2009年6月30日

iPhone 3G S 是會爆炸的烘爐?

中華電信幾工前才宣布講,新款的 iPhone 3G S 預定佇今 (2009) 年 8 月引進台灣,相信有誠濟朋友已經等袂赴想欲換機矣。毋過熟識老刀的朋友應該攏知影,我一直攏是「反 iPhone」陣營的支持者(尤其是漢字輸入法的部分,用一句普通話講,根本就是「劣質玩具」);iPhone 的新聞一出我的手,應該攏無好聽話【老刀咧想:中華電信凡勢愛送老刀一台 iPhone 3G S 試用,予我寫開箱文兼替怹寫一寡好話,哈哈!】。今日 iPhone 3G 的罪狀又閣加一條:

iPhone 3G S 燒甲會燙人兼會變色!

根據 Gadget Lab 報導,有愈來愈濟人拄著 iPhone 3G 傷燒的問題。iPhone 後壁的白色殼仔燒甲脫色了後,竟然出現親像 "Hello Kitty" 彼款的粉紅仔色!iPhone 毋但佇 Apple 的官方討論版四界予人姦撟爾爾,連 PC World 雜誌的編輯 Melissa J. Perenson 小姐嘛講著:毋但後壁,iPhone 的頭前嘛是仝款燒甲擋袂牢;伊只是耍一个𨑨迌物仔佮拍開瀏覽器看 Michael Jackson 過身的新聞爾爾。

按照 iPhone 過熱的範勢看來,內底電池的壽命真是予人煩惱矣!更加愛細膩的所在是,鋰電池傷燒會增加伊爆炸的危險。鋰電池(手機電池佮筆電電池)燒甲爆炸的案例已經足濟,除非蘋果公司趕緊改寫 iPhone OS,改善伊的電力管理功能(尤其新出的 iPhone OS 3.0 版的電力管理比 2.x 舊版閣較䆀),若無,我看爆炸的主角輪著 iPhone 3G S 應該是早慢的代誌。

總講一句:想欲買 iPhone 3G S 的朋友,付錢進前一定愛想予詳細矣!

2009年6月28日

改編 Windows XP 的行列輸入法,予伊支援拍入漢語字詞

行列詞庫輸入法

雖然附佇 Windows 內底的行列輸入法是免費使用,毋過行列科技公司嘛有另外推出會使拍入字詞的行列字詞輸入法。老刀今日應該是「食飽傷閒」,家己動手改編 Windows XP 內底的行列輸入法,除了共行列字詞輸入法定義的 60,373 个詞加入(請參考正手爿的圖)以外,臺灣閩南語的 Unicode 3.1 漢字嘛是一定愛支援矣啦!(註:Windows Vista 佮 Windows 7 系統內底的行列輸入法只有支援 Unicode 2.0 爾爾,當然嘛無支援字詞輸入)

想欲利用行列字詞輸入法拍入漢語詞,根據「行列輸入法寫真」(作者:廖明德先生)第 7 章的說明,規則是:

  • 二字詞:取第一个字的首、尾字根,佮第二个字的首、尾字根;若是單根字,就只取一个字根。
  • 三字詞:取第一个字的首、尾字根,第二个字的首根,佮第三个字的首根;若是單根字,就只取一个字根。
  • 四字詞抑者是超過四字:取頭前四个字的首根。
  • 字根拍煞,揤「'」(半型的單引號)出詞。

趕緊共怹寫踮遮,較免後擺放袂記。

這个修改版是老刀對行列科技公司網站掠 Unicode 原始對照表轉來製作。改編這个行列輸入法了後,毋管是拍漢語抑是拍台語文章,實在是方便誠濟。

2009年6月26日

Firefox 3.5rc3 推出

頂禮拜 Mozilla.org 才推出 Firefox 3.5rc2,今日就閣再推出 3.5rc3 版。老刀認為 Firefox 3.5 正式版推出的日子應該足近矣。有需要的朋友,家己來去這个所在掠轉去灌吧!

想欲知影 Firefox 3.5 有增加啥物新功能,請參考老刀進前「Firefox 3.5 beta 4,緊!」這篇報導。

2009年6月22日

25 个跨平台又閣免錢的𨑨迌物仔

老刀倒轉來矣啦!

因為這幾工有較無閒,老刀已經有一禮拜無寫新文章。今日倒轉來,就來報好空的𨑨迌物仔予逐家知。根據 Cnet 這篇報導,怹精選了 25 个開放原始碼 (open source) 的跨平台𨑨迌物仔,怹攏有支援 Windows、Mac OS X 佮 Linux 喔!

這 25 个物仔,雖然有一寡老刀較早捌耍過,但是其中大部分老刀家己嘛是頭一擺看著,真正是袂䆀。紲落來這幾工,老刀應該是會戰甲昏天暗地矣!哈哈。

2009年6月14日

Fedora 11 新版本介紹 (2):新功能

繼續頂一篇 Fedora 11 支援平台的介紹,這篇老刀紲落來為逐家介紹 Fedora 11 的新功能。

  • 全自動的字型佮 mime-type 安裝。
  • PulseAudio 這馬已經共音量控制的功能統一,使用者毋免去逐个應用軟體內底去設定音量。
  • 新增 Intel, ATI, Nvidia 核心模式設定 (kernel modesetting, KMS),予 GNOME/KDE 圖形介面開機變閣較緊。
  • 採用 iBus 當做預設的輸入法系統(毋過老刀猶是較佮意用 gcin 拍漢字)。
  • Presto。一般咧掠升級套件的時陣攏是共規个 .rpm 檔掠轉來。佮舊版套件比起來,可能新、舊版套件內底的大部分資料是相仝的。灌入 Presto 了後,因為升級系統的時陣干焦會掠新、舊版套件無仝款的所在爾爾,差不多會使減掠 60%-80% 的資料。毋過 Fedora 11 預設是無灌入 Presto,所以你家己需要佇終端機視窗內底拍入 yum install yum-presto
  • ext4 磁碟格式經過足久的試驗了後,這擺 Fedora 11 終於共伊收入變做預設的磁碟格式。雖然毋管是功能、速度表現攏比較早的 ext3 好誠濟,毋過 ext4 到底會使佇 Fedora 內底活偌久,實在予人煩惱啊;因為功能比 ext4 閣較強的 Btrfs 磁碟格式(試用版),佇 Fedora 11 內底已經開始提供使用者選擇試用矣。
  • 提升虛擬用戶登入的桌面寸尺到 1024x768 以上。
  • 提供 MinGW,會使予使用者佇 Fedora 內底開發 Windows 應用軟體。

想欲知影 Fedora 11 新版閣較詳細的說明,請參考怹的版本公告

2009年6月11日

Fedora 11 新版本介紹 (1):支援的平台

雖然比原來預定的時間延了幾工,Fedora 11 終於佇 2009 年 6 月 9 日正式推出矣。身為 Fedora 長年的愛用者,老刀當然是連鞭共 Fedora 11 掠轉來試用囉。Fedora 11 有下跤幾種平台的版本:
  • i586:予 Intel Pentium 處理器以上(包括佮 Intel 處理器相容的 AMD, Cyrix/VIA 處理器等)個人電腦專用,32 位元系統。
  • x86_64:予處理器支援 AMD64 佮 Intel EM64T 指令集的個人電腦專用(想欲你電腦的處理器敢有支援 AMD64/EM64T 指令集,請參考這个所在),64 位元系統。
  • ppc:予處理器採用 PowerPC G3/G4/G5 專用,32 位元系統。另外,有 Sony Playstation 3 的朋友嘛會當灌這个版本,予你的 PS3 變做一台個人電腦喔!
想欲進一步瞭解你的電腦是毋是符合 Fedora 11 的要求,請入來遮參考。老刀紲落來將欲佇後一篇介紹 Fedora 11 的新功能,敬請期待。

2009年6月9日

Safari 4 正式版:有進步,但猶是無合格!

今日蘋果公司佇 WWDC 2009 大會期間除了發表 iPhone 3G S、更新 MacBook Pro 系列(Unibody MacBook 趁這擺小改款,順紲併入 MacBook Pro 系列;對今日開始,MacBook 只賰白殼仔機一款型體)、宣布 Mac OS X 10.6 (Snow Leopard) 升級價數佮推出日期以外,另外一个逐家現此時就享受會著的物件就是 Safari 4 正式版開放逐家掠。相關的新聞別个網站已經報誠濟矣,所以老刀就共這篇文章的重點囥佇 Safari 4 的使用感想頂懸。另外因為老刀進前試用 Safari 4 Beta 的感想有夠䆀(請參考我較早「Safari 4 Beta for Windows 送你一字:差!」這篇報導),這擺特別閣再提 Firefox 3.0.10 出來佮新出的 Safari 4 正式版相比,予逐家做伙來做論斷。

頂擺老刀發表 Safari 4 Beta 有記憶體的問題,好佳哉正式版已經共這个所在修理好勢;這陣毋管老刀按怎拍開/關掉 Safari 4,攏無閣再發生 Safari 4「食 CPU」予電腦頓頓的狀況矣!雖然佇穩定性方面會使講是進一大步,可惜佮 Unicode 3.1 漢字的支援頂頭猶是仝款了然矣。請看下跤這 2 張圖:

It Sucks... the Official Safari 4

▲頂懸:Safari 4 ▼下跤:Firefox 3.0.10
(點落去會使看大張圖)

Firefox 3.0.10 is better

請針斟看紅箍仔的所在,親像「𤆬」(U+241AC)、「𥐵」(U+25435) 這款 Unicode 3.1 範圍的漢字攏無現出。這嘛難怪,因為設計 Safari 的阿啄仔毋捌漢字,按怹的思考方式,應該是袂特別針對漢字的問題去做修正(除非有人去共怹反映)。看起來這一版 Safari 4 猶有一大段路愛行矣!

2009年6月8日

smcFanControl 予一寡 iMac 佮 MacBook 燒過頭

smcFanControl 是專門予 Intel Mac 使用的電腦電風控制軟體。雖然伊免錢閣好用,毋過根據這篇報導看來,smcFanControl 佇 Mac OS X 10.5.7 下跤,會予一寡 iMac 佮 MacBook 燒甲當機。尤其佇咧備份硬碟(讀/寫大量資料)、仝步 iTunes 抑是仝步 iCal 的時陣,電腦傷過燒紲來當機的慘狀是定定咧發生矣!

有一个真趣味的所在,是干焦有一部分 iMac 佮 MacBook 會燒過頭,並毋是所有的 iMac 佮 MacBook 攏有這款問題。老刀特別提醒有咧使用 smcControl 的朋友,佇怹猶未出新版解決這个問題進前,暫且莫做備份佮仝步資料吧。

2009年6月4日

做伙來去「萬里 1 號」食烘肉攕

迷你的燒烤攤朋友阿猜開了「二階堂」提供誠濟好食物仔(請參考老刀進前試食「原味肉燥」佮「風味番仔薑(辣椒)醬」這篇報導)以外,最近嘛開了「____炭烤」網站佮「萬里 1 號」烘肉擔賣起烘肉來囉。頂個月室友心花開講伊想欲食燒肉,老刀趁著這个機會,拍電話佮予阿猜約束了後,就𤆬伊做伙拼去「萬里 1 號」交觀。

炭火預熱

佇萬里鄉瑪鋉路頂頭的「萬里 1 號」店頭小小一間,若無張持,車就會駛過頭矣;老刀頭一擺去,真正就予我駛過頭。好佳哉沿路有咧注意門牌號碼,並無駛傷超過。拄好「萬里 1 號」店頭對面就是免費的停車場,對駛車的朋友來講,真正是好消息。老刀到店頭的時陣,阿猜佮阿金總舖已經咧烘炭相等矣!

阿猜招待的和風沙拉

「萬里 1 號」的產品真正簡單:就「孜然羊肉」、「孜然牛肉」、「香草豬肉」3 款烘肉,全部 20 箍一攕。聽阿猜講,老刀是彼暗的 VIP,所以伊家己來烘予老刀佮室友做伙食。另外,這擺因為香草豬肉拄好欠貨(只賰小可仔),這暗主要是試孜然羊肉佮孜然牛肉 2 款;另外,正手爿這𥐵「和風沙拉」是頭家的特別招待。

鮮嫩多汁的去筋牛肋

烘甲拄好的孜然羊肉,肉汁誠飽但是袂油,加了孜然粉佮一寡阿猜、阿金總舖特調的香料秘方,完全食無羊肉的臭羶味,食幾若攕落來嘛袂啥喙焦。聽阿金總舖咧講,孜然牛肉是採用牛髕仔骨,毋過入冰庫進前有用手工共牛筋沓沓仔撠掉,實在是足厚工。老刀問怹:遮爾好食的烘肉準備嘛遮厚工,一攕 20 箍台票敢會趁錢?阿猜笑笑仔應著:「以後拍算欲開餐廳,這陣一爿試做一爿試食,餐廳到時一定會準備上好的用心佮材料來款待人客」,有影足感心。紲來囥一張室友試食孜然羊肉的相片佇遮「有圖有真相」呢!

聽阿猜講起,現此時「萬里 1 號」除了佇店頭內底以外,嘛有接受人客預訂「機動出擊」,也就是親像部隊操練場邊仔的「野戰小蜜蜂」仝款,共擔仔拎去車頂載到人客指定的地點,現場烘予伊食夠氣,真正是服務夠工。想欲去「萬里 1 號」揣阿猜食烘肉的朋友,會使來參考下跤這張地圖:


在較大的地圖上查看路觀圖:萬里 1 號

2009年6月1日

蘋果恬恬仔延長一寡 MacBook Pro 的圖形處理器保固到 3 冬

因為進前 nVidia 出產的 GeForce 8600M GT 圖形處理器出了封裝的問題,頂禮拜蘋果公司恬恬仔共 2007 年 5 月至 2008 年 9 日中間出產的 MacBook Pro 內底的圖形處理器保固延長到 3 冬(原來是提供 2 冬保固服務),這个問題看起來狀況是比逐家原本想的閣較嚴重。下跤是蘋果公司的說明:

If the NVIDIA graphics processor in your MacBook Pro has failed, or fails within three years of the original date of purchase, a repair will be done free of charge, even if your MacBook Pro is out of warranty.

英文版的說明全文佇遮。想欲進一步了解的朋友,嘛會當參考蘋果公司的說明(漢文網頁),毋過彼个漢文網頁老刀佇咧寫這篇文章的時陣猶未更新(猶原是寫著「自原始購買日期後 2 年內故障」),請逐家小注意一下。