2010年1月28日

佇台灣,我看衰 iPad!

逐家進前的預料證實是真的,蘋果公司終於佇 1/27 正式推出平板電腦 iPad,怹共 iPad 定位佇 iPod TouchMacBook 中央,希望會使食著電子冊的市場。蘋果佇價數頂頭,提供對上基本款(16GB,Wi-Fi 網卡)米金 $499 到上高級款(64GB,Wi-Fi+3G 網卡)米金 $829,攏總有 6 種選擇。雖然看起來是袂䆀,但是 iPad 佇台灣敢會成功,我家己並無遮爾樂觀矣。

我看衰 iPad 佇台灣的未來,理由有下跤幾點:

  1. 電子冊市場狀況不明。現此時台灣幾間主流的大冊商抑是雜誌社攏無公開表示欲支持電子冊,照這馬的範勢,將來 iPad 佇台灣開始賣的時陣,商場頂頭的電子冊應該是無夠額來支持 iPad 的生存。當然囉,你若無讀漢文冊的需要,對英文冊的讀者來講,iPad 應該是真好用的物件。
  2. 台灣猶未支援 iTunes 音樂商店、App Store 嘛無夠本土化,加上無支援 Flash 佮 ActiveX,一寡網站無法度正常佇 Safari 頂頭現出,嘛減損 iPad 佇台灣的附加價值。【老刀註:網站無法度正常佇 Safari 頂頭現出,其實袂當怪蘋果公司;真正的罪人是所有利用微軟公司的 ActiveX 開發網頁的台灣廠商,怹可能到今猶毋知影:怹所做的網頁予「非 Internet Explorer 用戶」有偌爾痛苦!】
  3. iPhone OS 對正體漢文輸入法的支援差。因為 iPad 佮 iPhone 攏是採用 iPhone OS 系統,所以 iPhone 漢字輸入歹用的缺點,佇 iPad 頂懸應該嘛攏相仝。老刀已經佇進前的文章內底不只一擺說明 iPhone OS 手寫拍入漢字的功能傷差(真濟字無法度寫出來),而且除了手寫以外,干焦有注音、拼音輸入法會當用爾爾。對倉頡、大易、行列、嘸蝦米……等使用者來講,除非共 iPhone OS 破解 (Jailbreak)、鬥入第三方推出的輸入法介面以外(嘛失去蘋果公司的原廠保固),想欲佇 iPad 內底欲使用 iWork 建立文件,應該會足艱苦。
  4. 軟體鍵盤歹拍,嘛(可能會)無法度用注音拍入漢字。毋但軟體鍵盤無實體鍵盤回饋力的問題爾爾;根據蘋果公司公布的影片,iPad 軟體鍵盤採用 3 排鍵(毋是注音慣用的 4 排),而且上正手爿彼一列嘛去予蘋果公司省去;對慣勢用注音拍字的朋友來講,注音符號無夠揤的狀況一定會出現。雖然 iPad 會當利用藍芽另外接無線鍵盤來用,但是嘛增加使用的成本。
  5. 現此時猶未支援正體漢文的使用介面(有簡體漢文介面)。我臆蘋果公司可能嘛知影現此時的 iPad 佇正體漢文的支援方面,有頂懸的問題猶未解決,所以當咧修補這个問題。等怹補好了後,就會使利用「韌體更新」的方式,共正體漢文介面補完全。

毋管如何,佇 iPad 無正式引進台灣、老刀無去店頭試用進前,頂懸所寫攏是個人所臆。敢是事實,等伊引進台灣了後便知分曉。

沒有留言: