2008年1月21日

1/20 老地方冰果室台灣分壇大喜,Alex Tsai 告別羅漢跤仔

猶會記得舊 (2007) 年 4 月 26 日,老地方冰果室台灣分壇壇主之一的 Alex Tsai 共女朋友 Wendy 求婚成功(請參考這篇報導),請眾冰果室友佇 Le Park Cafe 灌黑啤嚕啉予爽快,敢若無偌久進前才發生的代誌。時間過了真緊,這件好事總算開花結果,老刀總算會使啉著甜蜜的喜酒。

既然冰果室眾朋友逐家難得鬥陣見證老蔡怹 2 人的喜事,所以當然愛鬧熱一下;這擺應該是老刀目前為止拄著上濟台單眼數位相機齊發的婚禮,冰果室眾朋友實在真有人情味啊!

這擺冰果室眾來賓內底,有 2 个對國外來的貴客:冰果室總壇壇主白萊恩(對米國轉來)、另外 1 位是新加坡來的思慶兄,拄好怹佮老刀坐仝桌,所以會當留落相片做見證。其他閣有老木村、阿清做伴郎,怪醫、老恩、詹姆士、燦哥、五樣、Bianca、超哥、Jerry.、Maxx、進藤光、Le Park Cafe 的鄧老闆,猶閣有一寡無寫著名的好朋友前來鬥鬧熱,予 2 位新人上深的祝福。

老刀特別精選一寡剪影,貼佇下跤:

新郎、新娘用鎖頭互相鎖定後半世人

眾人相機伺候

分送五彩雞胿予眾親友

想欲看其他精彩相片嗎?歡迎入來我的 flickr 相簿(有 97 張)。

沒有留言: