2009年2月27日

Panasonic, Philips, Sony 將欲聯合成立新的藍光 (Blu-ray) 授證公司

佇無偌久進前的 2008 年,藍光 (Blu-ray) 殺出重圍佇新一代影片光碟規格 2 大陣營內底勝出,相信逐家猶有印象。根據這篇報導,為著欲應付愈來愈濟的藍光媒體佮放送器的規格授證,這 3 間藍光規格制訂者(另外猶有其他 6 間共同制訂者),宣布將欲佇今 (2009) 第 3 季佇米國聯合成立專門處理授證服務的新公司,並且聘請 IBM 前任的智慧財產部門主管 Gerald Rosenthal 來扞頭。新公司成立了後,授證手續將會大大簡化、授權費用嘛會降價,以方便藍光規格的推廣。

預定欲推出的新授權費用(以米金計算),逐台藍光放送器收 9.5 箍、逐台燒錄器 14 箍,燒錄空片逐片收 0.12 箍、可複寫的空片逐片收 0.15 箍。按呢看起來授權費用雖然無偌濟,但是以授權數量看起來,新公司的員工倒咧仝款會使食甲漲死,哈哈!

Safari 4 Beta for Windows 送你一字:差!

Safari 4 Beta for Windows蘋果公司昨日推出新一代的瀏覽器 Safari 4 Beta 試用版(有 Windows 佮 Mac OS X 二種版本)。根據老刀掠 Windows 版轉來用的感想,只有一个「差」字會當形容。

雖然 Safari 4 顯示網頁的速度實在緊甲驚死人,可惜毋但 Unicode CJK Extension B 的相容性歹(顛倒較輸 Safari 3.2),這个應用程式佇執行緒佮記憶體管理方面,嘛是予人失望。執行 Safari 4 了後,CPU 使用率一直攏佇 98-100% 中間跳來跳去,系統嘛變甲頓頓、袂順。上差的所在是:若是你共 Safari 4 關掉,Safari 竟然會「留戀」佇背景(記憶體內底)毋肯離開:仝款食掉 98-100% 的 CPU 使用率、系統猶原頓頓,除非利用 Ctrl-Alt-Delete 叫出「工作管理員」強迫共 Safari 結束,才會當解決系統頓頓的問題

老刀的電腦雖然毋是上新、上緊,但是這款的設備:

  • Athlon64 3500+ (2.2GHz)
  • 2.0 GB RAM
  • ATI Radeon 9700 Pro 顯示卡

佇 Windows XP Pro 頂頭執行,已經比蘋果公司公布的系統需求「500-MHz Pentium 級或更好的處理器、256MB 記憶體」好幾十倍啊!系統頓甲這款程度,蘋果公司推出這个物件,敢會傷趕緊?

總講一句:這款「半成品」,實在無法度叫老刀推荐逐家掠來用啦!

2009年2月22日

AMD-ATI 推出新版顯示卡驅動程式 Catalyst 9.2

AMD-ATI 今日拄推出予 Windows (XP/Vista) 佮 Linux (IA-32/x86_64) 專用的新版驅動程式 Catalyst 9.2。

Windows 版的 Catalyst 9.2 𤆬來了效能提升;佇一寡(電動)𨑨迌物仔頂懸,效能會當提升 5-20%。這个新版嘛解決了舊版一部分問題,親像 Catalyst for Windows 佇 WinDVD 9 放送藍光影片袂順,Catalyst for Linux 無法度予 Google Earth 執行、HDMI 無影像輸出等等。建議有咧用 ATI-AMD 顯示卡的朋友去掠落來更新

想欲進一步了解 Catalyst 9.2 更新,歡迎揤頂懸的連結,入去參考怹的版本公告 (Release Note)。

2009年2月21日

Adobe 針對 Acrobat 佮 Acrobat Reader 發出安全性警告

根據 CNet 的報導Adobe 昨日對 Acrobat 9 佮 Acrobat Reader 9 發出了安全性的警告。Acrobat 因為存在安全性的問題,使用者若是無張持拍開藏有惡意程式碼 (Trojan.Pidief.E) 的 PDF 文件,就可能會造成應用程式當機,而且有可能予攻擊者非法得著別人電腦的控制權。這个新發現的安全性問題仝款會影響較早的 Acrobat 佮 Acrobat Reader。

Adobe 預定將佇 3 月 11 日先推出 Acrobat 9 佮 Acrobat Reader 9 的更新檔,以修正這个問題;了後,會閣再揀一个「吉時好日」推出予舊版 Acrobat 7, 8 專用的更新。

賽門鐵克 (Symantec)【老刀註:就是出版 Norton AntiVirus 彼間公司】的部落格這篇文章寫著:佇 Adobe 猶袂推出更新進前,建議逐家暫時佇 Acrobat Reader 內底關掉對 JavaScript 的支援。

2009年2月19日

HP mini 2140 到位矣!


開機畫面
原由 Gontera 上載

期待誠久的迷你筆電 HP mini 2140 已經送到老刀厝內,按照慣例,當然愛寫這篇報導報予逐家知影啊!

佮其他牌子的迷你筆電比較,HP mini 2140 外型上特別的所在,是採用鋁鎂合金的殼仔:銀色的機身,予我想著蘋果公司出品的 MacBookMacBook Pro。可惜廠商為著欲降低成本,生產線差不多攏徙去中國矣,HP 嘛是仝款;想欲買台灣製造的產品,真是愈來愈歹揣矣!雖然 HP 筆電的功能可能毋是上強,但是 HP mini 2140 的鍵盤大粒好揤,會當輕鬆拍字,是老刀最後選擇伊的重要原因(歹勢啦 BenQ,老刀原本佮意的是你)。另外,原廠附 2 組電池 (3+6 cells) 予「續航力」擋蓋久、硬碟採用日立的 7200 轉高速 SATA 硬碟,攏是 mini 2140 比同級品優秀的部分之一。

這台電腦已經預裝了 Windows XP Home。開機顯示漢、英雙語(會當予使用者決定欲灌的 Windows XP Home 是「漢文版」抑是「英文版」),揀「漢文版」了後一直到設定完成,差不多愛半點鐘久(所以電源線愛記得插咧),紲落來電腦就會當使用矣。這台 mini 2140 的功能嘛是袂差,內建藍芽 2.0+EDR(支援 A2DP),佮老刀的 Sony Ericsson 手機連線誠是方便;內建 SD 記憶卡讀取功能,佇出外的時陣轉入所翕的數位相片嘛真讚。猶閣有一點,這台 mini 2140 有大台筆電才有的 Express/54 擴充槽,對身軀邊已經有大台筆電的朋友來講,mini 2140 免驚予你的 Express/54 擴充卡無所在用,應該紮出門真讚的替代選擇。

無佇箱仔內底的贈品有:有 HP 標誌的 USB 滑鼠佮筆電包。這个筆電包是 Targus 製造,質感袂䆀喔!鬥入 3-cell 電池組入去 Hp mini 2140 了後,收入這个筆電包拄拄好;毋過若是鬥入 6-cell 電池組了後,mini 2140 欲收入筆電包就有淡薄仔勉強啊。

世間事實在無全然好空:好的講煞,紲來講缺點矣。毋知影 HP 是神經大條抑是按怎,內底竟然無附「作業系統」佮「驅動程式復原」2 片死豬 (CD)。這對不幸發生意外(親像電腦中毒、硬碟故障等),抑是想欲 DIY 換記憶空間較大的硬碟的朋友來講,重灌電腦變做是艱苦的代誌。雖然佇「包裝內容物清單」(Packing List) 內底嘛無寫著這 2 片死豬,但是 HP 所印的「HP mini 快速入門」手冊第 6 頁明明寫著:「如果系統發生故障或不穩定,請使用電腦隨附的 Operating System(作業系統)光碟和 Driver Recovery(驅動程式復原)光碟來復原您的作業系統和程式」。無知影 HP 怹是咧創啥貨,拍算欲共 mini 2140 捾轉去用的朋友,出手進前一定愛想予詳細啊【老刀註:死 HP,趕緊還我這 2 片死豬仔啦!】

最後,老刀共開箱所翕的相片攏囥佇 Flickr 相簿內底,歡迎逐家入來參觀。

2009年2月15日

終於共消費券開掉矣:將欲迎接 HP mini 2140!

2009 年初上予人注意的話題,就是新台票 3600 箍的「消費券」矣!進前老刀一直攏有欲共消費券用佇迎接迷你筆電的拍算。原本我心目中的第一選擇是 Benq Joybook U101,毋過為著後擺帶出門的時陣會當「擋蓋久」,再三考慮的結果,決定加開小可仔所費,共目標鎖定來去標準配備有 3+6 鋰電池(攏總 2 組)的 HP mini 2140,並且利用這擺「3C 消費券特展」去訂了一台,當然 3,600 箍的消費券就按呢開掉矣。

可能是這台最近傷過熱門的關係,廠商攏無貨會當予老刀現場捾倒轉去。所以就先付了 2,000 箍當做訂金,禮拜三就會使去迎接 HP mini 2140 啦!開箱文連鞭著推出,敬請期待喔!

2009年2月9日

2009 台北(鼓仔)燈會現影像紀錄

佮較早比起來,今年 (2009) 佇國父紀念館佮台北市政府舉辦的台北鼓仔燈會內容有較特別。除了傳統中國故事的鼓仔燈(親像「七仙女」、「牛郎會織女」這款)以外,就連最近上時行的電影「海角七號」嘛有「牛角七號樂團」的鼓仔燈來應景,有夠趣味矣。這擺燈會嘛有增加西洋式十足的內容(親像「灰姑娘」佮頂懸相片的「福爾摩斯」等)佮世界各洲的主題區、主燈以身障奧運的競賽項目為題,嘛是誠特別啊。

這擺老刀所翕的相片攏囥佇 Flickr 相簿內底,無閒去看鼓仔燈會的朋友,歡迎入來參觀看覓。

2009年2月8日

Seagate/Maxtor 硬碟韌體更新的總整理

自從老刀發見家己的 Maxtor 硬碟出現佇 Seagate/Maxtor 硬碟韌體出包的名單以後,著一直足注意後紲的發展。3 禮拜後的這馬,新版韌體差不多攏推出矣,佇頂一篇的報導內底,老刀嘛家己佇 iMac 頂頭共有問題的硬碟更新韌體好勢。所以來做一个整理,當做是這个系列的報導的完結篇。

更新韌體進前,一定愛確定欲更新的硬碟一定愛佇下跤這幾个型體的名單內底,請點入去看原廠的說明並且共掠韌體更新程式的 .iso 映像掠倒轉來:

產品系列 型號
Barracuda 7200.11 ST3500320AS, ST3500620AS, ST3500820AS, ST3640330AS, ST3640530AS, ST3750330AS, ST3750630AS, ST31000340AS
Barracuda 7200.11 ST31500341AS, ST31000333AS, ST3640323AS, ST3640623AS, ST3320613AS, ST3320813AS, ST3160813AS
Barracuda ES.2 SATA ST3250310NS, ST3500320NS, ST3750330NS, ST31000340NS
Maxtor DiamondMax 22 STM31000334AS, STM3640323AS, STM3320614AS, STM3160813AS
Maxtor DiamondMax 22 STM3500320AS, STM3750330AS, STM31000340AS

【注意:韌體版本一定愛掠予著,萬一你所更新的韌體毋是正確的型號,硬碟就無救矣】

紲落來,準備一片空的 CD-R,參照 Seagate 提供的說明,共拄才所掠的 .iso 映像燒入去。你的電腦若是使用 Intel 處理器的 Mac,請參考老刀頂一篇報導的方式,利用「磁碟工具程式」來燒入。

用這片 CD-R 光碟開機:

  • PC:佇 BIOS 設定用光碟機開機。
  • Mac:佇「系統偏好設定」的「開機磁碟」設定,抑是共 CD-R 囥佇光碟機內底,佇重新開機聽著「噹」聲的時陣共 "C" 揤牢咧,一直到聽著光碟機運轉的聲音了後才放開手。

紲落來,就會當看著老刀頂一篇文章所貼的螢幕畫面,揤 "A" 等更新完成了後閣再開機就完成矣。

2009年2月6日

佇 iMac 更新 Seagate/Maxtor 硬碟韌體

因為蘋果 iMac 所附的硬碟空間無夠大,所以老刀舊年佇咧迎接 iMac 的時陣,已經順紲共伊的硬碟換做 Maxtor 500 GB 的型體(型體:STM3500320AS)。知影舊曆年前拄著 Seagate/Maxtor 硬碟韌體出包了後,老刀趕緊用「磁碟工具程式」檢查一下硬碟韌體,結果紲來驚了一趒:所用的 Maxtor 硬碟(韌體版本 MX15)竟然出現佇名單內底,真正予我揀著「簽王」!

看著國外網站的使用者貼著出包的硬碟資料無無去的慘狀,無知影啥物時陣會輪著老刀這个。為著欲予家己安心,更新韌體是一定愛做啊!

更新韌體進前

(點一下會當看大張圖)

「更新韌體」這款代誌,本來佇 PC 下跤是真簡單,毋過這擺硬碟是鬥佇 iMac 內底,欲拆機器若無張持去拍歹去,就欲哭無目屎矣!看著國外有人佇 Mac Pro 頂懸更新 Seagate 硬碟成功了後,老刀著決心來佇 iMac 試一下看覓。

掠落韌體 .iso 映像檔了後,趕緊用「磁碟工具程式」共伊拍開,點「燒錄」燒入去空白的 CD-R 內底。

Loading Firmware

(點一下會當看大張圖)

佇「系統偏好設定」選擇用拄燒好 CD 開機:

Startup Disk Selection

(點一下會當看大張圖)

重新開機了後,出現 DOS 的畫面(其實是進入 FreeDOS 系統),沒想到新型的 iMac 竟然會當執行這款 20 冬前的「DOS 文字模式選單」,心肝頭竟然有莫名的感動。

(點一下會當看大張圖)

揤 "A" 了後開始更新韌體【注意:更新猶未完成絕對袂使關機,若無你的電腦內底著會加一塊「磚仔角」矣】,下跤是更新結束的畫面,凊彩揤一下鍵盤,電腦就會自動關機。

(點一下會當看大張圖)

重新開機了後,閣再入去「磁碟工具程式」檢查一下,發見韌體版本已經變做 MX1A 矣!

After Firmware Update

(點一下會當看大張圖)

這篇報告,老刀嘛仝步提供予米國 Accelerate Your Mac 網站,原文內容是:

I've successfully updated the firmware of my Maxtor DiamondMax hard disk (500GB, Model No. STM3500320AS) in my (intel-CPU) iMac. The firmware version of this hard disk was MX15 (before update) and is MX1A now. You can see screenshots at http://www.flickr.com/photos/gontera/sets/72157613323628183/

Best regards,
Gontera Y.
From Taipei, Taiwan
好的內容,當然嘛愛報予阿啄仔知影啦,哈哈!

2009年2月5日

Firefox 3.0.6 推出

受著誠濟人愛用的 Firefox 瀏覽器今日推出 3.0.6 更新矣。這版主要是修正安全性的問題爾爾,並無增加新的功能。老刀建議有咧使用 Firefox 的朋友,利用「說明 -> 檢查更新」升級,抑是直接去 mozilla.org 網站掠落來安裝。

關於 Firefox 3.0.6 進一步的說明,會使參考怹的版本公告

2009年2月3日

VueScan 十週年慶,提供舊用戶免費升級 8.5 版

VueScan 是一个支援 Windows、Mac OS X 佮 Linux 平台的掃瞄器驅動程式,現此時已經支援超過 1,200 種型體的掃瞄器。對一寡原廠已經無支援的古董掃瞄器來講,VueScan 可能是除了 SANE(支援 Linux 佮 Mac OS X)以外的唯一選擇。

Hamrick Software 公司佇推出 VueScan 已經 10 冬的時陣推出 VueScan 8.5.02 新版;另外,為著欲答謝用戶的支持,特別提供舊用戶免費升級到 8.5 版。只要佇你掠 VueScan 落來安裝,並且拍入舊版的註冊序號,就會當升級到這个新版。

有這个好空,當然是愛報予逐家知影啦!

2009年2月2日

ATI-AMD 推出 Catalyst 9.1 顯示卡驅動程式

ATI-AMD 推出 Windows 佮 Linux 2 款平台的新版顯示卡驅動程式 Catalyst 9.1。這个新版主要增加了對 OpenGL 3.0 的完整支援,另外嘛修正了一寡舊版的問題。所以建議有咧用 ATI 顯示卡抑是 AMD 整合式顯示卡(尤其是咧耍 game 佮畫圖為主要用途)的朋友,緊來去 ATI-AMD 網站掠落來升級吧。

關於 Catalyst 9.1 的詳細說明,會使參考 ATI-AMD 的釋出公告