2009年1月31日

Mozilla 再度宣布 Firefox 3.1 beta 3 延後出貨

等欲用新版 Firefox 3.1 瀏覽器的使用者可能再閣加等幾日。根據 InfoWorld 的報導,因為 Firefox 3.1 有一寡 JavaScript 的問題猶未解決,Mozilla 宣布 Firefox 3.1 後一个測試版 (beta 3) 推出的日期閣再延後。

這擺 Firefox 3.1 beta 3 延後推出,雖然並無確定對 3.1 正式版「預定佇今 (2009) 年第 1 季推出」的計畫敢會產生影響,毋過 Firefox 計畫的主持人 Mike Beltzner 佇這禮拜四表示「這馬並無 100% 確定 Firefox 3.1 會佇 2009 年第 1 季推出」看起來,欲等正式版推出,誠有可能愛閣較晏一下。到這禮拜三為止,Firefox 3.1 猶有 18 个 bug 猶未解決,Beltzer 表示其中 15 个無解決進前,袂推出 beta 3 版;伊另外表示講,解決這幾个 bug 比原本所想的閣較複雜,所以並無法度估計啥物時陣會當共怹完全解決。

現此時上新的 Firefox 3.1 beta 2(2008 年 12 月 8 日推出),會當佇遮掠來試用

另外,Firefox 3.1 主要對手 Internet Explorer 8 (IE8) 的開發進度,相信嘛對 Firefox 開發的進度𤆬來壓力。這禮拜一微軟已經推出 Internet Explorer 8 候選版本 1 (RC1),雖然按照 ComputerWorld 的試驗結果看來,Firefox (3.0.5) 的速度猶原勝過 IE8 RC1,毋過按照 IE8 RC1 執行 SunSpider 的成績比 IE8 beta 2 緊 70% 進步的程度看來,Firefox 佇 JavaScript 速度領先 IE8 的優勢已經愈來愈少啊。

2009年1月30日

Xnet 推出 Captain FTP 6 佮 CrowzNest 2.2

Xnet Communications 這間德國公司的 Captain FTP,一直是老刀佇 Mac OS X 下跤上愛用的 FTP 軟體(老刀嘛是 Captain FTP 漢文版的翻譯者)。這擺怹上新推出的第 6 版除了換全新的程式圖像(參考正爿的圖),佮較早的「死人骨頭」圖像比起來,親切真濟矣。其他重要的更新有:
  • 排程同步
  • 整合 Amazon S3 的網路備份/儲存功能
  • 為 Amazon 檔案建立暫時的 HTTPS URL 連結
  • 如同 URL 的方式,將檔案以電子郵件送出
  • 全新的輔助介面
  • 離線瀏覽 Webdav/Amazon
  • 蒐尋及複製位址簿上的資料
  • 額外的檔案編輯器
想欲了解閣較詳細的更新說明,請參考這个所在

另外,配合 Captain FTP 6 的推出,CrowzNest 這个 Captain FTP 外掛的輔助軟體嘛順紲推出 2.2 版。Captain FTP 6 佮 CrowzNest 2.2 攏會當佇 Xnet 的下載網頁掠著。

下跤是 Captain FTP 6 的執行畫面(點一下會當看大張圖):

Yahoo! 推出 Flickr Uploadr 3.1.3

Yahoo!(雅虎)誠受真濟朋友歡迎的 Flickr 網路相簿服務,趕佇過年前分別針對 Windows Vista/XP 佮 Mac OS X 10.4/10.5 二種平台,推出了 Flickr Uploadr 3.1.3 攏總 8 種語言版本的上載工具。

雖然這擺的 3.1.3 版號稱修正了 Flickr Uploadr 3.0 for Windows 佮漢字路徑袂合的問題(有興趣的朋友,會當參老刀進前的報導),毋過對 Flickr 討論版這篇討論看來,猶有一寡朋友有仝款問題;老刀親自掠落來試用了後,並無發見有討論版所講的問題。

想欲試用新版 Flickr Uploadr 的朋友,歡迎來去 Flickr 的「工具」網頁掠轉來鬥。

2009年1月24日

來去歇睏,老刀祝福逐家新春快樂

又閣來到一年一擺的新春假期矣。這擺 9 工的連紲假期,毋知影逐家有啥拍算?

佮舊年仝款,因為老刀欲轉去高雄過年,紲落來這幾日,可能無法度親像較早按呢來共逐家報導上新的消息。老刀建議逐家利用這幾工假,來去拜訪親情、朋友,順紲提拄領著的消費券出門踅街兼「拚經濟」較實在矣。

最後,老刀恭喜逐家新春快樂,來年再會!

2009年1月23日

希捷硬碟韌體出包猶閣有續集

希捷昨日推出的新版韌體猶原是問題不斷,一寡 Barracuda 7200.11 500GB 硬碟的使用者更新韌體了後,原來是好的硬碟竟然嘛從此變做正港的「磚仔角」(歹去)。希捷仝一日就關掉韌體下載的服務。

這擺怹又閣推出新版的韌體更新,看官版論壇的反映看來,使用者佇韌體更新了後,現此時猶未有出包的報告,所以應該是有比進前彼款較穩定矣。欲執行這个韌體更新,你需要先共硬碟韌體 .iso 檔掠落來、共伊燒入去 CD-R 內底了後,利用這片 CD-R 開機。詳細的做法,會使參考希捷提供的說明

【1/30 補充】因為希捷已經推出正體漢文的說明網頁,所以老刀配合共頂頭的網址連結換做正體漢文版。毋過正體漢文版的網頁並無共 Mac 使用者燒錄開機光碟佮更新韌體的步數寫出來。所以老刀建議 Mac 的使用者切轉去英文版的網頁參考。

2009年1月22日

Intel 發表新款低功率四核心處理器

根據報導,Intel 已經發表熱設計功率 (TDP) 只有 65W 的新款 Core 2 Quad 處理器:

型體 Core 2 Quad Q9550 Core 2 Quad Q9400 Core 2 Quad Q8200
頻率 2.83 GHz 2.66 GHz 2.33 GHz
前端匯流排 1,333 MHz 1,333 MHz 1,333 MHz
L2 快取記憶體 12 MB 6 MB 4 MB
每千粒單價 $369 米金 $320 米金 $245 米金

另外,Core 2 DuoPentium Dual Core 系列嘛有新款推出:

型體 Core 2 Duo E7500 Pentium Dual Core E5400
頻率 2.93 GHz 2.8 GHz
前端匯流排 1,066 MHz 800 MHz
L2 快取記憶體 3 MB 2 MB
每千粒單價 $133 米金 $84 米金

舊款 95W TDP 的 Core 2 Quad 落價 16-40%,現此時舊款 3GHz 的 Q9650 顛倒比 Q9550 閣較俗;另外,舊款 Core 2 Duo 佮 Pentium Dual Core 嘛分別落價 15% 佮 24%。

2009年1月21日

希捷推出硬碟韌體更新

頂擺老刀報出希捷 (Seagate) 硬碟有問題的消息了後,代誌是愈來愈大條矣。Seagate 官方已經對這擺硬碟出包的事件做了回應,根據怹發表的支援文件看來,受著影響的硬碟產品,包括:
  • Baraccuda 7200.11
  • DiamondMax 22
  • Barracuda ES.2 SATA
老刀建議有咧使用頂懸這幾个硬碟產品的朋友,趕緊按照彼篇文件的說明,來去更新你的硬碟韌體吧。

2009年1月17日

希捷 (Seagate) 1 TB 硬碟 ST31000340AS 有問題!

提供 5 冬保固的 Seagate 硬碟產品,一直是老刀購買新硬碟的唯一選擇。毋過根據最近 Seagate 官方論壇出現使用者的反映看起來,ST31000340AS(韌體編號 SD15-SD19)出問題的機會實在超出平常的懸。正常使用 3-4 个月了後,會雄雄讀袂著資料,雖然會當利用 RMA 退換新品轉來,但是資料損失的代價實在是無法度估計矣。Seagate 官方現此時猶袂對這个現象發表回應。

已經咧使用這款硬碟的朋友,佇問題袂解決進前,老刀建議趕緊共資料拷貝入去備份硬碟。最近想欲買硬碟的朋友,請注意紲來的發展。

2009年1月14日

開講軟體 Pidgin 2.5.4 推出矣,趕緊掠來更新吧!

真誠朋友愛用,嘛是老刀電腦開機一定愛拍開的多用途開講軟體 Pidgin 推出 2.5.4 版矣。因為進前 Windows 版的 Pidgin 2.5.3 有結束程式的時陣當機的問題(請參考老刀進前這篇報導),所以老刀建議這馬咧用 2.5.3 版的朋友趕緊來掠轉來更新。

新的 2.5.4 除了修正頂懸所講的問題以外,猶有下跤的主要修正:

  1. 變更 MSN 連線伺服器,避開了這幾工來 MSN 連線袂穩的問題。
  2. 有時陣佇新增帳號的對話框內底,變更通訊協定會造成當機的問題。
  3. 更新 GTK+ 版本到 2.14.6。

想欲知影這个版本更新的這一步消息,請入去怹的版本變更說明

2009年1月11日

歇禮拜,來聽歌:老刀精選 (15) – "Stars" by Hear 'n Aid

又閣誠久無共逐家介紹經典的搖滾歌曲矣。這站仔老刀嘛一直咧思考,佗一調歌會當代表我心目中上重要的歌曲?2009 年第一砲,老刀就來介紹陣容「空前」(嘛有可能是「絕後」)經典的 "Stars" 來予逐家懷念。

猶會記得米國流行樂壇為著欲援助非洲災民,成立了 USA for Africa (United Support of Artists for Africa) 的組織,45 位當時歌壇「A 跤」合灌了 "We Are the World" 這調歌,相信真濟人攏捌聽過嘛閣有印象。仝年佇金屬界,搖滾天團之一的 Dio 發起了 Hear 'n Aid 組織,合灌了這調 7 分外鐘的 "Stars",名單佮歌曲攏是仝款精彩矣!

1985 年 5 月,來自十外个「A 跤」金屬團體、40 个藝人合作灌製的 "Stars",陣勢一點仔攏袂輸 USA for Africa。毋過既然是搖滾歌曲,上精彩的部分當然是 9 个吉他手合作完成、時間攏總超過 2 分鐘半的吉他 solo(獨奏)部分矣。吉他手包括(按照姓氏排列):
另外,節奏吉他的部分,是 Iron Maiden 的 Dave Murray 佮 Adrian Smith 負責。想欲進一步了解這調歌的介紹,會當來參考 Wikipedia 的說明佮囥佇 YouTube 的 "Stars" 紀錄影片(第 1 段第 2 段第 3 段)。

遮爾精彩的歌曲,當然是一定愛聽的矣。這馬老刀就邀請逐家來欣賞這調永遠的搖滾經典:

 

2009年1月7日

iWork.com?

這擺蘋果公司佇無 Steve Jobs 參加的 Macworld 2009 大會頂頭,發表了下跤的物件:
佮前幾冬 Macworld 大會比起來,2009 年應該是上無精彩的一擺。雖然蘋果公司新發表的產品無啥看頭,毋過台灣分公司這擺仝步推出漢文版的產品網頁,佮較早愛「慢 1~2 禮拜才有新產品的漢文網頁」的服務比起來,進步有影誠濟!所以老刀踮遮,愛共蘋果台灣分公司的拍拚呵咾一下。

新的 iWork '09 內底加了一項新功能叫做 iWork.com,這到底是啥物?蘋果公司網頁關於 iWork.com 的解說是:
iWork.com 是一項網路服務,所以任何人都可以透過網路瀏覽您發佈的文件,不必再操心同事用的是 Mac 還是 PC;不必離開 Pages、Numbers、或是 Keynote,就可以輕鬆發佈文件、並邀請他人閱覽。只需點按工具列的 iWork.com 按鈕,就能立刻上傳文書、試算表、以及簡報檔案到網站上。Mac OS X Mail 會發送專屬網址連結給每一位邀請對象,收信人只要點按連結就能瀏覽文件。

根據蘋果官方網頁的資料看來,雖然 iWork.com 有支援 Microsoft Office 的文件,毋過事實上用過 iWork 的朋友攏知影,iWork「支援 MS Office 的程度」絕對毋是 100% 矣。按頂懸所講「毋免閣再煩惱同事用的是 PC 抑是 Mac」這句話來看,敢是咧暗示蘋果公司會推出 iWork for Windows 版?結果如何,時到便看矣!

2009年1月5日

用 Windows Live Writer 離線寫 Blogger/Blogspot 部落格文章

微軟的 Windows Live 服務已經推出了一段時間,內底附了 Windows Live Messenger(這个應該是上濟人用)、Windows Live Mail、Windows Live Writer 等袂䆀用的工具。其中內底的 Windows Live Writer 部落格文章管理工具,老刀一直叫是伊干焦專門支援 Windows Live 的部落格爾爾。這幾工老刀掠落來試用了後,發見伊竟然嘛有支援「老刀烏白講」所用的 Blogger/Blogspot 部落格平台,所以會當用親像「佇 Word 拍文章」仝款的方式來創作部落格文章,應該是誠讚的代誌。

老刀感覺 Windows Live Writer 上讚的所在,是會使共文章先佇電腦拍好勢(毋免上網),等後擺上網的時陣才共文章規批上傳,對定定寫部落格文章的朋友來講,Windows Live Writer 應該會是足好的工具。

使用的方式嘛真簡單,頭先拍開 Windows Live Writer,用「部落格 –> 新增部落格帳號」,選「其他的部落格服務」。親像下跤的圖:選用部落格服務

揤「下一步」了後,拍入「部落格網址」、「使用者名稱」佮「密碼」了後,閣再揤一擺「下一步」就完成了。拍入部落格相關資料

Windows Live Writer 嘛會當共進前寫好的舊文章叫出來修改:編輯古早所拍的文章

袂䆀用吧?家己去掠來試看覓便知分曉。

2009年1月4日

Steve Jobs Must Die?

今日 LowEndMac 刊出了這篇標題會驚死人的文章,予老刀想著較早(阿陸仔出身、這馬已經是米國籍的)明星李連杰佇 2000 年主演的電影 Romeo Must Die(致命羅密歐)。這篇文章到底是咧寫啥物?

這篇文章並毋是咒讖 Steve Jobs,佮老刀頂一篇 CNet 的預測仝款,是咧建議 Steve Jobs 莫閣再搬「蘋果公司救世主」的角色 (in the role of savior of Apple),共這个角色「宣告死亡」。原作者認為這擺 Jobs 宣布佇今年 Macworld 2009 大會 予 Phil Schiller 上台演講,主動退去幕後就是好的開始。而且逐家攏知影,以「創新」出名的蘋果公司,猶原會繼續共這个企業精神保持落去。

2009年1月3日

CNet 的 2009 年 5 項預測

CNet 佇舊年底(換做台灣時間,是正月初一下晡)預測了 2009 年 3C 相關的 5 大預測。分別是:
  1. PS3 價數閣再落 100 箍米金。除了 Sony 這幾个月來製造 PS3 的成本已經有較降低以外,面對 Xbox 360 佮 Wii 的競爭,降價應該是早慢的代誌。
  2. 蘋果公司終止佮 AT&T 合作,宣布開放予其他的電信業者推出購買 iPhone 的專案。
  3. 藍光放送機 (Blu-ray player) 的市占率,佇今 (2009) 年嘛是沓沓仔成長爾爾,並袂當得著大成功。
  4. 微軟宣布 Windows 7 正式上市的日期(原作者預測將佇十一月初二)。
  5. Steve Jobs 宣布退休的日期。伊的健康問題最近一直予蘋果迷誠關心,原作者預測伊會佇今年內宣布接任人選,毋過 Jobs 猶原會蹛佇蘋果公司到 2010 年底。【老刀按:嘛應該是時陣矣,一路順行】。
頂懸的預測敢有準?結果如何,明年這个時陣就知影囉。

2009年1月1日

老刀烏白講 2008 年終排行榜

老刀佇遮先祝福逐家新年快樂。

新的年度已經開始,老刀按照舊年的做法(希望以後會當久久長長,變做「慣例」),共發表的資料整理做這篇「2008 年終排行榜」,正式來共 2008 年講一聲再會。老刀利用 OneStat 這个方便的網站流量分析工具,分析 2008/01/01 到 2008/12/31 期間逐家瀏覽本站的狀況,取頭前 5 名寫踮下跤:

上受著歡迎的文章(人客利用蒐尋引擎觀視幾擺),其中第 4 名有 2 篇並列:
名次舊年名次文章幾擺
1-AMD-ATI 更新顯示卡驅動程式 Catalyst 8.42,857
2-PC World 的輕型筆記型電腦評比,MacBook Air 得著頭彩1,601
3-AMD 推出 ATI Catalyst 7.12 顯示卡驅動程式 (for XP/Vista)981
4-ATI-AMD 推出顯示卡驅動程式 Catalyst 8.8912
4-Adobe 推出 Camera RAW 4.3.1 更新912

作業系統(人客使用系統所占比例):
名次舊年名次系統比例
12Windows58.70%
21Mac OS X36.97%
33Linux3.70%
44其他0.06%
55Unix0.02%

瀏覽器(人客使用瀏覽器所占比例):
名次舊年名次瀏覽器比例
13Internet Explorer36.65%
21Mozilla/Firefox34.36%
32Safari25.99%
45Netscape Navigator1.45%
54Opera0.67%

人客對佗來(國家排行所占比例):
名次舊年名次國家/地區比例
11台灣58.79%
22香港18.88%
33米國3.99%
4-中國2.68%
54英國0.91%

最後,希望逐家會當定定來參觀、支持我的烏白講網頁,予 2009, 2010, ... 逐年攏會使繼續共排落去。