2008年5月31日

幾个有關 SSD 硬碟的新聞

來自 PC World 的這篇報導講著,希捷 (Seagate) 公司的執行長 Bill Watkins 透露怹的第 1 个 SSD 硬碟產品將佇明年上市(嘛順紲透露講,怹的 2 TB 硬碟嘛欲佇明年推出),毋閣推出日期佮價數偌濟並無進一步宣布。

另外這篇來自 vnunet 的報導英特爾 (Intel)、美光 (Micron) 2 間公司將佇今 (2008) 年後半年推出 34 nm(奈米)製程的 32 Gb NAND 多層晶片。Intel 的 NAND 產品事業群的行銷主任 Pete Hazen 補充講,有了這片目前是全世界上小的 NAND 來共 SSD 硬碟肚量加倍,連鞭就會當來突破 256 GB。老刀認為,嫌講 SSD 硬碟腹肚無夠大粒的人,會使考慮共喙窒起來呀。

2008年5月27日

ATX 電源改予 PowerMac G3/G4 使用

相信大部分的使用者攏會同意,蘋果公司的 PowerMac G3/G4 是真「粗勇」的電腦。毋閣萬一若拄著電源歹去的時陣,足貴的修理費用,絕對會予代誌變甲足大條啊!

Accelerate Your Mac 今日介紹的 ATXG4 網站,應該是真濟 PowerMac G3/G4 使用者之福。這个網站內底提供真豐富的資料,教逐家按怎共 PC 的 ATX 電源改裝予 PowerMac G3/G4 使用,順紲予你的錢袋仔莫變傷薄,這款站長實在有夠好心啊。另外,站長伊家己嘛有做 ATX -> PowerMac G3/G4 電源的轉接線咧賣,可惜並無對米國以外的所在出貨。毋知影佇米國的朋友,敢有興趣來發起集體購買?

教育部母語(閩南語、客家語、馬祖福州語)創作獎徵稿

現此時教育部國語會當咧舉辦母語創作獎徵稿活動,到 2008 年 6 月 15 日為止。創作獎分做閩南語、客家語、馬祖福州語 3 款,對象有「教師組」、「大專院校學生組」佮「社會組」3 種。另外,邀稿的文類分做「詩」、「散文」佮「小說戲劇」3 款。

想欲進一步瞭解活動消息,抑是有興趣參加徵稿的朋友,歡迎共報名簡章掠轉來參考:

老刀鐵馬遊記 (2) - 基隆河汐止、內湖段

頂禮拜騎了五堵、汐止這短短一段基隆河邊了後,紲落來老刀頂禮拜六家己一人順著基隆河邊,騎入去台北市練跤腿力。雖然沿途風景真媠,但因為並無啥人咧騎的關係,白鷺鷥等一寡水鳥徛踮河邊掠魚仔,飛來飛去並無予人驚擾。所以這擺老刀就一爿沓沓仔騎車,一爿來欣賞景色、毋免驚去撞著別人啊。

佮較早租車騎淡水河的經驗比起來,基隆河的風景猶閣較媠,毋閣可能是知名度不如淡水河跤踏車道的關係,來遮騎車的人加足少。大部分的時間,老刀頭前、後壁攏無看著人,實在有「千山我獨行,不必相送」【老刀註:這是港片「楚留香」的歌詞尾句】的氣勢啊!哈哈。

這擺老刀沿路所翕的相片攏囥佇遮

2008年5月25日

5/23 老地方冰果室聚會紀錄

這擺老地方冰果室逐禮拜五暗時舉辦的例行聚會,因為老蔡進前就有放風聲講,上奇公司(真濟款數位畫圖軟/硬體設備的國內專業代理商)的 Sylvia 黃經理欲來展示 Wacom Cintiq 12WX 液晶數位板,結果一寡誠久無看著的朋友,這擺就攏總出來「全員集合」!

老刀佮較早幾擺聚會仝款,佇 7 點左右入場。毋過來到 Le Park Cafe 2 樓的時陣,現場就已經足鬧熱啊。足久無看著的朋友,親像將欲升大學的「資訊少年」魏藥、掠影專家大牛哥、浮爺、拄出冊的暢銷作者五樣,猶閣有小白小姐(聽伊講欲換新頭路啊,所以會當來參加這擺聚會)、喵小相 (heyer)、貓頭兄、「大雄哥」佮 2 位古錐的查某囝、jimmy1019、paper,加上定定出現的「固定班底」阿清、詹姆士、木村、阿錦(佮朋友 Kelly 鬥陣)、aks,以及活動發起人老蔡等人,予這擺聚會變做是鬧熱的老地方同窗會啊。

當然老刀袂使錯過這个機會,趕緊來翕一寡相片予無緣參加的朋友欣羨一下。

相關的影像佮文字紀錄,請參考:

我的 flick 相簿(攏總 53 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年5月24日

AMD-ATI 推出顯示卡驅動程式 Catalyst 8.5

AMD-ATI 拄共怹的 Windows/Linux 顯示卡驅動程式 (Catalyst) 更新到 8.5 版。你的電腦若有 ATI Radeon 9500 抑是閣較新的顯示卡,就會當來升級這个版本(包括透過 Boot Camp 咧使用 Windows 的 Mac 用戶)。新的 8.5 版主要是增加影音方面的支援,親像:
  1. 支援 480i、480p、1080p24 模式。
  2. 支援 SECAM TV 視訊輸出。
  3. 非標準 TV 模式的 HDMI 音訊。
  4. 支援 Windows XP SP3。
  5. 提升顯示效能,特別是咧耍𨑨迌物的時陣。
  6. 修正一寡舊版驅動程式所發見的問題。
想欲詳細進一步了解 Catalyst 8.5 改進啥物的朋友,會使來參考伊的 Release Note:

2008年5月23日

水冷、恬恬袂吵的 PowerMac G4 (MDD)

第尾代的 PowerMac G4 鏡面機種 (MDD) 因為有袂歹的性能佮好的擴充性,所以一寡用戶猶毋敢改換 Intel 處理器的新機種。毋閣 MDD 親像「蠓仔踮耳空邊飛來飛去」的風扇運轉聲,實在是予人無啥爽快的使用經驗。

Accelerate Your Mac 貼出一篇水冷式的 PowerPC G4 CPU 散熱組合樣品的相片,這組水冷式的套件是 Danger Den 當咧開發的新產品。雖然猶袂開始賣,但是聽怹說鬥好了後,規組電腦上吵的部件變做是 nVidia 顯示卡頂懸的小風扇,但是音量並袂超過 30 dB。看起來 CPU 降溫予風扇停止,對消除運轉噪音來講,應該是有效的治本方法。

這篇報導佇遮。猶咧使用 MDD 的朋友,會使考慮買一組來鬥看覓。

2008年5月22日

Office 2007 明年將欲支援 ODF 佮 PDF

來自 ComputerWorld 的報導微軟公司昨日正式宣布,怹預定欲佇 2009 年前半年推出的 Office 2007 Service Pack 2 (SP2) 將欲支援 ODF (Open Document Format for Office Applications) 佮 Adobe 的 PDF 文件格式。到時陣 PDF 1.5、PDF/A、ODF (Version 1.1) 佮 XPS(XML Paper Specification,這是微軟公司制定、親像 PDF 仝款的可攜文件格式)攏會收入佇 Office 2007 支援的文件名單內底。

微軟公司這个動作,無形中嘛夯懸 ODFOffice Open XML 這 2 種開放格式文件的競爭。ODF 是昇陽公司 (Sun Microsystems, Inc.) 佮 IBM 做伙提出的開放文件格式。佇 2006 年 5 月,ODF 已經予 ISO 接受變做國際標準;Open XML 是 2007 年 4 月才予 ISO 接受。毋閣微軟公司並無講欲原生支援 (natively support) ODF 格式,到時陣可能會提供轉譯工具,提供 ODF 佮 Open XML 格式的互相轉換。

另外,其實 Office 2007 佇開發階段就有支援 PDF,但當時因為制訂 PDF 格式的 Adobe 公司反對,結果微軟決定共 PDF 佮 XPS 的支援囥踮一邊。現此時 PDF 嘛已經變做 ISO 標準,PDF 佮 XPS 的支援終於會當來宣布「解禁」。

對手陣營之一的 IBM 公開表示講,這代表使用 ODF 文件已經愈來愈受著重視,怹支持微軟公司的決定。

2008年5月21日

Seagate Showcase 產品線,拍入家庭數位影音市場

希捷 (Seagate) 公司佇米國 NCTA (National Cable & Telecommunications Association) 舉辦的 2008 年有線電視展示會發表新的 Showcase 產品線,搭配數位錄影機做伙使用,會當大大延長影片放送的時間;另外,摩托羅拉 (Motorola) 嘛頭先發表有 e-SATA 支援的高畫質 (HD) 數位錄影機,拄好佮支援 e-SATA 的 Seagate Showcase 鬥對擔。

Showcase 提供上濟 1 TB 的超大空間,會使錄 200 點鐘的高畫質 HD 影片,抑是 1000 點鐘的標準畫質電視節目。為著欲應付高畫質的即時影音錄影的需要,Seagate 採用怹最近發表的 Pipeline HD 家族的硬碟佇 Showcase 內底,予你有「囥踮床邊看影片」的安靜,嘛兼顧省電,佮仝時間處理 12 个高畫質資料流 (HD stream) 的強大功能。Showcase 已經得著 Windows Vista 的認證。

預定將佇 2008 年第 3 季開始販售的 Seagate Showcase 有 250/500/750/1000 GB 的空間,用戶會使選擇欲買 USB 2.0 抑是 e-SATA 的型體。想欲進一步了解的朋友,會使來參考Seagate Showcase 的新聞稿

2008年5月19日

老刀鐵馬遊記:五堵、汐止基隆河段

老刀較早有幾擺佮厝邊、朋友做伙去台北市租跤踏車遊淡水河,運動兼練腿力,顛倒佇厝附近的汐止自行車道毋捌去試騎過。其實五堵、汐止佇基隆河邊的跤踏車道,佇舊年底就已經佮台北市南港、內湖段相接;所以對五堵火車頭後壁開始,順基隆河一直騎落去,就會當一路騎經過圓山仔到關渡接淡水河。紲落來看是欲向北會使繼續騎到淡水,抑是向南騎對永和,攏總會使。

這禮拜六早時室友去上班的時陣,老刀想講反正一人顧厝嘛是無聊,所以就共跤踏車牽出來四界踅啊。這擺對起點五堵火車頭開始,騎汐止這段的基隆河段大約只有 2 公里,反正是欲度時間,老刀並無急欲騎煞,這擺終於舉起翕相機,一爿騎、一爿翕相。所以才有頂頭的相片予逐家觀賞啦!

這擺所翕的相片攏總囥佇 Flickr 相簿內底,歡迎逐家有盈入來參觀啊。

2008年5月16日

Captain FTP 5.3 + Crowznest 2.0 新組合

Captain FTP Crowznest
(頂圖:「海賊船長」Captain FTP 佮好兄弟「烏鴉岫」Crowznest)

昨日老刀收著德國 Xnet 公司來批通知講,怹公司真受歡迎的「海賊船長」Captain FTP for Mac OS X 已經推出 5.3 版。這个新版主要是配合 Xnet 另外推出的「烏鴉岫」Crowznest 2.0 的新功能所製造。

若有咧做網站的朋友,應該會同意 Crowznest 2.0 搭配 Captain FTP 是上贊的組合。Crowznest 是一个隨時監督你電腦(本機)佮伺服器(遠端)狀態的小工具。透過 Crowznest,你會當指定本機檔案夾 (Hot Folder) 佮佗幾个遠端伺服器目錄 (Remote Folder) 欲「仝步對應」。後擺當你指定的 Hot Folder 內容有變動(親像修改、刣掉內底的檔案,抑是共其他檔案搬入這个檔案夾內底)的時陣,Crowznest 就會自動透過 Captain FTP 上傳去 Remote Folder 做仝步的變更。雖然 Crowznest 1.x 是搭配 Captain FTP 4.5 以後的版本做伙使用的免費軟體,但是新的 Crowznest 2.0 改做愛付 11 箍米金購買的選擇工具。

另外,Captain FTP 5.3 嘛有修正幾个佇舊版本已經發見的問題。Captain FTP 5.3 定價 29 箍米金,免費試用期是 14 日。試用期滿了後,若欲閣再繼續使用 Captain FTP,就愛付費購買。舊版 Captain FTP 5.x 的用戶攏會使免費升級到 5.3 版。

2008年5月15日

Fedora 9 已經安裝好勢(Compiz 初體驗)

Fedora 9 Desktop

現此時老刀已經共 Fedora 9 安裝好勢。人講「有圖有真相」,就搭 1 張螢幕圖片予逐家參考看覓!全新的 Compiz 螢幕特效真正是真趣味、好耍,親像用視窗拍開、關掉佮輸入法拍字的組字框攏有「淡入淡出」的效果;視窗「移動」佮「最大化」有親像布丁按呢跳咧跳咧,真是誠有看頭啊。而且老刀用入門級的 ATI Radeon 9550 顯示卡表現就已經有夠水準(不只順,猶閣無「毛邊」),可見 Compiz 應該無用掉傷濟系統資源(想欲看 Compiz 的螢幕畫面,會使來這个所在參考)。

當然系統除了媠以外,嘛是愛有實用啦。新的 Fedora 9 用起來佮 Fedora 8 的感覺差不多,毋閣新功能這陣我猶袂用著偌濟。老刀有盈會沓沓仔試,若有啥物新發現,一定閣再共逐家報告。

【補充:佮較早仝款,Fedora 9 有提供予 i386、x86_64(Intel、AMD 等相容處理器專用的 PC,包括新款使用 Intel 處理器的 Mac電腦)、ppc(PowerPC G3/G4/G5 處理器專用)3 个作業平台的版本。想欲試的朋友,一定愛掠予著啊!】

2008年5月14日

Windows XP SP3 當機,HP 佮 AMD 愛負責?

Windows XP SP3 推出了後,國內外有一寡人回報講:有一寡電腦升級了後會落入「一直重新開機」的萬丈深坑內底。按呢看起來,實在愛感謝天公有共老刀保庇,2 台 PC 升級 Windows XP SP3 了後一切正常。

根據這篇報導,微軟公司客服部表示,怹檢查了目前所有的報告,發見問題攏是出佇 HP 的電腦。另外微軟公司前任的資深安全顧問 Jesper Johansson 佇伊的部落格發表講,Windows XP SP3「一直重新開機」的問題佇一寡採用 AMD 處理器的電腦嘛會發生。經過分析了後發見,主要是這寡使用 AMD 處理器的電腦當初是利用「佇 Intel 處理器的電腦製作的磁碟映像 (image)」來安裝 Windows XP。佇 SP2 抑是 SP3 升級好勢了後,電腦就會去走找 "Intelppm.sys" 這个物件(也就是 Intel 處理器的驅動程式)來造成電腦當機。微軟公司建議電腦有出這款問題的用戶,會使利用「安全模式」開機了後,修改系統登錄 (registry) 資料並且刣掉 "Intelppm.sys",就會當暫時解決問題。

2008年5月12日

先探 Fedora 9 新功能


除了 Mac OS X、Windows 以外,誠濟人知影老刀嘛是 Fedora Linux 的愛用者。代號 "Sulphur"(硫黃)的新版 Fedora 9 預定將佇 5/13 正式推出。新版有一寡功能是老刀誠期待的,親像講:
  1. Kernel 2.6.24 系統核心。
  2. GNOME 2.22,包括一个叫做 Cheese 的 webcam 應用程式,會當來利用身邊的 webcam 翕相抑是錄影。
  3. KDE 4.0.2。
  4. Compiz,這个上新、媠化的桌面管理程式,會當佇 GNOME 佮 KDE 啟動【老刀註:毋知影佮 Mac OS X 10.5 (Leopard)、Windows Vista 比起來是啥物上媠?】。
  5. 採用 OpenJDK 6 做預設的 Java 環境(IcedTea 7 猶原有附佇 Fedora 內底,但是需要家己安裝)。
  6. OpenOffice.org 2.4。
  7. 支援 ext4 磁碟格式。
想欲了解詳細的介紹,歡迎去看 Fedora 9 的 Release Note。結果如何,老刀掠轉來用了後,會閣來共逐家報告。

2008年5月10日

Adobe 恬恬仔推出 Acrobat 家族的 7.1.0 更新版

雖然 Acrobat 7.x 已經是舊版,但是 Adobe 嘛是恬恬仔推出 Acrobat 家族 (Professional, Standard, 3D, Reader) 的 7.1.0 更新版(有分 Windows 佮 Macintosh 的版本)。這擺主要是提供安全性更新佮進前錯誤的修正,並無另外提供新的功能。毋閣有一件代誌要特別講出來:佇 PCL 印表機(大部分毋是透過 PostScript 列印的各種噴墨、雷射印表機,應該攏有使用著 PCL)驅動程式下跤,印出有「毋是 Unicode 字集的正體漢文」的 PDF 文件的時陣,會印出一堆 ?(問號)的怪問題,這陣已經解決啊

想欲進一步了解 7.1.0 版修正了啥物所在,會當去參觀 Adobe 的 Release Note

2008年5月9日

Psystar「耍真的」系列之 2:產品支援網頁

頂擺老刀為逐家搶先報導 Psystar「耍真的」開始共 Mac 相容機 Open Computer、OpenPro 出貨了後,因為預裝的 Mac OS X (Leopard) 無法度使用「軟體更新」(Software Update) 來修補系統,所以佇怹的產品支援網頁推出 "Open Computing Updates" 單元,就是提供系統更新的「服務」,予用戶家己掠轉去安裝修補。但佇老刀心目中,Psystar 按呢做親像咧耍火,真是危險萬分啊。

老刀會按呢講毋是無理由,因為這款提供「予人掠更新檔」(也就是「再散佈」)的行為,明顯違反 Mac OS X (Leopard) 的「軟體許可協議」(Software License Agreement, SLA) 第 3 條「閣下不得出租、租賃、借出、再散佈或分許可 Apple 軟體」的規定。毋閣進前 Psystar 就已經違反第 2 條之 A.「閣下同意不在任何不帶有 Apple 標籤的電腦上安裝、使用和運行此 Apple 軟體」在先,閣再加犯一條嘛是無差啦!哈哈。

2008年5月7日

Windows XP SP3、Vista SP1 漢文版已經出現佇 Windows Update

Updating Windows XP SP3
(頂圖:Windows XP SP3 已經會當利用 Windows Update 更新)

較早微軟公司已經宣布延後原訂佇 4/29 推出 Windows XP Service Pack 3 (SP3)(請參考這篇報導),就佇一禮拜後的今日,老刀發見 Windows XP SP3 漢文版已經出現佇 Windows Update 的更新套件名單內底啊(請參考頂懸的圖)。【5/14 補充:Windows XP SP3 的網路安裝套件嘛已經發布 SP3 掠檔佮升級用了誠濟時間(老刀坐踮電腦頭前坐甲欲啄龜,哈哈),升級了後佇「控制台」->「內容」顯示電腦已經升級 SP3 成功:

winxpsp3
(頂圖:老刀的 Pentium 4 中古 PC 已經升級好勢)

為著欲予 Windows XP 舊版的使用者瞭解 Windows XP SP3 包括啥物物件、予資訊人員瞭解企業內部按怎部署 (deploy) Windows XP SP3 的相關代誌,微軟公司特別寫了升級白皮書囥佇怹的網站內底,有需要的朋友會當去參考一下。

另外,聽講 Windows Vista SP1 嘛已經收入佇 Windows Update 內底啊,毋閣老刀並無使用 Vista,希望有咧用 Vista 的熱心朋友會當共老刀講一聲使用心得。Windows Vista SP1 嘛有獨立安裝的版本,有興趣的朋友會使對這个所在掠落來。

微軟公司嘛有提供升級光碟映像檔 (iso) 的下載網址:
老刀的 PC 進前有淡薄仔錯亂(親像 XP「工作列」的「音量」佮一寡圖示無法度顯示),佇系統升級了後,已經有回復正常啊。

2008年5月6日

Nine Inch Nails 上新專輯 "The Slip" 免費掠落來聽!

佮意工業搖滾 (Industrial Rock) 佮另類搖滾 (Alternative) 的朋友請注意來。Nine Inch Nails(九吋釘)為著答謝歌迷 20 冬來的支持,特別共上新的 The Slip 規塊專輯所有歌曲開放予你免費掠來聽!實體的 The Slip 專輯 CD 佮烏膠曲盤(唱片)將佇今年 7 月推出。

這陣 The Slip 專輯的音樂檔案,有提供高品質的 MP3、無失真的 (lossless) FLAC 佮 M4A(就是 iTunes 的 AAC 格式),甚至嘛有比 CD 音質閣較好的 24位元/96kHz WAV 格式。想欲掠歌的朋友,請入去 Nine Inch Nails 官方網站的專屬網頁登記。

2008年5月3日

5/02 老地方冰果室聚會紀錄

這禮拜五暗時的老地方冰果室例行聚會,老刀差不多七點左右就到位啊,但是逐家親像講好勢仝款,攏足晏才來報到。老刀只好提出身軀邊的 Pocket PC,用 MSN 來佮佇公司加班的詹姆士開講,一直到 Pocket PC 無電為止。好佳哉新朋友柏宏連鞭著入來報到,所以嘛無予盈盈的老刀等傷久。

新朋友柏宏是師大一年的學生,這擺為著欲來佮逐家討論翕相的問題,共學姐借 Nikon D80 來赴會(後擺愛招學姐做伙來啦!)。隨後詹姆士、老蔡、錦爺、阿清、paper 佮超哥翁某就連紲入來啊。佇老刀十點離開以後,猶閣有 aks 來參加,可惜我並無拄著人。

這擺聚會因為老刀日時有要事在身,無法度攑翕相機佇台北市內四界踅,所以就無共伊帶出門啊。這擺是老刀頭一擺使用 Sony Ericsson W700i 翕相手機來作紀錄,所以相片無法度提供進前聚會用 Nikon D70s 紀錄彼款品質,請逐家多多包涵。

最後愛感謝朋友阿鑫半賣半相送這支手機予老刀,才會當為逐家做這篇報導啊。

我的 flick 相簿(攏總 15 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年5月2日

教育部公布「臺灣閩南語推薦用字」第 2 批、「臺灣閩南語卡拉 OK 正字字表」

舊年教育部公布「臺灣閩南語推薦用字」第 1 批 300 字了後,本站連鞭就採用做標準用字。昨日教育部閣再公布第 2 批 100 字,歡迎有興趣的朋友來參考看覓。

可能嘛有真濟朋友已經對電視新聞知影,教育部為著欲解決卡拉 OK 伴唱帶的台語用字混亂的情形,避免無正確的用字來誤導民眾,特別針對 50 調逐家定定咧唱的歌曲,公布「臺灣閩南語卡拉 OK 正字字表」,另外嘛做了下跤的說明:
有鑑於目前坊間閩南語伴唱帶,歌詞字幕之閩南語用字,常借用華語用詞或採用華語借音,造成閩南語漢字使用的混淆。為改善這種混亂情形,教育部特成立「閩南語卡拉 OK 正字小組」,就國內 KTV 閩南語歌曲中選出 50 首較具代表性之歌曲,並以「臺灣閩南語卡拉 OK 正字字表」方式,呈現教育部建議用字與歌詞原文用字之差異。
在「臺灣閩南語卡拉 OK 正字字表」中的「歌詞建議用字」欄位,是以教育部公告的「臺灣閩南語推薦用字(第 1、2 批)」為依據。至於歌詞原文之用字,另於「原文用字」欄位呈現,以方便對照。

官方新聞稿佇遮


這擺新公布的用字,老刀會趕緊讀予好勢,來當做本站的標準用字。

【5/03 補充:目睭較利的朋友應該發見老刀已經按照教育部新公布的推薦用字修整文章(這陣已經共 4 月份發表的文章改好勢)。你若看著老刀佗位改了毋好,歡迎蹛正手爿「留字條予老刀」這个所在共我講一聲,老刀會趕緊來改進。先共逐家說一聲多謝啦!】

2008年5月1日

吳守禮教授的「台語正字」

「老刀烏白講」網站堅持用台語報導上新的電腦佮 3C 產業消息,一直受著真濟朋友的歡迎佮鼓勵。甚至嘛有一寡朋友共老刀講,怹就是看「老刀烏白講」咧學台語,予我誠感動啊。為著欲推廣台語,以後老刀若是有盈,嘛會來介紹幾个推廣台語的好網站予逐家參考。

這擺老刀欲介紹予逐家的台語網站,是已經過身的台語學者吳守禮教授的「台語正字」。吳教授佇日本時代的台北帝大就一直咧研究台語,國民政府接收台灣了後仝款是創作不斷,伊嘛是 2001 年頭屆總統文化獎「百合獎」得主。

「台語正字」介紹 20 个定定會用著的台語正字用詞,嘛按照古字字源,詳細解說俗字是按怎予人誤用:親像「鬥腳手」是正字,俗字做「逗腳手」是誤用。逐篇讀起來攏真有趣味啊!

【老刀按:教育部「臺灣閩南語推薦用字」中,「腳」是寫做「跤」用;本站用字是以教育部的推薦用字為主】