2008年4月30日

想欲升級 Windows XP SP3 的朋友,暫且閣等幾日

根據 CNet 的報導,微軟公司宣布因為找著進前毋捌發現的新問題,原來訂佇 4/29 推出 Windows XP SP3 的日期將會閣再延幾日。

這擺發現的新問題是 Windows XP SP3 佮 Dynamic RMS (Retail Management System)【老刀按:毋知影微軟官方按怎翻譯這个專有名詞,老刀暫且共伊叫做「零售店管理系統」,這个物件是予幫助中小型企業管理連鎖店面用的】有相容性的問題。微軟公司將佇解決這个問題了後,正式來推出 Windows XP SP3。

事實上,Windows Vista SP1 佮 Dynamic RMS 嘛有仝款的相容性問題(微軟已經咧進行修補當中)。微軟公司建議 Dynamic RMS 的用戶暫且共「升級 Vista SP1」佮「升級 XP SP3」這 2 件代誌放予袂記。

2008年4月29日

Psystar 耍真的!Open Computer 開箱報導

就佇幾日前 Psystar 宣布 Mac 相容電腦 Open Computer、OpenPro 產品已經開始出貨了後,這篇 Gizmodo 的報導頭先放送讀者提供的 Open Computer 開機影片開箱相片

對用戶的報告看來,Psystar 已經佇 Open Computer 內底預先安裝 Mac OS X 10.5 (Leopard),Apple System Profiler(蘋果系統描述)認為 Open Computer 是一台 Mac Pro。開機影片說明這台 Open Computer 開機實在有夠緊。另外,出貨包裝內底嘛有附一套 Leopard DVD。

毋閣有一好就無二好:使用者家己並袂當利用這片 Leopard DVD 重新安裝入去 Open Computer 內底(Psystar 應該是有動一寡跤手,共 Leopard 安裝佇電腦),所以後擺若拄著 Open Computer 硬體抑是 Leopard 系統歹去,使用者想欲重灌電腦將是痛苦的代誌。另外,Leopard 下跤的 Software Update(軟體更新)嘛無法度使用。

猶閣有一點愛講出來。對相片看來,Psystar 所用的主機板是竟然技嘉 (Gigabyte) 出品、電源牌子是華碩 (Asus),果然是「台灣之光」啊!

【5/01 補充:CNet 這篇評論講著,怹嘛已經收著 Open Computer 現貨,並且有畫質閣較好的開箱影片開箱相片

2008年4月28日

蘋果 iMac 改款更新,終於會當來準備共怹進貢啦

今日蘋果公司一如預料發表 iMac 新改版,新款 iMac 這擺終於採用 Intel 上新款 Penryn 製程的處理器。除了硬體規格(處理器、匯流排速度)提升以外,價數不但無起,而且有反映米金匯率落價小可仔,老刀看了是真佮意,已經決定欲進一台來共服務 7 冬的 PowerMac G4 退休啊。
  • 20" 入門款:Intel Core 2 Duo 2.4 GHz (6 MB L2),1.0 GB RAM、ATI Redeon HD 2400XT (128MB)、250 GB 硬碟,新台票 40,900 箍。
  • 20" 進階款:Intel Core 2 Duo 2.66 GHz (6 MB L2),2.0 GB RAM、ATI Redeon HD 2600 Pro (256 MB)、320 GB 硬碟,新台票 50,900 箍。
  • 24" 高級款:Intel Core 2 Duo 2.8 GHz (6 MB L2),2.0 GB RAM、ATI Redeon HD 2600 Pro (256 MB)、320 GB 硬碟,新台票 60,900 箍。
  • 24" 頂級注文款:Intel Core 2 Duo 3.06 GHz (6 MB L2),2.0 GB RAM、NVidia GeForce 8800 GS (512 MB)、500 GB 硬碟,新台票 76,900 箍。
網路商店已經接受預訂,預定 4-6 禮拜後交貨。想欲了解詳細規格的朋友,請參考蘋果公司的 iMac 網頁

2008年4月26日

4/25 老地方冰果室聚會紀錄

這禮拜五暗時老地方冰果室佇 Le Park Cafe 的例行聚會,老蔡邀請著「心念所至、幸福門開」展覽會的作者來共逐張展出作品親筆簽名,順紲來佮逐家開講交流。一寡真久無看著的朋友攏總到位,又閣是一个快樂、鬧熱的暗暝。

這擺參加聚會的朋友,除了有對米國倒轉來找頭路的新人 Chrisy 小姐以外,嘛閣有老恩、阿清、老蔡佮馬妹翁某、真久無看著的燦哥燦嫂佮公子 3 人、Jerry.、aks、superman_eh、JamesCooper,加上固定班底詹姆士、木村等十幾个人。

著啦,差一點仔嘛袂記得一件代誌:這擺聚會嘛拄著老蔡共馬妹(嘛是老刀的學妹)求婚成功週年紀念,毋閣老刀袂記得佇 Le Park Cafe 當場恭喜怹 2 人感情一路行來終於修成正果。所以踮這个所在共怹講一聲恭喜,祝福怹趕緊生一隻 iPhone 來予逐家抱啦!哈哈。

相關的紀錄佮討論,請參考:

我的 flick 相簿(攏總 24 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

PS3 變身筆電大改裝

Tearing a Sony PS3 Apart
(這張對癮科技網站掠來的圖,清楚介紹 Sony PS3 內底原來是生做按呢)

來自癮科技的這篇報導(第 1 集),真是予老刀大開眼界。原作者共伊的 Sony PlayStation 3 (PS3) 電動𨑨迌物仔機改裝做筆電,對拆機開始、到焊接、組合,解說了真詳細啊,嘛非常精彩。想欲來改裝 PS3 的朋友,這篇文章應該有參考的價值。

後 1 集作者將欲介紹按怎共改裝了後的 PS3 鬥入去筆電殼仔內底,應該嘛是另外 1 篇誠精彩的文章。希望會當較緊看著啊!

2008年4月23日

按怎用台語寫部落格文章?

今日朋友 Lin rAphael 入來「老刀烏白講」問著這个問題
身為一位臺灣人,真想學習如何怎麼用臺語文
該到何處學習呢?真想也能打出流利的臺語文
我想應該嘛有真濟人想欲知影老刀寫台語文章的撇步。老刀踮遮攏無偷藏,就共我的步數寫佇下跤【3/21/2009更新重寫】
  1. 普通時盡量用台語來想代誌。
  2. 參考教育部的「臺灣閩南語推薦用字」(第 1 批第 2 批)來練習拍字,建議你掠落來,有閒加減看幾擺就會熟似啊。
  3. 其他袂曉拍的字/詞,老刀推荐你入去教育部的「臺灣閩南語常用詞辭典」查,嘛會當佇「老刀烏白講」網頁倒手爿利用「線上台語字典」查詢。
  4. 因為用「注音輸入法」拍字會受著華語讀音的限制,拄著想欲拍的字毋知欲按怎用華語念的時陣,定定就無法度閣再拍落去啊!所以若是會使,趕緊學一个以拆字為主的輸入法,親像倉頡、大易、嘸蝦米……佗一款攏好(我家己用「行列輸入法」),絕對會當予你佇拍字的時陣得著上大的幫助。
  5. 上重要的一點,愛定定練習拍字,拍毋著免驚歹勢,有糾正就會進步。
最後,希望親像「老刀烏白講」這款的台語網站會當愈來愈濟、愈流行,至少慣勢用台語拍字了後,後擺教囡仔學台語嘛方便啊!

Psystar 團隊已經準備好勢?

Mac 相容電腦製造商 Psystar 公司宣布講,怹 4/07 彼个禮拜所收著的全部訂單,會佇 4/21 開始出貨。物件送出了後,Psystar 會寄電子郵件通知客戶,而且會附快遞貨品的追蹤流水編號,以方便客戶隨時追查處理狀況。以上若是事實,Open Computer、OpenMac 的開箱相片佮使用心得閣等幾日著會出現。

另外,按照 Psystar 公司網站的說明,怹公司這擺終於「確定」搬去 Doral(佇 Miami 的市郊),住址是:
10475 NW 28th St
Doral, FL 33172

【老刀按】照 Google Map 的資料佮 Psystar 網站所留的地圖比對,頂頭地址的第 2 逝應該是 "Miami, FL 33172";Psystar 又閣一擺共公司地址寫毋著啊。


佮怹公司大門的相片:

Psystar

對 Google Map 的衛星翕相資料,來看 Psystar 公司:


檢視較大的地圖

2 張相片的建築物是毋是有仝款,就交予各位朋友家己判斷啊。

2008年4月22日

微軟公司確定佇 4/29 推出 Windows XP SP3

根據 Electronista 的報導,微軟公司將佇 4/29 正式發表 Windows XP SP3【老刀註:微軟公司已經宣布共推出日期延後,請參考這篇報導,這嘛是明年微軟停止支援 Windows XP 進前的最後一个 Service Pack。這个 SP3 將是獨立的安裝程式版本,透過 Windows Update 更新的自動升級版愛閣小等幾日。

Windows XP SP3 主要是進前已經發表過安全性更新的組合,並無加入 Windows Vista 的重要功能。毋閣會當確定「網路存取保護」NAP (Network Access Protection) 有出現佇 SP3 內底,提供單位內部使用 Windows XP 享受著 Windows Server 2008 新功能的服務。

另外,Windows XP SP3 並無附 Internet Explorer 7 (IE7),想欲升級 IE7 的朋友請家己來遮掠來安裝

2008年4月21日

Firefox 3.0 beta 的 Unicode 試驗無夠合格

Unicode 3.x compatible not Unicode 3.x compatible
(倒手爿:Firefox 2.0.0.14、正手爿:Firefox 3.0 beta 5)

原來的文章佇遮

猶會記得較早老刀以「𨑨迌」2 字,討論過 Safari 2.x/3.x 對 Unicode 的支援程度。這陣 Firefox 3.0 已經進入 beta 階段,根據國內外一寡網友(包括老刀)試驗的結果,雖然 Firefox 3.0 beta 5 有佮 Safari 3.1 仝款緊的瀏覽速度,而且嘛已經有夠穩定,但是伊支援 Unicode 3.1 的試驗結果是顛倒較輸舊版的 Firefox 2.0.0.14,頂懸的圖會當證明;新版支援 Unicode 的程度比舊版較差,嘛是誠奇怪的代誌啊!

另外,毋管是 2.0.0.14 抑是 3.0 beta 5 攏總無法度佇 blogger/blogspot 的文章標題顯示 Unicode 3.1 的台語文字,這是另外一个需要改進的所在(Safari 3.1 並無仝款的問題;攏會使正確顯示標題佮文章內底的 Unicode 3.1 台文字)。

希望正式版本的 Firefox 3.0 會當來解決這个問題。

【註:老刀已經共這个問題重搭入去 Mozilla Taiwan 討論區,經過佮一寡朋友討論了後,初步已經知影問題出現佇佗位。有興趣的朋友,歡迎去遐參考看覓】

2008年4月18日

歹戲拖棚的 Psystar

昨日老刀才講著「Psystar 可能是假公司」的證據愈來愈濟了後,過無偌久,Psystar 就出來說明代誌的經過。毋閣怹的講法四界全破空,套一句漢文用詞,真是「愈描愈黑」。

Psystar 聲明的原文有淡薄仔長,老刀共重點整理佇下跤:
  1. 因為 Psystar 網路商店予提供者 Powerpay 切斷交易服務,所以無法度提供客戶透過網路商店交易(Powerpay 說明是因為 Psystar 違反協議,全文佇遮),這陣怹已經有開放客戶利用 PayPal 線上付款購買 Open Computer 佮 OpenPro。
  2. Psystar 公司因為當咧搬厝的關係,所以服務專線暫時無人接、聯絡地址寫毋著攏是暫時的現象。
  3. 造成逐家的誤會,Psystar 共逐家話一聲失禮。
雖然如此,頂頭的說明嘛是疑問重重:
  1. 網路商店提供者會主動共客戶停權,一般是因為客戶本身出了嚴重的問題。對消費者來講,這有可能是一个警告。另外,是按怎 Psystar 毋直接提供主流的 MasterCard、Visa 信用卡,反倒轉去用 PayPal?
  2. 公司閣按怎搬,地址應該未去誤植吧?而且一日內更正數擺地址,逐擺「拄好」攏寫毋著,這款代誌實在嘛誠奇怪啊?
毋管如何,佇「騙局」的懷疑猶袂完全創清楚進前,想欲買 Open Comptuer、OpenPro 的朋友上好閣小等一下。

2008年4月17日

AMD-ATI 更新顯示卡驅動程式 Catalyst 8.4

AMD-ATI 昨日推出予 Windows XP/Vista 佮 Linux 專用的顯示卡驅動程式 Catalyst 8.4。這版適用的 GPU 除了 ATI Radeon/X 系列/HD 系列以外,嘛支援 AMD 最近推出的 580X 佮 690 整合晶片組。

這擺推出的新版看起來除了有增加 ATI 佇 Folding@Home 的群組運算以外,只是修正舊版佇一寡程式(尤其是𨑨迌物仔)頂懸出現的問題而已。若想欲進一步知影 Catalyst 8.4 改進了啥物所在,請參考釋出公告 (Release Note):

Psystar 的 Mac 相容機敢是一場騙局?

昨日老刀介紹 Psystar 公司宣布推出 Mac 相容機 Open Computer、OpenPro 了後,受著逐家真大的注意,單日瀏覽人次已經拍破本站紀錄。事實上,這个事件佇米國嘛引起足大的話題,所以有一寡熱心的「狗仔隊」就走揣彼間公司網站所留的住址,希望會當探聽著進一步的消息。

較早邁阿密商務辦公室 (Miami Chamber of Commerce) 已經表示「毋捌聽過 Psystar 這間公司」,而且網站所留的公司住址佇仝 1 工內就變更數擺。Gizmodo 的報導嘛講著,根據有心人士按照這幾个住址一个一个去現場翕相的結果,佮 Psystar 網站停止接受信用卡付款的動作顯示,「Psystar 可能是假公司」的證據愈來愈濟;老刀認為 Psystar 應該愛出面說明一切。

老刀會繼續來為逐家報導這个故事紲落來的發展。

Firefox、Safari 鬥陣釋出安全性更新

這 2 款主要的網頁瀏覽器今日鬥陣推出安全性更新,關於這擺更新的說明,請參考:
毋管如何,趕緊來去掠來安裝吧。

2008年4月16日

Mac 相容機將再度挑戰 Apple

日前 1 間設佇米國 Miami 的公司 Psystar 宣布怹推出 Mac 相容機 "Open Computer"、"OpenPro",並且共逐家說明蘋果公司 Mac OS X 系統的軟體授權許可 (Software License Agreement) 限制「Mac OS X 只會當安裝佇蘋果出品的電腦頂懸」是壟斷、無合法的行為。根據 Psystar 員工表示:「使用者買 Windows,會使選擇伊欲灌佇啥物牌子的電腦。為何買 Mac OS X 袂當按呢做?蘋果公司實在是無看重消費者的權利。」因為爭議實在傷過大,按照慣例,侵權官司是免不了啦,Psystar 公司表示「是毋是有侵權,交予法院來證明一切」。

價數 399.99 箍米金起跳的 "Open Computer" 是鎖定佇 Mac mini 等級,因為伊是用一般的 PC 外殼加上 ATX 電源供應器,所以親像古早的 PowerMac G3/G4/G5 仝款,有一般桌頂電腦的擴充性。而且透過 Psystar 家己有開發相容的 EFI v8 韌體模擬器,直接來安裝原版的 Mac OS X 10.5 (Leopard) DVD 片(毋是違反軟體授權許可的「修改版 OSX86」)【感謝冰果室頭家白老闆指正,Psystar 並毋是 EFI 韌體模擬器的作者】。伊的基本的規格有:
  • 處理器:Intel Core 2 Duo 2.2 GHz
  • 記憶體:2 GB
  • 硬碟:250 GB SATA
  • 顯示卡:Intel GMA 950
  • 20x 雙層 DVD+/-R LightScribe SATA 光碟燒錄機
  • 4 空 USB
  • 外殼:白/烏
  • 系統會當選擇 Windows XP/Vista、Ubuntu Linux 佮 Mac OS X 10.5 Leopard
看起來,Mac mini 除了較無占桌面空間的優點以外,完全攏比輸 Open Computer 啊。另外,Paystar 嘛提供一擺訂 5 台 Open Computer 的優惠專案。

價數 999.99 箍米金起跳的 OpenPro 的規格是鎖定佇 MacPro 族群,規格是:
  • 處理器:Intel Core 2 Duo 2.6 GHz/Core 2 Quad 2.4-2.6 GHz)
  • 記憶體:2/4/8 GB
  • 顯示卡:nVidia GeForce 8600/8800
  • 硬碟:150 GB 1 萬轉高速硬碟,抑是 750 GB/1 TB 7200 轉硬碟
  • 外殼:銀/烏/鏡面
  • 系統會當選擇 Windows XP/Vista、Ubuntu Linux 佮 Mac OS X 10.5 Leopard
蘋果公司十外冬前佇 Steve Jobs 猶未倒轉來做 CEO 的時陣,有短暫授權包括台灣世成科技 (Umax) 在內的其他硬體廠商生產 Mac 相容機,但因為這个授權嚴重打擊著蘋果公司家己的硬體銷售,後來逼使蘋果公司不得已收回 Mac 相容機的所有製造授權。

2008年4月14日

4/11 老地方冰果室聚會紀錄

這擺老刀仝款來共逐家做老地方冰果室例行聚會的報導。一踏入去 Le Park Cafe 2 樓,就看著捌出過幾本的暢銷冊作者進藤光、插畫家愛倫公主佮幾个朋友踮遐,連鞭 Maxx、paper 嘛入來鬥鬧熱啊。

無偌久香港羅先生入來共逐家解說伊的環遊世界計畫。伊拍算 5 月底進前起行,利用 1 年時間一路向西,對中南半島、斯里蘭卡、印度、中東、歐洲、南美洲、北美洲,最後轉來亞洲的終點站台北。佇遮祝福伊一路順風。慢且!阿 wei-wei 咧?根據羅兄表示,當然是交予查某囝飼啊。

這擺佮普通時較無仝款的所在是,聚會的固定班底詹姆士、木村足晏入來,差一點仔老刀就拄無著。

相關的紀錄佮討論,請參考:

我的 flick 相簿(攏總 36 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年4月13日

歇禮拜,來聽歌:老刀精選 (11) - "Warrior" by Scandal (featuring Patty Smyth)

自從頂禮拜老刀介紹了 Vixen 這个攏總是媠姑娘仔的組合了後,熱心的朋友共老刀講著,希望會使閣再聽一寡查某搖滾歌手的作品。為著回應朋友的意見,這禮拜老刀紲落來介紹 Scandal 的主唱 Patty Smyth 予逐家知影,Patty 嘛是查某搖滾歌手內底,老刀個人上佮意的一个。

1981 成立的搖滾團體 Scandal,創團成員的組合有:
  • 主唱 Patty Smyth
  • 吉他手 Keith Mack
  • 吉他手 Jon Bon Jovi(毋過 Jon 無偌久就來離開,家己另外組合這陣已經是超級天團的 Bon Jovi 矣)
  • 貝斯手 Ivan Elias
  • 鍵盤手 Benjy King
  • 鼓手 Thommy Price
Scandal 佇 1982 年推出 Scandal 仝名 EP(迷你專輯),主打歌 "Goodbye to You" 連鞭受著樂評注意。1984 年怹推出專輯 The Warrior,內底的主打曲 "Warrior" 得著米國 Billboard 雜誌流行榜第 7 名、搖滾榜第 1 名的好成績,可惜因為佮 CBS 唱片公司鬧意見,佇結束 "The Warrior" 巡迴公演了後,過無偌久,短命的 Scandal 就宣布解散。

1984 年彼時陣,因為 Patty 佮 Eddie Van Halen(Van Halen 的吉他手)的牽手 Valerie Bertinelli 是密友的關係,Eddie 邀請 Patty 加入 Van Halen 來代替主唱 David Lee Roth 離開的空額,但 Patty 當時並無答應(老刀註:真是可惜,Patty 失去一个會當大紅的機會)。後來 Patty 替 Don Henley 擔任 Building The Perfect BeastThe End of the Innocence 2 塊專輯的幕後合音,嘛佇 1987 年推出第 1 塊個人專輯 Never Enough;毋過 Patty 上出名的個人單曲,應該是選自 1992 推出的 Patty Smyth 仝名專輯內底的 "Sometimes Love Just Ain't Enough",這調歌嘛是佮 Don Henley 合唱的名曲。

Patty 佇 1997 年嫁予退休網球名將 John McEnroe(已經囥入去佇網球名人堂),John 佇伊的自傳寫著:因為 John 家己想欲做音樂事業,Patty 看著 John 當咧興頭,就寫了 "Wish I Were You" 這調歌;這調歌後來予電影 Armageddon(台灣翻譯做「世界末日」)收入去做插曲。

這擺老刀欲介紹逐家聽的 "Warrior",聽人講嘛是真有名的冰島歌手 Björk 上愛的歌曲之一。這調歌的 MV 佇下跤:

2008年4月12日

Adobe 推出 Photoshop Lightroom 1.4.1 佮 DNG Converter and Camera RAW 4.4.1 更新

佇頂個月 Adobe 推出 Photoshop Lightroom 1.4 版數位相片處理軟體但是無偌久著收倒轉去了後(有興趣的朋友,會當參考這篇報導),經過 3 个禮拜又閣再推出更新版 1.4.1。

這擺更新除了有原來 1.4 版提供的新功能(支援一寡新相機,親像 Nikon D60、Pentax K20D/K200D、Sony Alpha 200/300/350 等,嘛增加佇 Mac OS X 10.5 印表機驅動程式相容性)以外,主要是修正 1.4 版的問題(親像會共 EXIF 的日期資料讀歹去、Olympus JPEG 無正確的色彩偏差、處理過的 DNG 無法度佇 Photoshop 用 Camera RAW 4.4 拍開處理……等一寡問題)。另外,Adobe 嘛鬥陣推出了 Camera RAW 4.4.1,對客戶總算有了交代。

掠落 Adobe Photoshop Lightroom 1.4.1:
掠落 Adobe DNG Converter and Camera RAW 4.4.1:

2008年4月11日

iPhone SDK 暗示 3G 的支援將欲實現?

(頂圖:新一代的 iPhone 採用英飛凌的 S-GOLD3?)

來自 PC World 的報導,ZiPhone(iPhone 解鎖軟體)的作者講著,怹對破解 iPhone 上新測試版韌體佮 iPhone SDK beta 的資料看來,傳聞中的 iPhone 3G 支援有可能會實現。

ZiPhone 公布一部分上新版 iPhone 韌體的資料(請參考頂圖),應該是「確定」有支援英飛凌 (Infineon Technologies AG) 的 S-GOLD3 晶片組,這是英飛凌支援 EDGE 數據機的上新產品,而且伊會當佮 WCDMA 副處理器合作,提供閣較緊的 3G 網路連線速度。

另外,根據英飛凌公布的 S-GOLD3 晶片組規格,支援的相機畫素是 500 萬,若是感覺這陣的 iPhone 相機無夠看的朋友,會使來等待後一代的 3G 款式。

2008年4月9日

HP 承認 USB Floppy Drive Key 佇出貨進前著帶有「蠕蟲」

根據惠普公司 (HP) 幾日前公布的支援文件,怹所出貨的 HP USB Floppy Drive Key 內底摻有歹心的「蠕蟲」,可能會對用戶的電腦資料造成傷害。HP USB Floppy Drive Key 有 256 MB、1 GB 2 款規格,伊是 HP ProLiant 伺服器選購品的「HP 光學第 2 儲存」配件之一,本身是 USB 2.0 隨身碟,但插入去 ProLiant 伺服器頂懸,著會當變做傳統的「軟碟機」來開機使用。

這擺 HP 公布的資料,HP USB Floppy Drive Key 內底摻有 "W32.Fakerecy" 佮 "W32.SillyFDC" 2 款蠕蟲,你的防毒軟體的病毒定義(病毒碼)若已經是上新版,應該攏會使掠著這 2 隻蠕蟲並且來共怹刣掉。但若是你的 HP USB Floppy Drive Key 買來了後攏毋捌做過病毒掃瞄,頂頭這 2 隻蠕蟲就有可能已經侵入任何一台 ProLiant 伺服器所連接的磁碟機內底。HP 建議用戶來做全系統(包括所有磁碟機)的病毒掃瞄

另外對這篇報導看來,出包的廠商並不只 HP 佮怹的 USB Floppy Drive Key 產品而已。Best Buy 所出品的數位相框嘛捌出過仝款問題。所以老刀建議新買來的 3C 商品(親像隨身碟、硬碟機、記憶卡、數位相機等週邊商品),絕對愛做的第一件代誌,著是接去電腦先做一擺病毒掃瞄啊。

2008年4月7日

Pidgin 2.4.1 for Windows 的 GTK+ 漢文問題已經修理好勢

因為老刀這幾日較無閒的關係,到今較有時間來裝已經推出有一禮拜的 Pidgin 2.4.1 for Windows 多用途開講軟體。這版所附的 GTK+ 設定已經有共漢文調整好勢,所以並無發生 Pidgin 2.4.0 所附的 GTK+ 設定佇 AIM/iChat 無法度正常拍漢文的問題(請參考進前這篇報導)。

想欲了解 2.4.1 版新增佮改進的所在,請入來看遮

2008年4月5日

PowerMac G4 CPU 升級卡名廠 GigaDesigns 關店?

來自 Accelerate Your Mac 的報導,PowerMac G4 CPU 升級卡名廠 GigaDesigns 網站(網址: http://www.gigadesigns.com/)佇幾日前毋知影為著啥物原因關掉,到今編輯群寫批去問 GigaDesigns 嘛因為「退批」的關係攏聯絡無成功。

GigaDesigns 是第 1 間推出 PowerMac G4 MDD(Mirror-Drive Door,就是鏡面機啦)專用 CPU 升級卡的廠商。佇舊年 Sonnet Technologies 嘛推出 MDD 專用的 CPU 升級卡進前,GigaDesigns 一直攏是唯一有供應這款升級卡的廠商。佇 Apple 已經改用 Intel 公司的 CPU 了後,毋知影其他出產 PowerMac G3/G4 升級卡的廠商猶會當擋偌久?

2008年4月3日

「教囡仔用台語寫作」教育部 520 進前的最後一擊?

轉貼來自「聯合新聞網」的消息佇遮
「拜託,不是都要下台了,怎麼還不死心」!教育部政策再度震驚家長。許多小學生家長聞言大表反對,認為是加重學生課業負擔,有民眾表示「難道連台語拼音都要補習嗎?」有人則擔心,「華語和英語,是世界語文學習主流,台灣怎麼背道而馳」。更有民眾希望「520之前,政策可以凍結」。但也有部分家長力挺,認為孩子本來就該學習書寫自己的母語。

「喔!拜託,又來了」,這是台北秦小姐初聞閩南語新教育部政策的第一反應。她認為這項政策若通過,將加重小學生和家長的負擔。她表示,家中尚未念小學的孩子都已經在補習英文,預備上小學,現在又來一個「台羅拼音」是要去哪裡補?

她認為,台語應在日常生活中學習,孩子和長輩用台語聊天,阿嬤用台語唸歌,都是很好的學習方式,硬學台羅拼音實在不妥。她希望教育部意識形態辦教育的「臨別秋波」在520之前能暫緩。

民眾林小姐則表示,目前華語和英語是世界主流的語言,她不明白台灣為何背道而馳,加重小學生課業負擔。台語是生活化的語言,重點是活用,強迫用拼音學習書寫,她大表反對。

民眾羅先生則強調「本土意識」不能因政黨輪替而抹滅,閩南語是孩子的母語,本來就應該學習標音書寫。羅先生的孩子已經小學二年級,他表示,若有需要,他會買書回來自己教孩子。

老刀認為教囡仔用台語寫作,本來就是一件好的代誌。當然家長會著驚有怹的理由,老刀嘛會當諒解,但是開喙補習、合喙補習的人攏是這一寡學生家長,完全毋知影怹家己才真正是製造學生壓力的主要來源啊。另外,老刀認為「華語和英語,是世界語文學習主流,台灣怎麼背道而馳」這句話嘛無合理,理由有 2 點:
  1. 教育部只有講欲教學生用台語寫作,並無講欲「廢華語」;華語一直攏是台灣官方所訂的「國語」。
  2. 華語雖然是世界語文的學習主流之一,但真正是主流的是對岸(阿陸仔)所用的「簡體中文」,毋是台灣官方使用的「正(繁)體中文」。
猶閣有一點:彼篇報導無來訪問當事者(學生)的意見,我看「學台語」敢會增加學生負擔猶真歹講。你看香港人用「廣東話」寫作嘛是真普遍,嘛無聽怹咧吵講「學廣東話」會增加學生負擔?記者袂審先判,單方面的報導一點仔攏無公正、客觀矣。

食飯、啉水敢著愛補習?我想答案你我毋免講攏嘛知影。若是啥物代誌攏愛來靠補習解決,這款教育、這款人生是註定愛失敗的,毋知影彼一寡仔學生家長敢有想著這點?毋過老刀嘛認為綠黨按呢做實在有較超過。基本上「推動母語教學」的方向絕對正確,但是佇教育根本問題解決進前,講這實在有欠妥當。按怎解決根本問題?老刀主張「廢補習」(廢除以升高中、大學為目的的補習),而且愛嚴禁教師「課後輔導」,一方面真正減輕學生壓力,嘛袂有「特定科目」教師錢袋仔趁飽飽的無公平、病態現象;予教育回歸基本面了後,再來討論學校欲教啥貨予學生吧!

2008年4月1日

論「傅愛波」之「冰果室再傳喜訊!蔡家新生代六月誕生」

下跤是友站「老地方冰果室」來的新聞
跟大家分享一個轉自網聚活動區的好消息,老地方團隊將在六月增添一個可愛女寶寶!冰果室大老蔡政儒先生是上週五晚間在公園咖啡網聚時與三五好友分享了這個喜訊。

據編輯的了解,由於這是蔡家的第一胎,根據台灣安胎習俗,婦女懷孕前三個月不可張揚,因此年初舉行婚禮時老蔡為了慎重,並沒有跟前來吃喜酒的眾親朋好友們分享這個大好消息。

老蔡也在週五晚間表示,由於他是虔誠的基督徒,為了要「宣揚神愛世人福音,並表彰望女成鳳之意」,他們已經決定要為小朋友取名為愛鳳。蔡夫人的預產期是在六月中,在此我們除了要恭喜老蔡之外,也預祝蔡家得到美麗健康的愛鳳寶寶。

按照冰果室的傳統,逐年 4 月初 1 日(西洋戇人節)冰果室編輯攏會寫一寡驚天動地,但又閣似是而非的笑話(親像舊年這篇「老蔡車輪餅」的故事仝款。尤其 2002 年彼篇「轟動武林、驚動萬教」的中台禪寺事件,因為實在傷過逼真,後來猶流傳去國外共「阿啄仔」騙甲戇戇踅,無法度的中台禪寺只好出面來說明一切),所以這篇「傅愛波」(April Fool) 應該嘛是今年的應景文章。毋閣話講倒轉來,既然老蔡後一胎查某囝欲叫做「愛鳳」(iPhone) ,按呢若生查甫囝來叫做「麥簿」(MacBook) 嘛是袂䆀啊!哈哈。

祝福逐家戇人節快樂!