2008年6月14日

歇禮拜,來聽歌:老刀精選 (12) - "High on You" by Survivor

真久無來共逐家介紹我所愛的搖滾歌曲矣。除了這段時間禮拜日較無閒以外,老刀家己貧惰嘛是有加減啦。拄好前幾工朋友「金屬頭」佇遮留字講著進前介紹 Def Leppard 的代誌,老刀才驚覺竟然已經 2 个月無閣再介紹歌曲啊!明仔載欲迎接新買的 iMac 轉來厝來,看來嘛是愛閣舞規工。所以就趁這陣禮拜六暗時,來介紹 Survivor 這个老刀誠佮意的搖滾團體予逐家欣賞。

Survivor 是佇 1977 成立的米國 AOR (Album-Oriented Rock/Radio) 搖滾團。這个團吉他手 Frankie Sullivan、鍵盤手 Jim Peterik(現此時已經離團)為中心,歌路行 hard rock 的路線。一開始 Survivor 並無受著傷濟人注意,毋過怹世命中的貴人,米國 Hollywood 的動作巨星 Sylvester Stallone 聽著怹第 2 塊專輯的單曲 "Poor Man's Son" 了後驚為天人,加上 "Survivor" 這个團名佮伊主演 Rocky(洛基)系列影片的性質嘛有四配,所以特別邀請當時猶無啥出名的 Survivor 寫一調仝款歌路的作品,來予 Rocky III 做電影主題曲,就是後來逐家攏知影的 "Eye of the Tiger" 啦!隨著 Rocky III 影片大賣,主題曲 "Eye of the Tiger" 嘛變做是怹的招牌曲。捀著 Rocky 電影的福氣,怹第 3 塊專輯嘛號名做 Eye of the Tiger,一路升到米國專輯榜第 2 名的位置,是一塊誠成功的作品。

可惜怹紲來 1983 年發表的專輯 Caught in the Game 成績普普,就佇予人懷疑怹是毋是「1 片團體」(老刀按:「1 片歌星」、「1 片團體」佇台灣親像特別濟啊,呵呵)的時陣,1984 年新主唱 Jimi Jamison 的加入,替 Survivor 帶來後壁幾年的好光景。第 5 塊專輯 Vital Signs 再度共逐家證明,毋免靠 Rocky 電影,怹仝款會當做出好作品。我這擺欲介紹的歌曲,就是選自 Vital Signs 內底單曲的 "High on You",佇 1985 年春天得著米國排行第 8 名的好成績。這調歌的 MV 佇下跤:



另外,因為 Survivor 的團員一直咧變動,所以老刀就無詳細寫出啊。想欲瞭解 Survivor 的歷史佮作品,會使參考:
  • Survivor 官方網站,佇內底會當試聽 Survivor 全部專輯的所有歌曲(Real/WMA 格式)。當然囉,想欲有閣較好的音質,去買死豬 (CD) 來聽就著啦。
  • Wikipedia 內底嘛對 Survivor 做了真詳細的介紹,佮意怹的朋友,應該愛入去讀看覓。

7 則留言:

金屬頭 提到...

刀兄,看到這"愛死喔夫胎哥"也勾起我對ROCKY的熱血回憶,哈哈。話說我前年看完第六集還是依然感到震撼啊!極力大推ROCKY I以及ROCKY 6。話說咱們台灣的比莉大姐當年也翻唱這首歌,翻的真是讓我地上打滾----歌名就叫做"愛的太苛",取諧音來的~犀利

老刀 提到...

咱 2 人真正有「默契」。這篇我本來就是想欲介紹 "Eye of the Tiger" 佮 "Burning Heart" 這 2 調 Rocky 系列主題曲,但是想講應該有誠濟人捌聽過,所以就改介紹 "High on You" 這調嘛是我真佮意的歌曲,希望你會佮意啊!

金屬頭 提到...

這首High on You也不錯聽。他們的"Search Is Over Now"也是我頗喜歡的抒情小品。感覺小弟的口味跟刀兄有點雷同,哈哈。在這邊跟刀兄推薦個加拿大AOR團"TRIUMPH",雖說名氣不大,但是也有些許佳作,有機會可聽聽看。

老刀 提到...

哈哈,咱 2 人真正愛聽的物件攏差不多。我遮嘛有 Triumph 的死豬唷! ;)

金屬頭 提到...

呵呵,真是巧合,有機會我真該跟刀兄交流認識一下。TRIUMPH是當初在唱片行打工店長大力推薦的一個團啦,也因為她所以才多接觸了一些80曲風的團體,當初是聽到他們的"THE CITY"這首三段式的組曲讓我十分有印象,進而接觸他們更多的作品。

老刀 提到...

你用「她」,敢講彼个店長是查某人?連我嘛想欲熟似伊啊,因為我的朋友內底,愛聽搖滾的人攏總是查甫啊!

金屬頭 提到...

是的,以前店長是位大姐,讓我開闊眼界聽的更廣,我對她始終抱著感恩的心。現在小弟天天期待刀兄下一首會推薦哪一曲,看看是不是我腦中歌單的其中一首?哈哈!