2009年12月29日

參加 2009 第 5 屆全球華文部落格大獎典禮

IMG_0659

因為本站參加今 (2009) 年第 5 屆全球華文部落格大獎入圍決選的關係,老刀受著主辦單位邀請,佇 12/27(禮拜日)下晡來到會場(台北縣政府507會議室)觀禮,紲來留落倒手爿這張紀念相片。

頭一擺報名參加,老刀算做是典禮內底的「菜鳥仔」,無知影原來這幾冬落來,這个典禮嘛有一寡算講是真心適的慣例(若講「規矩」嘛是會使矣),親像中獎的得主上台第一句話發表感想,十个內底差不多八个攏是「我完全毋知影會著大獎,所以無準備得獎感想」。我想這當然是得主家己謙虛啦,若無,實在嘛真奇怪呢?

Blogaward 2009佮老刀家己的估計仝款,「老刀烏白講」最後當然是落選矣,就連「評審團特別獎」嘛無。我共家己的看法寫佇下跤,就當做是「落選感言」吧:
  1. 佇眾普通話的「網海」內底,本站應該是唯一 1 个用台語創作的,評審團的委員諸公應該毋是逐家攏看有,所以本站來佮別站做伙比賽,佇先天上就較吃虧。
  2. 主辦單位應該愛「正名」號做「全球普通話部落格大獎」。若無,共「華文」分做「普通話組」、「閩南語組」、「客家語組」,甚至毋是華文的「原住民組」嘛會當考慮增設,對其他非普通話的網站較公平,而且按呢嘛會使予這个活動變做是推動台灣逐个族群母語發展的動力。
  3. 雖然今年無著大獎,但是老刀猶原會繼續創作落去,提供精選的高品質文章佮報導,來予逐家欣賞。

毋管如何,佇今年 3,362 个參選部落格內底,「老刀烏白講」一路過關斬將,通過初審(915 个入圍)、決選(217 个入圍),紲落來才會當提著正手爿這張頒獎典禮的入場證,老刀就已經感覺真滿足矣。

最後老刀愛恭喜今年的得主,嘛觀迎逐家來去參觀這一寡值得推薦的好站。

2009年12月25日

老刀祝福逐家聖誕快樂

雖然老刀 12/25 耶誕節這工猶原愛上班(凡勢閣欲加班),毋過並無袂記得共逐家說一聲「聖誕快樂」。今暗就點這調 Twisted Sister 的 "Oh Come All Ye Faithful"(選自 A Twisted Christmas 耶誕特輯)送予逐家,來做伙過一个搖滾耶誕節吧!

Twisted Sister 佇 YouTube 頂懸嘛開一个專屬頻道,提供特輯內底收錄的其他耶誕歌曲,歡迎逐家來去收看。

頂懸這調歌敢有淡薄仔熟似咧?沒毋著!伊就是 Twisted Sister 共 "Oh Come All Ye Faithful" 這調聖誕歌曲加上怹上經典的 "We're Not Gonna Take It" 旋律的創作,就連這齣 MV 的劇情嘛是借原本的 "We're Not Gonna Take It" 引用過來。

關於 "We're Not Gonna Take It" 這調歌的歷史,老刀較早捌介紹過,有興趣的朋友,歡迎來參考「歇禮拜,來聽歌:老刀精選(5) - "We're Not Gonna Take It" by Twisted Sister」這篇介紹。

2009年12月24日

瀏覽器大戰的上新結果

根據這篇 electronista 引自 StatCounter 的統計結果,頂禮拜 Firefox 3.5 佇全世界的市占率 21.93% 已經正式超過 Internet Explorer 7 (IE7) 的 21.2%,變做是使用人口上濟的瀏覽器版本。今年以來全世界的市占率排名:

Source: StatCounter Global Stats - Browser Version Market Share

毋過佇台灣,問題、破空規大堆的 Internet Explorer 6 (IE6) 是以 43.9% 的市占率,超過其他瀏覽器版本足濟。

Source: StatCounter Global Stats - Browser Version Market Share

為著予你有一个較安全的上網環境,老刀建議你儘量減用 IE6,趕緊升級到 IE7/IE8 較好(我家己是用 Firefox 3.5.6)。

2009年12月22日

新款 Intel Atom CPU 平台的 7 件事實

Intel Atom 處理器家族最近新增加 3 款:D510、D410 佮 N450。雖然大部分的 Atom 處理器攏是鬥佇小筆電頂懸,毋過對規格看來,這 3 个新款應該比舊型體的 Atom 好真濟。按怎講咧?PC Magazine 這篇文章,應該會當提供予逐家參考:

  1. 處理多媒體進步誠濟:雖然新款 Atom 處理器仝款無法度予你製作親像電影「阿凡達」彼款的特效,但使用 D510、D410 佮 N450 消除相片內底的「紅目睭」【老刀按:翕相機的閃光燈對人佮動物的目睭拍過去,目睭看起來親像變紅的現象】已經是有夠用矣。Photoshop CS4 佇 Atom N450 佮 D410 處理器的電腦頂懸,效能嘛猶會當接受。
  2. Atom D510、D410 佮 N450 攏支援 Intel 上新的 NM510 Express 晶片組。
  3. 閣較省電:新的 Pine Trail 架構,使用無到 20W 的電力。
  4. 閣較恬的系統:新 Pine Trail 架構的低電力,予處理器頂懸毋免另外鬥細粒電風。
  5. 硬體平台猶原是定位佇上網專用的消費機種:上網看影片若是使用電腦的主要用途,並無需要用甲 4 核心處理器來處理。
  6. 會當看比智慧手機閣較好的網頁:現此時 iPhone 佮 Android 手機攏猶未支援 Flash 網頁,但改用 Atom 小筆電是完全無問題矣。
  7. 新的 Atom 電腦有當做你主要使用的電腦的實力:因為性能的關係,第一代的小筆電是設計用來當做你的「副手電腦」(可能是厝內的第 3 台、第 4 台電腦);主要的工課應該是佇 Core 2 Duo 抑者是 Athlon X2 頂頭完成。毋過這時陣除了 3D game 佮編輯影片這寡需要性能較好的處理器以外,新款的 Atom 處理器差不多嘛會當替你處理甲誠好。

新型的 Intel Atom 處理器的規格是:

    型體 時脈 快取 匯流排 設計功率
    Atom D510(雙核心) 1.66 GHz 1 MB DDR2-800/667 13 W
    Atom D410(單核心) 1.66 GHz 512 kB DDR2-800/667 10 W
    Atom N450(單核心) 1.66 GHz 512 kB DDR2-667 5.5 W

註:老刀家己是用會使講是「古董級」的 Pentium 4、單核心第一代 Athlon64 的 PC 各 1 台,另外加上今年初買的 HP mini 2140 小筆電(採用 Atom N270 處理器)。我家己的要求並無懸:會使上網、寫部落格文章,對我來講已經有夠矣。當然,記憶體是一定愛趁俗加予滇矣!

予逐家誤用的閩南語字 (6)

這个單元真久無佮逐家見面矣。這站仔老刀共所看著的閩南語誤用字閣再來整理一批囥佇下跤,提供逐家參考:

例句 誤/異用字詞 正確字詞
恁 2 人郎才女貌,真正速配 速配 四配
台語,愛定定講才會輪轉 輪轉 輾轉
俗閣有力
這个賊仔有夠大膽,予警察掠著竟然敢共伊嗆聲 嗆聲 唱聲
毋免肖想我會請你呷這頓飯 肖想、呷 數想

頂懸的正確字詞,是以教育部國語會的臺灣閩南語推薦用字,佮臺灣閩南語常用詞辭典為主。

2009年12月20日

你的 iPhone 佮 iPod Touch 敢無法度放一寡歌曲?

蘋果公司最近這篇技術文件,講著某一寡利用毋是蘋果公司出品的軟體轉錄出來的歌曲抑是聲音檔佇 iTunes 放攏無問題,但是佇 iPhone 抑是 iPod Touch 頂懸放,就會出現下跤的症頭:

  • 跳過某一調特定的歌無放。
  • 佇所放的歌曲中央停止抑是暫停。
  • iPod 的放歌軟體抑是音樂軟體會意外結束。

拄著這幾个問題的時陣,利用下跤的方式凡勢會使解決問題:

  • 若會當揣著原版 CD,就共彼一寡出問題的歌曲對 iPhone/iPod Touch 內底刣掉,紲落來用 iTunes 轉錄歌曲了後,共怹傳入去 iPhone/iPod Touch 內底。
  • 若揣無原版 CD,利用 iTunes 彼寡音樂檔案轉做 AAC 格式

老刀的感想是:iPhone 佮 iPod 猶是用蘋果公司家己的 iTunes 上四配矣。話講倒轉來,蘋果公司軟體的相容性猶閣有加強的空間啦!

2009年12月17日

蘋果公司推出數位翕相機 RAW 相容性更新 2.7 版

蘋果公司今仔日推出數位翕相機相容性更新 (Digital Camera RAW Compatibility Update) 2.7 版,新增加對下跤新型翕相機的支援:

  • Canon EOS-1D Mark IV
  • Canon EOS 7D
  • Canon PowerShot G11
  • Nikon D3S
  • Nikon D300S
  • Nikon D3000

這个更新需要 Mac OS X 10.5.8 抑是 10.6.2 版。想欲參考現此時你數位翕相機的 RAW 格式敢有予 Mac OS X 支援,請參考下跤的蘋果公司支援網頁:

2009年12月16日

OWC 開始供應予 4 核心 Mac Pro (2009) 專用的單支 8GB 記憶體模組

頂級 Mac Pro 的用戶請注意來!米國真出名的電腦週邊/零件購物網站 OWC 已經推出予 2009 年出品的 4 核心 Mac Pro 機種專用的單支 8GB 記憶體模組矣。根據 OWC 的試驗結果,佇 Mac OS X 10.6.2 內底支援的記憶體空間,上大達到 32GB;雖然 Mac OS X Server 確定有支援超過 32GB 的記憶體空間,毋過現此時怹猶未完成對 64GB 系統的相容驗證。

OWC 附佮說明講著,單支 8GB 的記憶體模組毋通甲別款容量的模組摻咧鬥。另外,這款 8GB 模組並無支援 Mac Pro 的 8 核心機種。

OWC 嘛有對米國以外的國家出貨(包括台灣)。老刀進前捌怹訂過一寡物仔,個人對 OWC 的評價普普(無講特別好,但嘛無比別人差),有興趣的朋友會使參考看覓。

2009年12月15日

微軟,管好恁的中國分公司吧!

這幾個月來佇東南亞真出名的 Plurk(噗浪)微網址,今日發出這篇聲明稿,宣布講中國微軟公司最近推出的 MClub 服務,竟然是共 Plurk 的程式碼偷去 80% 以上的「賊仔貨」。

這篇聲明稿這馬已經有漢文版,老刀簡單說明佇下跤:

  1. 中國微軟佇今年 (2009) 11月,公開發表了家己的微網誌服務 "MSN聚酷(Juku)/Mclub" (http://club.msn.cn/)。
  2. 中國微軟這个服務,規个設計佮介面攏總嚴重抄襲了噗浪Plurk (http://www.plurk.com/),親像對正手爿到倒手爿捲動的創新時間軸設計。
  3. 中國微軟這个服務的程式碼,其中有 80% 完全是對噗浪中偷去的。
  4. 噗浪從來毋捌佮微軟公司接觸過,更無佮微軟有任何合作關係。
  5. 噗浪身為一个新創業公司,需要逐家的協助佮建議,嘛請逐家會當加減鬥相共。

怹佇聲明稿內底,嘛有貼出中國微軟這个海賊頭是按怎偷提 Plurk 程式碼的證據。老刀想著幾個月前雲惟彬先生(Plurk 創辦人)來台灣遊覽的時陣,電腦真不幸去予賊仔偷提去的舊新聞,毋知影這 2 件代誌敢有關係?毋管真相是按怎,定定掠人盜版的微軟公司這擺竟然家己來做海賊頭,實在有夠落氣矣!

2009年12月11日

Adobe 宣布明年 (2010) 開始放棄 Flash Player 對 PowerPC 處理器的支援

根據 Digital Arts 的報導,Adobe 就親像怹前幾工的預告按呢,推出 Flash Player 的更新版 10.0.42.34,修正 7 个安全性更新,包括 6 个會當予駭客進入 Windows、Mac OS X 佮 Linux 作業系統的問題;新版的 Adobe Flash Player 會當來這个所在掠

另外,Adobe 嘛宣布講怹對明年 (2010) 年 Flash Player 10.1 推出了後,將欲全面停止支援 PowerPC 處理器的 Mac 電腦,原因是新版 Flash Player 的效能改進並無法度支援舊式的 PowerPC 平台的關係;也就是講,到時陣想欲使用 Adobe 的上新軟體,Intel 處理器將是你唯一的選擇。

2009年12月10日

Intel 將欲併吞 nVidia?

這幾工來電腦界上爆炸性的話題,應該是 Intel 頂禮拜意外宣布停止 Larrabee 圖形處理器 (GPU) 的開發計畫,嘛袂推出 Larrabee 技術的獨立顯示卡產品。Larrabee 最後的命運是賣掉,抑是就按呢免費開放逐家予開發者,現此時猶袂決定(請參考 HEXUS 這篇報導)。米國出名的資訊新聞專欄作者 Robert X. Cringely 佇伊的部落格分析講「Intel 將欲併吞 nVidia,只賰合併的價數猶未講定」的論點,老刀是完全同意。是按怎講咧?

  1. 表面上 Larrabee GPU 技術難度較懸,干焦靠協力廠商的技術佮產能,應該無法度達到 Intel 的要求。Intel 絕對無希望怹的顯示卡晶片干焦有整合型的入門款爾爾,為著欲佮 nVidia 佮 AMD/ATi 競爭,佇 Larrabee 計畫停止了後,上好的辦法就是共 nVidia 規个公司買落來,按呢就會當提升拍敗主要對手 AMD/ATi 的本錢【老刀按:AMD 共 ATi 買落來了後,有製造 CPU 佮 GPU 的能力,這十外冬來,一直是 Intel 的主要對手】。
  2. 除了 GPU 以外,nVidia 的行動晶片技術嘛是 Intel 所欠,並且想欲得到手的物件。雖然 Intel 佇小筆電頂懸有 Atom 佮 Moorestown 的低功率處理器,但用佇行動裝置猶是傷過了電。nVidia 的 Tegra AXP 晶片是針對手機佮媒體放送機所設計,應該是 Intel 食行動裝置大餅真好的家私。
  3. 佇行動上網方面,nVidia 有家己的低電壓、整合 CPU/GPU 功能的 Ion 平台,AMD/ATi 嘛有家己的技術。本來 Intel 佇這方面嘛有 Larrabee,但是已經去了了矣。所以佮 nVidia 合併、接收 Ion 技術,絕對有伊的價值。

雖然頂懸這幾點是 Cringely 的個人推論,毋過攏有伊的根據。最後二間公司敢會合併,時到便看就知影矣。

2009年12月8日

gcin for Windows(無附佮 GTK+ 函式庫版本)的設定方式

自從香草輸入法框架停止開發 Windows 平台 (OpenVanilla for Windows) 的版本(請參考這篇官方討論版的文章)以後,gcin for Windows 真順序就彌補了 Windows 輸入法的缺點。gcin 提供佮 OpenVanilla 仝款的 .cin 輸入法表格,予使用者會使家己自由訂作專用的輸入法。

因為老刀家己是 Pidgin 的愛用者,並且 Pidgin 佮 gcin for Windows 仝款攏是利用 GTK+ 函式庫開發的軟體,所以佇 gcin 討論版發表這篇文章

鑑於目前以 GTK+ for Windows 為基礎的應用軟體為數不少(譬如 Pidgin 、GIMP 等),似乎沒有必要再重覆安裝一份 GTK+ 函式庫在 gcin 資料夾裡。故建請考量是否可將 GTK+ 函式庫的部分從 gcin 安裝程式中抽離,並直接引用電腦裡 GTK+ 相關環境參數的索引值,應是節省電腦資源的作法。

建議或可參考 Pidgin release 的作法,分別釋出「內含 GTK+」和「不含 GTK+」的安裝程式,供使用者自行選擇下載安裝。

文章發表了後,嘛得著作者 eliu 善意回應,釋出無附佮 GTK+ 函式庫的 gcin 版本。這个 "no-gtk" 的版本並無法度單獨鬥入電腦使用,伊是專門予已經先鬥入 GTK+ 函式庫的電腦使用的特別版本。eliu 先生嘛寫一篇關於這个特別版本的介紹專文

是按怎欲按呢做?因為 GTK+ 函式庫採用的 .dll(動態連結函式庫)格式,會當予逐个利用 GTK+ 函式庫開發的應用程式共用這个記憶體空間,所以記憶體只要鬥入一份 GTK+ 就好(實在毋免,嘛無必要佇記憶體內底鬥入幾若份仝款的 GTK+ 函式庫),毋但節省記憶體,嘛節省你的硬碟空間。

雖然 GIMP 佮 Pidgin 攏是用 GTK+ 函式庫開發的軟體,但是這一寡軟體鬥入 GTK+ 函式庫檔案的路徑所在並無相仝。佇 Windows XP 內底,GIMP 共 GTK+ 函式庫鬥佇 C:\Program Files\gimp-2.0\bin;但是 Pidgin 共 GTK+ 函式庫鬥佇 C:\Program Files\Common Files\GTK\2.0\bin 內底。確定 GTK+ 函式庫佇你電腦的路徑了後,共你 Windows 的 PATH 環境變數加入這个路徑就會使矣。

佇 Windows XP 下跤,欲變更環境變數的方式是:

  1. 揤「開始」,佇「控制台」內底,拍開「系統」。
  2. 佇「進階」標仔內底揣著「環境變數」按鈕,共伊點落去,就會當看著下跤這个畫面:

PATH User Variable on Windows XP

你電腦「使用者變數」內底若已經有 "PATH" 變數,請揤「編輯」,然後共 PATH 變數「值」的頭前加入:

C:\Program Files\Common Files\GTK\2.0\bin;

若無,就揤「新增」,然後佇「變數名稱」拍入 PATH【註:半形英文,大小寫攏會使】、「變數值」拍入:

C:\Program Files\Common Files\GTK\2.0\bin;%PATH%

改好了後,重新開機就完成矣。

2009年12月7日

明仔載 (12/8) 愛會記得更新你的 Adobe Flash Player

根據 Adobe 頂禮拜四發表的告示寫著,Adobe 將欲佇明仔載 12/8(禮拜二)針對 Adobe Flash Player 佮 Adobe AIR 釋出新版本,以修正最近發見的安全性問題,Adobe 官方共這个問題標示做危險級 (critical)

受著影響的 Adobe 軟體,包括:

  • Adobe Flash Player 10.0.32.18 佮進前的版本。
  • Adobe AIR 1.5.2 佮進前的版本。

2009年12月5日

蘋果公司恬恬仔供應配備四核心 Intel Xeon 3500/3.33GHz 處理器的 Mac Pro

根據米國蘋果公司網站的資料,怹已經推出 Mac Pro 四核心產品線的旗艦,已經恬恬仔升級到 3.33GHz 的 Intel Xeon 3500 系列單粒處理器,原本的 2.66/2.93GHz 單粒四核心機種嘛猶原有供應。現此時台灣蘋果公司網站的 Mac Pro 規格猶未更新。

另外,Mac Pro 八核心機種的規格並無變動,猶原是配備雙粒 Intel Xeon 5500 系列處理器,速度是 2.26/2.66/2.93GHz。

2009年12月4日

本站入圍 2009 年第 5 屆全球華文部落格大獎決選

2009 年第 5 屆全球華文部落格大獎決選入圍名單已經公布。其中「年度最佳訊息觀點部落格」有 22 个網站入圍,本站「老刀烏白講」真榮幸會當占著其中 1 个名額,除了感謝各位評審肯定以外,其實老刀上感謝的人,是長久以來恬恬仔支持老刀繼續創作的眾位讀者。

毋管最後得著大獎是啥物人,老刀仝款會繼續提供精選的相關消息,寫作專文來報予逐家知影。嘛希望逐家繼續來共我支持、鼓勵,予這个網站會當久長。

2009年12月3日

Pidgin 2.6.4 更新推出

老刀真愛用的多用途網路開講軟體 Pidgin 推出 2.6.4 更新版矣。這个新版修正了真濟所在,包括 libpurple 函式庫、AIM/ICQ/iChat、MSN、XMPP/Google Talk、Yahoo! 開講、重新設計的「偏好設定」,老刀建議有咧使用 Pidgin 的朋友來去掠轉來鬥

想欲了解 2.6.4 新版閣較濟的說明,歡迎去參考 Pidgin 的版本更新紀錄

2009年12月2日

日本花園大學推出 HanaMin 字型的更新版

HanaMin 是日本花園大學所推出的明體漢字字型。怹今年 10 月初才推出 20091003 版,共 Ext-C 漢字(收錄佇 Unicode 5.2) 完全收錄(請參考老刀進前發表的「HanaMin:完整收錄中日韓統一表意文字擴展 C 區 (Ext-C) 的字型,免錢的喔!」);才 2 個月爾爾,昨昏 (12/01) 就閣再推出 20091201 更新版。HanaMin 所支援的漢字總表

這个更新版主要有下跤的更新:

  • U+3400~U+4DB5:CJK 統一表意文字擴展 A 區 (Ext-A) 攏總 6,582 字(屬於 Unicode 3.0 範圍),已經攏總補滇。
  • U+20000~U+2A6D6:CJK 統一表意文字擴展 B 區 (Ext-B) 攏總 42,711 字(屬於 Unicode 3.1 範圍),這馬支援 18,085 字(頂一版支援 17,874 字)。
  • U+2F800~U+2FA1D:CJK 相容表意文字增補區攏總 542 字(屬於 Unicode 3.1 範圍),已經攏總補滇。

想欲進一步參考 HanaMin 字型的說明,請參考這个所在(日/英文);請想欲了解逐版 Unicode 增加佮修正的所在,會使入來遮參考

2009年12月1日

VirtualBox 3.1.0 推出!

VirtualBox

VirtualBox 昨昏推出重大更新的 3.1.0 版。這擺更新的所在會當講是真濟,主要的重大更新有:

  • Teleportation:經過網路,共當咧執行中的虛擬機器 (Virtual Machine) 程式段落,徙入去別台電腦的 VirtualBox 內底。
  • 虛擬機器的狀態,這馬開始會使儉佇任何一个快照 (snapshot)。
  • VirtualBox for Windows 的 2D 圖形加速。
  • CD/DVD 光碟機這馬會當接去任何一个 IDE 控制器,嘛支援一台以上的光碟機。
  • PAE 佮 AMD64 效能大提升(干焦支援 VT-x 佮 AMD-V)。
  • 試驗性的支援 EFI (Extensible Firmware Interface)。【老刀按:凡勢過無偌久,Mac OS X 就會當出現佇 VirtualBox 的虛擬機器內底矣】

想欲了解這版 VirtualBox 其他修正佮改進的所在,請參考伊的版本更新紀錄

2009年11月28日

2009 出廠的 Mac Pro 佇 Mac OS X 放歌,CPU 會燒歹去?

最近蘋果公司官方討論版頂頭上鬧熱的話題,應該是關於 Mac Pro 的 Intel Nehalem 處理器佇 Mac OS X 頂頭傷過燒的問題矣(請參考這篇討論)。

佇 2009 年 3 月以後出廠、採用 Nehalem 核心處理器(親像 Intel Xeon 3500/5500 系列佮 Core i7 處理器)的 Mac Pro 頂懸,若拍開包括 iTunes 在內的音訊處理相關軟體放音樂,準講干焦放一調歌爾爾,CPU 的核心溫度嘛竟然會衝甲 85℃以上,甚至超過 90℃,接近系統自我保護關機的溫度!毋過真奇怪,使用者入去 Mac OS X 的「活動監視器」揀「所有程序」來檢查,並袂發見啥物無正常的所在。有愈來愈濟的證據表示,問題可能是出佇蘋果公司的系統管理控制器 (SMC),蘋果公司猶未對這个問題表示回應。

這个問題並無發生佇透過 Boot Camp 當咧執行 Windows 系統的 Mac Pro,嘛無發生佇採用別款處理器的 Mac 電腦頂懸。另外,採用 Intel Core i5/i7 處理器的上新款 iMac(仝款屬於 Nehalem 核心)敢有仝款的問題,現此時猶未有報告講著。請各位 Mac Pro 佮新款 iMac 的用戶注意紲落來的發展。

2009年11月26日

Firefox vs. IE 大戰,明年 (2010) 猶有好戲通看

根據 CNet 的報導,微軟公司頂禮拜展示下一版 Internet Explorer 9 提升性能的新技術,毋過 Mozilla 嘛隨綴著微軟的跤步,所以微軟猶仝款佇咧 Firefox 後壁艱苦追趕。

微軟的新技術叫做 Direct2DDirectWrite,會當利用顯示卡硬體,來加速現出網頁圖形佮文字的性能。現此時 Windows 7 已經支援 Direct2D 佮 DirectWrite,微軟公司嘛當咧共這 2 个技術加入去 Windows Vista(真可惜,這 2 个技術並無引進入去 Windows XP 的計畫)。根據怹的展示,Direct2D 佮 DirectWrite 將會來閣較緊的圖形顯示、追蹤滑鼠振動閣較順序,現出網頁字型嘛將會閣較清楚、平順。毋過微軟實在真落氣,因為 Mozilla 宣布怹當咧改寫新版的 Firefox 3.7(預定佇 2010 年前半冬推出)將是代先支援 Direct2D 的瀏覽器。

下跤這張圖,是佇 Firefox 內底利用 Direct2D 技術提升瀏覽器效能的試驗結果(原圖佇這个所在)。

D2DGDIPerf1

跨平台 (Windows/Mac OS X/Linux) 的 Firefox 有家己的圖形處理系統 "Cairo",除了 Windows 平台的版本將欲支援 Direct2D 佮 DirectWrite 以外,Cairo 利用 OpenGL 的技術,佇 Mac OS X 佮 Linux 平台處理 Postscript 字型的效能已經真讚;怹表示講,這 2 个新技術,拄好是予 Firefox 佇 Windows 7 的效能提升甲綴著其他平台的版本爾爾。

2009年11月24日

對教育部「馬鈴薯狗」影片,看現此時母語教育出了啥物問題?

這篇是頂禮拜 Nownews.com(東森新聞)的報導
為了推廣閩南語教學,教育部耗費400多萬元,引進日本《馬鈴薯狗》等三部動畫,提供免費下載。但是,卡通的字幕卻以羅馬拼音標示,就像火星文的符號,不但小朋友看不懂,連講閩南語的大人都說,「真的很瞎」

像是「是按怎你會赫爾直咧」(是怎樣你會這麼直)、「規身軀軟膏膏」(整個身體軟趴趴),「明仔載閣較濟」(明天還要更多)、「按呢,無的確」(這樣,不一定);更奇怪還有「ne-khu-tai」,指的是瓢蟲裝扮的帽子和領帶:「Hoo2你的tsiuh-tsyh2足古錐」。這到底是日文還是閩南語?連講閩南語的小朋友都說,「我聽的懂,可是看不懂。」

其實,台灣也有幾部以閩南語發音的卡通,以《花田少年史》為例,字幕多半國語為主,部分狀聲詞會用羅馬拼音,不但有趣,也不會造成觀眾負擔,更提高學習閩南語的意願。

對此,教育部國語會表示,雖然國語字幕較容易推廣,只是,為了保留閩南語文字,會採用教育部閩南語推薦用字,若沒有推薦用字則以發音相近為準;但,不少民眾仍抗議,一部卡通把大家搞得跟文盲一樣!
看著這篇報導,老刀實在是看甲心狂火著。毋知影記者寫彼幾篇報導的目的是啥物?我看是看衰閩南語教育,講較歹聽的,甚至是咧看衰規个教育部。

我發見教育部電子報網站的「馬鈴薯狗」(佇電子報內底的 "Free Window Vlog" 項目內底),第1集到第26集攏總佇 2007-2008 年這中間推出。佇彼當時,教育部公布的閩南語推薦用字干焦有第 1 批 300 字,所以「馬鈴薯狗」字幕所採用的閩南語字,佮現此時公布 3 批攏總 700 字相比,已經有誠大的差別;記者一直拖甲頂禮拜(2009 年 11 月)才報導,並且是針對彼當時猶未公布推薦用字的部分大作文章,真正愛予人懷疑怹是心存歹意咧看衰這規件代誌。老刀嘛佇遮建議教育部,為著推廣閩南語,實在愛閣再利用這 700 字,共「馬鈴薯狗」佮其他的閩南語教材影片重配字幕。【老刀按:「赫爾直」這个詞,教育部公布第 2 批推薦用字以後,攏統一用「遐爾直」;另外,現此時教育部已經共馬鈴薯狗影片重配字幕矣】

現此時台灣所用的「閩南語」已經加入真濟日語佮原住民語的物件,其實佮中國大陸福建所用的閩南語相比,已經無啥仝款矣,就親像頂懸彼篇報導內底的 "ne-khu-tai"(日語,原文是英語 necktie【領帶】的意思)。拄著這款字詞,想欲用漢字完整表達,講起來嘛是有伊的困難。向望教育部對這款「外來語」,會當趕緊訂出統一的寫法,予包括閩南語在內的母語教育會使連貫。

老刀順紲欲借這个事件,再度呼籲教育部:欲推動閩南語教育,絕對袂當只重視囡仔的部分爾爾,大人嘛是仝款愛教育,而且是更加重要(毋但愛教育正確用字,更加愛教育正確的心態)!若無,遐爾濟大人(家長)親像彼陣記者按呢,共教育部落氣、唱反調,我就毋相信學生囡仔會偌用心看待「學習閩南語」這件代誌;教育部實在袂當閣再看輕「毋語教育將欲失傳」的嚴重性矣。上好的辦法,就是發文請全國中央佮地方政府配合,佇政府文書抑是對外舉辦活動有欲使用著毋語(閩南語、客家語、原住民語)的時陣,絕對愛採用教育部的推薦用字。教育部開遮爾濟時間、人力才編定這 700 字;政府機關家己若無採用,實在是浪費公庫。另外一方面,按呢做嘛是營造毋語環境的方式之一,百姓看久慣勢了後,相信怹對推薦用字的反感就袂遐爾大。佇寫這篇文章的時陣,我真正足希望「趴趴走」、「碎碎唸」、「好康」、「皮皮剉」……等這款錯誤用法,會當連鞭對身軀邊消失。

紲落來,就愛看教育部敢會提出 "guts" 矣。

2009年11月23日

設定 Fedora 12 的漢字輸入法環境

iBus 是 Fedora 12 預設的漢字輸入法環境。當你鬥好 Fedora 12、頭一擺開機的時陣,iBus 已經代先共你鬥好酷音、拼音 2 个漢字輸入法矣。另外,Fedora 安裝程式 (anaconda) 嘛已經鬥好 iBus 的日文 (Anthy)、韓文 (Hangul)、內碼輸入 (Rawcode) 佮其他誠濟國家語言 (M17N) 的輸入法引擎,予你隨時使用。所以對需要定定拍入「多國語言」的朋友來講,iBus 真正是真讚的選擇。

其實佇 Fedora 12 內底猶有提供倉頡 (CangJie)、行列30 (Array 30)、二筆 (Erbi)、五筆 (Wubi) 等漢字輸入法,毋過系統佇預設狀態並無鬥入。有需要的朋友,請入去「系統」選單,叫出「管理」項目內底的「新增/移除軟體」,就會當來家己鬥矣。就親像下跤的螢幕畫面:

新增-移除軟體

鬥好了後,共滑鼠游標徙去螢幕正手爿頂懸的 iBus 尪仔標 (icon),揤滑鼠正手爿,叫出 iBus「偏好設定」的「輸入法」標仔;紲落來,踮「選擇輸入法」的輸入法名單內底,揀出你欲使用的輸入法就會使矣(請參考下跤的圖)。

iBus偏好設定

佮頂一版 (Fedora 11) 仝款,Fedora 12 猶原有提供 gcin 這个真讚的漢字輸入法環境。老刀感覺 gcin 毋但提供了比 iBus 閣較濟種的漢字輸入法,並且伊佇使用環境的設計頂頭,嘛較符合台灣使用者的習慣。想欲鬥入 gcin,會使佇「新增/移除軟體」內底揣著 gcin 安裝套件,共伊拍勾仔了後揤「套用」,紲落來你就會當佇「系統」->「偏好設定」->「輸入法」頂頭切換 iBus 抑是 gcin 輸入環境:

IM Chooser

揀好了後揤「登出」,閣再登入就會當使用矣。

但因為現此時 gcin 提供的輸入法干焦收錄「漢字」的部分爾爾,所以老刀建議有需要拍入多國文字的朋友,猶是繼續使用 iBus 就好。

2009年11月20日

Fedora 12 試用感想


Fedora 12 桌面
原由 Gontera 上載

Fedora 12 Linux 佇 11/17 正式推出了後,老刀昨暗已經共伊掠轉來鬥好勢矣。正手爿的畫面,就是老刀掠落來的 Fedora 12 (x86_64) 螢幕畫面。

備份電腦內底的重要資料了後,老刀佮進前咧鬥 Fedora 11 的時陣仝款,嘛是共 Fedora 12 系統規个重鬥,並且洗掉舊的第 11 版(並毋是用「升級」的方式)。成功鬥入系統了後,為著欲予 Fedora 12 會當應付我的需要,我做了下跤的修改:

  1. 漢字輸入法:Fedora 12 預設的 iBus 輸入法介面干焦支援「酷音」佮「拼音」2 種輸入法爾爾。我家己利用 Fedora 12 內底的「新增/移除軟體」功能共 gcin 輸入法介面鬥入來,並且共伊當做預設介面,來使用我所慣勢的 gcin 行列輸入法
  2. 系統字型:我借用微軟的「微軟正黑體」當做 Fedora 12 的系統字型,佇咧讀文章的時陣,目睭較袂艱苦。

用 Fedora 12 新版差不多滿一工,初步的感想是:

  1. 開機的速度有影比 Fedora 11 緊誠濟,這本就是 Fedora 官方的訴求。
  2. Fedora 12 預設採用的硬碟格式是 ext4,佮前一代的 ext3 比起來,有閣較讚的功能佮安全性。
  3. 網路開講的預設軟體已經改換做 Empathy,毋是舊版所佮的 Pidgin。Empathy 佮 Pidgin 設定佮使用方式攏差不多,老刀轉換過來並無拄著啥物困難。毋過 Empathy 有支援 MSN 佮 Google Talk 的語音、視訊開講,這个部分一直是 Pidgin 想欲做,但是做猶未完成的功能;凡勢過無偌久,老刀就會去買一台 webcam 來予 Fedora 12 專用矣(老刀按:現此時 Pidgin for Linux 有支援 Google Talk 語音佮視訊開講;毋過 Pidgin for Windows 所支援的開講協定,攏干焦支援拍字開講爾爾)。
  4. 開 Firefox 瀏覽器耍 plurk 的速度有非常大的進步。進前佇 Fedora 11 的時陣,毋知影是按怎,一入去 plurk 攏愛等足久才會現出畫面(奇怪的是 Fedora 10 並袂發生這个狀況);這个問題佇 Fedora 12 已經無閣再發生。

老刀猶閣咧試用 Fedora 12 其他功能當中。紲落來若有新的發見,老刀會隨時報予逐家知影。

關於 Fedora 12 的新功能佮改進,請參考我進前發表的「Fedora 12 將欲推出」這篇文章。Fedora 12 官方嘛提供了真濟文件,親像版本公告 (release note)、鬥入指南 (installation guide)、部署指南 (deployment guide)、使用者指南 (user guide) 等,有興趣的朋友,歡迎來去 Fedora 官方網站文件網頁參考。

2009年11月18日

本站入圍 2009 年第 5 屆全球華文部落格大獎初選

中國時報主辦一年一度的全球華文部落格大獎已經開始,老刀今年頭一擺報名參選。拄才收著主辦單位的電子批信通知講,本站「老刀烏白講」已經入圍「年度最佳訊息觀點部落格」的初選。

感謝逐家這 2 冬來的支持佮頭勵,提供予老刀蒐集資料、寫部落格文章的力量。嘛感謝評審委員勞力,肯定本站的文章。紲落來,老刀猶原會繼續提供精選的相關消息,寫作專文來報予逐家知影。

2009年11月17日

蘋果閣再一擺拍贏 Psystar,毋過誰是最後的勝利者?

根據 PC World 這篇報導,頂禮拜六,米國聯邦法官 William Alsup 對 Mac 相容機製造商 Psystar 公司「侵犯著蘋果公司的 Mac OS X 作業系統著作權」這个官司,做出了不利 Psystar 的解說。雖然猶有一寡議題並無議決、案件嘛當咧進行中,毋過 Psystar 佇 PC 頂懸賣 Mac OS X 系統的日子應該是結束矣。蘋果公司是得著怹所愛的官司勝利,但是對逐家來講,敢仝款有得著勝利?

按照 Alsup 的解說,Psystar 利用鬥入 Mac OS X 的 Mac mini 為基礎,共 Mac OS X 灌入去 PC 內底,然後修改一寡 Mac OS X 的關鍵元件(破解),予這台 PC 變做 Psystar 公司破解 Mac OS X 佇 PC 執行的「映像中心」。利用這台「映像中心」,Psystar 就會當真簡單的共修改好勢的 Mac OS X 大量重製入去怹的 Open Computer 產品;Alsup 認為 Psystar 這个步數違反了著作權法。

這个官司最後的結果,將佇明 (2010) 年 1 月宣判。 蘋果公司贏得官司勝利,看來差不多是穩觸觸矣。毋過老刀個人認為:
  1. Psystar 的 Open Computer 產品線上訴失敗,顛倒是加速 EFi-X、Rebel EFI 這款「提供予使用者家己 "DIY",共 Mac OS X 鬥入 PC 的工具」愈來愈流行爾爾,蘋果想欲完全禁止使用者用怹家己的 PC 做實驗來鬥入 Mac OS X 系統,應該是無可能的代誌。
  2. 使用者後擺若家己欲修改蘋果公司包括 Mac OS X 在內的軟體(親像替怹猶未漢化的軟體,做漢化介面),因為這个動作違反蘋果公司「軟體許可協議」(Software License Agreement, SLA) 的內容(老刀按:Psystar 主張蘋果公司這个部分有濫用著作權的爭議,法官現此時猶未對這个爭議表示意見),毋管目的是為著推廣軟體,抑是欲予逐家較方便使用,佇蘋果公司大勝了後,攏愛面對予蘋果公司控告侵權的風險;從此以後,想欲修改軟體的朋友,真正愛三思矣!
Psystar 拍輸這个官司,對你、我佮眾使用者,甚至是蘋果公司家己,敢有人得著真正勝利?我看攏真歹講啦!

2009年11月11日

微軟公司推出包括 Word 佮 Excel 在內的 Office for Windows/Mac 安全性更新

微軟公司今仔日(米國時間 11/10)推出上新的 Office 安全性更新,主要是修正佇 Word 佮 Excel 拍開歹心駭客製作文件的時陣,可能會予怹執行任意程式碼的問題。下跤是微軟公司網站對這 2 个問題的說明:

這擺有影響著的 Word 佮 Excel 版本,包括 Office XP/2003 for Windows、Office Word Viewer for Windows 佮 Office 2004/2008 for Mac。另外,佇 Office for Mac 軟體的部分,微軟共其他部分的大/小問題攏總做一擺修正,推出了:

老刀建議有咧使用微軟 Office 的朋友,趕緊去掠來更新吧。

2009年11月10日

nVidia Fermi 圖形處理器袂赴佇今年底推出

頂個月 nVidia 才宣布新一代的旗艦級圖形處理器 Fermi 將欲佇今年底推出爾爾(有興趣的朋友,歡迎來參考老刀較早「nVidia 推出新的費米 (Fermi) 旗艦級圖形處理器」這篇文章),毋過真可惜,根據 EXP Review 這篇報導講著,因為產能不足,nVidia 已經證實新一代 Fermi-G300 圖形處理器推出的時間,將延後到 2010 年第 1 季。

nVidia 執行長黃仁勳 (Jen-Hsun Huang) 嘛講著,怹當咧走揣會當生產 Fermi 的 40 奈米晶圓廠,並且現此時 3 條生產線:GeForce、Quadro 佮 Tesla 系列產品,未來攏會改換採用 Fermi 核心。另外,伊嘛透露配合 Intel Core 2 Duo 專用的晶片組 MCP89 將欲推出的消息。黃執行長表示對 2010 年第 1 季充滿期待,因為到時怹將有誠濟新產品欲發表。

Nokia 宣布全面回收 AC-3E/AC-3U/AC-4U 手機充電器

根據 PCWorld 的報導,手機大廠諾基亞 (Nokia) 今日宣布:因為合作廠商(中國比亞迪電子公司)製造充電器的塑膠殼仔有可能會開去,予充電器內底的零件暴露佇外口、增加漏電危險,將欲全面回收部分手機型體的充電器,用戶嘛會當得著替換的新充電器。

台灣諾基亞官方網站嘛已經貼出新聞稿

(2009 年 11 月 9 日,芬蘭 Espoo)諾基亞今天公佈一項充電器更換計畫,凡消費者持有特定第三方供應商生產之特定型號的諾基亞原廠充電器,即可免費更換新的充電器。

在例行的品質檢測流程中,諾基亞發現由一家第三方供應商生產的某些充電器可能有潛在的產品品質疑慮。我們發現這些充電器的塑膠外殼可能會鬆脫,以致內部零件外露。如在此情況下接觸到插在帶電插座上的充電器的內部零件,可能會觸電。迄今,諾基亞尚未收到任何與這些充電器相關的意外或傷害訊息。

只有少數並在特定期間,由該第三方供應商生產之特定型號充電器符合此次更換計畫。這幾款特定充電器為生產於今年 6 月 15 日至 8 月 9 日之間的 AC-3E 以及AC-3U;以及於今年 4 月 13 日至 10 月 25 日之間生產的 AC-4U 符合此次充電器更換計畫。諾基亞已經建立相關網站,為消費者提供更多有關資訊,台灣消費者可以撥打服務專線 02-3234-9700,或請至以下網址查詢自己的充電器是否符合充電器更換範圍: http://chargerexchange.nokia.com 或瀏覽台灣諾基亞官方網站 www.nokia.com

諾基亞建議有關消費者,若您的充電器屬於更換範圍,請停止使用並免費更換。

比亞迪公司嘛針對這个消息發布這篇新聞稿,毋過按怎讀,就是無像 Nokia 遐爾規氣;中國製的產品品質實在袂使傷相信矣!

2009年11月3日

Fedora 12 將欲推出

作業系統大戰一場拍過一場,實在是無了時。2009 年前後已經有 Mac OS X 10.6 (Snow Leopard)Windows 7Ubuntu 9.10,佇老刀愛用的 Fedora Linux 方面,代號叫做 Constantine 的 Fedora 12 嘛咧欲佇 11/17 正式推出,這齣作業系統大戰,佇 2009 年後半冬是愈來愈鬧熱矣。

Fedora 12 將欲推出下跤 3 个版本:

  • i686(32 位元,Pentium Pro 以上的處理器攏適用)。對 Pentium 等級的電腦來講,Fedora 11 將是 Fedora 系列作業系統官方支援的終點站。
  • x86_64(64 位元,支援 AMD64/Intel EM64T 指令集的處理器適用)。
  • PPC(32/64 位元,PowerPC G3 以上的處理器適用,嘛包括 Sony PlayStation 3)。

Fedora 12 改進的所在誠濟,老刀共其中一寡寫踮下跤:

  • 支援閣較濟的網路掠影機 (webcam),新的 libv4l 函式庫,嘛提供網路掠影機支援比舊版較讚的功能:白平衡、Gamma 校正、自動調整曝光、自動感應筆電附佮的網路掠影機(親像倒轉 180 度、頂下鬥倒反等)。
  • GNOME 2.28。
  • KDE 4.3。
  • GRUB 開機選擇程式支援 ext4 檔案系統。
  • 新的 Dracut 開機系統。
  • 提升開機速度。
  • Eclipse 3.5。
  • 特殊用途使用者的軟體套件:包括科學佮數學、電子設計、電路設計、嵌入式系統、業餘無線廣播(火腿族)等。

想欲進一步了解 Fedora 12 的功能改進,請參考伊的版本公告(草案)。

2009年11月1日

予逐家誤用的閩南語字 (5)

距離這个單元頂一篇文章已經 3 个禮拜,老刀這站仔閣再對新聞報導佮俗語話內底,蒐集一寡逐家可能會真捷看著的誤用例,共怹整理佇下跤,希望逐家後擺毋通閣再用毋著字矣!

例句 誤/異用字 正確用字
狂飆180尬車互撞 竊車集團街頭玩命 尬車 較車
丈姆看囝婿,愈看愈尬意 尬意 佮意
蘇治芬呼籲青年返鄉打拼 打拼 拍拚
頭城收不收費? 駕駛霧煞煞 霧煞煞 霧嗄嗄
北投國小祖孫週 阿公阿嬤逗陣來看歌仔戲 阿嬤、逗陣 阿媽鬥陣

2009年10月31日

船長閣再出帆:Captain FTP 6.2 推出!

CFTP6老刀真愛用的 FTP 軟體 Captain FTP for Mac OS X 佇昨日推出 6.2 新版矣。

這个新版主要是修正舊版的一寡問題(親像 SFTP 連線、傳輸管理員,佮關於其他使用者回報的問題等),另外嘛增加對 Growl 的支援。猶有一點欲提醒逐家:這个版本仝款有收入老刀所製作的漢化翻譯介面喔!

Captain FTP 6.x 的用戶,攏會使去 Xnet Communications GmbH 公司網站免費掠這个新版本轉來升級。

2009年10月29日

眾搖滾迷,共你的 iPhone/iPod Touch 揤落去!

頂禮拜老刀才報導 Rock Band for iPhone/iPod Touch 爾爾,這陣 Tapulous 公司出名的 Tap Tap Revenge 系列又閣增加上新成員 Tap Tap Revenge: Metallica 來捙拚,這場搖滾戲齣是一直搬袂煞矣!

按照新聞稿的說明,建築佇 Tap Tap Revenge 3 平台的新產品 Tap Tap Revenge: Metallica(定價 4.99 箍米金),除了傳統彈奏 Metallica 音樂的耍法以外,嘛提供用戶透過藍芽對戰,囥炸彈佮一寡機關佇對手的 iPhone/iPod Touch 內底來擾亂對方,替家己嬴著勝利。Tapulous 公司嘛慷慨提供抽獎:佇蘋果 App Store 訂購 Tap Tap Revenge: Metallica 的客戶內底抽出一位幸運者,這位幸運者會當得著 Metallica 將欲佇 2009 年 12 月 5 日佇米國跋筊城 (Las Vegas) 舉辦的 "World Magnetic Tour" 演唱會門票 2 張、來回機票、內陸接送,並且有機會親身去後台佮 Metallica 面會!

Tap Tap Revenge: Metallica 提供 10 調 Metallica 的名曲:
  • Enter Sandman
  • Sad But True
  • King Nothing
  • All Nightmare Long
  • Some Kind of Monster
  • Master of Puppets
  • Seek & Destroy
  • Fuel
  • One
  • For Whom the Bell Tolls
最後,請逐家來欣賞 Tap Tap Revenge: Metallica 的宣傳片:

2009年10月25日

Psystar 推出會當佇任何 PC 鬥入 Mac OS X 10.6 的 "Rebel EFI" 工具軟體

Psystar 佮蘋果公司幾工前向米國的地方法院提出要求,將欲結束雙方互告的官司爾爾(請參考 PC World 這篇文章),但是過無偌久,Psystar 竟然推出號稱會當佇任何 PC 頂頭鬥入 Mac OS X 10.6 (Snow Leopard) 的 Rebel EFI 工具軟體。按呢看來,雙方可能猶有一寡官司無完無了,哈哈。

hardwareclean_1定價 49.99 箍米金的 Rebel EFI 提供了簡單的方式,予使用者家己佇 PC 頂頭鬥入 Mac OS X 10.6 (Snow Leopard)。透過這个工具,嘛會當予使用者了解怹 PC 的硬體零件(包括介面卡等)是毋是 「Mac OS 相容」(請參考正手爿的圖) 。Rebel EFI 這馬已經囥佇 Psystar 公司網站提供予逐家免費試用(試用期間只有 2 點鐘)。

老刀個人認為:Psystar 這擺出這招,應該是欲放風聲予蘋果公司了解怹破解 Snow Leopard 的技術佮能力;順紲逼蘋果公司開閣較濟的代價,共 Psystar 買這个「技術」,甚至是共 Psystar 規間公司攏總買落來,來防止別人共「鬥入 Snow Leopard 的技術」散布出去。

想欲進一步了解 Rebel EFI 相關消息的朋友,會當去參考 Rebel EFI 產品網頁Psystar 公司的新聞稿

想欲了解 Psystar 佮蘋果公司中間的恩怨,會使來參考老刀進前的報導:

2009年10月23日

蘋果公司 Boot Camp 放棄對一部分電腦的 Windows 7 支援

微軟公司終於佇昨昏 (10/22) 共 Windows 7 正式推出上市矣!對會當透過 Boot Camp 鬥入 Windows 系統的 Mac 用戶來講,敢欲升級,實在是真歹做決定。根據蘋果公司新公布這篇技術文件看來,蘋果公司宣布將欲佇今 (2009) 年底進前,推出支援 Windows 7 的新版本 Boot Camp;毋過真可惜,一寡舊機種的用戶愛失望矣。

下跤這幾款舊機種的 Mac 電腦,將無法度佇 Boot Camp 下跤鬥入 Windows 7:

  • iMac (17-inch, Early 2006)
  • iMac (17-inch, Late 2006)
  • iMac (20-inch, Early 2006)
  • iMac (20-inch, Late 2006)
  • MacBook Pro (15-inch, Early 2006)
  • MacBook Pro (17-inch, Late 2006)
  • MacBook Pro (15-inch, Late 2006)
  • MacBook Pro (17-inch, Early 2006)
  • Mac Pro (Mid 2006, Intel Xeon Dual-core 2.66GHz or 3GHz)

想欲知影你的 Mac 敢是佇這幾款機種內底,會使參考蘋果公司另外這篇技術文件

拄著真正愛鬥入 Windows 7 的時陣欲按怎?免驚。既然 Boot Camp 無直接支援,改用虛擬機器(親像 Parallels DesktopVMWare Fusion,抑是免錢的 VirtualBox 等)來鬥入 Windows 7,應該無問題啦!

2009年10月21日

你的 iPhone/iPod Touch 拍入日文「は」敢會當機?

捷捷咧利用 iPhone/iPod Touch 拍日文的朋友,請注意來!今日蘋果公司貼出這篇技術文件,說明 iPhone/iPod Touch 用戶佇拍入日文假名「は」拄著當機的解決方法。原來當機的原因是出佇鍵盤使用的語言頂懸。

你若拄著這个問題,解決的方法是:
  1. 佇主畫面內底,揤「設定」。
  2. 揤「一般」。
  3. 揤「國際設定」。
  4. 揤「語言」。
  5. 共主要語言佮鍵盤設定做英文。
  6. 倒轉去「設定」內底的「一般」選單。
  7. 揤「重置」。
  8. 揤「重置鍵盤字典」。
  9. 重新啟動 iPhone/iPod Touch。
  10. 倒轉去「設定」->「一般」->「國際設定」->「語言」內底,共你的 iPhone/iPod Touch 的主要語言設定做日文。
希望貼出這篇文章,會使解決一寡朋友的問題。最後,因為老刀家己並無 iPhone 抑是 iPod Touch,所以愛特別感謝好朋友「詹姆士」提供 iPhone 介面頂頭的「專有名詞」予老刀,順紲佇遮說一聲多謝。

2009年10月20日

Rock Band 將欲推出 iPhone/iPod Touch 版本!

有 iPhone 的朋友,好消息來矣!米商藝電公司 (EA) 將欲推出 Rock BandiPhone/iPod Touch 版本矣,並且欲用 9.99 米金的價數出現佇 AppStore 頂懸。

佇 Rock Band 內底,會當選擇「吉他」、「貝斯」、「鼓」佮「主唱」4 種情境。毋過佮 PS2/PS3/Wii/Xbox 360 的版本無仝款的所在是,iPhone/iPod 版並無附佮「實體」的樂器佮麥克風,伊是用 4 个手指頭仔揤螢幕頂頭的記號來耍,親像下跤的畫面按呢:

現此時的 Rock Band for iPhone/iPod Touch 內底有附下跤這 20 調歌:

  • 30 Seconds To Mars – Attack
  • AFI – Girls Not Grey
  • All American Rejects – Move Along
  • Beastie Boys – Sabotage
  • Blink-182 – All The Small Things
  • Blondie – Hanging on the Telephone
  • Foo Fighters – Learn To Fly
  • Foo Fighters – Everlong
  • George Thorogood & the Destroyers – Bad to The Bone
  • Jethro Tull – Hymn 43
  • Joan Jett – Hymn 43
  • Lynard Skynyrd – Simple Man
  • Motorhead – Ace of Spades '08
  • Pixies – Debaser
  • Presidents of The United States of America – Ladybug
  • Rise Against – Give It All
  • Silversun Pickups – Lazy Eye
  • Smashing Pumpkins – Cherub Rock
  • Steve Miller Band – Take The Money and Run
  • The Go Go's – We Got The Beat

藝電嘛提供付費選購其他歌曲的服務(逐調歌 0.99 米金)。

2009年10月17日

10/16 老地方冰果室例行聚會,兼老刀「搖滾開講 part 2」紀錄

受著老蔡 (Alex Tsai) 邀請,老刀閣再來到老地方冰果室逐禮拜五暗時的例行聚會「搖滾開講 part 2」。一寡老朋友、新朋友做伙來鬥鬧熱,共 Manaha 咖啡店 2 樓包廂坐甲滇滇,眾朋友熱情捀場,真正是足感心。

這擺老刀以 Damn Yankees 為題,來介紹米國搖滾界的超級樂團(關於「超級樂團」詳細的說明,請參考維基百科)。除了介紹 Damn Yankees 團員(包括:吉他/主唱 Tommy Shaw、貝斯/主唱 Jack Blades、吉他/主唱 Ted Nugent、鼓手 Michael Cartellone)的來歷以外,嘛介紹怹佇原來母團的代表作。老刀共這擺所放的曲目寫佇下跤:

歌名

團體

專輯(年份)

Stranglehold Ted Nugent Ted Nugent (1975)
Crystal Ball Styx Crystal Ball (1976)
Too Much Time on My Hands Styx Paradise Theatre (1981)
Haven't We Been Here Before Styx Kilroy Was Here (1983)
Don't Tell Me You Love Me Night Ranger Dawn Patrol (1982)
Call My Name Night Ranger Dawn Patrol (1982)
Rumors in the Air Night Ranger Midnight Madness (1983)
Four in the Morning Night Ranger 7 Wishes (1985)
High Enough Damn Yankees Damn Yankees (1990)
Double Coyote Damn Yankees Don't Tread (1992)
Someone to Believe Damn Yankees Don't Tread (1992)
I Will Be Your Witness Styx Brave New World (1999)

最後,老刀閣再感謝老蔡提供專業喇叭,猶閣有眾朋友(喵小相、詹姆士、五樣、阿勇佮阿貴爸仔囝、Gina、uSimon、小捲兄弟,另外嘛有 2 个老刀並無熟似的新朋友)來鬥鬧熱,做伙予這擺聚會圓滿大成功!

這擺聚會的相關討論囥佇老地方冰果室討論版,歡迎逐家去遐留落你的意見。

2009年10月15日

It's only rock and roll (3):歡迎逐家 10/16 禮拜五暗時來 Mahana 咖啡店,閣再聽老刀「搖滾開講 part 2」

頂個月 (9/11) 受著朋友 Alex Tsai 邀請,佇 Mahana 咖啡店(台北市中正區南昌路二段89號)舉辦的老地方冰果室例行聚會來「搖滾開講 part 2」,彼一暗逐家來捧場,予我印象誠深。因為一寡無緣到場的朋友一再希望老刀會使閣再開講一場,所以受著 Alex Tsai 再度邀請,老刀自然就答應重出江湖矣。

這擺我將欲以家己真佮意的樂團 Damn Yankees 為例,來介紹 1980 年代的米國的超級團體 (Supergroup)。啥貨是「超級團體」?就是幾个已經誠出名團體的團員,閣再臨時組合的團體,做伙出片、辦短期巡迴演唱會,就親像另外一个新團仝款。Damn Yankees 的團員,親像貝斯手 Jack Blades(來自 Night Ranger)、吉他手 Tommy Shaw(來自 Styx)佮 Ted Nugent(獨立樂手,有家己的團)、鼓手 Michael Cartellone(名團 Lynyrd Skynyrd 的現任鼓手,伊嘛是出名的油畫藝術家)。若閣有時間,老刀想欲共逐家介紹國外幾个真讚的搖滾網路電台,予你毋免蒐集一大堆 CD、MP3,只要你共電腦開咧,就隨時會使來搖滾一下。

最後,老刀嘛歡迎逐家來去老地方冰果室討論版,留落你的感想佮意見。

2009年10月11日

予逐家誤用的閩南語字 (4)

前站仔教育部公布第 3 批臺灣閩南語推薦用字了後,包括你我在內的朋友,可能愛小細膩一下,更正一寡逐工定定會用著的字詞。為著毋通共怹放袂記,老刀特別整理佇下跤:

例句 誤/異用字 正確用字
茶壺
倒退嚕
感冒真重,講話燒聲
熱天呷剉冰,真爽快 呷、剉
麻吉QQ卡好呷 吉、Q、卡、呷 𩚨
嘜閣共我漏氣矣,我會歹勢啦! 嘜、漏

頂懸的正確用字,是以教育部國語會的臺灣閩南語推薦用字,佮臺灣閩南語常用詞辭典為主。

2009年10月8日

Eltima Software 推出 SyncMate 2.4

Windows Mobile 智慧手機佇這幾冬來,是愈來愈流行矣。因為蘋果原廠的仝步軟體 iSync 並無支援 Windows Mobile 的手機佮 PDA,所以手機想欲佮 Mac OS X 仝步,就愛利用其他廠商推出的仝步軟體來達成;老刀較早捌介紹過免錢的 SyncMate,就是一个誠讚的解決方式。

這禮拜一 (10/5) Eltima Software 公司已經推出 SyncMate 2.4 新版。除了頂一版 (2.0) 支援仝步 Windows Mobile、Google 帳號、線頂伺服器、Nokia S40 系列手機以外,這个 2.4 新版閣再增加支援佮 Windows PC、USB 隨身碟、Sony PlayStation Portable (PSP) 仝步,功能是愈來愈強矣。甚至老刀感覺以這馬 SyncMate 的支援程度來講,利用鬥入 SyncMate 2.4 的 Mac 電腦來當做 3C 週邊裝置的仝步管理中心,絕對是誠輕鬆的代誌。

SyncMate 嘛有提供付 39.95 箍米金升級到「專家版」的服務,想欲享受「終身升級保證」,需要閣再加付 11.99 箍米金。SyncMate 專家版提供親像 Safari/Firefox 書籤、iTunes 音樂/影片、iPhoto 相片仝步佮其他一寡閣較好用的功能。

想欲了解這擺 SyncMate 更新、改進了啥物所在,歡迎來參考怹使用手冊內底的版本說明

2009年10月7日

VirtualBox 3.0.8 更新推出

VirtualBox

昇陽 (Sun Microsystems, Inc.) 今日推出免錢的虛擬機器軟體 VirtualBox 3.0.8

這擺主要是修正各種平台版本的 VirtualBox 佇虛擬記憶體管理方面的問題。而且佇 Mac OS X 10.6 (Snow Leopard) 頂頭嘛有小可仔改進。另外,佇 Windows 平台的「客端額外功能」(Guest Additions) 已經有支援 Windows Vista 64 位元的版本。

想欲詳細了解新版本修正啥物所在,歡迎參考怹的更新紀錄

2009年10月6日

HanaMin:完整收錄中日韓統一表意文字擴展 C 區 (Ext-C) 的字型,免錢的喔!

Ext-C感謝朋友 Pektiong 食好鬥相報,這个免錢的 HanaMin 字型是日本花園大學製作,伊採用標準的 TrueType 字型,會當直接鬥入 Windows/Mac OS X/Linux 等一寡主流作業系統使用。
按照花園大學對 HanaMin 字型的說明,伊支援 48,589 个漢字佮 572 个非漢字。其中漢字的部分有:
  • U+4E00 ~ U+9FA5:完整收錄 Unicode 1.0/2.0,收錄 20,902 字。
  • U+9FA6 ~ U+9FCB:完整收錄 38 字【老刀按:抑就是 Unicode 4.1/5.1,佮將欲收入佇 Unicode 5.2 的漢字】。
  • U+3400 ~ U+4DB5:中日韓統一表意文字擴展 A 區 (Ext-A),收錄 4,705 字(攏總 6,582 字)【老刀按:抑就是 Unicode 3.0 漢字】。
  • U+20000 ~ U+2A6D6:中日韓統一表意文字擴展 B 區 (Ext-B),收錄 17,874 字(攏總 42,711 字)【老刀按:抑就是 Unicode 3.1 漢字】。
  • U+2A700 ~ U+2B734:中日韓統一表意文字擴展 C 區 (Ext-C),完整收錄 4,149 字【老刀按:將欲收入佇 Unicode 5.2】。
  • U+F900 ~ U+FAD9:中日韓相容性表意文字,完整收錄 470 字。
  • U+2F800 ~ U+2FA1D:中日韓相容性表意增補文字 451 字。
親像教育部臺灣閩南語推薦用字內底的「亻因」(U+2A736,佇本站是用異用字「怹」代替),就是屬於 Ext-C 字集的範圍。所以嘛特別佇遮食好鬥相報,報予逐家知影。
因為現此時有鬥入 Ext-C 字型的電腦並無蓋濟,所以本站暫時猶無採用 Ext-C 發表文章的拍算。

2009年10月4日

nVidia 推出新的費米 (Fermi) 旗艦級圖形處理器

毋甘予 ATI-AMD 佮 Intel 行佇頭前,顯示卡老廠 nVidia 終於嘛推出怹上新的旗艦級顯示卡,號名叫做「費米」(Fermi) 的新款圖形處理器 (GPU),應該是紀念米國的物理學家 Enrico Fermi 博士 (1901-1954)【老刀按:費米博士是製造第一粒原子彈的「曼哈坦計畫」的主持人】。毋過這粒 Fermi 圖形處理器,敢有親像原子彈這款的威力?

按照 nVidia 網站關於 Fermi 的介紹看來,這粒 GPU 有下跤的特色:

  • 512個 CUDA 核心
  • NVIDIA 平行資料快取技術
  • NVIDIA GigaThread™ 引擎
  • 支援 Full ECC

另外,Fermi 嘛支援 DirectX 11 佮 OpenCL。佇 Windows 7 佮 Mac OS X 10.6 (Snow Leopard)頂懸的效能,絕對會當予 ATI-AMD 頂禮拜拄推出的 Radeon HD 5800 系列感受著誠大壓力。紲落來,就等硬體廠商推出採用 Fermi 圖型處理器的顯示卡了後,來做性能比較矣。

套一句吳樂天講廖添丁的名句:「好戲在後頭」;Radeon HD 5800 系列對 Fermi 大戰的結果如何,時到逐家便看就知影啦!

2009年10月3日

老刀祝福逐家中秋快樂

一年一度的中秋節來矣。老刀佮真濟朋友仝款,欲轉去南部過節歇睏幾工。佇高鐵車廂內底拍這篇文章,先來祝福逐家閤家團圓,月餅、烘肉食予飽飽;但是嘛希望逐家保重身體,毋通去食歹腹肚喔!

2009年10月2日

教育部公布第 3 批「臺灣閩南語推薦用字」

教育部今仔日公布第 3 批「臺灣閩南語推薦用字」總共 300 字,距離怹公布第 2 批用字已經 1 年 5 個月。現此時教育部的閩南語推薦用字攏總已經有 700 字,應該會當應付大部分的文書佮對話。另外,教育部嘛整理這 3 批 700 字,提供手冊、字卡予逐家毋免開電腦嘛會使隨時來學台語,實在有夠用心。老刀愛佇遮共教育部拍一个大噗仔。

下跤是教育部的新聞稿

「臺灣閩南語推薦用字(第 3 批)」及「臺灣閩南語推薦用字隨手冊、字卡」已公布於教育部網站,相關內容可至 教育部 網站「資料下載區」 下載使用。

教育部為推廣臺灣閩南語教學,及改善坊間本土語言教材各版本用字紊亂、紛雜不一的情形,已分別於 96 年 5 月及 97 年 5 月公布「臺灣閩南語推薦用字」第 1 批 300 字詞及第 2 批 100 字詞,現已研議完成第 3 批推薦用字計有 300 字詞。

本次所公布的「臺灣閩南語推薦用字(第 3 批)」除多為生活常用詞外,其與華語詞的寫法亦較有差異。如,「家私( ke-si )」(華語義為「工具、道具、槍械武器」)、「覕」( bih )」(華語義為「躲藏」)、「克虧( khik-khui )」(華語義為「委屈、吃虧」)等。目的是希望民眾於學習臺灣閩南語詞的同時,能比較、了解不同文化間的異同,進而尊重彼此的文化內涵。

教育部為考慮民眾學習之便利性,及推廣 97 年 10 月公布的《臺灣閩南語常用詞辭典》 http://twblg.dict.edu.tw/tw/index.htm (約收錄 1 萬 3,000 多詞),未來臺灣閩南語用字將以辭典內容為主,而後續將針對各界所提的用字建議,陸續進行修訂、增補等工作。

另外,臺灣閩南語用字研議工作現階段已完成共計 700 字詞,教育部已將第 1 批至第 3 批的推薦用字成果,彙整設計為隨手冊及字卡兩種形式的電子檔;且為響應並配合「節能減碳」政策,教育部所設計的「臺灣閩南語推薦用字 700 字詞」,僅提供電子檔置放於教育部網站,將不另製成紙本供民眾索取,請民眾依個人使用需求,自行下載後裁切使用。

因為老刀這站仔較無閒寫文章,所以進前無細膩去漏勾著教育部已經佇頂個月推出「臺灣客家語書寫推薦用字」(第 1 批)的消息。想欲進一步了解的朋友,歡迎來去教育部國語會網站參考。

2009年9月27日

旗艦級顯示卡大戰愈來愈精彩矣!

ATI-AMD 禮拜三 (9/23) 終於推出怹新一代的旗艦顯示卡:Radeon HD 5800 系列;這擺新推出 Radeon HD 5870/5850 二款,性能大勝前一代的 HD 4890/4870。另外,嘛𤆬來 3 項新功能:

  • Eyefinity 技術:透過 DisplayPort,會當支援上濟 3 个螢幕做伙使用。
  • 串流 (Stream) 技術:加速你上蓋消耗 GPU 資源繪圖程式佮𨑨迌物仔。
  • 支援 DirectX 11。

根據這篇報導,AMD-ATI Radeon HD 5870 佮 nVidia GeForce GX285 相比,佇 3DMark '06 佮其他一寡測試軟體的成績看來,Redeon HD 5870 得分竟然比 GeForce GX285 閣較懸 20%-50%(想欲進一步了解測試結果的朋友,會使直接去參考這篇文章的第 4 頁第 5 頁第 6 頁)。按照這款情勢看來,nVidia 為著欲佮 AMD-ATI 競爭,應該過無偌久就會推出新款的旗艦級顯示卡迎戰。

另外,根據 InformationWeek 的報導,Intel 幾工前 (9/21) 佇米國舊金山的 Intel 開發者論壇,嘛已經展示怹代號叫做 Westmere 的展示旗艦級 Larrabee 顯示卡原型:採用 32 奈米製程,核心是 Nehalem 處理器的架構。第一代的 Westmere GPU 將佇今年第四季開始出貨。

毋管如何,ATI-AMD、nVidia 佮 Intel 旗艦級顯示卡大戰將欲開戰矣;今年底抑是明年初,逐家準備來看這齣好戲吧!

2009年9月22日

iTunes Media 的檔案分類

蘋果公司推出 iTunes 9 將近 2 禮拜,你可能猶毋知影這个 iTunes 新版已經恬恬仔變更 iTunes 檔案夾的分類方式。根據蘋果公司的技術支援文件,iTunes 9 的檔案夾分類方式已經變做:

(iTunes Media 分類會共內容安排去相關的檔案夾內底):

iTunes Media on V9

iTunes
  iTunes Media
    有聲書
    自動加入 iTunes
    iPod 遊戲
    Mobile Applications
    影片
    音樂
    Podcast
    鈴聲
    電視節目
    語音備忘錄

雖然 iTunes 9 支援舊版的分類方式,蘋果公司猶原建議用戶升級到新的 iTunes Media 分類(老刀按:雖然怹講新版的編排較合理,但是應該毋是逐家攏按呢想)。方法是對 iTunes 9 的「檔案」功能表(選單)內底的「資料庫」項目,揣著「整理資料庫…」,紲落來佇螢幕現出的視窗(請參考頂頭彼張圖)內底的「更新為 iTunes Media 分類」拍勾仔;揤「確定」(Mac 版叫做「好」)了後,iTunes 會自動作資料庫轉換的動作。

最後有一點愛提醒逐家:這是單向的轉換過程;轉換成功了後,iTunes 並無提供回復舊版資料庫的方法。

2009年9月19日

It's only rock and roll 續集:歡迎逐家暗時入來噗浪 (Plurk) 繼續搖滾

頂禮拜五的「搖滾開講」已經煞場,這幾工一寡朋友共老刀講著:因為上班、上課的關係,袂赴來聽老刀上課,真是拍損。想欲聽老刀介紹經典搖滾,其實機會一直攏佇逐家身軀邊,順紲利用這个機會報予你知影。

這幾個月以來,老刀逐暗下班了後若有佇網路頂頭,攏會挑選特定主題,貼 5 調經典搖滾 MV 踮我的噗浪 (Plurk) 頁面內底(量其約佇台灣時間逐暗 9:00~12:00)。嘛因為按呢,漸漸嘛熟似其他佮老刀仝款痟搖滾的「噗友」入來開講。親像這款集合眾搖滾迷的開講,絕對會比老刀頂禮拜的「搖滾開講」閣較趣味矣!

猶未加入噗浪的朋友,入去我的噗浪頁面內底,嘛猶原會使看著我所推薦的經典搖滾 MV;若想欲加入開講,請趕緊來去噗浪首頁免費註冊一个帳號吧!

2009年9月13日

9/11 老地方冰果室例行聚會:「搖滾開講」課程紀錄

DSCF0685這擺老刀應朋友老蔡 (Alex Tsai) 的邀請來到 Mahana 咖啡店,佇老地方冰果室逐禮拜五暗時的例行聚會介紹我所佮意的搖滾老歌。因為是我頭一擺開講,所以是共 1980 年代時行的各種搖滾流派攏提出來介紹(攏總 11 調歌)。雖然開講有比預定的時間淡薄仔晏,毋過開講一開始,就有網友 Ann 認真咧用 iPhone 做筆記,予老刀誠感動。

老蔡講著,這擺的「搖滾開講」只是一个起步;後擺伊將欲計畫邀請一寡名人來到現場做專題性的介紹(親像邀請專業的樂手、製作人來講音樂,抑是掠影名家來開課等等),予例行聚會跳脫電腦的界線。雖然老刀毋是啥物「名人」,只是一个普通搖滾樂迷爾爾,毋過會當受邀來做頭先鋒,嘛是光榮的代誌矣。

這擺聚會嘛是老地方冰果室例行聚會徙去 Mahana 咖啡店了後,老刀頭一擺紮翕相機來做影像紀錄。除了感謝老蔡佇我開講的時陣協助翕相以外,嘛愛特別感謝網友 Fayever 熱心提供 Bose 專業音響,予這擺「搖滾開講」會當順利成功。

逐家若有關於這擺聚會的任何意見、感想,攏歡迎來去老地方冰果室討論版留字。最後,老刀共這擺「搖滾開講」的歌單寫佇下跤,予無緣來到現場的朋友參考一下:

歌名 藝人/團體 專輯 (年份)
Rock Of Ages Def Leppard Pyromania (1983)
Back In Black AC/DC Back In Black (1980)
The Angel Song Great White ...Twice Shy (1989)
Stars Hear 'N Aid Hear 'N Aid (1985)
Free Fallin' Tom Petty Full Moon Fever (1989)
Jealous Again The Black Crowes Shake Your Money Maker (1990)
Where You Goin' Now Damn Yankees Don't Tread (1992)
Never Heart Heart (1985)
For The Love Of God Steve Vai Passion & Warfare (1990)
Trilogy Suite Op: 5 Yngwie J. Malmsteen Trilogy (1986)
Should I Stay Or Should I Go? The Clash Combat Rock (1982)

2009年9月11日

It's only rock and roll……歡迎逐家來聽老刀搖滾開講!

今日蘋果公司雖然佇號名做 "It's only rock and roll, but we like it." 的新產品發表會推出了全系列 iPod 的規格更新(嘛順紲發表 iTunes 9 新版),但是這个發表會老刀看來看去,就是毋知影這擺發表會到底佮 rock and roll 有啥物關係?

想欲聽搖滾的朋友,機會已經來矣!老刀這擺應網站老地方冰果室的 Alex Tsai 邀請,將欲佇今暗的禮拜五例行聚會介紹 1980 年代真濟好聽的搖滾經典。關於這擺聚會的時間、地點佮其他討論,歡迎來遮參考,嘛歡迎順紲來去留落你的意見。

最後老刀愛特別感謝朋友 Fayever 鬥相共,熱心提供怹公司的 Bose 專業音響展示機來借老刀放歌。相信佇 Bose 名廠加持之下,今暗聚會現場一定是鬧熱滾滾矣!

2009年9月10日

VirtualBox 3.0.6 更新推出

受著老刀佮一寡朋友歡迎的免錢虛擬機器軟體 VirtualBox,已經推出 3.0.6 更新版矣。這个新版修正了真濟毛病,親像虛擬記憶體管理員 (VMM)、SATA 驅動程式……。其中伊的 Mac OS X 平台版本,嘛解決了佇 Mac OS X 10.6 (Snow Leopard) 32 位元環境內底的密碼對話框的問題。

想欲閣較進一步了解新版改進的所在,歡迎參考怹的版本公告

2009年9月7日

你的 iMac/MacBook/MacBook Pro/MacBook Air 螢幕敢會傷光?

你的 iMac/MacBook/MacBook Pro/MacBook Air 螢幕敢會傷光?趕緊來揤 F1/F2 調整光度,抑是入去「系統偏好設定」的「顯示器」檢查看覓吧!

老刀舊年 6 月買的 iMac 20" (Early 2008) 自從頂個月升級 Mac OS X 10.5.8 以後,開機了後的螢幕就一直保持踮上光的狀態,雖然會使入去「系統偏好設定」內底共光度調較小,毋過重新開機了後,螢幕猶原會保持佇上大光度。

更加奇怪的是,毋管是清 PRAM(開機的時陣揤 command+option+P+R)抑是清系統偏好設定(佇 /Library/Preferences 內底,以 com.apple. 名字起頭的檔案),攏無法度解決這个問題;原本叫是 Mac OS X 10.5.8 咧變鬼,毋過最近閣再共系統升級到 10.6,仝款無法度消除這个問題。

老刀佇 Google 內底用 Mac maximum brightness 做關鍵字去揣文章,連鞭就揣著全世界真濟使用者攏有佮老刀相仝的反映,而且毋但 iMac 爾爾,MacBook 佮 MacBook Pro 的用戶嘛有仝款問題,所以老刀這台 iMac 應該毋是個案。

佇老刀寫這篇報導的時陣,蘋果公司猶未提出解決問題的做法。

2009年9月6日

鑿破 Mac OS X 10.6 的大雞胿(3):騙鬼的漢字輸入法支援

嚴格來講,這篇應該算做頂一篇(鑿破 Mac OS X 10.6 的大雞胿(2):騙鬼的 Unicode 支援)的續集。毋過老刀考慮著文章長度的關係,紲來分做 2 篇發表。

佇智慧注音輸入方面,對 2003 年 Mac OS X 10.2.4 開始,就一直陪伴真濟朋友的「漢音輸入法」,已經佮老刀的 AppleTalk 印表機做伙「刀射」去矣啦。除了捶心肝以外,老刀建議你會當改用 Yahoo! 奇摩輸入法抑是佇 OpenVanilla 香草輸入法內底鬥入酷音輸入模組(詳細的說明,會使參考 OpenVanilla 0.9.0a1 的版本公告)來解決。毋論你最後是按怎解決這个問題,老刀個人感覺,按照蘋果公司數冬來真濟無尊重臺灣佮香港正體漢文用戶的「不良紀錄」,這擺漢音輸入來予怹「刀射」去,應該無啥物奇怪。

按照蘋果公司官方對 Mac OS X 10.6 (Snow Leopard) 的介紹,新版系統佇 MacBook 佮 MacBook Pro 頂懸,已經支援利用手指頭仔佇怹的 Multi-Touch 軌跡板寫漢字輸入,可惜這个對 iPhone OS 搬過來的功能,其實嘛有欠字嚴重的問題。因為佇 iPhone OS 頂頭真濟字無法度利用手寫輸入的問題,佇 Snow Leopard 嘛是仝款存在:平平是 Unicode 2.0「中日韓統一表意文字」(CJK Unified Ideographs) 的範圍,手指頭寫「堃」(U+5803)、「腈」(U+8148)、「萘」(U+8418) 並無問題,毋過寫「迌」(U+8FCC) 就無法度。Unicode 2.0 的支援就遮爾無完整,用跤頭趺想嘛知影用「手寫輸入」佇 Unicode 3.0 佮系統欠字嚴重的 Unicode 3.1 範圍,會有啥物狀況發生。

最後,老刀來共蘋果公司對正體漢文佮輸入法所做所為的「不良紀錄」整理踮下跤,當做一篇文章的結束:

  • 悲慘的「漢音輸入法」:對 System 7.1 開始附佮佇系統,一直到 Mac OS 9.2.2。Mac OS X 10.0 開始一度無去,到 10.2.4 再度出現到 10.5.8 為止;毋過 10.6 又閣再無去。
  • 倉頡、簡易輸入法:採用第五代的倉頡輸入拆法,佮用戶上濟的倚天中文、Windows 系統所採用的第三代倉頡無啥仝款。
  • 大易輸入法:拆法混亂(請參考這篇報導)。
  • 輸入法候選字的順序混亂,一寡常用字並無出現佇候選字區的上頭前。
  • Unicode 漢字字型無完整,欠字嚴重;系統所附漢字輸入法,並無包括完整的 Unicode 漢字。
  • 【新問題】Mac OS X 10.6「繁體-漢」字型的問題。
  • 【新問題】漢字「手寫輸入」收錄的漢字支援傷少。

2009年9月5日

解決 Safari 4.0.3 佇 Snow Leopard 內底無法度掠落 .dmg 的問題

老刀共 iMac 升級 Mac OS X 10.6 (Snow Leopard) 了後,Safari 就出現這个予人頭殼真疼的問題。因為老刀真慣勢利用 Safari 引出 iGetter 掠檔的關係,所以臆講應該是 iGetter 佮新系統相衝的關係。趕緊入去 iGetter「工具」選單,並且共「與網路瀏覽器整合」頭前的拍勾仔擲去捒了後,Safari 果然回復正常,嘛證明老刀臆了誠著。紲落來查了蘋果官方討論版,發見 Speed Download 的用戶嘛有仝款問題

所以老刀建議你採取下跤 2 个步數,來避開頂懸所列的問題:

  1. 等待 iGetter、Speed Download 原廠推出新版。
  2. 改用其他瀏覽器(推薦使用 Firefox)。

iGetter 佮 Speed Download 攏是分段掠檔的管理軟體。

2009年9月2日

予 QuickTime X 支援新的媒體格式

頂禮拜 Mac OS X 10.6 (Snow Leopard) 上市了後,相信已經鬥入新系統的朋友,一定嘛真想欲了解一新版 QuickTime X 除了內建支援的媒體格式以外,到底有支援偌濟外掛程式?蘋果公司這篇技術支援文件,應該會當解答這个問題(這篇文件,嘛適用佇 QuickTime 7)。

我想逐家上有興趣的所在,應該是予 QuickTime X 支援 Windows Media 格式的外掛程式矣,佇這篇文章內底嘛有說明:會使去掠 Telestream 的 Flip4Mac WMV 2.3.0.7-Beta 來鬥。老刀特別共伊寫踮遮,較袂後擺去放袂記。

2009年9月1日

鑿破 Mac OS X 10.6 的大雞胿(2):騙鬼的 Unicode 支援

Gontera 拍攝的 poor unicode support of Mac OS X 10.6。因為教育部「臺灣閩南語推薦用字」有一寡是屬於 Unicode CJK Unified Ideographs Extension B (Unicode 3.1) 的範圍,所以家己用的系統支援 Unicode 到啥程度,一直是老刀關心的話題。

佇 Snow Leopard 猶未正式推出進前,真濟人就已經咧姦撟試用版內底的新系統字型「黑體-繁」䆀看甲想欲跳樓。雖然如此,看著蘋果公司的 Mac OS X 10.6 (Snow Leopard) 的技術規格網頁下跤「關鍵技術」寫著 "Unicode 5.1",實在是予人期待。老刀升級 Mac OS X 10.6 (Snow Leopard) 了後,當然愛替伊做一擺「Unicode 健康檢查」。毋過真可惜,結果佮前一代的 Mac OS X 10.5 (Leopard) 仝款予人失望。

老刀共 Snow Leopard 鬥入 iMac 了後,原本的期待就夢醒矣!試驗的結果寫佇下跤:

  • Unicode 3.1 漢字 (U+20000 ~ U+2A6D6):欠字嚴重(請參考正手爿「字元檢視器」的螢幕畫面)!有 Windows Vista 佮 Windows 7 (beta) 的朋友,老刀建議你掠 Windows 內底的「細明體Ext-B」鬥入來 Mac OS X 代替使用
  • Unicode 4.1 漢字 (U+9FA6 ~ U+9FBB, U+FA70 ~ U+FAD9):干焦 U+9FA6 ~ U+9FBB 範圍有對應的字型。
  • Unicode 5.1 漢字 (U+9FBC ~ U+9FC3):無對應的字型。

老刀嘛發見一个現象:佇正手爿「字元檢視器」視窗「字元簡介」欄內底的「名稱」內底,毋管是佗一个 Unicode 的範圍,攏總已經預留著 "CJK UNIFIED IDEOGRAPH-xxxxx"(xxxxx 是 16 進位的 Unicode 內碼)的號名,精差彼一个內碼是「有字」抑是「無字」。可見蘋果公司網頁講著支援 Unicode 5.1 的技術,看起來只是「字元檢視器」有支援爾爾;佇使用者上需要的字型頂頭,蘋果實在輸微軟的 Windows 誠濟矣!

想欲進一步了解 Unicode 漢字的朋友,老刀建議你參考維基百科對中日韓統一表意文字的說明。

2009年8月31日

鑿破 Mac OS X 10.6 的大雞胿(1):再會吧,AppleTalk 印表機!

老刀終於共 iMac 的系統升級到 Mac OS X 10.6 (Snow Leopard),毋過並無佮一寡朋友仝款的滿心歡喜。因為系統升級了後,第一件代誌就發見 Snow Leopard 無論按怎掠,「系統偏好設定」就是無法度現出 AppleTalk 印表機,實在予我歡喜袂起來。

查了 Mac OS X 10.6 的輔助說明,內底是按呢寫著:
如果您需要使用 AppleTalk 印表機,請閱讀它的說明文件來看看是否有其他的方式可以將印表機連接到 Mac 電腦或區域網路。

若沒有其他方法可以連接印表機,請將它連接到使用 Mac OS X v10.5 或之前版本的 Mac 並設定其進行共享。
去蘋果網站查一下 Mac OS X 10.6 技術規格,怹真正是恬恬仔共 AppleTalk 的支援擲去捒(完全攏無講著 AppleTalk),親像這件代誌毋捌發生過仝款。AppleTalk 啊,「多謝」你十外冬來陪伴老刀從無棄嫌;這馬開始,老刀會使夯起刀仔,一枝一枝來共你「刀射」矣!

2009年8月30日

蘋果公司成立 Snow Leopard 支援網頁

為著配合 Mac OS X 10.6 (Snow Leopard) 上市,蘋果公司嘛成立了 Snow Leopard 專用的支援網頁,特別蒐集一寡真有參考價值的文章佇遐。雖然文章嘛有漢文翻譯,可惜佇老刀寫這篇報導的時陣,猶有一部分文章未完成漢化。

毋管你敢已經咧使用 Snow Leopard,抑是有拍算欲升級系統的朋友,老刀攏建議你來去讀一擺,相信伊會當減少你拄著麻煩、無法度解決的機會。

2009年8月29日

OpenVanilla 0.9.0 已經開始 alpha 試驗

最近攏共焦點囥佇 Mac OS X 10.6 (Snow Leopard) 頂頭,已經一站仔無來報導輸入法相關的消息矣。受著包括老刀在內的誠濟朋友歡迎的 OpenVanilla 香草輸入法,已經佇這禮拜三 (8/26) 釋出 0.9.0a1 試驗版。雖然才頭一个試驗版爾爾,真濟所在猶未完成(包括漢化介面嘛猶未做好),毋過根據 OpenVanilla 主持人 lukhnos 的說明,這个試驗版佇 Snow Leopard 的文字編輯 (TextEdit.app) 試過並無發生問題,所以特別寫出來予 Snow Leopard 的用戶注意一下。【老刀按:OpenVanilla 0.8.0 佇 Snow Leopard 內底,已經有人反映有袂當揤箭頭選字的問題

想欲試驗新版的朋友,老刀建議你先來去參考 OpenVanilla 的版本公告。這个物件老刀現此時嘛猶未鬥入 iMac 內底,這幾工我應該會揣時間試一下,若有進一步的消息,紲來共逐家報告。

2009年8月28日

Mac OS X 10.6 (Snow Leopard) 軟體佮印表機的相容性表列

今日蘋果公司新一代的作業系統 Mac OS X 10.6 (Snow Leopard) 終於正式上市矣。毋管你將來敢有拍算欲升級(甚至這馬已經升級)的朋友,一定真想欲知影現此時所用的軟體是毋是會當佇新系統內底正常使用。蘋果公司今日新推出這篇技術支援文件就排列了佮 Mac OS X 10.6 不相容的軟體。另外,wikidot 這份非官方的 Mac OS X 10.6 相容軟體表列(內容猶咧更新當中)按照字母排列了誠濟款軟體的相容情形,比蘋果官方所公布的閣較精彩,來予逐家比較看覓。

隨著 Mac OS X 10.6 的推出,蘋果公司這篇技術支援文件嘛說明了印表機/事務機軟體(驅動程式)的相容性表列。佮老刀較早「Mac OS X 10.5 內建支援的印表機表列」這篇文章比起來,除了增加一寡印表機/事務機的廠牌番號以外,老刀建議你的步數、概念攏是完全相仝;所以老刀順紲做伙寫佇遮,予逐家當做參考矣!

2009年8月27日

免錢的防毒軟體敢會予人相信?

防毒軟體已經變做真濟人的電腦內底必備的軟體矣。防毒軟體百百種,收錢的防毒軟體雖然好用,毋過一寡免費的防毒軟體敢就較歹用?今仔日 PCWorld 這篇文章,就共幾个免錢的防毒軟體提出來比較,各款的特色差不多攏有講著,真是十分精彩。

PCWorld 編輯誠長試驗過程的過程老刀就先跳過,直接來看結果;有興趣的朋友,會當去參考原文。經過怹的試驗,排名是:

  1. Avira AntiVir Personal
  2. Alwil Avast Antivirus Home Edition
  3. AVG 8.5 Free
  4. Microsoft Security Essentials
  5. PC Tools Antivirus Free Edition
  6. Comodo Internet Security

另外,Panda Cloud Antivirus 利用連接轉去怹公司的線上伺服器,予掃瞄惡意程式的功能比其他免錢產品閣較好的性能。可惜伊猶佇開發的階段,功能並無做完整,所以無佇這擺評分的名單內底。

最後,PCWorld 嘛推薦 2 个工具:PC Tools ThreatfireClamWin Free Antivirus 予逐家,來做頂頭這寡免錢防毒軟體的輔助品。歡迎逐家去掠轉來試用。

2009年8月26日

98年教育部臺灣閩客語文學獎活動開跑!

這个活動消息是對教育部國語會網站轉貼,歡迎逐家相招來報名參選喔!

繼「97年用咱的母語寫咱的文學/用恩兜个母語寫恩兜个文學創作獎」後,「98年教育部臺灣閩客語文學獎」是第2次針對臺灣閩南語及臺灣客家語所辦理的徵文活動。本次徵選對象分為教師組、學生組及社會組,徵選文類為現代詩、散文及短篇小說,各組各類前3名可獲得新台幣1萬至5萬元不等之獎金,收件期間為本(98)年9月2日至10月16日。至於詳細徵文辦法及注意事項請參考報名簡章(可至活動專屬部落格http://tkbh.blogspot.com下載),承辦單位及洽詢電話為:財團法人李江却台語文教基金會 蔣小姐02-23112210。

為積極推動臺灣本土語言文字化並表現於文學創作上,展現臺灣語言文化的活力與多樣性,教育部業於本年5月1日公布「教育部臺灣本土語言文學獎實施要點」,並分別以「98年教育部臺灣閩客語文學獎」、「98年度原住民族語文學創作獎」辦理徵文活動,以鼓勵社會大眾一同參與臺灣本土語言之文學創作。其中,「98年度原住民族語文學創作獎」活動相關訊息,可洽詢:國立屏東教育大學原住民教育研究中心 08-723-4577。

相關書寫系統如「臺灣閩南語羅馬字拼音系統」、「臺灣客家語拼音方案」、「臺灣閩南語推薦用字(第1、2批)」、「臺灣客家語推薦用字(第1批)」,以及「臺灣閩南語常用詞辭典」、「臺灣客家語常用詞辭典」均可上教育部國語推行委員會網站查詢(http:// www.edu.tw/mandr/index.aspx)。
本活動將自本年9月2日起開始收件,歡迎有志從事臺灣本土語言文學創作者踴躍投稿。

2009年8月25日

Snow Leopard 開機選擇程式

頂一篇老刀講著 Mac OS X 10.6 (Snow Leopard) 內底有 32 位元佮 64 位元的系統核心才無幾工爾爾,現此時已經有人寫好真方便的開機選擇程式。有拍算欲買 Snow Leopard 的朋友會使先去掠轉來囥,等 8/28 共 Snow Leopard 迎接入門的時陣,就會當親身試驗矣。

2009年8月20日

Mac OS X 10.6 預設採用 32 位元核心佮驅動程式

雖然蘋果公司連鞭將欲推出支援 64 位元的新版作業系統 Mac OS X 10.6 (Snow Leopard),毋過按照蘋果公司釋出的試用版 (10A432) 看來,除了 Xserve 預設就採用 64 位元核心以外,其他機種猶原是預設採用 32 位元核心佮驅動程式。今日 OS News 這篇報導,就透露這个重要的消息。

按照對蘋果公司流傳出來 Snow Leopard (10A432) 的版本公告看來,支援 64 位元核心佮驅動程式有下跤這幾款:

機型名稱 機型識別碼 64 位元支援
Early 2008 Mac Pro MacPro3,1 支援
Early 2008 Xserve Xserve2,1 預設
MacBook Pro 15"/17" MacBook4,1 支援
iMac iMac8,1 支援
Unibody MacBook Pro 15" MacBookPro5,1 支援
Unibody MacBook Pro 17" MacBookPro5,2 支援
Mac Pro MacPro4,1 支援
iMac iMac9,1 支援
Early 2009 Xserve Xserve3,1 預設

profiler請拍開「系統描述」(佇「應用程式」的「工具程式」檔案夾內底),去查你的 Mac「機型名稱」佮「機型識別碼」敢是頂懸所列的型體。若準是,就表示你的 Mac 支援 64 位元核心佮驅動程式(親像正手爿的圖)。

請佇開機的時陣共 '6'、'4' 揤予牢,就會使利用 64 位元核心佮驅動程式開機矣,毋過獨獨彼一擺有效;若想欲永遠用 64 位元核心開機,會使來去修改 com.apple.Boot.plist 檔案(佇 /Library/Preferences/SystemConfiguration/ 內底),揣著下跤的內容:

<key>Kernel Flags</key>
<string></string>

了後,共伊改做:

<key>Kernel Flags</key>
<string>arch=x86_64</string>

存檔後閣再重新開機就完成矣。以後若想欲轉去改用 32 位元開機,請佇開機的時陣共 '3'、'2' 揤予牢,當然囉,干焦彼一擺有效爾爾,除非你共 com.apple.Boot.plist 檔案的內容改倒轉來。

2009年8月19日

iPhoto 8.1 更新推出

image 蘋果公司今仔日共 iPhoto(佮佇 iLife '09 內底的相片處理軟體)更新到 8.1 版。新版增加了下跤的功能:

  1. 現此時會當訂購超大本(10" x 13")的精裝𠕇皮相簿。
  2. 包括 3 款新的相簿主題:Tropical, Asian, Old World。
  3. 提供一寡新的節日卡片主題。

蘋果公司建議 iPhoto '09 的所有用戶攏來去更新

蘋果公司 Mac OS X 產品網頁,已經恬恬仔換做 Snow Leopard

MC223
隨著蘋果公司後一代的作業系統 Mac OS X 10.6 (SnowLeopard) 愈來愈近,蘋果公司已經恬恬仔共 Mac OS X 產品網頁換做 SnowLeopard。按照官方網頁的規格說明,SnowLeopard 的硬體需求是:
  • Mac 電腦,配備 Intel 處理器
  • 1GB 的記憶體
  • 5GB 可用磁碟空間
  • 安裝的時陣需要 DVD 光碟機
  • 部分功能需要相容 Internet 網路服務供應商才會當使用;可能愛家己納錢。
  • 部分功能需要 Apple 的 MobileMe 服務才會當使用,需要納錢,按照條款實行。
想欲取得預定佇今 (2009) 年 9 月 8 月 28 日推出的 Mac OS X 10.6, 有下跤幾款方式:
  • 隨每一台新 Mac 提供:佇 Mac OS X Snow Leopard 推出了後,逐台新 Mac 電腦都會預先安裝 Mac OS X Snow Leopard(你毋免採取任何行動)。
  • Snow Leopard Up-to-Date 方案:佇 2009 年 6 月 8 日以後購買符合條件的 Mac,但無附佮 Mac OS X Snow Leopard,會使付新臺票 350 箍進行升級。
  • 對 Mac OS X v10.5 Leopard 升級:若是你的 Intel Mac 執行的是 Mac OS X v10.5 Leopard,請佇 Mac OS X v10.6 Snow Leopard 上市時購買(定價:新臺票 1,099 箍),然後按照簡易安裝指示進行安裝。
  • 對 Mac OS X v10.4 Tiger 升級:你的 Intel Mac 若是執行 Mac OS X v10.4 Tiger,請購買 Mac Box Set 軟體套組定價:新臺票 6,290 箍),內底包括 Mac OS X v10.6 Snow Leopard、iLife '09 (包括上新版本的 iPhoto、iMovie、GarageBand、iWeb 佮 iDVD)、iWork '09(Apple 為家庭與辦公室推出的生產力套裝軟體,其中包含 Pages、Numbers 與 Keynote)。
佇老刀寫這篇報導的時陣,蘋果公司的線上商店猶未提供 Mac OS X 10.6 (SnowLeopard) 的預訂服務

【08/25/2009 補充】現此時蘋果公司網站已經宣布 Mac OS X 10.6 (Snow Leopard) 將佇 8/28 正式推出,對這馬開始,怹的線上商店嘛已經提供預訂服務

2009年8月18日

ATI-AMD 推出 Catalyst 9.8 顯示卡驅動程式

今日 AMD 推出予 Windows XP/Vista/7 專用(Mac 的 Boot Camp 模式嘛適用)的上新版顯示卡驅動程式 Catalyst 9.8(來遮掠,32/64 位元系統攏有支援),全套包括有:

  • Radeon display driver 8.64
  • HydraVision for both Windows XP and Vista
  • HydraVision Basic Edition (Windows XP only)
  • WDM Driver Install Bundle
  • Southbridge/IXP Driver
  • Catalyst Control Center Version 8.64
Catalyst 9.8 支援的圖形處理器 (GPU) 有:
  • 桌頂產品系列:ATI Radeon HD 2400/2600/2900/3400/3600/3800/4600/4650/4670/4800/4850X2。
  • 多媒體家族產品系列:ATI All-in-Wonder HD 佮 ATI Theater 550 PRO/600/650。
  • FireStream 系列:FireStream 9170/9250/9270。
  • 整合型產品系列:ATI Radeon 3000/3100/HD 3200/ HD 3300/HD 4200。

Catalyst 9.8 新版除了支援 OpenGL 3.1 的延伸指令集以外,佮進前相仝,嘛修正佇一寡𨑨迌物仔頂頭的問題佮提升效能。想欲閣進一步了解的朋友,歡迎來去參考怹的版本公告

2009年8月17日

今年度 35 个上讚的 iPhone 應用程式

蘋果推出 iPhone App 線上商店到今已經滿一冬,現此時已經有超過 60,000 个予 iPhoneiPod Touch 專用的軟體。TechCrunch 編輯群最近精選 35 个上讚的應用程式,並且分做「上實用」、「上讚的𨑨迌物仔」、「閒閒消磨時間」3 類。有咧使用 iPhone 佮 iPod Touch 的朋友,會當來去參觀看覓。

佇掠落來試用進前,老刀欲提醒逐家:這 35 个應用程式是阿啄仔的評論,其中有幾个軟體是怹的觀點,可能無法度反映台灣人的需要。另外,老刀家己並無 iPhone 抑是 iPod Touch,所以並無家己試耍過;也就是講,萬一你灌軟體了後若出現問題,請去佮原作者聯絡

2009年8月13日

Safari 4.0.3 for Windows 猶原佮 Unicode 3.1 無相容!

Safari for Windows 這个問題已經存在真久矣。毋但是無法度現出網頁內底的 Unicode 3.1 CJK 漢字,而且是規个軟體(親像是頂懸正手爿的「搜尋框」佮「對話框」)攏總無法度現出。因為一直無等著任何新版本有修正這个問題,我決定家己來去蘋果公司的社群討論版反映,看是毋是會較緊等著蘋果公司官方回應。

顛倒是 Safari 4 for Mac 支援 Unicode 3.1 的程度已經足完整,真是奇怪啊!

2009年8月12日

蘋果公司提供 15" MacBook Pro「防眩光寬螢幕」的選擇

蘋果公司所推出的 MacBook Pro 高階筆電系列,原本只有 17" 的機種有提供用戶選擇欲採用預設出廠金爍爍(鏡面)的螢幕,抑是欲貼小可仔錢共螢幕換做霧面的形體。這馬 15" 的 MacBook 嘛會有提供仝款的選擇矣,根據蘋果公司的線上商店網頁,只要加貼 1,785 箍新臺票,螢幕從此就袂閣再「金光閃閃,瑞氣千條」。

對有想欲共蘋果公司進貢、納錢的一寡朋友來講,這應該是真好的消息。毋過 17" 螢幕貼錢換螢幕的價數嘛是 1,785 箍新臺票,佮 15" 螢幕仝款。毋知影怹敢是佮 Dell 仝款,共價數拍毋著呢?

2009年8月5日

予逐家誤用的閩南語字 (3) - 真正了然的臺北市政府!

「迺」街,臺北市政府錯得離譜!

根據這篇報導,臺北市政府最近推出這本「迺街護照」,邀請市民做伙去迌:利用這本護照(親像正手爿的圖),有通食、有通耍閣有通抽獎,實在是袂䆀。毋過這个「迺街」敢若怪怪呢?

按照教育部的臺灣閩南語推薦用字(第 1 批),正確的用字是「踅街」。臺北市政府毋但用毋著字,而且佇「迺」(音ㄋㄞˇ)邊仔加註ㄙㄟˇ音,真正是脫箠脫甲老刀無知欲講啥,了然矣!

老刀佇遮嘛呼籲教育部應該愛發文予中央佮地方各級政府機關,欲引用閩南語,上好是按照教育部的推薦用字為主。若是政府機關家己攏無採用、共教育部信篤,按呢老刀實在毋知影教育部制訂 2 批攏總 400 个推薦用字的目的佇咧佗位?

【老刀註】根據教育部的臺灣閩南語常用詞辭典,踅的意思是「來回走動、繞行、盤旋或是散步」,所以真濟人咧誤用的「碎碎唸」,正字愛寫做「踅踅唸」。親愛的朋友,逐家後擺毋通閣再寫毋著喔!

老刀 2009/08/06 補充:拄才已經佇臺北市政府的迺街網站留批,全文佇下跤:

這個活動真的臺北市政府辦的嗎?看了只有搖頭嘆息,臉冒「三條黑線」。怎麼說呢?原因出在「迺」字上面。

按照教育部頒的臺灣閩南語推薦用字(第1批),其網址為 http://www.edu.tw/files/bulletin/M0001/300iongji_960523.pdf,「逛街」的臺灣閩南語用字應作「踅街」,市政府的官員們不僅用錯字,而且還在「迺」(音ㄋㄞˇ)旁邊加註ㄙㄟˇ音,簡直是雙重錯誤,丟臉丟到家矣!

在此希望市政府的官員們「用功」一點,在引用閩南語字前多做點功課,以免錯字淪為笑柄。
就看市政府的官員按怎回批予老刀?請斟酌老刀紲落來的報導。

【2009/08/07 再補充】今日收著主辦臺北市政府這个活動的「凱格蘭公關」公司的陳麗貞總監、李聖依專案執行 2 位小姐來批,說明怹已經共主題網站的「迺街」改名,換做漢語的「逛街」,另外嘛佇首頁頂頭加上「逛街小檔案」,嘛算有圓滿的結局矣。原批的內容佇下跤:

Dear 老刀先生您好:

非常感謝您的來信指導﹗謝謝~

針對本活動名稱之錯字─「迺」街雖為無心疏忽之過,但仍令敝公司感到非常抱歉,在設計之初僅以大眾經常使用之字詞,未至教育部之資料庫中加以詳查,實為敝公司之過,再次感謝您適時的指導,讓我們能及早完成改正作業。

目前我們已將「迺」字拿掉,考慮一般注音輸入法使用者無法輸出「踅」字,在閱讀上也造成一般民眾困擾,因此主視覺將以「逛街」取代,文章中使用ㄙㄝˇ街這個詞時,將以您熱心提供之「踅」街,並附上注音讓民眾了解。

為了表達敝公司的謝意與歉意,我們準備了「逛街」包做為謝禮,也邀請您一起來「踅街」。

是否方便請教您的通訊地址,我們將以最快的速度寄送給您,非常感謝您的細心注意與不吝指教,再此敬上萬分感謝!

台北11魅力商圈執行小組-
凱格蘭公關 總監 陳麗貞
敬上
李聖依 Ann Lee
專案執行 Account Executive

2009年8月4日

蘋果鍵盤暗藏後尾門予駭客使用?

現此時的 3C 週邊裝置攏有處理器佮記憶體佇內底,鍵盤嘛是仝款。根據這篇報導,蘋果鍵盤內底有 8kb 快閃 (flash) 佮 256 位元組的動態存取記憶體 (RAM),看起來是無偌濟,但是對歹心人來講,灌入 keylogger【老刀按:鍵盤記錄程式,用來記錄使用者所揤的資料,主要是偷取怹拍入的帳號、密碼】佮其他歹心程式來講,已經有夠用矣!這个所在有閣較詳細的解說(參考就好,毋通去學做歹人喔)。

因為歹心程式是寫入佇 flash 內底,所以毋管是重開機,抑是共電池提出來(藍芽鍵盤)攏總無效,使用者並無法度家己發見鍵盤是毋是捌予人變造過,實在傷過危險。所以佇蘋果公司猶未解決這个問題進前,老刀建議逐家上好毋通烏白共別人的鍵盤提來用矣!

2009年8月3日

予逐家誤用的閩南語字 (2)

老刀佇二禮拜前新開這个單元了後,受著一寡朋友鼓勵,希望會使變做固定推出的單元,予我真正感動。這陣我咧想欲按怎佇固定的時間推出這个單元,親像電視咧搬的連續劇按呢。你若有任何意見,歡迎隨時共老刀反映,真勞力!

廢話減講,老刀踮遮閣再蒐集一寡誤用字予逐家參考:

例句

誤/異用字

正確用字

新娘水噹噹,褲底破一孔 水、孔
水餃皮真Q,真好吃 Q、吃 𩚨
熱天時仔,毋通佇外靠趴趴走 靠、趴
網路唬爛多 留言板成霸凌溫床 唬爛 虎𡳞

頂懸的正確用字,是以教育部國語會的臺灣閩南語常用詞辭典的推荐用字為主。

2009年7月31日

Gutenprint 5.2.4 推出

較早老刀捌介紹過 Gutenprint 這个現此時支援超過 1,300 種印表機的萬用驅動程式(請參考這篇報導)。經過誠久的等待,昨日 Gutenprint 終於閣再推出上新的 5.2.4 版,這擺支援的印表機又閣增加了一寡仔。

Gutenprint 有提供 Mac OS X 佮 Linux/Unix 的版本。想欲掠 Gutenprint 轉來用的朋友,請入來遮

2009年7月29日

Samsung 推出 1 GHz 的 "iPhone" 處理器

Samsung 佮 Intrinsity 合作,佇米國時間的這禮拜一 (7/27) 做伙發表採用 45 奈米製程的 ARM Cortex-A8 處理器 (較早號做 Hummingbird),提供 32kB 資料佮指令快取,以及 ARM Neon 多媒體延伸指令。

ARM Cortex-A8 的硬體架構,其實佇包括 Palm PreiPhone 3G S 佮一寡行動上網裝置頂懸攏看會著。Intrinsity 的執行長 Bob Russo 講著,佇高階行動裝置專用的處理器內底,ARM Cortex-A8 處理器是現此時速度上緊、而且是上省電的產品,會使予用戶看影片、耍game 閣較平順,佮𤆬來閣較久的電池壽命。想欲進一步了解的朋友,會使去參考 Intrinsity 的新聞稿

iPhone 3G S 採用佮 Cortex-A8 仝款核心的 600MHz 的 Samsung 的 S5PC100 處理器,下一代的機仔是毋是會直接採用 ARM Cortex-A8,時到便看啦!

2009年7月24日

ATI-AMD 推出 Catalyst 9.7 顯示卡驅動程式

今日 AMD 推出予 Windows XP/Vista/7 專用的上新版顯示卡驅動程式 Catalyst 9.7(來遮掠,32/64 位元系統攏有支援),全套包括有:
  • Radeon display driver 8.632
  • HydraVision for both Windows XP and Vista
  • HydraVision Basic Edition (Windows XP only)
  • WDM Driver Install Bundle
  • Southbridge/IXP Driver
  • Catalyst Control Center Version 8.67
Catalyst 9.7 支援的圖形處理器 (GPU) 有:
  • 桌頂產品系列:ATI Radeon HD 2400 以上。
  • 多媒體家族產品系列:ATI All-in-Wonder HD 佮 ATI Theater 550 PRO/600/650。
  • FireStream 系列:FireStream 9170/9250/9270。
  • 整合型產品系列:ATI Radeon 3000/3100/3200/3300。

Catalyst 9.7 嘛是第一款 AMD 得著 Windows Vista 佮 Windows 7 WHQL 認證的顯示卡驅動程式。關於這个驅動程式的詳細說明,請參考 AMD 的版本公告

【7/28/2009 補充】這馬已經有人共 Catalyst 9.7 的效能做了試驗,佇 ATI Radeon HD 4800 系列的顯示卡頂懸,有真大的進步。想欲了解的朋友,歡迎入來遮參觀。

2009年7月23日

gcin for Windows,讚!

佇 Linux 下跤拍漢字,gcin 應該是現此時上好、上方便的漢字輸入工具。其實 gcin 怹最近嘛沓沓仔咧發展 Windows 平台的版本矣。

雖然 gcin for Windows 這陣猶是「測試版」,毋過老刀試用幾工了後,發見 gcin for Windows 毋但已經共大部分 gcin for Linux 的功能照實做出來爾爾,伊的穩定度嘛有一定的水準。上重要的是,老刀共所發見的幾个問題回應予 gcin 的作者 (eliu) 了後,攏佇幾點鐘內就隨得著解決,真值得人呵咾矣!所以老刀佇遮真心推荐 gcin for Windows 予逐家試用。

想欲掠 gcin for Windows 轉來試用的朋友,歡迎點入來這个所在參考。

2009年7月22日

iWork '09 佮 iWork '08:檔案相容性

iWork '09 已經推出有幾個月,凡勢已經有真濟朋友注意著 iWork 新舊版相容性的問題。雖然老刀佇工作頂頭猶是使用微軟 Office 為主,並無咧使用 iWork,毋過猶是共蘋果公司這篇技術文件轉貼出來,予有需要的朋友參考一下。總講一句,結論是:

你會當用 iWork '09 讀寫 iWork '08 文件,但是無法度用 iWork '08 讀寫 iWork '09 文件。

所以若欲佇新舊版 iWork 頂懸流通的文件檔案,利用 iWork '08 格式來做是上好。

2009年7月21日

免錢的仝步工具軟體:SyncMate 2.0 新版推出!

SyncMate 2.0

雖然微軟的 Windows Mobile 手機仔/PDA 真好用,毋過微軟所附的 ActiveSync 干焦有 Windows XP/Vista 的版本,想欲佇 Mac OS X 下跤仝步,會使利用老刀較早捌介紹過SyncMate,頂禮拜 SyncMate 已經推出 2.0 版,老刀試用幾天了後真正滿意,所以紲來寫這篇文章。

佮進前的 SyncMate 1.4 版比起來,這擺 2.0 新版的功能有誠大的提升。主要的特色有:

  • 會當仝步你 Mac OS X 內底的通訊錄、曆日 (iCal) 的機仔,除了採用 Windows Mobile 的手機仔/PDA 以外,嘛支援佮別台 Mac 電腦、Google 帳號、線頂伺服器、Nokia S40 系列的手機仔仝步(正手爿這張圖,就是老刀使用 SyncMate 2.0 佮家己 Google 帳號仝步的畫面)。
  • 新的外掛程式。
  • 新的使用介面。
  • 新的使用說明書
  • 修正一寡程式錯誤。

除了會使利用 SyncMate 2.0 免費仝步通訊錄佮曆日以外,SyncMate 嘛有提供付錢升級「專家版」的服務,費用是 39.95 箍米金(專家版提供了親像 iTunes 音樂、iPhoto 相片仝步佮其他一寡閣較好用的功能)。佇 2009 年 6 月 14 日以後購買 SyncMate 1.x 的用戶,會當免費升級到 SyncMate 2;較早購買的舊用戶,升級 SyncMate 2 會當享受 5 折優待(想欲升級的舊用戶,請入來這个所在參考)。

2009年7月15日

予逐家誤用的閩南語字 (1)

今日佮一寡朋友開講,講著這馬閩南語字誤用的情形足普遍,實在予人真幌頭矣。所以刀想著:除了報導 3C 新聞以外,介紹一寡正確的閩南語用字予逐家熟似,予「老刀烏白講」這个網站發揮教育功能,應該是好事一件。所以就開了這个新單元,希望逐家會佮意,更加歡迎留落你的意見佮老刀分享。

其實「閩南語字予人誤用」這个問題,老刀已經斟酌誠久矣。無論電視台所拍的閩南語歌詞字幕,抑者是新聞報導、網站等,誤用的情形實在足普遍。親像下跤這 2 篇:

  1. 奧客大調查:北部人最機車【這篇題目「奧客」是誤用;正確的用法是「漚客」】
  2. 台北捷運全球最怪【這篇文章上尾段「呷緊弄破碗」是誤用;正確的用法是「食緊挵破碗」】

紲落來,老刀有閒會閣再精選一寡閩南語字誤用的案例,來報予逐家知影,敬請期待。

2009年7月11日

VirtualBox 3.0.2 更新推出

今日昇陽公司 (Sun Microsystem Inc.) 共免費的 VirtualBox 虛擬機器軟體更新到 3.0.2 版。這个版本針對一寡問題進行修正,包括虛擬記憶體的改進(提升效能)、改善佮 Kaspersky Internet Security 四配的效能、修正 APIC 佮 share folder 的問題等。老刀建議有咧使用 VirtualBox 的朋友去掠更新檔來灌。

想欲閣較了解新版改進佇佗位,歡迎去參考怹的改版紀錄

2009年7月9日

Safari 4.0.2 修正 2 个安全性的問題

蘋果公司今日針對 Safari 4.0 的 WebKit 引擎所發見 2 个安全性問題進行修正,推出了 4.0.2 版。老刀建議有咧用 Safari 4 的朋友趕緊去掠來灌吧。

關於這 2 个安全性問題的說明,會當去蘋果公司網站參考。

2009年7月7日

【官方講法】PowerMac G5 佮 Mac Pro 的顯示卡會當相換乎?

相信這个問題應該是真濟人想欲知影。

雖然第尾代的 PowerMac G5 佮後來推出的 Mac Pro 攏是採用 PCI-E 的顯示卡,根據蘋果公司這篇技術支援文件看來,應該是無可能的代誌。毋過仝款的電腦型體,猶有一寡顯示卡會當互通。親像 PowerMac G5 就有下跤這幾款會使採用:

  • GeForce 6600 LE
  • GeForce 6600
  • GeForce 7800 GT
  • NVIDIA Quadro FX 4500 (part number 631-0110)

這篇文章嘛有列出 Mac Pro(第一代、2008 年初、2009 年初)會使使用的顯示卡,歡迎逐家去參考看覓。

【老刀非正式的講法】無仝代 Mac Pro 的顯示卡敢會當互通?揣著正確的 ROM 共顯示卡「改造」了後,應該會當佇別代 Mac Pro 下跤使用。欲按怎改?先送老刀一台 Mac Pro 予我研究一下吧,哈哈!