2008年1月12日

歇禮拜,來聽歌:老刀精選 (6) - "Shandi" by KISS

進前老刀介紹了一寡經典歌曲了後,有人問過老刀:「你上佮意的團體是啥物?」我的回答一定無第 2 句話,絕對是 "Kiss"。然也,Kiss 永遠是老刀的最愛!

Kiss 予人印象上深的所在,永遠是 4 个大貓仔面(其實彼 4 款化粧攏有怹特殊的稱號)。佇 1970s 彼个年代,Kiss 的歌詞作品內容實在傷過創新,加上 Kiss 的舞台表演嘛是一絕:規場水霧、噴火、吐血的場面,創新前衛的程度予怹絕對是受著青少年囡仔歡迎、予家長上頭殼痛的對象啊,呵呵。1999 年 1 齣叫做 "Detroit Rock City" 的電影(佇台灣出版的片名叫做「搖滾新世代」),就是描寫 1978 年有 4 个高中生為著欲去看 Kiss 佇 Detroit 舉辦的演唱會,使用種種手段,終於達著心願的故事(Kiss 本尊嘛有參加電影演出)。

佇音樂頂懸,Kiss 是以 Gene Simmons(主唱兼貝斯吉他)佮 Paul Stanley(主唱兼節奏吉他)為中心的團體,閣加上 Ace Frehley(主奏吉他)、Peter Criss(鼓)這 2 个黃金陣容,以重搖滾為中心,創造了 1970s 的黃金時代;甚至佇 1978 年 9 月,Kiss 創下空前絕後的紀錄:怹 4 个人發表個人專輯作伙出片,1 擺 4 塊專輯予樂迷聽甲爽!(名義上是個人專輯,但唱片封面有拍 Kiss logo 佇頂頭,所以逐家仝款認定彼 4 片是 Kiss 的作品)

可惜 1980s 早期因為團員的意見袂合,紲來引起 Criss、Frehley 離開。這 2 人留落來个位置一直無法度固定,嘛予 Kiss 經過誠濟年的起起落落,包括 1983 年開始洗掉厚粧(以素面面對世間),但是表現一直不盡如人意;雖然中間嘛不乏成功的作品,但已經無法度重現親像 1970s 彼款的大成功。一直到 1995 年的 MTV unplugged 表演後段,Kiss 送予所有支持樂迷一个大禮:邀請 Criss、Frehley 倒轉來客串演出引起熱烈迴響,終於 1996 年正式宣布 2 人重新入團,再造 Kiss 的盛況。當然,十外冬無看著的貓仔面化粧又閣重出江湖啊。重新以原始陣容出發的 Kiss 連紲得著真濟獎佮特殊的光榮(親像進入「搖滾名人堂」、佇 2002 年冬季奧運會閉幕時獻唱等),一直到 2003 年 Frehley 為著抗議 Kiss 佮 Aerosmith 巡迴演唱的時陣,替 Aerosmith 暖場開唱,主動宣布離開(Aerosmith 猶未出名的時陣捌替 Kiss 暖場過)、2004 年 Kiss 佮 Peter Criss 約滿,無閣再繼續合約為止。想欲進一步瞭解 Kiss 故事的朋友,會當來看 Wikipedia 的介紹

這擺老刀欲介紹選自 1980 年專輯 Unmasked 的 "Shandi" 這條歌予逐家。這塊專輯佇逐家團員意見袂合的當時發表,Peter Criss 雖然猶是專輯掛名的鼓手,但實際上伊並無參與錄音,專輯內底全部歌曲拍鼓的部分攏是 Anton Fig 代勞。"Shandi" 是 Kiss 彼个年代誠少見著的小品之作,以搖滾主體加入小可仔當時流行的 disco 旋律,雖然 Kiss 的「基本教義派」認為這調歌拍歹 Kiss 一貫的傳統,但老刀認為這條歌猶是真讚啦!

另外,雖然 Simmons、Stanley、Criss、Frehley 4 个團員攏總佇這條歌的 MV 出現,但是 Unmasked 收錄這條歌的錄音室版本,實際上只有 Paul Stanley(吉他)1 人是正港 Kiss 的陣容(樂手包括:鼓手 Anton Fig、貝斯手 Tom Harper,猶閣有名氣誠大、寫過真濟名曲的專業作曲者 Holly Knight 擔任鍵盤手)。這條歌佇米國並無大賣,顛倒佇澳洲、紐西蘭佮歐洲幾个國家攏是前十名的流行歌曲。

MV 佇遮,老刀敬請逐家來欣賞:

沒有留言: