2009年4月26日

二階堂產品試食:「原味肉燥」佮「風味番仔薑(辣椒)醬」

原本是 Adobe 專業軟體講師的朋友阿猜,決心「金盆洗手」離開拚價、惡性競爭不斷的烏暗資訊業:一个人對繁華的台北市徙去萬里鄉創辦「二階堂」,從此踏入料理世界。前幾工阿猜聯絡老刀講,怹最近開發新產品「原味肉燥」佮「風味番仔薑(辣椒)醬」2 味,想欲請老刀提供意見。頂禮拜三中晝,阿猜特別親身送去老刀的辦公室,予我感動誠久。今日老刀就來拆開攪麵試食,來感受阿猜對美食的熱情。

果然原味的「原味肉燥」

「原味肉燥」是調理包的真空包裝(請參考正手爿的相片)佮一般市面上看著的肉燥無啥仝款。一般的肉燥,親像滷肉飯的滷碎肉攏有帶肉湯。二階堂的原味肉燥是無帶肉湯的五花焦肉燥,雖然如此,一拆開真空包裝,連鞭就鼻著厚厚的蔥仔芳氣,果然特別。老刀個人認為,會採用無肉湯的焦肉燥,毋但方便包裝爾爾;因為無肉湯,肉燥較袂變歹、保存期限嘛會當延長。根據阿猜表示,無用肉湯另外一个原因,是「堅持欲予逐家應該有的份量,灌水增重的漚步伊毋願做」,真正足感心。

老刀聽阿猜講另外這味「風味番仔薑醬」(請參考下跤的相片)是用 3 款番仔薑先炒了後閣再沓沓仔翕,準備起來是誠厚工。這味番仔薑醬嘛是芳氣十足,食起來喙箍有淡薄仔麻麻,應該是有摻花椒佮一寡芳料做伙炒;另外伊的口感嘛有小可仔親像沙茶醬,毋過比市面上的沙茶醬薟足濟。對愛食薟的朋友來講,這罐番仔薑醬絕對是開脾聖品,攪飯、攪菜攏總適合。

這一罐充滿的阿猜的心血

為著欲食出肉燥的原味,這擺老刀啥物攏無加,直接共肉燥攪入煮好的麵條爾爾,先試食 2 喙麵了後,閣再摻入小可仔番仔薑醬。雖然看來真簡單,毋過肉燥內底厚厚的蔥仔,加上番仔薑醬了後,真正有夠芳。予老刀一時喙斗大開,連紲食幾若碗麵,嘛予老刀體會著阿猜對料理的用心佮熱情矣!【老刀註:想欲減肥的朋友,絕對毋通考慮這 2 款口味啦!】

因為頭一擺試食二階堂產品的印象誠好,予我開始期待怹其他的產品矣。聽阿猜講,怹除了調理包佮醬料以外,中晝嘛有供應口味特殊又閣價數公道的便當,上讚的是有網路訂購服務(台北市內有送到位)。想欲進一步了解的朋友,歡迎敲服務電話 (02) 2492-4780,抑是直接來去二階堂網站看覓。

沒有留言: