2008年3月2日

Pidgin 2.4.0 推出


受著真濟朋友(包括老刀在內)愛用的 Pidgin(發音佮 "pigeon" 仝款,是「粉鳥」的意思)網路開講軟體,已經推出了 2.4.0 版。佮較早的版本仝款,新版攏會修正一寡舊版的程式錯誤。毋閣這版佇使用者前端介面嘛做了淡薄仔改變。其中上明顯的所在,應該是佮別人開講的的時陣,若是對方當咧拍字,Pidgin 會出現提示文字;另外拍字區的懸度會以你設定的字型寸尺自動調整(上濟會凍到 4 列懸)。想欲詳細了解新版改變了啥物所在,請入來看怹這篇說明文件

另外有一點請逐家注意:Pidgin 2.4.0 安裝套件內底有附新版的 GTK+ 2.12.8 函式庫。可能是包裝的 GTK+ 參數並無特別針對漢文調整,所以老刀共 Pidgin 2.4.0 安裝好勢了後,使用 AIM 協定(就是 iChat 使用的協定)佮朋友開講會發生無法度出現漢文的情形(使用其他協定如 MSN 的時陣,並無發見仝款的問題)。除非你家己會曉調整 GTK+ 2.12.8 的執行參數,若無老刀建議你使用原來附佇 Pidgin 前一版 (2.3.1) 內底的 GTK+ 2.12.1 就好。也就是講,當你安裝 Pidgin 2.4.0 進行到一半出現下跤這个提示畫面(提醒你升級 GTK+)的時陣:


請選「否」跳過 GTK+ 的安裝步驟。

沒有留言: