2009年4月28日

GPS Cycle Computer 共 Windows Mobile PDA 變做 GPS 記錄器

禮拜日下晡佮朋友燦哥佇網路開講,講著這幾冬來聽搖滾音樂的心得,愈講愈歡喜。老刀決心共身邊的 KISSSymphony Alive IV 提去燦哥遐做伙欣賞,用伊「發燒級」音響來放這个 2 塊 1 套的專輯,一爿泡茶一爿聽歌嘛是享受。話講到遮,就進行這擺的鐵馬出遊(汐止到松山往回)。

GPS Cycle Computer

佮進前騎車出遊的經驗無仝款的所在是,老刀這擺加紮一件家私,就是灌入 GPS Cycle Computer(現此時上新的版本是 3.103)軟體的古董 Mio P550 衛星導航 PDA,順紲趁這个機會紮伊出來試驗。倒手爿是 GPS Cycle Computer 的畫面。佮手頭的里程碼表比起來,GPS Cycle Computer 的顯示的速度 (Speed) 有一點仔無仝款,差不多佇 ±5% 左右;但是距離 (Distance) 並無明顯的誤差。

雖然 GPS Cycle Computer 的作者是開發佇 HTC Touch Diamond 手機頂頭,佇伊的 Windows Mobile 6.1 Professional 系統內底有媠媠的字型;古董 Mio P550 PDA 採用的 Windows Mobile 5.0 系統只有「新細明體」一款字型會使用,拄著螢幕下跤細字的部分實在有夠䆀。毋過想著遮爾新的軟體竟然猶原會使佇我這台古董機仔內底使用,老刀就咧欲謝天謝地啊!老刀這擺所騎的路線,是對汐止大同路斡正手爿去中興路,過中興橋倒斡入去基隆河正岸的自轉車道,然後佇松山彩虹橋出自轉車道,行虎林街迵過永春市場;轉去汐止是騎台北市八德路、南港路接汐止大同路(也就是省道台 5 線)。GPS Cycle Computer 的紀錄輸出佇 Google Earth,來予逐家參考:

拜訪燦哥

對手頭已經有 Windows Mobile PDA 的朋友來講,GPS Cycle Computer 應該是誠實用的軟體。雖然如此,因為 Windows Mobile PDA 佮智慧手機仔非常了電,為著欲增加伊的「續航能力」,老刀強烈建議使用 PDA 佮智慧手機的時陣,上好是另外加接 USB 電池補充電力,這是絕對必要矣!

6 則留言:

Henry C 提到...

我已有HTC diamond 2手機,是否安裝GPS Cycle Computer軟體,便能穫得經緯度資料?

謝謝

我主要是旅行時能利用手機獲得經緯度資料

老刀 提到...

雖然我並無使用 HTC Diamond 2,毋閣我想 GPS Cycle Computer 佇 HTC 下跤使用,應該是無問題吧?

你敢欲親身試看覓?

撲浪我 plurk 提到...

我買了iphone GS3 裝了免錢軟體MotionX-GP
S,哇哩勒~太呷電了!沒2~3個鐘頭就快要沒電了。真是頭殼疼!!

老刀 提到...

「撲浪我」先生/小姐:

就我所知影,嘛是有廠商推出專門予 iPhone 使用的外接電池產品,建議你隨身紮一二粒,對延長 iPhone 續航能力,絕對是有幫助。

提到...

我是用 HTC 勝利機+GPS CYCLE COMPUTER 3.81版,狀況良好,只是不知老刀有無碰到一個情況,就是用GPX格式匯出時,時間會差8個小時,能解決嗎!?

我是匯出到 Sporttrack這個軟體還有FunTrip這個網站,結果相同

老刀 提到...

萬:

利用 "GPX time adjustment" 功能,就會當調整。