度裝載你的光碟機,這陣就會使共 CD/DVD 退出。
  • 對睡眠模式醒過來的時陣,電腦會再度裝載光碟機,這陣嘛會使共 CD/DVD 退出。
  • 有一寡 Mac 開機了後攏莫做任何代誌,差不多過 10 分鐘了後就會自動共光碟片退出來。
  • CD 囥佇電腦傷久去燒甲翹翹㧎咧。所以共你的 Mac 關機完全放予冷了後,開機彼當時就會使共片退出來。

2010年3月2日

PowerMac G3/G4 SCSI 卡的差別

蘋果公司 Mac 電腦的心臟改換做 Intel 處理器了後,採用 PowerPC G3/G4 處理器的 PowerMac 嘛已經咧欲行入歷史。最近蘋果公司共怹一寡技術支援網頁有關 PowerPC 處理器機種電腦的文章做最後一擺的更新佮「封存」,嘛表示對 PowerPC 處理器電腦的支援已經結束。

昨日蘋果公司封存這篇有關 PowerMac G3/G4 SCSI 卡規格說明的技術支援文章,對猶咧使用中古 PowreMac 的朋友來講,嘛有淡薄仔參考價值,所以老刀閣再共這篇文章轉貼出來予逐家參考。

想欲佇 Mac OS X 使用 SCSI 卡佮週邊裝置的朋友請注意來。有一點愛報予你知影:逐个 Mac OS X 系統支援 SCSI 的程度攏無啥仝款,根據老刀的經驗佮國外網站的報導,對 SCSI 支援上差是 Mac OS X 10.6 (Snow Leopard),然後是 Mac OS X 10.4 (Tiger),老刀個人無建議佇這 2 个系統使用 SCSI 週邊(反正 Snow Leopard 並無支援 PowerPC 處理器,無差啦)。顛倒原本佇 Mac OS X 10.4 (Tiger) 無法度掠著 SCSI 的 PowerMac 電腦,佇鬥入 Mac OS X 10.5 (Leopard) 並且重灌 SCSI 卡驅動程式了後,差不多攏會當回復正常(尤其是 Adaptec 的 PowerDomain 系列 SCSI 卡),手頭猶有 SCSI 卡佮週邊裝置的朋友,會使來試看覓。

過年來到高雄行春


橫渡高雄港
原由 Gontera 上載
這幾暗下班了後,攏咧整理過年歇睏時仔所翕的相片,算來嘛已經真濟工無貼新聞來佮逐家分享。隨著相片沓沓仔整理好勢,就趁這陣來轉貼一寡行春的照片來予逐家參考看覓。

過年彼幾工,台灣中、北部的濕冷,相信逐家猶有印象;毋過來到南台灣的高雄市,顛倒是出大日頭,熱甲愛食枝仔冰降溫,真正予人想袂到。這工我坐渡輪過去足濟冬無拜訪的旗津,喙食旗津海產,跤踏旗后炮台,來到十外冬無拜訪的旗津,心內真是歡喜。可惜下晡欲轉去高雄市的時陣,拄著欲排幾若公里長的隊伍去坐船,等甲跤痠手軟,就絕對毋是輕鬆的代誌矣。

這擺老刀共所翕的相片攏囥佇 Flickr 相簿內底,歡迎逐家來參觀看覓。嘛歡迎分享過年時去耍的好所在,報予逐家知影喔。