2009年3月28日

Mac OS X 閣按怎鐵皮銅骨,拄著木馬嘛是無效啦

雖然逐家攏講 Mac OS X 真安全(無啥病毒佮木馬),其實世間上並無絕對安全的系統,認真講起來,Mac OS X 只是佮 Windows 比較起來「小可仔」安全爾爾。根據這篇報導,這个 RS Plug 木馬的新變種,有可能共你的 Mac 𤆬來大災難。

毋通講 Mac OS X 是百毒不侵,無拍入管理者密碼是欲按怎會予木馬程式走入去系統內底?歹心網站表面上是提供你一寡「好空」的功能,這个 RS Plug 變種是以提供予你「觀看 HDTV 高畫質電視節目」當做藉口,當你透過歹心網站掠落摻有木馬程式來安裝的時陣,佮你灌入其他軟體仝款,系統會要求你拍入密碼;等你拍入了後,木馬就佮歹心軟體做伙種入你的系統內底矣。所以 Mac OS X 無論是按怎鐵皮銅骨的堅固,拄著木馬攏是無效!

用 Windows 的朋友嘛免歡喜、看笑詼。彼个歹心網站嘛是會偷偷仔共 Windows 用戶灌入 Zlob 系列的歹心軟體,陷害人的步數仝款是「跨平台」啊。

其實,所有的木馬程式侵入使用者系統的方式攏差不多,定定使用的散布方式,差不多是透過網站、電子批信、商業軟體的註冊機(會自動計算序號的物仔,予你通過軟體安裝程式的序號檢查)佮頂懸所講的歹心軟體。總講一句話,毋通去上來路不明的網站、莫開來路不明的批信、莫灌來路不明的軟體,就會使避免木馬程式的攻擊矣。

Firefox 3.0.8 推出

佮 3.0.7 比起來,這擺修正了 2 个安全性的問題。有咧用 Firefox 的朋友,老刀建議你利用「說明」選單內底的「檢查更新」來升級吧。

2009年3月23日

按怎用台語寫部落格文章 (4):輸入法環境佮瀏覽器

佇頂一篇文章內底,老刀已經共逐家介紹使用「NCRs 表示法」代替拍入 Unicode 漢字的方法,予你方便拍入台語用字。凡勢你已經計畫欲建立家己的台語部落格,毋過你佇開始進前若會當先來參考這篇文章,對提升你部落格文章佮瀏覽器的相容性,應該有誠大的幫助。

想欲寫出相容性上好的部落格文章,老刀建議你對「系統字型」、「輸入法環境」佮「所使用的瀏覽器」3 點來考慮。

一、系統字型:

請參考下跤 2 个佇 Firefox 3.0.7 所觀視的螢幕畫面(這是頂一篇文章的落尾段)

U+4180 on Firefox 3.0.7 U+4180 on Firefox 3.0.7

有啥物無仝?關鍵佇屬於 Unicode 3.0(嘛有人叫做 Unicode CJK Extension A)範圍的「䆀」字(Unicode 內碼是 4180)。你的電腦若無鬥入 Unicode 3.0/3.1 字型(親像「標準配備」,也就是無鬥入其他字型的 Windows 2000/XP,干焦有支援 Unicode 2.0 爾爾),佇 Firefox 內底就會看著一个內底有註明 Unicode 內碼的四角箍仔,親像頂懸倒手爿彼張螢幕畫面按呢;Windows XP 若有鬥入「新細明體更新」,系統的「新細明體」就有支援到 Unicode 3.0 範圍,「新細明體更新」另外佮附一套支援 Unicode 3.1(嘛有人叫做 Unicode CJK Extension B)的「新細明體 Ext-B」字型。

因為逐个牌子的瀏覽器無仝款,你所看著的「文章內容」可能有淡薄仔無相仝。佇 Internet Explorer 內底,系統無的字就袂現出(看起來親像「空一格」,雖然彼一格佮正港的「空格」字元並無仝款),並毋是像 Firefox 按呢會用四角箍仔代表;佇舊版的 Safari 2.x 內底就會現出伊 的 NCRs 表示式。雖然逐間公司出品的瀏覽器所定的方式無啥仝款,老刀建議你盡量用 Firefox 3.x 當做寫台語部落格的主瀏覽器。按怎講?請紲落來看下跤的說明。

二、輸入法環境佮瀏覽器:

現此時主流的輸入法環境有:

  1. Windows XP/Vista:除了系統內建的輸入法環境以外,嘛會使另外鬥入 OpenVanilla 抑是 Yahoo!奇摩輸入法等。
  2. Mac OS X:除了系統內建的輸入法環境以外,嘛會使另外鬥入 OpenVanilla 抑是 Yahoo!奇摩輸入法等。
  3. Linux:SCIMgcin

佇頂懸的輸入法環境內底,除了 Windows XP 附佮的輸入法環境以外,包括 OpenVanilla/Yahoo!奇摩輸入法、SCIM 佮 gcin 攏是利用「UTF-8 編碼格式」來處理所拍的字,並毋是正規的 Unicode 表示法。雖然佇 Internet Explorer、Firefox (2.x)、Safari (3.x) 攏會使正常現出 UTF-8 編碼處理的漢字,但若是用 Firefox 3.x 看這寡字就會變亂碼矣;所以為著欲保持你網頁的相容性,這个時陣就愛改用 NCRs 表示法才會使解決這个問題。考慮著 Firefox 瀏覽器的市占率(Windows、Mac OS X、Linux/Unix,攏總接近 20%),這是一定愛做的讓步,嘛是老刀建議你盡量利用 Firefox 3.x 來寫台語網頁的原因;萬一你若拄著無法度現出的亂碼字,才知影愛去改寫、修正。

另外,根據老刀試用 Safari 4.0 beta 的結果,網頁內底用 NCRs 表示法所拍入的漢字猶原袂當正常現出,顛倒用 Safari 3.x 完全正常;佇蘋果公司無解決這个問題進前,老刀並無建議你共 Safari 升級到 4.0 版

話講到遮,相信你對台語網頁已經有初步了解矣。老刀誠心希望這幾篇文章推出了後,會當解決逐家寫台語網頁可能會拄著的問題。最後,老刀嘛希望逐家會當共你的台語網頁報予老刀佮眾朋友知影,做伙來推廣用台語寫網頁文章啊!

2009年3月21日

按怎用台語寫部落格文章 (3):拍入 Unicode 漢字

佇頂一篇文章,老刀簡單介紹了 Unicode 佮電腦作業系統佮 Unicode 漢字的支援性。紲落來這篇,老刀將欲介紹佇電腦內底拍入 Unicode 漢字的方式。

你的電腦作業系統若毋是傷舊(Windows 2000 抑是 Mac OS X 10.2 以後,系統愈新支援 Unicode 的範圍愈闊),至少攏會當拍入 Unicode 2.0 範圍的漢字。佇第 1 篇文章內底老刀建議逐家來學拆字為主的輸入法(親像倉頡、大易、行列、嘸蝦米等),就會使輕鬆拍字矣。毋過顧慮著大部分用注音輸入拍字的朋友(尤其是毋知影按怎用華語唸、拍袂出來的時陣),抑是你的作業系統/輸入法版本無夠新(親像想欲佇 Windows 2000/XP 拍入 Unicode 3.1 範圍的漢字),就愛利用拍入「Unicode 內碼」的 NCRs (Numeric Character References) 的方式解決。老刀佇遮提供你 2 款步數:

ishida
  1. 利用石田 (ishida) 桑的 Unicode Code Converter 來查:方式誠簡單,佇彼个網頁倒手爿上頂懸的 "Characters"(字)的格仔內底,直接拍入漢字了後,揤邊仔的 "Convert"(轉換)。舉例來講(請參考頂懸的圖),拍入「迌」,查著伊的 16 進位 NCRs 是 迌,抑是 10 進位的 NCRs 是 迌 ,你佇文章內底就會當利用這个 16 進位抑是 10 進位的 NCRs 來代表「迌」。請注意,NCRs 內底的 & # ; 攏是半形英文標點符號,一定愛拍予著! cns11643
  2. 針對用華語注音拍字、袂曉念台語字的華語讀音的朋友,老刀推荐你入去 CNS11643 中文全字庫網站的「字碼查詢與下載」項目查字,怹提供了筆劃、注音、部首、倉頡、CNS、拼音、符號、拼音、部件、筆劃順序,佮包括頭前所有步數的「複合查詢」(怹猶閣有提供另外一款版本)。佇頂頭的圖內底,你仝款會當查著「迌」的(16 進位)Unicode 內碼是 8FCC。共伊改做頂懸所講的 NCRs 表示方式 (迌) 了後,就會當用佇你的網頁內底矣。

感覺袂䆀吧?有了這 2 个網站,相信「拍台語」就變做是簡單的代誌矣。後一篇文章內底,老刀將欲討論漢字輸入環境、瀏覽器佮 Unicode 漢字的相容性,來共這个系列文章做一个煞尾,敬請期待。

2009年3月19日

按怎用台語寫部落格文章 (2):Unicode 漢字介紹

舊 (2008) 年老刀寫著「按怎用台語寫部落格文章」這篇報導,推出了後誠受著逐家歡迎。因為一直攏有朋友來問著相關的問題,老刀決心來寫續集,特別整理這幾冬寫臺灣閩南語(老刀佇這篇文章後壁,就用「台語」代替)文章的心得拍踮遮,來予逐家做參考。這擺就先來替逐家介紹 Unicode 漢字,當做是紲來幾篇文章的起頭吧。

定定入來本站交關的朋友,應該知影台語用字,佮現此時台灣人所用的華語用字無啥仝款。事實上,包括台語用字在內的罕用漢字,攏收入佇「Unicode CJK 漢字集」【老刀按:CJK 就是 Chinese/Japanese/Korean 的縮寫,抑就是「漢/日/韓文會用著漢字庫」;佇下跤的文章內底,會用「Unicode 漢字」代替「Unicode CJK 漢字集」】。雖然現此時 Unicode 的規格已經訂到第 5.1 版,毋過佇主流的電腦系統,親像 Windows XP/Vista、Mac OS X、Linux 等,支援的 Unicode CJK 漢字是佇 Unicode 2.0-3.1 的範圍。想欲進一步了解 Unicode,歡迎來去維基百科遐參考;另外,嘛會當去 Unicode 官方網站參考看覓。

想欲拍包括台語字在內的 Unicode 漢字,你所用的輸入法上好是會當支援 Unicode。想欲拍 Unicode 漢字,嘛需要 Windows 2000 以後的作業系統(親像 XP/Vista;Windows 95/98/ME 的輸入法並無支援 Unicode),抑是 Mac OS X(Mac OS 9 以前的系統嘛無附支援 Unicode 的輸入法)。親像 Windows 2000/XP 的漢字輸入法支援 Unicode 2.0、Windows Vista 漢字輸入法支援 Unicode 3.1。當然囉,系統愈新,支援的 Unicode 版本就愈新、會當支援愈濟字矣!想欲了解你所用的作業系統支援 Unicode 的程度,請參考這个所在

這篇文章暫時寫到遮。紲落來,老刀後一篇將欲教逐家按怎用電腦拍入 Unicode 字,敬請期待。

2009年3月14日

動作誠緊,HP 光碟已經寄到位!

Sent from Houston, USA by HP

這禮拜一老刀正式共 HP 申請 Operating System(作業系統)佮 Driver Recovery(驅動程式復原)2 塊光碟了後,拜五暗時下班轉來厝內,就看著信箱內底有 FedEx Express(聯邦快遞)送來正手爿相片這包物件,日思夜夢的物件終於送到位矣。看著這个信封後壁特別註文是 "Extremely Urgent"(特急件),老刀特別估算一下時差,禮拜一申請的時陣佇米國是禮拜日暗時,等怹隔轉工上班佇台灣已經是禮拜一暗時抑是禮拜二透早。按呢算起來,對米國 Houston(休士頓)寄來台灣只開了 3 日爾爾,HP 這款服務實在是令人呵咾。

Where is "Taipei Country"? 毋過話講倒轉來,信封地址頂頭的 "Taipei County"(台北縣)紲變做 "Taipei Country"(台北鄉),老刀感覺真奇怪的時陣,看著 HP 所附的清單,果然無錯,原來這个問題出佇 HP 的員工傷過「假𠢕」矣(有相片為證)!一想著遮,心肝頭一陣痠軟,紲毋知影欲講啥才好?

這包 FedEx Express 送來的物件,老刀已經翕做相片貼佇 Flickr 相簿內底。到底 HP 愛呵咾抑是愛拍尻川,就交予逐家來判斷吧!

2009年3月13日

Firefox 3.1 beta 3 推出!

瀏覽網頁,早就變做逐家每日一定愛做的代誌;因為按呢,家己所用的瀏覽器性能好歹,一直受著誠濟朋友來關心。雖然 Mozilla.org 推出 Firefox 3.1 的進度可能會延後,毋過佇 beta 2 出世 3 個月後的今日,怹終於共「難產」的 beta 3 試用版推出矣(來遮掠轉去用),這有可能是 Firefox 3.1 正式版推出進前的最後一个試用版。

根據 Mozilla.org 的公告,Firefox 3.1 beta 3 主要有下跤的新功能佮改進:
  1. Gecko 1.9.1 核心。
  2. 提供 64 種語文的版本(包括正體漢文)。
  3. 終於提供「隱私瀏覽模式」,特別適合公家用的電腦使用(袂記錄你的登入帳號、密碼)。
  4. JavaScript 性能佮速度大進步。根據老刀家己試驗結果,Firefox 3.1 beta 3 佇 JavaScript 相容性檢驗的 ACID3 得著 93 分(3.0.7 版干焦得著 71 分爾爾)。
想欲進一步知影新版詳細的說明,請參考怹的釋出公告

2009年3月12日

蘋果推出會講話的第三代 iPod Shuffle 佮 iTunes 8.1

蘋果公司今日推出第三代 iPod Shuffle,新款毋但記憶容量較大、外型較古錐,並且透過 VoiceOver 技術,竟然會曉講包括漢語在內的 14 種語言(老刀註:可惜無包括「台語」),應該是伊上大的賣點吧,詳細的規格佇遮

為著配合新款 iPod Shuffle,蘋果公司順紲推出 iTunes 8.1 新版,速度除了比舊版 (8.0) 緊誠濟(尤其是當你的音樂資訊庫 (iTunes Library) 真肥的時陣,抑是佮 iPod/iPhone 仝步連線的時陣)以外,主要嘛有下跤的改進:

  1. 開放予朋友佇 iTunes DJ(原本叫做「派對隨選播放」)內底點歌。
  2. 改善掠 iTunes Plus 歌曲的效能。
  3. 手動管理 iPod 歌曲會當使用「自動加入」。
  4. 自動共 CD 的歌曲以 iTunes Plus (256kbps, VBR) 格式匯入。
新版 iTunes 8.1 仝款有提供 Mac OS X 佮 Windows 使用的版本(來遮掠),毋過目前 64 位元 iTunes 8.1 for Windows 的安裝程式猶袂推出(只有 8.0.2 版)。

2009年3月11日

Acrobat 佮 Acrobat Reader 9.1 更新

頂個月老刀報導 Adobe 針對 Acrobat 佮 Acrobat Reader 發出安全性的警告了後,Adobe 真正準時佇預告的日子修正這个問題,推出 Acrobat 佮 Acrobat Reader 9.1。

Acrobat 佮 Acrobat Reader 9.1 的釋出公告佇遮

2009年3月9日

蘋果今年第 3 季推出迷你筆電?

下跤這篇是工商時報的報導
蘋果電腦今年最新秘密武器即將在下半年推出,延續先前iPhone、Macbook Air的設計概念,蘋果準備推出最新的小筆電,其觸控螢幕仍是最大賣點。中小尺寸面板供應商勝華(2384)與蘋果過去一年合作密切,外傳蘋果小筆電的觸控面板供應也將由勝華雀屏中選,雙方合作進一步延伸到NB產品,計畫在今年第三季開始出貨。

蘋果的iPhone掀起觸控螢幕風潮,多點觸控功能備受市場矚目,觸控介面的應用也愈來愈廣泛,眼見低價的迷你電腦銷售一路長紅,蘋果也將在今年第三季時推出迷你電腦,外傳將由廣達代工,全面搶攻迷你筆電商機,而根據蘋果給零組件廠商的預估,今年蘋果整體NB出貨量將有機會首度超越1,000萬台關卡。(新聞來源:工商時報─記者袁顥庭/台北報導)
講甲親像真的仝款。進前無偌久 Steve Jobs 才講「袂去生產低於 $500 箍米金的迷你筆電這款『糞埽』物仔」爾爾,頂懸的報導若是事實,錢囥佇咧面頭前,家己所講攏會使無算話矣,哈哈!

話講倒轉來,蘋果欺騙逐家感情嘛毋是頭一擺。猶會記得較早蘋果講 Intel CPU (PC) 又慢又燒,當時的 PowerPC 60x/G3/G4/G5 速度毋但緊閣袂發燒,佇這陣蘋果改換 Intel CPU 了後,是非曲直自有公論啊!

2009年3月8日

共 HP 討系統佮驅動程式復原 CD

頂個月老刀共 HP mini 2140 娶入門了後,對伊實在誠滿意。毋過對原廠「無附 Operating System(作業系統)佮 Driver Recovery(驅動程式復原)2 塊 CD」這件代誌,心內一直袂當安心;想欲共系統瘦身,萬一若調整無好勢、需要重灌系統的時陣,這 2 片 CD 就是老刀的救命丹啊。幾日前老刀正式寫批共 HP 討,結果隔工就收著回批:

親愛的 先生/小姐您好:
感謝您來信詢問惠普科技相關資訊,針對您的問題,我們的解答如下:

麻煩您使用“英文”將下列訊息填寫完整,我將透過這些訊息幫您嘗試申請恢復光碟,如果申請成功的話我們會在7個工作日内將光碟郵寄到您填寫的地址。
S/N:
P/N:
您的大名:
聯絡電話:
公司寶號:
地址:
郵編:
隨機附帶的作業系統版本及語言(以筆電背面的系統貼紙為准):
需要申請的光碟片作業系統版本及語言:

愛用「英文」提供資料看來,這 2 片 CD 應該是對米國 HP 總公司寄出來;仝款有咧用 HP mini 2140 的朋友,嘛會使去共 HP 討啦!結果如何,敬請期待老刀紲來的報導。

2009年3月7日

3/06 老地方冰果室聚會 Core i7 特別報導

IMG_0047

用了誠久的版面,老刀今日終於決心來做改變;逐工照三頓攏食仝款的菜,仝款會厭啊!新的版面配色較簡單,而且毋免閣再受著 800 像素闊度的限制(Blogger 為著欲予 800*600 的古董螢幕使用的解析度),會當全面利用著螢幕的空間,希望逐家佮意。

這擺台灣 Mac 界會使算做是「老先覺」的 Ascent 葉先生(誠拄好,佮老刀仝宗,嘛仝款對打狗(高雄)起來台北拍拼咧!)來到老地方冰果室逐禮拜五暗時聚會的 Le Park Cafe 現場共逐家展示 MaQ 相容電腦(請參考頂懸的相片),鬥入 Intel Core i7 的超級性能,實在予人袂當放袂記:Final Cut Pro、Adobe CS4 系列、另外一个螢幕猶咧耍「魔獸世界」,一點仔攏嘛袂頓。聽 Ascent 講,伊家己嘛是本站「老刀烏白講」的讀者,老刀感覺真光榮啊!

IMG_0067

Ascent 嘛真大方來佮逐家開講,解說 MaQ 相容機的種種問題,予這擺的聚會充滿難得的技術話題。呵呵,相片倒手爿這个人有淡薄仔面熟咧,原來 TaipeiMac 的發起人尼克兄嘛來矣。聽伊講,所蹛的所在離 Le Park Cafe 並無偌遠,希望以後會當定定看著伊來佮逐家開講。

另外,老刀嘛佮一站仔無來的 usimon 一爿討論真濟關於小筆電的使用心得(伊是 Asus Eee PC 的用戶),一爿透過網路看台灣隊佇日本的 WBC 比賽予韓國隊「結果擲捒」(哎!)。最後老刀嘛共伊的 3G 網路卡,鬥入去拄娶入門的 HP mini 2140 試用,雖然誠好用,毋過想著 3G 網路的通信費用……莫閣講啊,老刀參考一下就好。

相關的影像佮文字紀錄,囥佇:
我的 flick 相簿(攏總 11 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2009年3月5日

Firefox 3.0.7 推出

雖然 Firefox 3.1 連鞭就欲正式推出(這陣已經有 beta 2 會當試用),毋過 Mozilla.org 佇今仔日嘛是推出 3.0.7 更新版,修正現此時 3.0.x 系列的安全性佮穩定性的問題。老刀建議有咧使用 Firefox 的朋友,趕緊來利用「說明」選單內底的「檢查更新」,抑是直接去 mozilla.org 網站掠轉來鬥。

想欲知影這版更新了啥物所在,會使去參考怹的釋出公告

2009年3月4日

有史以來上濟款的 Mac 新產品發表,你上佮意佗一款?

較早蘋果公司 Mac miniiMacMac Pro 產品線輪流發表新產品的慣例,今日終於拍破矣。蘋果公司今仔日共這 3 个系列桌頂電腦全面更新(另外猶有 Airport Extreme、Time Capsule、Apple Keyboard 佮 MacBook Pro 的小改款),應該是蘋果公司有史以來上濟款的新產品發表。這擺蘋果台灣分公司嘛配合新產品推出,仝步更新產品網頁佮線上商店的網頁,並且開始接受預訂。

雖然支援 8GB DDR3 記憶體的新款 iMac 功能誠讚,毋過老刀的感想應該佮真濟朋友仝款:新台票 21,900 箍、上俗款的 Mac mini 應該是老刀唯一有興趣的產品。可惜老刀舊年已經先共 iMac 娶入門,若無,這台 Mac mini 就會是我的選擇矣!

你上佮意佗一款新產品?歡迎共你的感想留佇下跤。

Pidgin 2.5.5 新推出

受著真濟朋友(包括老刀)愛用的網路開講軟體 Pidgin 今日推出 2.5.5 版矣。這版修正的問題是落落長啊,尤其是 MSN 的部分加足穩定。老刀建議有咧使用 Pidgin 的朋友去掠來更新。

想欲進一步了解知影 2.5.5 新版的改進,請入來遮參考