2008年11月5日

gcin 專用的行列輸入法,已經有支援 Unicode 3.1 字集的版本

前擺老刀更新 OpenVanilla 的行列輸入法了後,這馬另外閣做一个予 gcin 專用的版本。這个版本老刀暫時囥佇 gcin 官方討論版,包括原始檔 (ar30.cin) 佮編好的輸入法檔 (ar30.gtab)。有需要的朋友,歡迎家己掠轉去安裝(安裝的方法佇遮,請參考「安裝 gtab 檔」這段)。

這个予 gcin 專用的 ar30.cin,除了是採用支援 Unicode 3.1 七萬外字的上新版輸入法表以外,嘛針對原來 gcin 行列輸入法使用「行列簡碼」的時陣,螢幕浮字的順序佮原始輸入法規格書無仝款的問題做了修正(完全按照官方定義)。關於這个 gcin 專用行列輸入法的討論,請參考 gcin 官方討論版這篇文章

5 則留言:

匿名 提到...

老刀樣(さま),你好。

有一个問題欲向你請教一下,就是:

我電腦內底有裝新的新細明體(v5.03),我咧想應該就是你所講的彼个有7萬漢字彼版的吧?!毋過伊內底彼个「新細明體-ExtB」的漢字攏走袂出來,所以你報的彼个原始檔(ar30.cin)我連過了後,對19逝開始,著出現像下跤這款四角格仔字

w 女□□□□□□□□□

是欲按怎予遐个字死出來咧? 用「字元對應表」嘛攏看無半个漢字的講。><"

midismilex

老刀 提到...

midismilex:

你講的部分,應該是佇 %quick begin 佮 %quick end 中央的部分吧?彼是行列輸入碼的「簡碼」功能啦!

正港的拆字鍵碼定義的部分,是佇 %chardef begin 佮 %chardef end 中央的部分,嘛是你欲揣的所在。

匿名 提到...

老刀樣(さま),多謝你。答案我應該揣著矣。

歹勢呢,進前袂記得共你講,我的猶是XP系統。講無完全,欲捎就會予人捎無。^^

到尾仔佇網路頂懸四界趖,才知影原來「字元對應表」頂懸敢若本來就看無的款。上尾仔佇馬來西亞的倉頡之友網站總算看著Ext-B遮个字矣。按呢後maí欲拍遮个字就無問題矣。

共你齪嘈(tsak-tsō),歹勢呢。^^

ps. 奇怪,倉頡當時嘛佇馬來西亞有人用??閣號名號甲袂輸影友會咧。昏去!!

midismilex

tim 提到...

我還在用SCIM,
今天去
2008 Ubuntu Release Party台中@SA台中
請教一下,有沒有人會裝GCIN。

謝謝。

你們用的國字,讓我有看沒有懂。比文言文還難,那裏有得學??

老刀 提到...

tim,

真是歹勢,我家己是用 Fedora 9,無咧用 Ubuntu,所以無法度共你鬥相共。佇 Fedora 9 內底已經有內建 gcin,設定上一點仔攏無困難。

關於你第 2 个問題,本站用字是採用教育部的推薦用字(現此時已經公布 2 批),佇本站的 top banner 已經有附連結,歡迎去掠落來參考。另外,教育部嘛有「臺灣閩南語常用詞辭典」、「臺灣閩南語我嘛會」2 个教學網站,若想欲進一步了解,歡迎來去參考我最近的專文介紹。