2008年1月9日

Mac Pro、Xserve 出新規格啊,後一个輪到 Mac mini?

今日蘋果公司更新了 Mac ProXserve 的新規格(蘋果台灣分公司仝日著完成產品網頁漢化更新,速度之緊,應該有拍破較早的紀錄),經過國內外各大網站的報導,相信你已經對新規格有淡薄仔熟似啊,但是這毋是老刀欲介紹的重點,因為這 2 个產品實在傷過高級,已經超出引起老刀興趣的範圍;老刀有興趣的物件,永遠集中佇家己負擔會起的 Mac miniiMacMacBook 身上。

老刀會按呢臆毋是無道理。因為 Mac mini 到今猶咧用 PC 陣營早著退出主流市場的 Intel GMA 950 整合顯示晶片,而且蘋果公司的 MacBook 嘛早就已經升級硬體規格,放棄 GMA 950 改用效能閣卡好的 Intel GMA 3100 顯示晶片。按前一代產品的更新週期,Mac mini 是上後一个規格更新的產品,既然其他產品(包括 MacBook/MacBook Pro、iMac、Mac Pro)攏已經規格升級,後禮拜的 MacWorld Expo 輪到 Mac mini 發表升級規格,看起來嘛是理所當然。今日蘋果佇怹的支援網頁推出 Mac Pro、Mac mini 新手指南網頁,按呢看起來,Mac mini 更新規格應該是真有可能的代誌啊。

話講倒轉來,敢若發表 Mac mini 一款入門級的產品,實在無符合蘋果公司逐擺佇 MacWorld Expo 攏有震憾人心舉動的慣例,所以老刀推測應該有別款新產品會鬥陣發表,到底蘋果公司會發表啥物,幾日後便知分曉。

【老刀事後補充:結果蘋果公司佇會場推出的新產品是 MacBook Air,無出新款的 Mac mini 真是予我失望】

2 則留言:

Marcus 提到...

我本來有興趣買這代的Mac Mini
看完刀哥的講解
感覺勿是等一段時間等使用Intel GMA X3100 繪圖顯示晶片
的新一代Mac Mini
就是歸去買iMac
以上
感謝刀哥的講解

老刀 提到...

其實我的意見佮你仝款。我嘛是對新款的「阿露米 iMac」較有興趣講……