2008年6月18日

共 iMac 娶入門

因為老刀身邊對 2001 年就服務到今的古董 PowerMac G4/733 已經有 7 歲啊,一寡新軟體無法度使用實在予老刀誠頭痛。所以當蘋果公司佇今 (2008) 年 4 月發表採用 Intel Core 2 Duo (Penryn) 處理器的新款 iMac 了後,老刀就一直有計畫想欲共古董 G4 退休(請參考這篇報導)。

自從頂禮拜老刀下決心去蘋果優仕訂 iMac 了後,終於佇禮拜日共數想真久的 iMac 迎娶入門啊。感謝頭家 Randal 鬥相共,共內接硬碟換做 500 GB、RAM 嘛加到 4 GB(有意思換硬碟的朋友,服務費用請佮櫃檯參詳)。對老刀來講,已經是有夠實用啊。

老刀嘛共開箱的過程翕做相片,囥佇 Flickr 翕相簿內底。歡迎逐家入來參觀啊。最後,這擺逐家有開箱相片看,愛感謝朋友兼好厝邊 qv90 共伊的 Canon IXUS 85 IS 借予老刀翕相,踮這个所在共伊說一聲多謝。

8 則留言:

煒竣的爹 提到...

看起來真水,用起來應該真讚

老刀 提到...

這是當然。敢有想欲做伙買一台來用看覓啊?

khoguan 提到...

老刀兄,我啦,我予汝煽動,啊,無啦,是鼓舞,因為受著汝个鼓舞,嘛去網路訂一台矣。上緊應該明仔載會送到位。

毋閣 MS Office 2008 for Mac,我去店頭問,一个包裝,內底 3 个授權序號,愛五千幾箍。我一台Mac,一个儂用,當然只需要一个序號。按呢,我愛去佗位(親像啥乜站,啥乜板卡妥當)揣儂來公家買卡好hannh? 請指點明路,感恩^^

老刀 提到...

科元兄:

彼 3 个序號,目的是授權佇厝內、公司(學校)佮筆電使用。對象攏是仝 1 个用戶啦。

毋閣你若真正一定欲用 Office,而且欲佮 Office for Windows 完全相容,我是較建議你利用 Boot Camp(予 Mac 直接用 Windows 開機),抑是 Parallels Desktop、VMWare 這類的虛擬機器來灌一套 Windows XP/Vista 加 Office 2003/2007 for Windows,會當予你有 100% 的相容性。

khoguan 提到...

老刀兄,感謝汝。因為想講既然liau5落去買Mac矣,盡量攏將工作佮娛樂攏徙來純Mac的環境。除非是不得已,親像ActiveX網頁,才切過去MS環境。

我一台iMac、雙个系統的規畫:
用diskutil,將原本一个partition切做三个,第一个當然是原來的 HFS+,閣來是 NTFS, 閣來是 FAT32。

Win XP裝蹛 NTFS,會使獨立開機。閣再裝Parallels,使用這个NTFS,按呢嘛會當sng2虛擬的 Win.

FAT32 用來當做 Mac OS 佮 Win OS交流資料的所在,按呢卡袂為著file system讀寫的問題塊加操煩。

毋知按呢規畫有理想無?

歹勢,一直來亂。汝若有閒工閣有心情,才拜託共我點一下。

老刀 提到...

科元兄:

你的硬碟規劃是會使,但我是感覺 iMac 內建硬碟只有 250 GB 抑是 320 GB,按呢刮,逐區會當使用的空間實在誠有限啊。

我認為:需要佮 PC 抑是佮別台電腦交流的資料,囥佇外接碟應該是較好的選擇。

khoguan 提到...

老刀兄,loo2-lat8! 我佇網路訂的,HD tshan5-tshan5直接要求換750G的 ^^

applepeel 提到...

想買但是沒小朋友,而且不適合我用,要買就要存錢買MBP,因為我都在外面趴趴走