2008年2月29日

佗一版 Mac OS X 上適合你?

蘋果推出的 Mac 型體是遮爾濟款,逐冬規格攏愛翻過幾擺,而且 Mac OS X 推出到今已經到 10.5.x,毋知影啥款型體搭配啥款作業系統較妥當?相信這嘛是真濟 Mac 入門者定定問著的問題。

Low End Mac 的專欄作者 Ian R Campbell 最近就整理這个問題,發表 "What's the Best Version of OS X for My Mac?" 這篇文章,分析了 Mac OS X (10.2-10.5) 佮舊款機種四配的建議,文章雖然有淡薄仔長,但是對 Mac 入門者佮想欲瞭解蘋果公司 PowerPC (G3/G4/G5)、Intel 處理器型體特性的朋友來講,這篇文章應該誠有參考價值。

2008年2月28日

228 和平紀念日,Blogger、Flickr 2 大站「假死」紀念死難同胞

今日是 228 和平紀念日,老刀佇遮為幾十冬來身心受著苦難的同胞表達上真誠的哀悼佮敬意。早時老刀發見 Blogger (blogspot) 佮 Flickr 這 2 个老刀逐日攏必定入去的網站嘛「假死」停止全部抑是一部分功能,敢講「阿啄桑」嘛知影今日是台灣人重要的歷史紀念日?

廢話減講,下跤有圖為證:
Blogger「假死」證明(點頂頭的圖會凍看大張原圖)

Flickr 一部分功能「假死」證明(點頂懸的圖會當看大張原圖)

逐家毋免驚,佇老刀寫這篇文章的時陣,Blogger 已經回復功能(若無,就無法度寫出這篇文章啊),Flickr 猶未回復完整功能。

2008年2月27日

蘋果台灣分公司開始接受 MacBook Air 佮新款 MacBook/MacBook Pro 的訂單

昨日蘋果公司發表新規格的 MacBookMacBook Pro 了後,蘋果台灣分公司的線上商店對今日開始接受新款型體的訂單。另外,MacBook Air 嘛開始接受預訂。

欲知影詳細的情形,請入去怹的線上商店看覓便知分曉。

2008年2月26日

蘋果 MacBook、MacBook Pro 規格升級

幾日前流傳的「謠言」到今終於變做事實,蘋果公司今日真正共 MacBookMacBook Pro 的規格做了更新。老刀認為這个新規格除了 MacBook Pro 採用新款 Penryn 代號的 Core 2 Duo 處理器以外,並無啥物予我感覺趣味的所在,所以就無寫踮遮啊;想欲進一步了解新規格的朋友,會使去蘋果公司網站參考:
老刀顛倒對舊款的庫存出清較有興趣,佇新規格正式引入台灣進前,想欲拼俗買庫存的朋友愛好好啊把握逐間水果店難得落價「拼庫底」的機會啊。

Adobe 正式釋出 AIR 1.0 佮 Flex 3.0 網頁應用軟體開發工具

Adobe 公司佇今日正式推出 Adobe Integrated Runtime (AIR) 1.0。AIR 會當用來整合建立佇 Web 的軟體,予使用者用起來親像是一般的應用軟體仝款。經過 AIR 整合了後的應用軟體會使離線執行(毋免連接網路)、會當共資料錄佇硬碟內底、有家己的程式圖示 (icon),嘛無閣再需要瀏覽器。這陣 AIR 1.0 有適用佇 Windows、Mac 2 款平台使用的版本;根據 CNet 這篇報導,Linux 平台的 AIR 1.0 將佇幾个月後推出,Adobe 嘛計畫欲推出 AIR 的行動裝置版本 。

除了推出 AIR 1.0 以外,Adobe 作伙推出 Flex Builder 3.0 網頁軟體開發工具。若無想欲開錢買 Flex Builder 的程式開發者,嘛會當免費掠開放原始碼版本的 Flex 3.0 SDK 家己開發 Flex 軟體。

2008年2月24日

微軟宣布關於 Office 2008 for Mac 更新佮 XML File Format Converter 正式版的消息

根據 CNet 的報導,微軟日前宣布欲送予 Mac 用戶一个禮物,看你是用啥物版本的 Office for Mac 而定:怹除了將佇 3 月 11 日推出 Office 2008 for Mac 第 1 个更新版本以外,當時嘛宣布會當予 Office 2004 for Mac 使用 Office 2007 for Windows 文件檔案的 XML File Format Converter 正式版本「確定」將欲佇 6 月底進前推出。

若按照微軟本來的計畫,XML File Format Converter 是欲佇「2006 年底抑是 2007 年初」發表,毋閣這个計畫一再拖延,對「Office 2008 for Mac 上市 6-8 禮拜後」到上新講法的「6 月底進前」。佇怹猶袂發表正式版本進前,你會使點遮掠 beta 版本來試用。

2008年2月23日

iPod Shuffle 疑難排除佮維修服務的 FAQ

蘋果公司昨日更新怹 iPod Shuffle 疑難排除佮維修服務的 FAQ 文件,這篇文件針對下跤幾个情況做了說明:
  1. 我的 iPod Shuffle 無回應,抑是無法度開機。
  2. 我的電腦掠袂著 iPod Shuffle。
  3. iPod Shuffle 無法度予我傳輸/放送歌曲。
  4. 耳機的問題。
  5. 我的 iPod Shuffle 需要送修服務。
  6. 蘋果公司 iPod Shuffle 服務條款的連結。
建議有 iPod Shuffle(無論是第 1 代抑是第 2 代)的朋友攏總來參考一下。

2008年2月20日

nVidia 公開 Mac OS X 10.5 版本的 CUDA 規格的工具集 (Toolkit) 佮軟體發展工具 (SDK)

nVidia 最近已經公開怹 Mac OS X 10.5 (Leopard) 版本的 CUDA 1.1 Toolkit 佮 SDK (beta),提供予專業的程式開發者撰寫符合 CUDA 的軟體。

CUDA 全名叫做 "Compute Unified Device Architecture",是 nVidia 根據 GPGPU (General-purpose computing on graphics processing units) 技術所發表的新一代顯示卡規格。簡單來講,就是利用 GPU 的高速運算功能做一寡圖形處理以外的代誌,來減輕中央處理器 (CPU) 執行負擔,並且達到加速應用程式執行速度的目的。這陣 nVidia GeForce 8 系列的高階顯示卡已經有支援 CUDA 的規格。

想欲進一步瞭解 CUDA 的朋友,會使來參考維基百科 (Wikipedia) 的介紹;另外,Heresy' Space 的這篇文章有講著一寡技術性的資料,嘛仝款有參考價值。

蘋果推出 Xsan 2、iPod 落價佮一寡消息

蘋果公司今日有一寡動作:
  • 推出 Xsan 2:這个第 2 代 SAN (Storage Area Network) 產品提供予你閣較簡單使用、高效能企業等級的檔案系統,定價 999 箍米金(新台票 34,900 箍)。
  • 新推出 iPod Shuffle 2GB,定價 69 箍米金;另外 1GB 的型體落價到 49 箍米金(新台票 1,700 箍)。
  • 推出 MacBook/MacBook Pro 鍵盤韌體更新 1.0:修正對睏去的狀況精神起來的時陣,MacBook/MacBook Pro 毋熟似使用者拍入的第 1 个按鍵;安裝這个更新需要 Mac OS X 10.5.2 系統。
  • Xserve RAID 停止出貨 。

2008年2月19日

試用 Just Mobile Bluetune 多用途藍芽無線喇叭

進前老地方冰果室的 Alex Tsai 老蔡佇禮拜五暗時的例行聚會中,拜託老刀試用 Mobis 公司的 Just Mobile 品牌系列產品 Gum(USB 外接電池)佮 Bluetune Solo(藍芽免持聽筒喇叭)了後,最後一項 Just Mobile Bluetune 多用途藍芽無線喇叭產品嘛終於完成所有的功能測試,並且已經共試用心得寫好勢,予這个試用計畫完美結束。

老刀經過一個月的試用,發見 Bluetune 的無線藍芽功能會當予生活帶來較早毋捌想過的便利:出外的時陣,除了會使共 Bluetune 囥佇車內當做免持聽筒使用以外,嘛會當幫助筆電、 PDA 做為聲音輸出;佇厝內嘛會當隔著房間,四界欣賞利用電腦放送美妙的音樂,所以老刀特別撰文推薦,歡迎有興趣的朋友來參考看覓。

按照慣例,這篇文章已經刊登佇下跤幾个所在:最後,嘛歡迎你點下跤的「商品測試」標籤來看老刀試用其他商品的心得報告。

2008年2月15日

32GB SDHC 記憶卡將佇 4 月問世

自從日本松下 (Matsushita/Panasonic)、東芝 (Toshiba) 佮 SanDisk 制訂 SD 記憶卡規格以來,因為體積是薄薄仔一片,加上使用方便的關係,無偌久就取代 Compact Flash (CF) 記憶卡的角色,變做是消費性電子商品的主流記憶卡。

根據 CNet 的消息,Panasonic 準備欲佇今年 4 月推出速度達到 20 MB/s 的新一代 32GB SDHC Class 6 記憶卡,訂價 700 箍米金。另外 SanDisk 嘛準備佇今年 4 月推出速度較慢小可 (15 MB/s) 的 32GB SDHC 記憶卡,但是定價只有 350 箍米金。有需要的朋友,會使考慮買來用啊。

2008年2月13日

微軟推出 Office 2004 11.4.0 更新

雖然微軟公司已經推出 Office 2008 for Mac,但聽講內底的 Powerpoint 2008 有中文相容性的問題,所以老刀就無升級啊。你若是佮老刀仝款猶咧用 Office 2004 for Mac,建議來去微軟公司的 Mactopia 網站掠 Office 2004 11.4.0 更新套件,這个物件修正一寡可能會予你的電腦受著駭客攻擊的程式弱點。

蘋果推出 Apple TV 更新、Aperture 2.0、iLife Support 8.2

蘋果公司繼續昨日推出 Mac OS X 10.5.2 更新的氣勢,佇今日推出 Apple TV 軟體更新iLife Support 8.2 佮數位影像後製軟體 Aperture 2.0。重點寫佇下跤:
  • 新版 Apple TV 軟體更新包括:新的租片服務、線上商店、用大螢幕觀看 Flickr 佮 .Mac 網路相簿。Apple TV 用戶會當選擇予 Apple TV 自動更新,抑是家己動手升級。
  • iLife Support 8.2 更新了 iLife ’08 應用程式的元件,增加怹軟體效能佮穩定性。
  • Aperture 2.0 除了增加百外項新功能以外,嘛有新台票 6,900 箍的新定價(舊的 1.5 版定價新台票 9,900 箍),舊版升級價是新台票 3,500 箍。即日起會使佇蘋果台灣分公司的線上商店購買,2-4 工作日交貨。

2008年2月12日

蘋果推出 Mac OS X 10.5.2 佮一寡更新套件

蘋果公司今日推出了 Mac OS X 10.5.2Mac OS X Server 10.5.2 的系統更新,另外嘛推出 Leopard Graphics Update 1.0 佮適合佇舊版 10.4.11 系統使用的安全性更新 (Security Update 2008-001) 套件(分別有適合 PowerPCIntel 2 款處理器使用的版本,請注意愛掠予著)。

佮較早無仝的所在是,這擺蘋果公司 Mac OS X 10.5.2 更新說明的技術支援文件有推出漢文版,真正是體貼所有華人使用者的做法,老刀認為愛記 1 支大功予蘋果公司(因為我就免閣再翻譯啊)。有興趣的朋友,請參考下跤的連結:
另外,蘋果公司嘛建議所有使用 Mac OS X 10.5 (Lepoard) 的用戶進行更新 Leopard Graphics Update 1.0,但是怹並無講著這个更新套件的詳細說明,所以我嘛毋知這个更新套件有變更著啥物所在?你更新了後若有發見佗位無仝款,歡迎留字來予老刀知影。(2/18 補充:根據 LowEndMac 的報導,Leopard Graphics Update 1.0 更新了 AltivecDVDDriver、IntelGMA 驅動程式、ATI 驅動程式、GeForce 佮 NVDANV 驅動程式,猶閣有提供一个全新的 OpenGL 框架)

2008年2月11日

強迫 Pidgin for Windows 顯示漢文介面的方法

Pidgin(發音佮 "pigeon" 仝款,是「粉鳥」的意思)是一个佇 Windows 抑是 Linux 下跤支援 AIM/iChat/ICQ、MSN、Yahoo Messenger、Google Talk、IRC、QQ 佮一寡通訊協定的網路開講軟體。你若是有真濟款開講帳號,毋免拍開一堆開講軟體,只愛開一个 Pidgin 視窗就會當做所有的代誌。因為 Pidgin 功能是遮爾強大,所以有人利用 Pidgin 的 purple 函式庫另外踮 Mac OS X 平台開發了 Adium X;若說 Pigdin 是 Adium X 之父,一點仔攏無過份。

最近好朋友阿鑫共老刀講著 Pidgin 佇 Windows 下跤安裝的時陣出現的介面是「英文版」,毋是伊慣習使用的「漢文版」。雖然 Pidgin 安裝程式會按照 Windows 的語系自動使用仝款的語文介面,但有時陣 Pidgin 會掠無著正確的語系,變做「漢文系統」出現「英文版 Pidgin」的情形。Pidgin FAQ 內底有講著透過 PIDGINLANG 環境變數,家己動手自訂 Pidgin 語系的方法。老刀共方法用圖解說,按呢逐家應該會較好瞭解。
  • 第 1 步:來去「控制台」->「系統」的「進階」標籤下跤,點「環境變數」,親像圖 1。
圖 1 「系統內容」視窗
  • 第 2 步:佇螢幕出現「環境變數」的視窗內底,點「新增」。
圖 2 Windows 的「環境變數」視窗
  • 第 3 步:「變數名稱」拍入 "PIDGINLANG"、變數值拍入 "zh_TW",捏「確定」了後,你會看著 "PIDGINLANG" 已經加入去「使用者變數」內底啊。
圖 3 新增環境變數


圖 4 恭喜你出運啊(大功告成)!

請你重新拍開 Pidgin,漢文介面應該就會走出來啊!

2008年2月7日

祝逐家新春快樂,恭喜發財

這擺老刀欲轉去高雄過年。這幾日可能較無盈更新網頁,年後繼續來為逐家服務。老刀先佇遮祝福逐家新春快樂,恭喜發財啦! :)

2008年2月4日

2/08 老地方冰果室聚會(年初二,高雄)召集令

因為老刀欲轉去高雄舊厝過年的關係,拄好新婚無外久的老地方冰果室「對帳蔡」(Alex Tsai) 頭一擺佮愛妻做伙轉來高雄外家厝(註:婚宴照片佇遮),所以就想欲佇高雄舉辦老地方冰果室網聚的「新春加演場」。訂於 2/08 暗時 8:00 佇高雄火車站二樓的麥當勞開講【更正】地點第 2 擺更正,確定佇:

步道 Strada
高雄市中正二路67號
點遮看地圖


想欲看老刀、老蔡真面目的朋友,歡迎逐家來插會仔鬥陣開講。有意參加的朋友,歡迎來去這个所在留字以便統計人數。若有閣較適合的舉辦地點,更加歡迎留落你的意見。

2008年2月2日

RealPlayer 是「歹心軟體」(Badware) 之宣判

RealPlayer 是 RealNetworks 公司出品,一直受著真濟人愛用的老牌網路影像放送軟體。雖然伊是真受歡迎的軟體,但是昨日 RealPlayer 10.5 佮 11 版竟然出現佇 StopBadware 網頁的「歹心軟體」(Badware) 名單頂懸,真是予人意外啊。

啥物是 "Badware"(歹心軟體)?

"Badware" 用一句話來表示,就是「無尊重使用者選擇,佇電腦內底偷偷做一寡怹毋知影的代誌」的軟體;廣告軟體 (adware)、惡意軟體 (malware)、 間諜軟體 (spyware) 攏是屬於 Badware。

根據 StopBadware 的解說
  • RealPlayer 10.5:因為 RealNetworks 並無通知使用者「若無註冊 RealPlayer 10.5,『訊息中心』(Message Center) 就會送出廣告視窗」這件事實,所以判定是 Badware。
  • RealPlayer 11:並無告知使用者「安裝 RealPlayer 11 的時陣會順紲安裝 Rhapsody Player Engine 佇電腦內底」,而且使用者刣掉 RealPlayer 的時陣,並袂做伙刣掉 Rhapsody Player Engine,而且嘛無提供使用者家己刣掉 Rhapsody Player Engine 的方法,所以判定是 Badware。
想欲進一步瞭解的朋友,歡迎來參考 StopBadware 官方新聞稿佮正式的報告紀錄

對這个事件觀之,做生理愛有道德,尊重消費者、毋當踮消費者後壁做偷來暗去的代誌,就未得著臭名啊!這句話各行各業攏總通用。

老刀註:StopBadware 是由哈佛 (Havard)、牛津 (Oxford) 2 間大學、Google、聯想 (Levono)、PayPal 佮 VeriSign 合資成立的法人組織。

2008年2月1日

華碩 Eee PC 試耍感想

室友的頭家新買一台華碩 Eee PC 4G(701 型,內建 4 GB SSD 硬碟),因為用袂慣勢內底的 Linux 系統,另外想欲利用 Eee PC 網路操盤炒股票,所以需要來重灌 Windows XP。為著欲共室友鬥跤手、做人情予怹頭家,予伊較好做人,所以老刀就親自上陣啊。

這擺老刀使用 Windows XP Home SP2 光碟來重灌系統。因為 Eee PC 並無附光碟機,所以需要透過 USB 另外鬥一台,好佳哉這台 Eee PC 的主人有順紲借光碟機予老刀。重灌的過程佮一般的 PC 攏仝款(開機了後,先揤 F2 入去 BIOS 畫面,指定使用外接光碟機開機),所以老刀就無閣寫出來呀。這篇文章的重點是囥佇試用的心得感想。

這台只有一个手掌大的 Eee PC,相信有真濟朋友已經佇電腦店頭佮大賣場看過。佇 Eee PC 拄推出彼个時陣,看著伊的規格:Intel Celeron M 900MHz、512 MB RAM、3 个 USB 2.0 埠、內建 802.11g 無線網路,特別是 0.92 公斤的「輕量級」,應該會當符合大部分朋友的需要。老刀本來嘛有想欲買一台來耍,但考慮著伊的鍵盤傷小,拍字實在有夠辛苦,所以想欲買一台的熱情就拍無去囉。另外,這台 Eee PC 4G (701) 螢幕是 800*480 解析度,一般拍文書猶會使,但是瀏覽網頁就有淡薄仔艱苦,這是伊的缺點。有想欲買 Eee PC 的朋友,出手進前一定愛想予清楚。


閣有一件重要的代誌:因為這款 701 型只配有 4GB SSD 硬碟,灌好 Windows XP Home SP2 佮進入 Windows Update 完成重大系統更新(無灌其他軟體)了後,只賰 450 MB 空間(請參考頂圖),老刀建議參考 Eee PC 說明書第 4 章來進行「Windows XP 最佳化」的動作(其實就是刣掉一部分 Windows XP 功能啦)。若是「使用 Windows」是你買 Eee PC 的目的,按呢直接買 Eee PC 8G 這个型體應該是上好的選擇。

測試過程的相片,已經囥佇我的 Flickr 相簿,歡迎逐家入來參考看覓。