2008年3月18日

OpenVanilla 行列輸入法40鍵版

佇 Mac OS X 下跤想欲好好來拍漢字的時陣,真濟人會來推薦 OpenVanilla(開放香草)輸入法框架。OpenVanilla 親像伊的名仝款,是遮爾「開放」(Open),所以包括你我在內的有心人攏會當訂製家己專用的輸入法。尤其當你慣勢使用的輸入法並無予 Mac OS X 支援的時陣,OpenVanilla 應該就是解決你問題上好的方式(Mac OS X 這陣只有支援注音/漢音、倉頡/簡易、大易、拼音輸入法)。

老刀嘛是 OpenVanilla 的愛用者。因為我已經使用十幾冬的行列輸入法並無予 Mac OS X 支援,為著欲予逐家較方便拍漢文,我進前已經製作 OpenVanilla 行列輸入法(30 鍵版)字碼表提供予 OpenVanilla Team 收入發行套件內底。毋過「第一代」的行列輸入法(40 鍵版)並無包佇標準的發行套件,拄好幾工前 OpenVanilla 官方網站討論區內底有人問著這个問題,所以老刀踮遮來做一擺說明。

OpenVanilla 除了包括目前流行、改良過的行列輸入法 30 鍵版以外,其實老刀嘛有替逐家製作 40 鍵版的「第一代」行列輸入法表格,可惜因為 OpenVanilla Team 的疏忽,這个表格並無包括佇選擇安裝的 Extra Pack 內底,所以愛請有需要的朋友家己對遮掠落來,並且共伊拷貝入去:

/資源庫/OpenVanilla/0.8(抑者是 0.7.2,看你的版本而定)/Modules/OVIMGeneric

登出了後閣再登入,你就會當來使用行列輸入法 40 鍵版啊。

有一點愛共逐家說明:這个行列輸入法 40 鍵版收錄的字數只有 big5 範圍(一萬五千字左右),並無包括 unicode 漢文;老刀並無計畫欲改寫表格予伊支援 unicode 漢文,但我歡迎有閒的朋友鬥陣來做這件代誌(完成了後,請通知 OpenVanilla Team 囥入 Extra Pack 予需要的朋友使用)。最後,OpenVanilla 標準套件內底的行列輸入法 30 鍵版有收錄 unicode 3.1 範圍七萬外个漢字,你若是佮老刀仝款愛定定用著 unicode,猶是趕緊來改學 30 鍵版吧!

3 則留言:

鄭凱文 提到...

你好~我是使用行列輸入法的,我的系統是用mac,在win系統時打了一個字後,通常會顯示後面相關的字,例如:打蘋,就會出現果字出來,但是mac版本沒有,不知要如何解決呢?麻煩老刀大...

鄭凱文 提到...

老刀大你好~煩請解答小弟的問題可以嗎?謝謝

老刀 提到...

鄭凱文兄,你好:

你應該是講 Windows XP 的「相關字詞功能」吧?這个功能是 Windows 特有的功能,Mac 頂懸無這个功能(你應該是用 OpenVanilla 吧),實在是無啥通奇怪。

其實老刀感覺:因為「相關字詞功能」需要目睭看字詞去揀字,一定會減慢拍字的速度;所以若是行列拆字誠順,「相關字詞功能」猶是關掉較好(我家已就是按呢做)。