2008年12月27日

12/26 老地方冰果室聚會報導

老刀誠久無來共逐家報導老地方冰果室逐禮拜五暗時的例行聚會矣。這擺聚會因為老蔡 (Alex Tsai) 進前就宣布講,除了 3Dconnexion 特別展示高級𨑨迌物仔 SpacePilotSpaceExplorer 以外,嘛有紀念品的抽獎(可惜老刀傷早離開,無參加著抽獎活動),結果一寡久久出現一擺的朋友紲攏總出來參加,這暗實在有夠鬧熱矣。

另外,浮爺 (Faust) 傳說中的愛機 Canon EOS 5D Mark II 嘛終於紮出來矣。老刀佇現場用伊試翕幾張相,5D Mark II 夯踮手頭的感覺誠讚,佇 Le Park 這款攏是電火球的環境內底翕相,色緻實在有夠媠,果然有 Canon 新一代翕相機之王的範勢。

相關的影像佮文字紀錄,攏囥佇:

我的 flick 相簿(攏總 28 張相片)
較早所翕的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

有關蘋果公司產品的調查,需要你來協助完成

朋友沈堯鈞先生佮老刀仝款,攏是對 Mac Plus 開始到今,20 幾冬來一直咧使用蘋果電腦的老用戶。今日老刀佮沈先生開講,才知影伊為著拍拚提在職學分,當咧設計一份關於蘋果公司產品的用戶調查。為著欲幫助伊早日學成出業,老刀推荐有咧使用蘋果公司產品(包括 Mac 電腦iPhoneiPod 佮蘋果公司出產的軟體)的朋友,攏歡迎來揤下跤這个連結:

添落你的意見

2008年12月25日

來更新 Pidgin 2.5.3 開講軟體吧!

Pidgin 這个老刀佇 Windows 佮 Linux 下跤一定愛開的開講軟體,佇前幾工已經推出 2.5.3 版矣。新版修正的所在誠濟,想欲知影 2.5.3 版改進了佗位,請入來參觀這个所在

【1/4 更新】用了 Pidgin 2.5.3 幾工落來,發見 Windows 版 Pidgin 佇結束的時陣有當掉的問題(會使共 Pidgin 強制結束)。想欲解決這个問題,請佇頭前的連結掠新版的 libpurple.dll 轉來,拷貝入去 C:\Program Files\Pidgin 就會使矣

2008年12月21日

Adobe 予 64 位元 Linux (x86_64) 專用的 Flash Player plugin(官版更新)

因為老刀這幾工咧無閒作穡,這篇無講蓋新的「新聞」貼了有較晏。毋過對猶毋知影這个消息的朋友來講,嘛誠有參考的價值。

Adobe 自從頂個月推出第一个代號叫做 "Astro"(太空人)、Linux (x86_64) 平台專用的 Flash Player 10 (alpha) 了後,頂禮拜 (12/16) 閣再推出更新;新的 alpha 版本號碼是 10.0.21.1。有咧使用 64 位元版本 Linux 的朋友,老刀推薦你趕緊去 Adobe 的下載網頁掠來鬥。

根據老刀家己這幾工來佇 Fedora 10 (x86_64) 下跤使用官版 Flash Player 的結果,現此時並無拄著大問題。只是看 Flash 網頁的時陣有小可仔㧎㧎。毋過利用系統更新 (System Update) 共新版顯示卡驅動程式灌入來了後,㧎㧎的問題就無去矣。以前佇 x86_64 平台看 YouTube 網頁問題袂少,這擺用新的官版 Flash Player 來看 YouTube 網頁,一切攏誠順序矣。

最後來共逐家提醒一下。因為 Fedora 10 佇預裝的時陣已經有灌入 nspluginwrapper,雖然 nspluginwrapper 佮官版 64 位元 Flash Player 會當做伙存在,但是根據 Adobe 的版本公告 (Release Note) 的講法,nspluginwrapper 有可能會造成 Flash Player 效能降低、袂穩定,佮功能無正常的問題。所以建議欲灌 Flash Player 進前,上好先共 nspluginwrapper 刣掉較好。

2008年12月20日

新單元:較早寫的創作/評論

熟識老刀的朋友差不多攏知影,老刀𨑨迌電腦的歷史已經真久矣。這幾冬內底老刀寫的物件,自從早期推廣用 mIRCircle 這款 IRC 軟體來開講(佇 MSN、iChat、Yahoo 等一寡即時通訊軟體 (Instant Messengers) 猶袂出世的時陣,用 IRC 佮網友開講,是值得共身邊朋友展風神的代誌)、用 MAME/MacMAME 模擬器來「拍電動」,到前一站仔替老地方冰果室寫 3C 商品的試用文,雖然無講誠濟篇,嘛算是共家己的創作做一个完整收藏。

有興趣的朋友,歡迎來去本站正手爿的「較早寫的創作/評論」專區欣賞。但是有一點請特別注意:有幾篇較早寫佇 OIKOS 生活網的文章,因為網頁並無設定文字編碼,所以若拄著有「規篇文章攏全亂碼」的時陣,愛會記得共瀏覽器的文字編碼設定做「正(繁)體中文 (Big5)」。

2008年12月19日

想欲知影你的迷你筆電 (netbook) 灌 Mac OS X 的結果?

自從華碩 (Asus) 的 Eee PC 推出了後,去買一台迷你筆電 (netbook) 紮佇身軀邊,變做是時行的代誌。想欲知影你的迷你電筆灌 Mac OS X 了後,網路卡(有線、無線)、USB、音效、藍芽敢有支援嗎?今日 Gadget Lab 這篇文章,應該會當予你決定是毋是欲「偷偷仔」灌 Mac OS X 佇內底的參考。

Gadget Lab 已經共現此時大賣的幾个主力機種,包括微星 (MSI)、戴爾 (Dell)、華碩 (Asus/Eee)、惠普 (HP)、三星 (Samsung)、宏碁 (Acer/Aspire)、聯想 (Lenovo)、技嘉 (Gigabyte) 相關產品做了試驗(可惜並無包括老刀佮意的明碁 Benq),對想欲灌 OSX86 的朋友,是一篇值得參考的好物矣。

2008年12月13日

OpenVanilla 0.9 for Mac OS X 徵求測試者

轉貼一篇佮 OpenVanilla 新版有關係的「舊」消息(原文佇遮):
Hi,
經過快一年的休息,我們最近又重新啟動了 OV 0.9 的相關工作。我們現在想徵求幾位測試者,來試試看現在的 OV 0.9 code 是否能正常使用。
有幾個要先說明的地方是:

1. 測試是以目前放在 branches/0.9-Oranje 的 code 為主
2. 目前 0.9 的 code 只有 0.8 的輸入法部分,沒有簡繁轉換 filter、沒有相關字詞功能
3. 沒有localization
4. Config 需要用手動設定
5. 沒有安裝包,需要手動 copy 至相關位置

我們目前預計測試的幾個模組包括了傳統注音、行列、藏文、Esperanto、Unicode等數種。泛用跟POJ兩者可能會排稍晚才進入0.9的build system中。

如果有意願的朋友,請跟我們聯絡。我的 email 是 lukhnos {在} gmail {點} com

Thanks!

d.
有興趣的朋友,歡迎來去共 OpenVanilla Team 的主持人 lukhnos 報名。

這幾工因為咧拍拚工課的代誌(時機歹歹,拚經濟較要緊啦),所以一禮拜攏無貼出新的消息,真是歹勢。

2008年12月4日

Google Earth 予 Mac 專用的瀏覽器外掛程式 (plugin) 已經推出矣!

愛用 Google Earth 的 Mac 用戶請看遮來!今仔日 Google 已經推出外掛程式 (plugin),予你佇瀏覽器內底會當使用 Google Earth。毋過掠落這个 plugin 竟然愛 47MB 的空間!根據 Google 的講法,是因為這个外掛程式支援 PowerPC/Intel 二款處理器的 Universal Binary 格式的關係。

這馬 Google Earth 外掛程式支援瀏覽器的上低要求是:

  • Windows 2000/XP/Vista:Internet Explorer 6、Firefox 2.0、Flock 1.0
  • Mac OS X:Safari 3.0、Firefox 3.0

2008年12月2日

Fedora 10 試用心得(2):使用 gcin 拍漢字

佇頂一篇文章,老刀講著 Fedora 10 內底無法度使用 gcin 的問題,這陣已經有解藥:拍開 /etc/X11/xinit/xinput.d/gcin.conf,增加一逝 DISABLE_IMSETTINGS=yes 就萬事 OK 矣;請佇 console 內底用 root 帳號登入去 Fedora 10 了後,家己用 vi 去改 gcin.conf 就好。

為著系統安全的因素,Fedora 10 已經無閣再支援用 root 登入 GNOME(Linux 的圖形介面)矣。若想欲佇 GNOME 下跤操作的朋友,請使用下跤的步數:

  1. 共 /etc/X11/xinit/xinput.d/gcin.conf 拷貝一份去「家目錄」(home directory)。
  2. 利用「應用程式」->「附屬應用程式」->「文字編輯器」(也就是 gedit)編輯這份 gcin.conf,佇上尾加一逝 DISABLE_IMSETTINGS=yes 了後,選儲存檔案。
  3. 拍開「應用程式」->「系統工具」->「終端機」,佇內底拍入下跤的指令(請注意字母大、小寫):
    su
    【拍入你的 root 密碼】
    cp gcin.conf /etc/X11/xinit/xinput.d/gcin.conf
    exit

  4. 關掉「終端機」、登出系統了後閣再登入,你應該就會當正常使用 gcin 矣。
雖然家己「加工」是有小可仔麻煩,毋過佇 Fedora 專用的 gcin 套件猶未更新進前,這是你唯一的解決方法。

2008年11月30日

2008 年資訊月展覽—台北場

一年一擺的資訊月展覽又閣開始矣。這擺因為老刀有想欲進一台 Benq Joybook Lite U101 當做出外寫文章、部落格的工具,特別去 Benq 的擔仔試耍,感覺誠滿意矣。雖然展覽期間有特價,毋閣老刀應該是等舊曆年進前分著「消費券」了後才來出手。

【2009/2/15 補充:最後是決定買 HP mini 2140 迷你筆電】

當然啦,老刀佮舊年仝款猶原嘛紮著翕相機去翕一寡媠姑娘仔來予逐家欣賞。這擺所翕的「戰果」攏囥佇 Flickr 相簿內底,所用的設備是對高雄的阿兄遐提來的 Fujifilm S5 Pro,因為是第一擺使用這隻翕相機(毋是老刀用慣勢的 Nikon D70s),若是翕了無好,敬請包涵矣。

想欲參觀老刀較早所翕的媠姑娘仔,請入來遮

2008年11月29日

Fedora 10 試用心得(1):輸入法

老刀掠轉來新出的 Fedora 10 (x86_64) 了後,昨暗已經共伊灌好勢。一寡新功能猶袂赴試,顛倒是發見了漢文輸入的部分有嚴重的問題:只會當支援 SCIM 一款輸入法環境;雖然共 gcin 灌入去,毋閣猶原無法度使用。

看 Fedora 10 的版本公告提著,怹另外有附 ibus 輸入法環境,而且有可能會佇後一版 (Fedora 11) 共 ibus 列入輸入法環境的正選(也就是講,終於欲共歹用的 SCIM 講再會矣)。我稍等來試裝 ibus 看覓,再來共逐家報告。

【12/3 補充:雖然 ibus 會當佇「系統」->「管理」->"Add/Remove Software" 家己灌入。可惜現此時伊並無支援老刀定定愛用的行列輸入法,只好作罷。】

2008年11月27日

Fedora 10 正式開火 (Fire it up)!

Fedora 是老刀除了 Windows、Mac OS X 以外,另外一个定定愛用的系統。今日代號叫做 "Cambridge" 的 Fedora 10 已經正式推出,因為 Fedora 官網這擺有推出版本公告 (Release Note) 的漢文翻譯,所以老刀就無閣再貼出來矣。有興趣的朋友,歡迎家己過去讀看覓便知分曉。

Fedora 10 除了傳統 i386、x86_64、PowerPC 版本以外,這擺特別增加支援 ia64 佮 sparc,總共有 5 个硬體平台的版本,你會當對遮掠轉去用。現此時老刀當咧共 Fedora 10 x86_64 的 .iso 掠轉來,敬請等待老刀第一手的安裝佮使用的心得。

2008年11月23日

gcin 行列輸入法再修正 (v0.21)

進前老刀製作專予 gcin 使用、支援 Unicode 3.1 字集的行列輸入法(請參考較早這篇「gcin 專用的行列輸入法,已經有支援 Unicode 3.1 字集的版本」),毋過共字鍵統一改用英文字母小寫的關係,老刀並無注意著聰明甲「傷過家婆」的 gedit,嘛順紲共大寫羅馬數字變小寫啊!這陣老刀已經共這个問題修正好勢(修正版本是 0.21);另外,配合 gcin 官方檔案號名的慣例,老刀共這个修正版改名做 ar30-big。重新更新佇遮:
若有造成你無方便,老刀佇遮共你說一聲失禮。

2008年11月22日

1895:洪同學,加油!

電影 "1895" 描寫 1985 年清日(甲午)戰後,台灣先民組織義軍,反抗接收台灣的日本兵的故事。演出以來受著逐家重視佮呵咾的程度,應該是今 (2008) 年台灣除了「海角七號」以外,另外一齣台灣奇蹟。前幾工老刀佇電視看著電影 "1895" 導演洪智育先生的專訪,看了後真是又驚又喜矣。下跤這張相片(原圖佇電影 1985 官方部落格,網址是 http://f10.wretch.yimg.com/themovie1895/17/1945234600.jpg)徛佇上正手爿彼位洪導演,竟然是老刀高中時陣隔壁班的同學,嘛是鬥陣參加「翕相社」的社友矣!
1895:洪同學,加油!

老刀共手頭高中時陣所翕的相片提出來整理一下,下跤這張 1983 年雄中翕相社的全體社友合影,前排倒手爿第 2 个、徛踮老師身驅邊彼个少年洪同學,就是現此時的洪導演啦!

雄中攝影社-1983

真濟朋友知影老刀使用 Nikon 單眼數位翕相機 (DSLR),毋閣老刀拄學翕相所用的翕相機是老爸的 Canon FTb:毋但大台,重量嘛是一流矣。看著洪同學手中彼台輕巧的 Nikon FM2,心內實在誠欣羨矣,嘛對 Nikon 這个牌子留落好印象。老刀讀大學的時陣,利用打工所趁的所費買著這世人第一台翕相機,就是選擇 Nikon FM2。從此變做 Nikon 的奴才,講起來嘛佮洪導演有淡薄仔關係矣,哈哈!

老刀用這篇文章來祝福堅持理想翕相的洪同學,佇 1985 電影成功進前,伊應該嘛是食著真濟苦;話講倒轉來,老刀當時放棄「共翕相當做飯碗」的理想,結果只有出外騎自轉車的時陣才來烏白翕一寡有的無的,恬恬仔共翕相當做興趣就心滿意足矣!

PS. 少年時陣的老刀是佗一个?呵呵,留予你家己臆,當做功課矣!

OSX_LAMZEV.A 歹心程式侵入,Mac 用戶請注意!

根據趨勢科技 (Trend Micro) 公司這篇報導,有一个號名做 OSX_LAMZEV.A 的歹心程式有可能會行入你 Mac OS X 的後壁門,侵入你的 Mac 內底。

當執行這个歹心程式的時陣,伊會請你選一个應用程式(也就是「感染的目標」)佮 1024 以上的通訊埠號碼 (port number) 了後,就會家己產生 /tmp/com.apple.DockSettings 並且拷貝入去 ~/Library/LaunchAgents 內底,以後逐擺「中標」的 Mac 一開機,OSX_LAMZEV.A 就會當踮 Mac OS X 後壁執行。這个歹心程式提供予歹人入侵你的 Mac 的機會,當你拍入較敏感資料的時陣(親像入去購物網站拍入帳號、密碼、甚至是信用卡號碼等),歹人就會當偷提你所拍入的資料,真是後果慘重矣。

趨勢科技公司提供的 Smart Protection Network 服務,這馬已經會當掠著 OSX_LAMZEV.A 並且共伊刣掉。

2008年11月21日

iTunes 8.0.2 更新

這个老刀逐日一定愛開的「聽歌」軟體,今日推出新版矣。修正了下跤的問題:
  • 一寡電腦頂頭製作 MP3 檔案音質較差。
  • 利用代理伺服器 (proxy server) 連接 iTunes 網路商店傳輸穩定性的問題。
  • 改善 VoiceOver 的支援。
緊利用你的 Apple Software Update 抑是家己去蘋果公司的 iTunes 網頁掠轉來升級吧。

2008年11月20日

「臺灣閩南語我嘛會」網站教你學台語哦!

「臺灣閩南語我嘛會」原本是教育部電子報內底教逐家學習台語的單元,今仔日教育部國語會共這个單元單獨建立網站掛踮遮。毋但解說定定會用著的台語用辭爾爾,上讚的所在是提供真人放送(發聲)的功能。可惜老刀試驗了後發見愛使用 Internet Explorer 才有法度真人放送;親像老刀這款用 Firefox 慣勢的人,欲叫我用 Internet Explorer 真是一件袂慣勢的代誌矣【11/29補充:教育部已經共這个問題修理好勢,請參考教育部的公告

下跤是教育部的說明
為協助一般民眾對臺灣閩南語發音及臺羅拼音的掌握,教育部特別規劃了「臺灣閩南語我嘛會線上有聲功能網」(網址為http://guamae.moe.gov.tw),希望藉由線上發音之輔助,使一般大眾能更輕鬆、更有效地學習臺灣閩南語。
教育部電子報專欄《臺灣閩南語我嘛會》自95年11月16日起開始刊登,主要以淺顯易懂之撰寫方式,每週介紹5個閩南語詞彙供民眾學習。本學習網頁即以 80期電子報為資料庫內容,除了詞目、例句輔有線上發音外,亦規劃設計「電子報期數」、「筆畫」及「條件檢索(輸入臺羅拼音、漢字、華語詞)」等功能,期望能提供民眾更有效、便捷的學習資源。
目前該網頁已置放於教育部國語會網站,未來將陸續增加音檔的建置與資料庫的擴充,歡迎各界踴躍利用與指教!
教育部嘛已經佇老刀較早捌介紹過的「臺灣閩南語常用詞辭典-意見回饋」討論版內底建立專屬的「臺灣閩南語我嘛會」討論區,有任何建議佮問題,歡迎去留落你的意見。

2008年11月18日

舊印表機的新救星:Gutenprint 5.2.2 更新推出

Gutenprint(較早捌叫做 Gimp-Print)這个佇 Linux 佮 Mac OS X 內底支援超過 1,300 種印表機的驅動程式集合,最近已經推出 5.2.2 更新矣。對一寡無予製造廠商直接支援(大部分的)舊式印表機來講,Gutenprint 會當講是唯一的救星(想欲進一步了解的朋友,歡迎來參考老刀進前這篇「Mac OS X 10.5 內建支援的印表機表列」)。另外,Gutenprint 嘛有推出一个 Mac 用戶專用的網頁

想欲了解 Gutenprint 敢有支援你的印表機,會當來遮看覓

這擺 Gutenprint 終於放棄了對 Mac OS X 10.2 的支援;雖然新版本 5.2.2 版只有支援 Mac OS X 10.3~10.5,毋閣現此時 10.2 應該是無啥人咧使用啊。最後,這个新版修正對一寡 Epson 印表機佮多功能事務機的支援,另外嘛增加義大利文的操作介面。

2008年11月17日

gcin 已經正式收入支援 Unicode 3.1 的行列輸入法

進前老刀共上新、支援 Unicode 3.1 的行列輸入法表改編予 gcin 專用了後,幾工前 gcin 團隊已經共這个版本收入官方版。下跤是來自 gcin 官方網站的消息

gcin 即日起內建行列輸入法大字集


這是由廖明德先生(行列輸入法發明人兼現任維護者)提供的最新版本。

gcin 1.4.3.pre9 以上版本內建 ar30-big.cin / ar30-big.gtab

預設不啟用,若想使用請執行下列命令:
sed "s/ar30.gtab/ar30-big.gtab/" /usr/share/gcin/table/gtab.list > $HOME/.gcin/gtab.list

行列輸入法的詳細更新資訊請參考:

2008年11月16日

11/15 自轉車遊淡水

中晝接室友下班,作伙食一頓了後,想講前幾工台北一直落雨關踮厝內,難得天氣變好,就決心招室友順基隆河邊的自轉車道,對汐止騎車去淡水看日頭落山。可惜因為老刀 2 人佇關渡宮歇睏傷久,到淡水的時陣日頭已經落去矣,毋閣嘛是 2 人作伙踮碼頭食半斤煠小卷佮 20 箍新台票的超大支霜淇淋,共家己鼓勵一下。

這擺因為大部分的時間攏咧趕路,所以沿途無翕傷濟相片。老刀按照慣例,共相片攏總囥佇遮相簿內底,歡迎逐家來去參觀指教。

2008年11月14日

瀏覽器更新:Firefox 3.0.4、Safari 3.2

Firefox、Safari 這 2 个主流的瀏覽器,相接推出更新,主要是修正了一寡安全性的問題。建議有咧使用的朋友趕緊去掠轉來升級。

有關這 2 个瀏覽器新版改變了啥物,請參考:

2008年11月10日

MacBook 螢幕家己換

螢幕歹去的 MacBook(原圖佇 MacBook.fr

蘋果電腦雖然是媠閣好用,毋閣萬一有零件歹去的時陣,毋但愛等足濟工(因為原廠零件愛對國外調)修理費用嘛是仝款「高貴」啊!這篇報導英文翻譯佇遮)寫著,這个歹運的使用者無張持去共 MacBook 螢幕摔歹去,因為這款人為破壞並無佇蘋果的保固範圍內底,為著欲節省修理費用,只好家己就來動手換螢幕矣。

阿啄仔作者家己訂來一片 LG/Philips 13" LCD (WXGA, 1280x800) 了後,就共動手的過程翕做相片貼出來。親像這款精彩閣有額的好文章,老刀當然愛介紹大家來去參考看覓矣!

2008年11月9日

新增民意調查

因為本站正手爿的項目愈掛愈濟,已經有淡薄仔雜亂。今日老刀做了一寡仔調整,另外嘛增加了「你感覺老刀應該愛閣報寡啥物?」的項目(到 11 月底為止),歡迎逐家來留落你的意見,嘛提供予老刀當做調整文章題材的參考。

另外,嘛歡迎你到本站正手爿下跤的「鬥陣的朋友」,來報到、捧場一下。老刀先踮遮共你說一聲刀射(多謝)。 :)

2008年11月8日

2007 年以後出廠,使用 Santa Rosa 佮 Penryn 系列處理器的 MacBook/MacBook Pro 攏總支援 6GB 記憶體!

頂禮拜老刀頭先共逐家報導講,2008 年 10 月推出的新款阿露米 MacBook/MacBook Pro 支援 6 GB RAM 的消息了後,根據受著真濟朋友(包括老刀)呵咾的網路購物大站 Other World Computing (OWC) 今日貼出廣告看起來,2007 年以後出廠、使用 Santa Rosa 佮 Penryn 系列 Core 2 Duo 處理器的 MacBook/MacBook Pro 攏總支援 6 GB 記憶體!

OWC 的 6 GB (2GB+4GB) 升級方案的價數是 479.95 箍米金;想欲拼頭先升級的勇士,會當來訂一套來試看覓矣,嘛歡迎你踮遮留落你的升級經驗予逐家分享。

2008年11月6日

Mac 101:較早佇 Windows 內底,我慣勢……

最近幾冬因為蘋果開始採用佮 PC 相仝的零件來降低成本,降價了後的蘋果產品,嘛拍破較早予人感覺產品價數傷懸的印象。近來對 Windows 跳過來的朋友嘛真濟,雖然 Mac OS X 是簡單、好用,毋閣佇用慣勢 Windows 的情形下,若拄著「毋知影按怎做較著」的時陣,就是誠艱苦的代誌。

今日蘋果更新怹的 Mac 101 教學網頁內底的這篇文章,應該會當解決誠濟 Mac 菜鳥仔的疑問,值得老刀推薦新朋友來去參考看覓。

2008年11月5日

gcin 專用的行列輸入法,已經有支援 Unicode 3.1 字集的版本

前擺老刀更新 OpenVanilla 的行列輸入法了後,這馬另外閣做一个予 gcin 專用的版本。這个版本老刀暫時囥佇 gcin 官方討論版,包括原始檔 (ar30.cin) 佮編好的輸入法檔 (ar30.gtab)。有需要的朋友,歡迎家己掠轉去安裝(安裝的方法佇遮,請參考「安裝 gtab 檔」這段)。

這个予 gcin 專用的 ar30.cin,除了是採用支援 Unicode 3.1 七萬外字的上新版輸入法表以外,嘛針對原來 gcin 行列輸入法使用「行列簡碼」的時陣,螢幕浮字的順序佮原始輸入法規格書無仝款的問題做了修正(完全按照官方定義)。關於這个 gcin 專用行列輸入法的討論,請參考 gcin 官方討論版這篇文章

2008年11月2日

歇禮拜,來聽歌:老刀精選 (14) - "Goodbye" by Night Ranger

誠久無來共逐家介紹老搖滾矣。老實講,這陣景氣毋是蓋好,會當為著生活拍拚實在是誠幸福的代誌。這个禮拜老刀欲介紹的團體,是老刀非常佮意的米國團體 Night Ranger

Night Ranger 是 1980 年佇米國舊金山成立的 hard rock 團體。怹拄創團的時陣,團體號名叫做 Stereo,毋過無外久就改名做 Ranger,1982 年的時陣閣再改名 Night Ranger 了後,號名總算固定落來矣。創團陣容是:
  • Jack Blades:貝斯(兼主唱)
  • Kelly Keagy:鼓(兼主唱)
  • Brad Gillis:吉他
  • Jeff Watson:吉他
  • Alan Fitzgerald:鍵盤
老刀猶會記得 Night Ranger 佇 1982 年第 1 片專輯 Dawn Patrol 的主拍的歌曲 "Don't Tell Me You Love Me",當時電台放送捌鬧熱一時矣,毋過真正的成名代表作,應該是 1983 年推出第 2 塊專輯 Midnight Madness 內底的 "Sister Christian",這調歌 Kelly 為伊小妹所寫的炮仔芭樂 (power ballad) 拍入米國流行歌曲榜第 5 名,Night Ranger 終於出運,變做是這馬咱所講的「A 跤」搖滾團體。包括紲落來 1985 年推出的第 3 塊專輯 7 Wishes,嘛是得著誠大的成功。

雖然 1980 年代後期重搖滾大興,毋過 Bon JoviPoison 這款 glam band 時行起來,顛倒是予 Night Ranger 的樂迷嚴重損失。紲落來的 Big Life (1987)、Man in Motion (1988) 2 塊專輯攏無法度閣再創造 Midnight Madness7 Wishes 彼款的大成功。鍵盤手 Alan Fitzgerald 佇咧錄 Man in Motion 專輯半路就來離開(變做是 Van Halen 幕後的鍵盤手),嘛註定 Night Ranger 解散的命運:隔年 (1989) Night Ranger 終於共逐家講再會矣。

好佳哉怹無予樂迷等待傷久,Kelly Keagy 佮 Brad Gillis 佇 1991 年重新集合,無偌久 Jeff Watson 嘛倒轉來;新貝斯手的位置是揣來 Gary Moon(代替當時已經另外佇 Damn Yankees 拍拼的 Jack Blades),Night Ranger 終於閣再重新出發,並且嘛開始巡迴演出。1996 年 Jack Blades、Alan Fitzgerald 重新入團,Night Ranger 回復創團的聲勢,一直到 2003 年 Alan Fitzgerald 再度離開(閣再佮 Van Halen 合作)、2007 年 Jeff Watson 離團;現此時的 Night Ranger 加入 2 个新人:Joel Hoekstra(吉他)、Christian Matthew Cullen(鍵盤)。

這擺老刀欲介紹的歌曲,是怹第 3 塊專輯 7 Wishes 的單曲 "Goodbye"。雖然這調歌的旋律足簡單(只有 2 款),毋過精彩的空心吉他伴奏,猶原是共這調歌頓落「保證大賣」的大印(拍入米國流行榜前 20 名)。這馬,就請逐家來欣賞這調歌的 MV:

2008年11月1日

新版阿露米 MacBook/MacBook Pro 支援 6 GB 記憶體!

想欲共手頭的新款 MacBook/MacBook Pro 性能發揮到上大限度,尤其是定定愛處理相片、影音多媒體的朋友,請注意來!

根據 ZD Net 這篇消息,新款使用 DDR3-1066 (PC3-8500) 規格的阿露米新款 MacBook 佮 MacBook Pro 支援 4 GB + 2 GB,總共達到 6 GB 的總記憶體空間!雖然愛犧牲雙通道的好處(記憶體速度差不多會損失 5% 以內),但是一般佇使用的時陣應該無啥感覺;毋閣對使用大量 CPU 時間處理相片、影音多媒體的朋友來講,記憶體愈大,用起來是愈順矣!

2008年10月30日

報一件「鐵馬仔族」一定愛知影的好空

今日收著台灣卡巴斯基 (Kaspersky) 來批講著,明仔載 (10/31) 早時 8:30~9:30 騎著你的「鐵馬仔」(嘛有人叫做跤踏車、自轉車)佮你的「職員證」去 7-11 瑞泰店(內湖花市對面),就會使得著卡巴斯基請客的「活力早頓」(御飯丸加統一豆奶)一份,只有提供 300 个名額。


檢視較大的地圖

2008年10月28日

新版 OpenVanilla 行列輸入法表格

老刀今日收著行列科技公司廖明德先生(行列輸入法發明人)協助提供的行列輸入法版新版對照檔了後,連鞭就共伊改寫做 OpenVanilla 支援的 .cin 規格。攏總有 array30.cinarray-special.cin 2 个檔案,歡迎有需要的朋友家己去掠轉來用。若有任何問題,嘛歡迎踮遮留字共老刀講一聲。

安裝的方法誠簡單,只要共這 2 个檔案拷貝入去下跤的所在:
  1. (Windows) C:\OpenVanilla\Modules\OVIMArray
  2. (Mac OS X) /Library/OpenVanilla/0.8/Modules/OVIMArray【註:/Library 佇漢文版的 Mac OS X 叫做「資源庫」】
了後,閣再登出/登入(抑是重新開機)就會當矣。

這个版本更新 (0.52),基本上猶原是 Unicode 3.1 的字集範圍,但是有補足舊版對照檔 (0.51) 佇 Unicode CJK Extension B 範圍有淡薄仔欠字的情形。另外,0.52 版嘛增加了對 Unicode 字集的俗字容錯拆法。

2008年10月27日

Sun 推出的 VirtualBox 2.0.4,有收錄漢文介面!

昇陽 (Sun Microsystems, Inc.) 昨昏推出(免錢的)虛擬機器軟體 VirtualBox 2.0.4 for Windows、Mac OS X、Linux 佮 Solaris/OpenSolaris 等作業平台的版本更新。期待誠久的漢文介面,這版終於囥入來矣(親像下跤這張圖),真值得老刀來推薦一下。

另外,這个新版主要是修正了一寡程式錯誤,想欲了解新版改善了啥物所在,請參考怹的說明

2008年10月26日

閣再論瀏覽器對 Unicode 漢字的支援

原來的文章佇遮

為著「𠕇䈄㤉㧌㧎㨨㴘㷮㾀𨑨䢢䫌𥑮䖳㽎鰮㴙㔂䠡䆀」這幾个台語定定用著的字,我特別利用 Internet Explorer 7、Firefox 3.0.2/3.0.3、Safari 3.1.2 三款瀏覽器,佇 Windows XP SP3、Mac OS X 10.5.5、Fedora 9 (Linux) 三種作業平台做了試驗:

Firefox 3.0.2/Fedora 9
Unicode 測試-1

Firefox 3.0.3/Windows XP SP3
Unicode 測試-2

Internet Explorer 7/Windows XP SP3
Unicode 測試-3

Safari 3.1.2/Windows XP SP3
Unicode 測試-4

Safari 3.1.2/Mac OS X 10.5.5
Unicode 測試-5

Firefox 3.0.3/Mac OS X 10.5.5
Unicode 測試-6

對按呢看來,我認為佇 Windows XP、Mac OS X 仝款有「𠕇」、「𨑨」、「𥑮」3 字無法度現出的問題,可能是出佇教育部建立這个討論版所用的軟體對 unicode 字集的支援並無完全的關係(彼 3 字攏是屬於 unicode 3.1 的範圍),我較早嘛捌佇 Firefox 台灣站有發表過這个問題。另外,Firefox 3.0.2/Fedora 9 雖然會使正常現出這 3 字,但其他的 unicode 字因為系統字型並無夠完整(有「欠字」),所以並無現出。這是系統字體的關係,並毋是我想欲佇遮討論的問題。

本來有想欲試 Opera 瀏覽器的部分,但是老刀傷過貧惰的關係,就交予有興趣的朋友來試看覓吧。

2008年10月25日

教育部的「臺灣閩南語常用詞辭典」佮「意見回饋」討論版

感謝朋友 midismilex 的提醒。教育部新編這个「臺灣閩南語常用詞辭典」,我佇前幾日有看著報導,毋過因為老刀近日咧處理一寡手頭的工課,實在是有較無閒的關係,猶未好好來耍一下。

這个辭典除了提供常用詞查詢以後,怹的附錄嘛仝款精彩,提供臺灣閩南語的俗諺、百家姓、地名、親屬關係、外來詞、(各地)方言差、人體器官圖、二十四節氣的詞音對照,仝款實用十足矣。

其實怹閣較讚的所在,是提供關於這个辭典的「意見回饋」的討論版,網址是:

http://twblg.dict.edu.tw/testforum/forums/list.page

有啥物關於台語用字的問題佮建議,攏會當佇遐直接發文(而且是教育部官方咧維護),服務真正有夠好。所以老刀「食好鬥相報」,來共逐家推薦這 2 个好站矣!

2008年10月23日

若是你的手機無佇 iSync 支援設備名單內底……

若是你的手機無佇 iSync 支援設備名單內底,無法度佮 Mac OS X 仝步傳資料的時陣欲按怎?相信這是一寡人真正苦惱的代誌。昨日蘋果公司更新的這篇技術支援文件,可能就是你上讚的解藥。

蘋果公司這篇文件蒐集了幾个「副廠」推出的 iSync plug-ins 連結佮怹支援的手機名單。想欲知影你上新買的手機佮 iSync 敢有四配?這篇文章是絕對有參考的價值矣!

2008年10月22日

網路開講軟體 Pidgin 2.5.2 更新推出!

老刀佇 Windows 佮 Linux 下跤定定使用的多用途開講軟體 Pidgin 2.5.2 更新已經推出矣。佮進前的版本比起來,2.5.2 版只有修正小可仔程式錯誤,並無重大的功能改進。雖然如此,老刀嘛是建議逐家去掠升級轉來用。

想欲知影 2.5.2 版改進了佗位,請入來參觀這个所在

2008年10月21日

蘋果公司更新鍵盤快速鍵一覽表列

今日蘋果公司更新了鍵盤快速鍵一覽表列,這擺怹嘛做伙提供漢文版的說明。所以老刀著無共文章引過來矣。老刀建議逐家 Mac 的用戶攏來去掠轉來印一份囥佇身軀邊,有需要的時陣著會使參考。

【閣再補充】另外,蘋果公司針對透過 Boot Camp 咧使用 Windows 的朋友,嘛更新了 Mac 鍵盤對應 Windows 鍵盤的技術支援文件,仝款嘛誠有參考的價值矣。

2008年10月18日

你可能毋知影佮新 MacBook 有關係的所在:前 10 名

蘋果公司這禮拜二推出阿露米殼仔的新 MacBook 了後,金爍爍的螢幕、取消 FireWire 予一堆死忠的 Mac 用戶罵甲臭頭。除了這 2 點以外,阿啄仔這篇報導登出其他前 10 名佮 MacBook 有關係的代誌,老刀簡單寫佇下跤:
  1. 「目標磁碟模式」無去啦:FireWire 取消了後,這个予 FireWire 專用的功能,嘛終於共逐家講再會啊。
  2. 「系統移轉輔助程式」上新版 1.2.2 (174)。
  3. 南北橋晶片改用 nVidia MCP79。放棄採用 Intel 的晶片組,嘛是節省成本的方法之一。毋閣 nVidia 晶片組的性能佮穩定性佇 PC 彼爿早就予一寡人罵甲臭頭;蘋果公司敢有替 nVidia 做調整(最佳化),應該嘛是誠濟人關心的代誌。
  4. 金爍爍的鏡面一旦破去,規个螢幕就愛做伙換掉。
  5. Mac OS X 10.5.5 (9F2114) 新版本,毋是其他電腦所用的 9F33 版。
  6. 電池電量指示改去倒手爿。
  7. 鍵盤固定的狀況有改進。
  8. 喇叭的音質嘛有進步:進前的 MacBook 佮閣較早的 iBook 攏有出力無夠的缺點,佮這擺比起來,算做是有誠大的改進。
  9. LCD 螢幕視角的問題猶原仝款,應該是用佮前一版 MacBook 仝款螢幕的關係。這嘛是「偷工減料」的結果。
  10. 拆裝硬碟終於變做是簡單的代誌。佮老刀較早共 iBook 換硬碟拆 20 外粒螺絲比起來,這个阿露米殼仔佇設計頂頭,已經有大大的進步啊。
想欲進一步看精彩全文的朋友,歡迎入來遮參觀。

2008年10月16日

微軟推出 Open XML File Format Converter for Mac 1.0.1 更新程式

想欲佇 Office v. X 抑是 Office 2004 for Mac 拍開 Office 2007 for Windows/Office 2008 for Mac 的文件,安裝 Open XML File Format Converter for Mac 是除了升級 Office 軟體版本的另外一條路途。今日微軟公司共 Open XML File Format Converter 的 Mac 版本做了更新,主要是修正一寡安全性的問題。有咧使用 Office v. X 抑是 Office 2004 for Mac 的朋友,建議來去微軟公司網站掠落這个更新程式;有興趣想欲了解這个更新改進啥貨,會使來這个所在參考。

Open XML File Format Converter 除了有予 Mac 使用的版本以外,嘛有予 WindowsPocket PC (Windows Mobile) 使用的版本。照這个情形看來,推出更新應該是這一二工內的代誌啊。

2008年10月15日

蘋果推出予阿露米殼仔 MacBook, MacBook Pro 專用的「軟體更新 1.2」

今日蘋果公司才推出新款阿露米殼仔的 MacBookMacBook Pro,過無偌久,怹著接咧推出予新機種專用的軟體更新 1.2 版,腳手實在有夠緊。

這个物件除了改善外接螢幕相容性以外,嘛提供了一寡軟體的修正。蘋果公司建議阿露米殼仔 MacBook/MacBook Pro 的新用戶攏來進行更新。想欲搶頭先買新電腦的朋友,毋通袂記咧更新哦!

2008年10月11日

Mac OS X 10.5:對安裝、啟動以及登入問題進行疑難排解

蘋果公司今日更新這篇文章(增加一條問題),有需要的朋友會當家己參考一下。這篇文章嘛有漢文版,毋閣因為怹猶袂更新的關係,並無加入原文最後一條問題佮解決的方法。

2008年10月6日

老刀鐵馬遊記 (3) - 基隆河松山、關渡段

這擺老刀利用禮拜六歇睏的機會,閣再來做一擺基隆河遊記。原來是拍算對汐止出發,騎去松山食中晝頓了後就騎轉來汐止。毋閣想著反正禮拜六下晡並無安排啥物代誌欲做,所以就臨時決定食飽對松山出發,共規條基隆河騎透透。

對汐止到松山這段,因為佮較早騎的路線仝款,所以就無閣再做記錄啊(想欲參觀沿路風景的朋友,會使來看五堵汐止段【正岸倒岸】、汐止南湖段),嘛歡迎來參考我較早的遊記),這擺是中晝食飯飽對松山開始記錄(基隆河倒岸),經過松山機場、大佳公園、圓山囡仔樂園,行承德路過河到正岸,過百齡球場、雙溪,一直騎到關渡接淡水河為止,紲落來踅翻頭一路騎正岸轉去汐止。按車頂碼表的記錄,這擺汐止、關渡往回攏總騎了 64.7 公里,對老刀這款「肉雞仔」來講,已經是破紀錄的遠途啊。

老刀嘛共沿途的風景記錄佇遮,歡迎逐家來參考看覓啊!

2008年10月2日

DSLR(數位單眼翕相機)配老鏡

這幾冬來 DSLR (Digital Single-Lens Reflection) 翕相機愈來愈俗,身邊真濟朋友嘛一个一个乖乖納錢繳稅予 Nikon、Canon、Sony 等廠商,甘心變做是 DSLR 俱樂部的會員。毋閣新鏡頭一粒比一粒貴,功能雖然強,但並無表示舊鏡頭就會歹用。親像老刀手頭使用超過 20 冬、日本製的 Nikkor AF 50mm f/1.8 鬥入 Nikon D70s 內底,現此時猶原是定定陪我出巡的好朋友。

拄踏入 DSLR 世界的新朋友,若是感覺新鏡頭傷貴、負擔袂起,選擇較俗的二手舊鏡頭,嘛是誠好的選擇。親像這篇文章所講,準講舊鏡頭鬥入你的新 DSLR 翕相機可能無法度自動對焦(親像彼篇文章作者採用無機身馬達的 Nikon D60),但是若是利用舊鏡頭才有的「景深標記」,仝款會使予你翕出袂失焦的照片。對焦的問題解決了後,測光的部分會當利用 DSLR 「相片翕歹著刣」的特色,加試幾个測光組合,一段時間落來,對提升你的經驗佮功力絕對是有幫助啦。

最後老刀祝福逐家攏會翕著滿意的作品啊!

2008年9月28日

佗一款瀏覽器上緊:老 Mac (G3) 篇

雖然蘋果公司宣布怹電腦全面採用 Intel 處理器已經誠久,但相信猶有真濟 PowerPC G3/G4 的古董機仔猶替怹主人咧工作。Low End Mac 這篇文章利用舊的 PowerBook G3/400 (Pismo) 為逐家試驗 9 種專門予 Mac OS X 使用的瀏覽器,包括:
  • Opera 9.5.2
Mozilla 瀏覽器
  • Camino 1.6.4
  • Firefox 3.0.2
WebKit 瀏覽器
  • iCab 4.2.0
  • Shiira 2.2
  • Demeter 1.5 Beta 2
  • Radon 1.0
  • Sunrise 1.7.4
  • Safari 3.1.2
試驗的機器是用 PowerBook G3/400、1GB RAM、5400 rpm 40GB 硬碟、Airport 網路卡、Mac OS X 10.4.11。結果作者共 Camino 拍著 4 分滿分的好成績,評定是第 1 名。

你上佮意的瀏覽器是佗一个?歡迎你入來留字共老刀講啊。 :)

2008年9月26日

Google 用 1,000 萬箍米金徵求你奇巧的好創意

這个叫做「10100 計畫」的物件是幾个 Google 10 週年慶祝活動之一,你若有一寡好心、奇巧的好創意,就有機會得著大獎哦!下跤是 Google 這擺 10100 活動徵選的項目:
  • 社群團體:如何讓人們的聯繫更緊密、建立社群並保護特殊文化?
  • 生活機會:如何協助人們及他們的家人過更穩定的生活?
  • 能源需求:如何讓大眾使用安全、乾淨又便宜的能源呢?
  • 環境保護:如何喚起全民共識,一同打造更乾淨的永續全球生態系統?
  • 衛生保健:如何才能讓人們活得更長壽、更健康?
  • 教育課題:如何讓更多人享受更完善的教育資源?
  • 平安生活:如何維護社會安寧,讓大家都能安居樂業?
  • 其他議題:某些好創意是不能用類別來限定的。上述範圍之外的創作就歸在這個部分下。
想欲進一步瞭解,抑是已經有奇巧的好創意、想欲報名參加的朋友,請參考 Google 的活動說明

2008年9月24日

Firefox 3.0.2 正式推出!

雖然比預定的日期延後幾工,Firefox 3.0.2 已經正式推出啊!Firefox 的愛用者,請趕緊去掠來灌吧!

有興趣欲進一步瞭解 Firefox 新功能的朋友,歡迎入來參觀伊的 Release note

2008年9月23日

希旺 (Pretec) 推出 64GB、100GB 的 CF 記憶卡

隨著新型翕相機的像素愈出愈濟,各位朋友換新翕相機了後,手頭的記憶卡是毋是會感覺無夠使用?根據這篇報導,以 Pretec 自有牌子佇台灣拍出名號的希旺科技公司已經拍破現此時記憶卡容量的紀錄,推出 64GB 佮 100GB 的 CompactFlash (CF) 記憶卡,應該會當減輕記憶卡無夠用的困境。

這 2 款速度達到 233X (35MB/s) 的 CF 記憶卡,已經超過怹進前保持的 48GB 容量紀錄。另外怹嘛推出超高速 333X 的 32GB 佮 50GB CF 記憶卡,會當提供 50MB/s 的讀寫速度,這个速度嘛是現此時的世界紀錄。

根據 Pretec 專利的 Q-SATA 技術,會當利用 4 片 64GB 做基礎,集合變做 2.5" 的 256GB SATA 硬碟,這嘛是到今容量上大的 2.5" SSD 硬碟。

這 2 款新的 CF 記憶卡將參加佇德國舉辦的 Photokina 2008 展覽。Pretec 233X 64GB 佮 333X 32GB CF 卡的建議價數是米金 $399、$630;233X 100GB、333X 50GB 將佇 2008 年底出貨(價數袂定)。

想欲進一步參考 Pretec 新聞稿的朋友,歡迎來遮看覓

2008年9月22日

OpenVanilla 0.9 (Oranje) 紲落來的新計畫

相信真濟朋友佮老刀仝款,攏是 OpenVanilla(開放香草輸入法框架)的愛用者。佇 OpenVanilla 0.8 推出接近一冬的今日,OpenVanilla 計畫主持人 lukhnos 用英文發表一篇關於 OpenVanilla 未來發展的聲明稿。老刀特別佮這篇文章的重點整理佇下跤,報予逐家知影:

  1. 未來的 OpenVanilla Win32 版本,將會共目標專門囥佇 Windows Vista 平台。
  2. 下一版 OpenVanilla 0.9 的代號是 "Oranje"(意思是荷蘭人講的「柑仔」,念做 "oh-rahn-ye"),現此時佇咧計畫階段,猶袂正式動工。
  3. OpenVanilla 0.8 佮進前的版本經過幾擺的修補,程式碼包括 Makefile(熟似 Unix 系統的朋友,應該知影這是啥物貨)、XCode projects(Mac 版本)、Windows 批次指令、Visual Studio(微軟的 Windows 軟體開發工具)等,親像雜菜麵按呢集合做伙,已經達到難以維護的地步。佇新的 OpenVanilla 0.9 版,lukhnos 佮 zonble(這 2 个人是 OpenVanilla team 的老仙覺啊)將會先共佇 Mac OS X 頂頭重新改寫 OpenVanilla 完成了後,才會考慮共 OpenVanilla 搬去別款系統平台。
雖然看來距離 OpenVanilla 0.9 正式推出應該愛閣等誠久,但是聽著伊未來會變較苗條,嘛是予人真歡喜:因為超過 700 kB 的「行列30」輸入法 .cin 檔載入去記憶體內底,袂當遐爾順,嘛是一件可惱的代誌啊。

2008年9月17日

燒燙燙的 Firefox 3.0.2 beta 已經推出啊!

Firefox 3.0.2
今日老刀踮 Firefox 3.0.1 瀏覽器下跤無張持去揤著「檢查更新」,無想到 Firefox 竟然問我敢欲升級到 3.0.2 版,當然是共伊升級落去啊。 :)

升級好勢了後,進入 Firefox 網站發見 3.0.2 這陣猶佇 beta 階段(正式版猶袂推出)。這擺伊攏無共使用者提醒「beta 測試版可能會造成軟體抑是系統袂穩定的風險」就直接更新軟體,雖然是有較過分,毋閣看怹的 Release note 寫講 Firefox 3.0.2 版已經支援佇 flash 物件內底拍入漢字,對誠濟人來講應該是天大的好消息。親像老刀仝款想欲做白貓鼠的朋友,會當來升級試看覓矣。

2008年9月15日

佇 Eee PC 灌入 Mac OS X 10.5 (Leopard)

嚴格來講,這篇報導並袂當算是新聞,因為進前一寡熱心的朋友已經捌試過;但是話講倒轉來,怹會按呢做並毋是無道理:PC 這爿流行 Mini Notebook 已經規冬,但是蘋果目前為止並無對應的產品線。

老刀感覺現此時的 MacBook 抑是 MacBook ProMacBook Air 訴求的重點佮 Mini Notebook 攏總無仝款,我認為蘋果公司應該嘛應該推出 "MacBook Mini" 拍入這个市場才著。若無,老刀早慢會進一台 Mini Notebook 灌 Leopard,按呢出外的時陣就會當有電腦用。

2008年9月10日

阿婆 (Apple) 掠狂,軟體升級木蘭飛彈射袂紲

蘋果公司 (Apple) 今日一如預料,除了 iPod 全系列家族大更新(包括 iPod Touch 佮 2.1 版軟體、新的 iPod Nano,嘛有新色彩的 iPod Shuffle )佮 iTunes 8.0 以外,嘛順紲推出誠濟軟體更新,包括:
另外,這擺號名叫做 "Let's Rock" 的記者會並無搖滾巨星來加持,老刀感覺有一點仔失望。

2008年9月8日

Adium X 1.3.1 更新推出

受著真濟人愛用的 Adium X 多用途開講軟體,今日推出 1.3.1 更新版,修正了一寡問題。建議有咧使用 Adium X 開講的朋友去掠來更新吧!

想欲了解這个新版修正了啥物所在,歡迎去參考怹的版本歷程紀錄

2008年9月6日

南韓大廠 Samsung 數想欲買 SanDisk

根據 PaidContent 的報導,南韓大廠 Samsung(三星電子)公司當數想欲買 SanDisk 公司,嘛已經咧試一寡有可能成功交易的方法,但是這陣猶袂確定交易的方式。SanDisk 是全世界出名的 NAND Flash 記憶體生產廠商,Samsung 這擺若會當交易成功,逐年就會使省落來付予 SanDisk 3.54 億箍米金的授權費用。

真正諷刺的代誌是:老刀有一寡朋友是絕對「排韓」的朋友,怹對南韓出產的物件是列入拒絕來往,但是本身又閣是絕對支持 SanDisk,毋是 SanDisk 牌子的記憶卡絕對袂去考慮!若是這擺予 Samsung 交易成功,毋知影怹敢會閣再支持 SanDisk 記憶卡啊?令人懷疑啊!哈哈。老刀對記憶卡的牌子無啥意見,堅持價數俗就好;毋閣對 Samsung 的硬碟就有意見啊,幾冬前捌買過怹的硬碟,效能實在輸別間的產品傷濟,所以現此時我猶是共 Samsung 硬碟列入拒絕來往的對象。

2008年9月3日

老刀精選(13) - "Let's Get Rocked" by Def Leppard

根據 CNet 的報導,已經恬淒淒真久的蘋果公司,終於宣布佇米西時間後禮拜二 9 月 9 日早時 10 點舉辦一場號名做 "Let's Rock" 的記者會。"Let's Rock" 這个名,予誠濟人想著:蘋果公司可能將欲推出新款的 iPod 佮 iTunes 8.0。雖然如此,愛聽搖滾音樂的老刀認為 "Let's Rock" 應該表示蘋果公司會閣再走揣搖滾名團代言新產品;會佮佗一團合作?後禮拜的記者會便知分曉(進前蘋果公司有佮搖滾名團 U2 合作,推出 iPod U2 紀念版的先例)。

老刀趁這擺機會,嘛來為逐家推出誠久無介紹的「老刀精選」搖滾名曲來應景。這調 "Let's Get Rocked" 是搖滾名團 Def Leppard 佇 1992 年推出第 5 塊專輯 Adrenalize 的主打曲。天才吉他手 Steve Clark 雖然有參加歌曲的寫作,可惜猶袂等著出片就來過身。所以 Def Leppard 推出 Adrenalize 這塊專輯,正是怹事業上困難的時陣,嘛是 Def Leppard 唯一以「4 人陣容」推出的專輯(怹較後壁推出的作品,是用 Vivian Campbell 接替 Steve Clark 留落來的缺)。雖然如此,這片 Adrenalize 專輯內底,會當聽出怹想欲維持頂一片 Hysteria 專輯水準之志。

【老刀按】我進前捌介紹過 Def Leppard 這个團。有興趣的朋友,歡迎來複習這篇「歇禮拜,來聽歌:老刀精選 (8) - "Photograph" by Def Leppard

紲落來,就請逐家來觀賞 "Let's Get Rocked" 的 MV:

2008年9月2日

Pidgin 2.5.1 更新推出

Pidgin 2.5.0 推出了後過無幾工,Pidgin 2.5.1 更新閣再推出;這擺 2.5.1 新版主要是修正一寡 2.5.0 的問題,另外嘛有修整誠濟介面語言的翻譯(包括漢文在內)。

有關於 Pidgin 2.5.1 新版改正的所在,請參考怹的 Changelog

2008年8月31日

PC 族的劈腿告白

最近應著朋友 Alex Tsai 邀請來接受「老地方冰果室」的訪問,為逐家介紹老刀家己較早利用 Mac 處理代誌的經驗。這陣老蔡已經共訪問的內容囥佇這篇老地方冰果室的報導,歡迎逐家來去共老刀捧場兼指教。

PS. 最近老刀因為感冒誠重的關係,已經有幾日無法度為逐家報導新聞啊。這陣雖然已經退燒,但嗽一直是治袂斷根。有時真正有雄雄欲共心肝嗽出來的感覺,真是艱苦啊!你若有啥物治嗽的秘方,一定愛報予老刀知影啊!

2008年8月26日

Adium X 1.3 正式版來到世間

經過誠久的 beta 試驗了後,Mac OS X 下跤嘛是受著真濟朋友愛用的 Adium X 已經正式推出 1.3 版啊。這擺新版解決的問題嘛是真濟,親像採用佮 Pidgin 2.5.0 仝步的 libpurple 函式庫、帳號登入的速度大大改進等等。

想欲了解詳細的改進,會使來參考怹的 Changelog

2008年8月25日

Open Tech 公司準備用 50,000 箍米金共怹賣掉

雖然頂個月老刀為逐家介紹 Open Tech 推出 Mac OS X 相容電腦的消息,毋閣代誌才過無一个月,Open Tech 就佇怹的網站搭出講公司欲用 50,000 箍米金賣掉的消息。拍賣的項目包括 Open Tech 的牌子、網站佮商業秘密等。

對這个所在看起來,佇 Apple 控告 Psystar 的官司猶袂有結果進前,「生產 Mac OS X 相容電腦」這條路實在誠歹行啊!

2008年8月22日

ATI-AMD 推出顯示卡驅動程式 Catalyst 8.8

ATI-AMD 昨日推出予 Linux 佮 Windows 專用的新版顯示卡驅動程式 Catalyst 8.8。這个版本主要有增加下跤的新功能:
  • 新的 Avivo 視訊:佇 ATI Radeon™ HD 4800 系列頂懸動態校正 Gamma 佮對比,予你咧放送影片的時陣,有閣較好的畫質;嘛有予 ATI Radeon™ HD 3000 佮 4800 系列專用的設定項目組合 (preset)。另外,佇 Windows XP 內底嘛有 Edge enhancement(漢語叫做「邊緣銳化」,老刀猶袂想著欲按怎翻做台語),佇咧放送影片的時陣,影像的邊角就袂閣再有霧霧的「鬼影」啊!
  • 佇 Windows XP 內底支援多重顯示卡組合 (Hybrid Graphics Support)。若是共 ATI Radeon™ HD 2400/3400 系列的顯示卡鬥入去內建 AMD 780D/780G 整合顯示卡的主機板,AMD 780D/780G 就會當幫助 Radeon GPU 做平行處理,大大增加 3D 算圖的速度。
當然,新的 Catalyst 8.8 嘛有修正舊版佇一部分佇𨑨迌物仔的問題。想欲詳細了解關於新版的一切,會使參觀 Release Note

2008年8月21日

Pidgin 2.5.0 新版推出

老刀真愛用的網路開講軟體 Pidgin 推出 2.5.0 啊。雖然這个新版提供了一寡新功能,毋閣老刀感覺上實用的功能,是 MSN 的部分終於有支援離線訊息啊!也就是因為這點,終於予我知影原來有朋友「頂個月」留字問老刀敢有欲接收舊的筆記型電腦?哈哈。另外,新的 libpurple 函式庫嘛有支援予使用者家己自訂「尪仔標」(smiley) 的功能(這陣只有佇 MSN 的部分有支援)。

想欲知影 Pidgin 新版到底改進了啥物所在的朋友,會使入來遮看予詳細。

2008年8月18日

予 Pidgin 現出你當咧聽的歌名:Windows 篇

Mac 專用的開講軟體,親像 Adium XiChatMessenger for Mac 7Skype 攏會當現出你當咧聽的歌名予逐家知影。佇 Windows 下跤的 Windows Live Messenger 雖然嘛有這个功能,但放送歌曲的軟體只限定微軟家己的 Windows Media Player 一種。親像老刀這款使用 iTunes 放送 AAC (.m4a) 音樂慣勢的人,欲叫我改用 Windows Media Player 是無可能的代誌啊!

雖然 Pidgin 是 Windows 佮 Linux 下跤誠受著歡迎的多用途開講軟體,毋閣定定一爿放歌一爿拍字開講的老刀想欲佮朋友講一寡音樂的時陣,若會使予 Pidgin 現出當咧放送的歌名,就加足方便啊!利用 MusicTracker 這个 Pidgin 的 plugin,會當予你做這件代誌。

MusicTracker 灌好了後,請入去「工具/模組」內底共 MusicTracker 拍勾:

pic-1

了後,捏下跤的「設定模組」,就會使家己現出欲現出的字串:

pic-2

設定好勢了後,就會使予朋友看著你所放送的歌曲啊!

pic-3

MusicTracker 支援的放送軟體一直咧增加當中,老刀佇寫這篇文章的時陣,現此時支援的名單有(一直咧增加當中):

2008年8月13日

7-Zip 4.59 beta for Windows 支援 UDF, XAR 佮 DMG/HFS 檔案格式

想欲佇 Windows 內底解開予 Mac 用的安裝檔(無論是 .dmg 抑是 .mpkg),已經有解啊!

佇 Windows 下跤受著誠濟人愛用,免錢的壓縮/解壓縮軟體 7-Zip 佇今日推出 4.59 beta 版。這个新版增加了對 UDF、XAR(Mac OS X 10.5 Leopard 的 .mpkg 安裝檔,就是採用 XAR 格式)佮 DMG/HFS 檔案格式的支援,對 Windows/Mac OS X 雙系統的使用者來說,應該是一个天大的好消息。

微軟推出 Office 2004 11.5.1、Office 2008 12.1.2 更新

微軟今日推出了予 Mac OS X 專用的 Office 2004 11.5.1Office 2008 12.1.2 更新,修正了一寡安全性的問題。有咧使用 Office 2004/2008 的朋友,建議去掠來安裝吧。

2008年8月12日

Nikon D90 愈來愈有影?

Nikon 的單眼數位翕相機受著誠濟朋友愛用(包括老刀在內)愛用。自從頂禮拜 Nikon Rumors 已經搭出第一張 D90 的相片了後,這幾工關於 Nikon "D90" 數位翕相機將欲推出的傳言是愈來愈有影啊!昨日連佮 Nikkor 18-105 VR 鏡頭作伙出貨的 kit 價數 1299.99 箍米金嘛出來啊,是真是假,應該袂予逐家等傷久,便等 D90 推出便知分曉。

可能嘛有人會問老刀:到時敢真正甘共手頭的 D70s 賣掉,改換做 D90?我想是袂啦!身為散赤人,有翕相機通用,就愛感謝天公伯啊。

2008年8月8日

Apple 技術支援的「烏暗面」

雖然對十冬前 iMac G3 推出開始,蘋果公司的產品令人讚歎的外型、簡單實用的使用介面,永遠攏是眾人注意的焦點,毋閣講一句實在話:蘋果台灣分公司的技術服務實在予人毋敢領教啊!最近米國華盛頓郵報 (Washington Post) 嘛有一篇有關蘋果公司產品支援烏暗面的報導,看來蘋果這間世界性公司提供的服務內容,真正佮執行長 Steve Jobs 龜怪的性地攏總仝款。

華盛頓郵報這篇報導講著:蘋果直營店的 Genius Bar 提供予人客直接佮員工對談的場所雖然誠好,但除了佇 Genius Bar 以外的世界來講,蘋果公司絕對是「上袂愛佮人客相交插」的公司。長久以來,蘋果公司對足濟代誌,對 Steve Jobs 的健康問題,到將欲上市的新產品一直當做是商業秘密。

另外,就連蘋果的軟體嘛是烏暗重重。華盛頓郵報舉幾个例,實在是講入去老刀的心肝底啊!親像:「你敢真正相信上新版的 iTunes 只是『包括了會當改進穩定性佮執行效能的修正』(includes fixes to improve stability and performance)?」;另外 iPhone 2.0.1 將近 250 MB 的更新只用 "bug fixes"(修正錯誤)2 字凊彩帶過,除了蘋果以外,無人知影到底修正了啥物所在,這敢是負責任的公司的處理方式?

蘋果公司官方論壇嘛是蘋果「袂愛佮人客相交插」的另外一个證據。蘋果的論壇佮其他大部分公司有專人維護佮提供問答服務的官方論壇無仝款,足少有蘋果家己的員工佇內底提供服務,會使講是完全放予使用者家己「自生自滅」的所在。

佮其他公司相比,親像微軟共怹上新的工作進度公布佇 MSDN Channel 9,並且歡迎逐家去留落意見、Dell 嘛有予人客提供意見的 Dell IdeaStorm 網站。老刀個人認為:其實蘋果會使閣較「開放」小可仔,永遠共喙窒住並毋是好辦法啊!

2008年8月5日

Intel "Larrabee" 顯示卡,將欲加入 GPU 大混戰

Intel 佇 8 月 4 日已經公布代號叫做 "Larrabee" 的新一代圖形處理器 (GPU) 規格(新聞稿佇遮),預定佇 2009-2010 年推出。按照伊的規格看來,Larrabee 系列應該會當予 AMD-ATInVidia 傳統大廠足大的壓力。

佮較早 Intel 推出的「整合式」繪圖晶片無仝款,這擺新的 Larrabee 將是獨立的 GPU;也就是講,採用 Larrabee 圖形處理器的顯示卡會當佮所有 x86 平台相容。所以 Intel 踏出這步,將是宣布直接佮 AMD-ATI、nVidia 傳統大廠對拍的開始。

若看入去 Larrabee 規格內底,就知影其實 Larrabee 並不止做 GPU 的工作(雖然伊嘛是會使做 GPU 應該做的代誌),應該說 Larrabee 是 Intel 採用怹多核心 x86 CPU 技術的精華,閣再加入 GPU 單元的「綜合體」。對 Intel 公布的資料看來,Larrabee 對 8 核心起磅,上濟會使到 48 核心,而且逐粒核心(以 Pentium 為基礎,但是加入 64 位元指令集佮「多執行緒」)攏有 256kB 的 L2 快取記憶體。另外 Larrabee 嘛完全支援 DirectX 佮 OpenGL。

對 Cnet 轉搭的 Intel 簡報片看來,Larrabee 的「核心數目」佮「總效能」將有倍數成長的關係。毋知影 Larrabee 頂級的 48 核心顯示卡佮 AMD-ATI、nVidia 對戰有啥物結果?真正予人期待啊!

2008年8月2日

Windows Mobile 佮 Mac 的同步工具:SyncMate 當咧進行官方漢化

雖然 Pocket PC 抑是 Smartphone 使用的 Windows Mobile 5.x/6.x 佮 Mac OS X 有幾種工具會當來進行資料仝步,毋閣老刀較佮意利用 Eltima Software 公司出品的 SyncMate 來做。免費的 SyncMate 提供了下跤幾款仝步功能:
Windows MobileMac OS X
連絡人通訊錄
行事曆iCal 事件
工作iCal 待辦事項

另外,使用者若是付一寡錢升級到「專家版」,就會使增加仝步檔案夾、iPhoto(相片)、iTunes(音樂)、Mail、便條、時間等功能。

老刀最近得著 Eltima Software 公司同意,來共 SyncMate 進行漢文版的翻譯。這陣翻譯工作已經進行超過一半,請參考下跤的圖:

SyncMate

有咧使用 Windows Mobile 的朋友,敬請期待啊!

2008年7月31日

卡巴斯基 2009 漢文版防毒軟體開放網路掠檔升級

今日收著卡巴斯基來批通知講,怹 2009 中文版的安裝程式佮說明書已經正式開放網路掠檔。這是官方的 30 工全功能試用版,註冊了後就佮盒仔裝的零售版本仝款。有需要的朋友,會當家己掠來安裝升級啊。

2008年7月30日

HP 宣布免費修理部分筆電產品

因為出名的圖形處理器 (GPU) 製造商 nVidia 佇這個月初承認怹產品的包裝材料有缺點,惠普公司 (HP) 宣布提供免費維修 24 款 2007 年 11 月以後出廠、採用 nVidia 顯示卡的筆電產品,包括 HP Pavilion dv2000/dv6000/dv9000 佮 Compaq Presario v3000/v6000 系列。症頭包括:LCD 螢幕無畫面、無法度開機等。想欲進一步瞭解的朋友,歡迎來去 HP 網站參考

2008年7月26日

免費的 x86 虛擬機器 (VM)

這幾冬個人處理器速度快速進步,予個人電腦的性能得著非常大的提升;因為處理器的性能有夠強的關係,想欲佇電腦灌 2 个以上的系統,除了分割硬碟安裝的「傳統做法」以外,利用「虛擬機器」(Virtual Machine, VM) 軟體來安裝別款系統,嘛是袂歹的做法。透過 VM 安裝的系統,有「毋免重新割硬碟空間」的優點。因為老刀家己有 PC 的關係,所以頂個月買 iMac 了後,並袂趕緊欲試「單機雙系統」,毋過因為 PC 佮 iMac 囥佇無仝房間,為著無愛佇房間中間行來行去,所以今日終於嘛利用 VM 安裝 Windows XP SP3 入去 iMac 內底。

支援 Mac OS X 的 VM 軟體,較出名的是 Parallels DesktopVMWare Fusion 2 款,但是怹攏是愛用錢買的商業軟體。這擺老刀選擇的是免錢的昇陽 (Sun Microsystems) 的 VirtualBox 1.6.2。這个物件的操作介面有淡薄仔親像微軟的 Virtual PC 2007 for Windows(嘛是免錢的 VM 軟體),除了猶未支援 iMac 的 iSight 網路攝影機以外,並無拄著使用上的問題。所以老刀踮遮推薦這个物件予有需要的朋友。

VirtualBox 除了有 Mac OS X 的版本以外,嘛有提供予 Windows、Linux 佮 OpenSolaris 專用的版本。

2008年7月24日

AMD-ATI 推出顯示卡驅動程式 Catalyst 8.7

AMD-ATI 推出予 Windows XP/Vista 佮 Linux 專用的 Catalyst 8.7 顯示卡驅動程式(有咧使用 Boot Camp 的 Mac 用戶,嘛會當佇 Windows 下跤安裝)。對怹的 Release Note 看來已經有修正誠濟問題(大部分是針對特定耍𨑨迌物件)。可能是 Release Note 拄推出的關係,Release Note 內底有一寡連結猶無法度點,所以就暫時無寫佇遮啊。

有興趣的朋友,會使來去 AMD-ATI 的網站掠轉來用

2008年7月23日

Apple Taiwan 恬恬仔變更官方網址

最近發見蘋果亞洲股份有限公司台灣分公司 (Apple Taiwan) 的官方站址,對 http://www.apple.com.tw/ 恬恬仔改做 http://www.apple.com/tw/,雖然只有差一个標點符號,毋過這个意義是差真濟啊,代表講台灣分公司的網頁已經予總公司收倒轉去管理啊。是好是歹,便看就知。

Mac OS X 相容電腦第 2 砲:Open Tech Computer

Apple 才正式共 Psystar 開炮提出告訴(請參考「蘋果公司終於出手反擊 Psystar」這篇報導),過無幾工,另外 1 間電腦公司 Open Tech 嘛宣布將欲推出 Open Tech Computer、Open Tech XT 這 2 款 Mac OS X 10.5 (Leopard) 相容電腦,表示蘋果公司以後接受相容電腦的挑戰,將會愈來愈濟。

定價 620 箍米金的 Open Tech Computer v1.0,規格是:
  • Intel Pentium D 945 3.40GHz 雙核心處理器
  • 500 GB 硬碟 (7200 轉)
  • 3 GB DDR2 記憶體 (667 MHz PC 5400)
  • DVD 燒錄機
  • 500 W 電源供應器
  • Power Up 牌子的 ATX 中型烏色直立式外殼
  • 整合式 Wi-Fi 802.11g 無線網路
「高階」的 Open Tech XT 定價 1,200 箍米金,規格有:
  • Intel Core 2 Quad Q6600 2.40 GHz 四核心處理器
  • 4GB DDR2 800MHz 記憶體
  • 640GB 硬碟 7200 RPM
  • DVD 燒錄機
  • CoolerMaster 牌子的 ATX 中型直立式外殼
  • Integrated Wi-Fi 802.11g
Open Tech 客戶會當選擇佮電腦做伙出貨的系統,有 Mac OS X 10.5 (Leopard)Windows Vista 64 位元家用進階版 (Home Premium)、Windows XP Home 64 位元版Ubuntu 8.04。毋過佮 Psystar 無仝款的是,Open Tech 並無預裝 Mac OS X (Leopard) 系統,使用者會使透過特製的 DIY 工具,家己動手安裝。

2008年7月22日

Mobile01「大安森林團」活動公告

現代人吃好穿好,身軀超重的情形真正普遍;加上汽油愈來愈貴,所以騎自轉車(腳踏車)運動,甚至利用伊來做上、下班通勤的工具,佇台北市內實在是愈來愈時行啊。

最近愛騎自轉車的朋友 hsuchen 佇 Mobile01 發起了「大安森林團」的車友俱樂部,嘛邀請老刀參加活動。雖然老刀嘛真贊成騎自轉車來練跤腿力,但是因為下班的時間、路途攏袂拄好,所以老刀就無法度參加囉。

7/22 盈暗「大安森林團」安排了大佳—關渡宮的夜騎活動,蹛佇台北市、而且時間會當配合的朋友,歡迎做伙去報名練身驅啦(聽說團長欲請車友食豆花,有這款好空,一定愛報予逐家知影啦!哈哈)。

2008年7月19日

利用 RJ-45 乙太網路線佮別台 Mac 相接,敢有需要雙絞線?

雖然老刀的阿露米 iMac 需要佮中古的 iBook G4 相接的時陣,一般我會使用 FireWire 抑是利用無線網路完成,但是利用傳統的 RJ-45 乙太網路線嘛是真方便的代誌:這條線不但比 FireWire 纜線加真俗,而且嘛誠好買著。毋過 RJ-45 網路線有 2 種規格「標準」款佮「雙絞」(cross-over,嘛有人共伊叫做 twist-paired),因為接頭仝款的關係,外觀完全無法度分辨標準抑是雙絞。到底愛按怎選才正確,相信嘛是誠濟生手會拄著的問題,就聽老刀來說分明吧:
  • 雙絞網路線:用佇2 台電腦用 RJ-45 網路線直接相接。
  • 標準網路線:用佇透過乙太網路集線器 (ethernet hub) 予 2 台以上的電腦相接。
根據蘋果這篇技術支援文件看來,怹佇 2001 年以後推出的產品已經有「自動跳接」的功能,所以毋管是用雙絞線抑是標準的網路線,攏總通用。包括有:
  • iMac (17-吋 1GHz) 佮以後的型體
  • eMac (ATI 繪圖卡) 佮以後的型體
  • iBook (雙 USB) 佮以後的型體
  • Power Mac G4 (Gigabit Ethernet) 佮以後的型體
  • Xserve 佮以後的型體
  • Power Mac G5
  • PowerBook G4
  • Mac mini
  • AirPort 基地台 (Dual Ethernet)
  • AirPort Extreme 基地台
  • AirPort Express
  • 所有使用 Intel 處理器的 Mac 電腦
若是想欲接的任何一台電腦,攏總是無佇頂懸名單頂頭的「古董款」的時陣,你就需要傳雙絞線來用。

2008年7月17日

「非官方 Fedora FAQ」網站推出 Fedora 9 的版本

雖然 Linux distributions 有百百款來選擇,毋過老刀誠久以前就慣勢用 Fedora 啊,所以說 Fedora 是老刀愛用的 Linux 系統,嘛是一點仔攏無過分。

你若想欲進入 Linux 的世界,Fedora 應該嘛是上好的選擇之一。除了 Fedora 官方網站有提供完整的支援(包括 IRC【老刀按:全名號做 Internet Relay Chat,這是一種跨平台的網路開講協定】、E-mail、官方論壇,以及線上手冊等)以外,非官方的 The Unofficial Fedora FAQ 網站其實嘛是 Fedora 用戶「進補」的重要網站,甚至這陣 Fedora 官方已經無咧支援的第 1~6 版,The Unofficial Fedora FAQ 猶繼續有提供支援服務。

最近 The Unofficial Fedora FAQ 網站終於推出怹的 Fedora 9 FAQ「上新版」,想欲耍 Fedora(抑是現此時已經咧耍)的朋友,老刀攏建議恁入來參考一下。

2008年7月16日

蘋果公司終於出手反擊 Psystar

Psystar 公司佇今年 4 月推出預裝 Mac OS X 10.5 (Leopard) 的 Open Computer 佮 Open Pro 電腦了後(請參考「Mac 相容機將再度挑戰 Apple」這篇報導),蘋果公司終於以 Psystar 違反蘋果公司 Mac OS X (Leopard) 的「軟體許可協議」(Software License Agreement, SLA) 第 2 條:

本許可證允許閣下每次在單一帶有 Apple 標籤的電腦上安裝、使用和運行一(1)份 Apple 軟體。閣下同意不在任何不帶有 Apple 標籤的電腦上安裝、使用和運行此 Apple 軟體,或授權他人這樣做

的規定,正式對 Psystar 提出告訴。根據米國舊金山的北加州地方法院的紀錄,訴狀已經佇 7 月 3 日收件,預定佇 10 月 22 日開庭。相信這个案件的判決結果,將為未來「Mac 相容電腦敢會使公開製造、販賣」𤆬來重大影響。

現此時 Psystar 公司的線上商店猶原咧賣 Open Computer (USD$554.99) 佮 Open Pro (USD$1,154.99),想欲買的朋友愛趁緊啊。

【老刀按】既然蘋果公司的「軟體許可協議」規定一定愛佇「有 Apple 標籤的電腦」鬥入 Mac OS X,按呢下跤 2 个狀況敢有合法,就交予逐家判斷:

  1. 有 Apple logo 就好:佇 Psystar 的電腦,抑是一般的 PC 頂頭貼一張 Apple logo(上好是用附佇蘋果電腦產品包裝內底的 Apple logo「官方版」貼紙)了後,才來鬥入 OSX86,按呢敢有合法?
  2. 無 Apple logo 安裝軟體:共 Apple 電腦頂頭的 Apple Logo 用砂紙磨掉了後來鬥入 Mac OS X(雖然電腦是 Apple 正廠血統,但就是差一粒 Apple logo),按呢敢有合法?

2008年7月14日

OpenVanilla 內底的「行列輸入法」說明文件

相信誠濟人已經知影,老刀是 OpenVanilla 行列輸入法表格的製作者兼輸入法模組的試驗者(但老刀並無正式加入 OpenVanilla Team)。前幾工佇咧瀏覽 OpenVanilla 關於行列輸入法的說明的時陣,發見有所在需要淡薄仔修正。所以就家己修改了一个版本,另外嘛佇 OpenVanilla 官方論壇頂懸留字,請管理者趕緊修改官方網站錯誤的部分。

下跤是我修改的版本,有興趣的朋友會使來參考看覓。另外,OpenVanilla Team 若認為無應該按呢搭,嘛歡迎來共老刀反映,我會來共下跤的部分改掉。

行列輸入法

行列 30 鍵版輸入法(以下簡稱為「行列輸入法」)為行列科技公司廖明德先生發明的高效率中文輸入法。與倉頡輸入法一樣,行列輸入法亦採用公開授權的方式,免費提供各家作業系統植入。

OpenVanilla 所包含的行列輸入法,是由廖先生鼎力提供 Unicode 3.1 字集的原始表格轉製,包含中(繁/簡)日韓漢字集共七萬餘字的對照檔。可惜目前 Mac OS X 10.4/10.5 內建的中文字型並未完全收錄完整的 Unicode 3.1 字集,故部分文字將無法顯示(或出現奇怪符號),這並非是 OpenVanilla 的問題;您只要另外安裝支援 Unicode 3.1 全字集的字型,便可正確顯示這些文字。此外,在行列輸入法規格書中,為方便使用者高速輸入文字、符號,另外定義了一些特殊功能,如二級簡碼、以 wildcard 字元(半形 *、?)簡易組字等,新的 OpenVanilla 0.8 版亦有支援。雖然 OpenVanilla 將行列輸入法設計為獨立的輸入模組。不過,OpenVanilla 的行列輸入法模組還是會與以類似泛用輸入法模組的方式,讀取一個基本的 cin 資料表格,這個表格同樣也是可由您自行依需要修改,並增加新的按鍵組合的,修改之後同樣會套用在您的輸入法環境中。修改表格的方法請參見手冊中「刪除、修改與設計自己的輸入法」部份。

如果您想瞭解、學習並體驗行列輸入法易學易懂、不需死記字根鍵位,與高效率輸入文字與符號的樂趣,請參考行列科技公司網站的「行列教室」。該公司網站並提供了一些與行列輸入法相關的參考資訊,如有興趣,歡迎前往瀏覽參考。

學習特別碼

當您在使用行列輸入時,是否常希望能用特別碼來加快輸入速度,但又記不得每個字的特別碼拆法,甚至連哪些字有特別碼都不清楚?「特別碼提示」和「快打模式」,就是設計用來幫助行列使用者學習特別碼的新功能。「特別碼提示」功能可以在您以正常輸入方式輸入完一個含有特別碼的字後,自動提示該字的特別碼,如此就可以從您最常用的文字開始練習,不必再死背整個特別碼表格了;而「快打模式」除了會自動提示特別碼外,還會強迫您一定要輸入特別碼,否則不會上字。

「特別碼提示」和「快打模式」的開關都可以在「OpenVanilla 偏好設定/個別模組設定/其他模組的設定/行列」找到;設定為 1 可以開啟、0 則是關閉。在 OpenVanilla 0.8 裡,「特別碼提示」預設為開啟、「快打模式」預設為關閉。如果您希望在「快打模式」和正常輸入模式之間切換時,可以在行列輸入的狀態下打入「8⇣8⇣2-0⇡」再按 SPACE 送出即可。

相關連結

Wikipedia 上關於行列輸入法的相關說明

2008年7月12日

7/11 老地方冰果室聚會紀錄

這禮拜老地方冰果室佇 Le Park Cafe 的例行聚會,Maxx 爸仔囝、Elsa 佮 Amy 誠早就到現場(老刀已經連紲幾禮拜無法度插頭香啊),提著一台白色 MacBook 的新朋友 Jimmy (efchang) 嘛真早到。過年偌久,大牛哥、阿勇阿貴父子佮足久無來參加聚會的好朋友阿鑫,猶閣有轉來台灣度假的音樂家超然兄到位了後,逐家就一直就開講落去啊。

這擺逐家的話題一直佇翕相機頂懸,聽大牛哥講起伊的輝煌紀錄,「聽君一席話,勝讀十冬冊」,「3C 少年」阿貴你愛來聽斟酌啊!隨後 Lisa 夯來頂禮拜拄買的新𨑨迌物 Nikon D60,一入場,文森、雅玲等一寡朋友誠佮意 D60 的輕巧,紛紛借來試翕。我的 D70s 就借「徒弟」Lisa,來佮試用 D60 的雅玲 2 位小姐對翕,一時 Le Park Cafe 2 樓誠是萬分鬧熱。

相關的影像佮文字紀錄,囥佇:

我的 flick 相簿(攏總 47 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年7月10日

iTunes 7.7 正式推出,附佮 MobileMe for Windows

就佇老刀預測 iTunes 7.7 連鞭就會推出了後,過無偌久,蘋果公司就真正推出 iTunes 7.7 版。下跤是蘋果公司的說明:
使用 iTunes 7.7 來與 iPhone 3G 同步音樂、視訊和其他項目,從 iTunes Store 下載專為軟體 2.0 或以上版本之 iPhone 和 iPod touch 設計的應用程式。同時,也可從 App Store 免費下載新的 Remote 應用程式(適用於 iPhone 或 iPod touch)來從家裡的任何角落控制 iTunes 播放。

另外,配合明仔載將欲推出的 MobileMe 線上服務,iTunes for Windows 安裝好勢了後,「控制台」內底會增加一个「MobileMe 喜好設定」的物件:
MobileMe-1

進入「MobileMe 喜好設定」的畫面:
MobileMe-2

看起來這个 MobileMe 嘛有支援 Windows,真是袂歹啊!至少佮較早的 .Mac 比起來,對 Windows 是友善誠濟啊!

備份 iPhone 的資料,傳入去 iPhone 3G 內底

距離 iPhone 3G 7 月 11 日佇全世界誠濟國家(但是無包括台灣)仝步販售的日子愈來愈近,蘋果公司嘛更新 iPhone 用戶共資料傳入去 iPhone 3G 的技術文件(事實上,已經是 1 禮拜內的第 3 擺更新)。計劃欲對國外搶一台 iPhone 3G 的朋友,會當來參考看覓。

另外,這篇文章有講著「iPhone 3G 需要 iTunes 7.7 以後的版本」。因為現此時 iTunes 上新的版本是 7.6.2,所以老刀認為官方的 7.7 版應該這幾工就會正式推出。另外,AppleInsider 這篇報導有評論 iTunes 7.7 preview 的功能(親像利用 iPhone 佮 iPod Touch 遙控 iTunes),結果如何,相信 7.7 正式版推出了後便知分曉。

2008年7月8日

解除 MacBook Air SuperDrive 的封印:改予其他電腦使用

雖然老刀並無買 MacBook Air,但是 MacBook Air SuperDrive 真媠的型體,老刀看了嘛是真佮意啊。就親像伊的名仝款,MacBook Air SuperDrive 是蘋果公司專門做予 MacBook Air 使用的光碟機,毋過已經有人利用換掉 MacBook Air SuperDrive 內底的 IDE -> USB 橋接電路板,成功予伊接佇別款型體的 Mac,甚至是 HP 的 PC 頂頭使用。有興趣的朋友,會使參考這篇文章改裝過程的翕相

這片 IDE -> USB 橋接電路板只要 9 箍米金,講起來價數嘛算合理,上讚的所在是這个網路接受台灣的訂單(運費愛另外付),所以有需要的朋友會當考慮來共訂貨。毋過老刀認為:因為橋接電路版並無用著傷高深的技術,所以佇台灣只要骨力小可仔,加問幾間電子零件店,抑是透過 Yahoo! 奇摩、露天拍賣這款網站,應該會當找著仝款寸尺的橋接器來替換。改裝成功的朋友,一定愛留字報予老刀知影啊!

2008年7月6日

7/04 老地方冰果室聚會紀錄

這擺老地方冰果室的聚會嘛真鬧熱。Alex Tsai 誠早就到位,希望老刀會當接受專訪,順紲來共敗家網「歡欣年中慶.滿千就狂抽」活動抽出好運中籤的朋友;中獎的名單,應該這幾工就會公布。

這擺聚會的重點,當然就是朋友 Lisa 小姐新買的 Nikon D60 kit 提來 Le Park Cafe 現場予逐家翕開箱相片(歡迎你加入 Nikon 家族啊),結果老刀好運,得著這个開箱翕相的機會,當然嘛愛翕一寡相片來做紀念。最後 Lisa 嘛誠大方做起 model,當然現場眾朋友愛用翕相機的快門熱烈回應啊!親像下跤這張:

人媠,真是按怎翕攏媠。少年誠好!

除了接受老蔡訪問佮抽獎以外,老蔡嘛提來 WD 的 My Book Home Edition 懸到 1 TB 超大空間的外接硬碟予老刀寫試用心得。這篇測試文應該連鞭就會推出,有興趣想欲買外接碟的朋友,請期待老刀的試用心得。

可惜因抽獎、翕樣品相片用了一寡時間,所以這擺相片並無翕傷濟。另外這擺來參加的新朋友 Elsa 小姐,老刀並無佮伊講著啥物話,希望後擺伊有機會閣來 Le Park Cafe 開講佮逐家熟似。

相關的影像佮文字紀錄,囥佇:

我的 flick 相簿(攏總 20 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年7月3日

Pidgin 2.4.3 更新推出!

老刀佇 Windows 佮 Linux 下跤定定愛用的多用途開講軟體 Pidgin 今日推出 2.4.3 版啊。這擺的更新主要是 libpurple(Pidgin 所使用的函式庫)佇 Yahoo! 下跤改用 UTF-8 文字編碼,佮修正一寡佇 Yahoo! 內底的問題;另外嘛修補真濟記憶體配置的破空。詳細的修正紀錄佇遮

有咧使用 Pidgin 的朋友,建議去掠來更新吧。

2008年7月1日

Nikon 推出 D700 新款翕相機、SB-900 閃光燈,佮一寡物件

Nikon 傳說中的新款數位翕相機 D700 終於佇今日正式發表(會當來參考 Nikon 的新聞稿),全幅的 D700 雖然是定位佇中階機種,但是有佮 D3 仝款的 12.1 MP(百萬畫素)的 CMOS、仝款的 ISO 範圍 (200-6,400),有 1 秒 5 張的連紲翕相速度(D3 是 1 秒 9 張)、觀景窗的放大倍數 0.72x 是比 D3 的 0.7x 佮大、定價是 2,999 箍米金(D3 是 4,999 箍)。比起老刀身邊的 Nikon D70s,差一个 "0" 實在是差天差地啊。

另外 Nikon 嘛推出新一代的頂級閃光燈 SB-900新聞稿佇遮,定價 499 箍米金)。比起前一代的 SB-800,上大的改進是 24-105 mm 的鏡頭焦段範圍、比 SB-800 閣較緊 25% 的回充速度、會使 360 度轉踅的燈身、韌體 (firmware) 會使家己更新,莫怪是上頂級的物仔。毋過 SB-900 比 SB-800 較大小可,定價嘛較懸,所以趁這陣 SB-800 猶有庫存的時陣趕緊去買一台來囥,嘛是袂歹的選擇。

另外,Nikon 嘛推出 2 款 PC-E 系列的鏡頭:PC-E Micro 45 mm f/2.8D ED(定價 1,799 箍米金)佮 PC-E Micro NIKKOR 85mm f/2.8D(定價 1,739 箍米金),有興趣的朋友,會使來參考怹的新聞稿

2008年6月30日

Adobe Acrobat 9 Pro 開始出貨

Adobe 進前已經發表的 Acrobat 9 Pro 終於對今日開始出貨啊,定價 449 箍米金,舊版升級價 159 箍米金;閣較高級的 Acrobat 9 Pro Extended 定價是 699 箍米金、舊版升級價是 229 箍米金。

Acrobat 9 家族有 Reader、Standard、Pro、Pro Extended 4 種版本,想欲瞭解到底差佇佗位的朋友,會當來遮參考

2008年6月28日

蘋果更新 PowerBook G4 主機板延長保固計畫

猶咧使用尾代 PowerBook G4 (15 吋 1.5/1.67 GHz) 的朋友一定愛注意這件報導。針對尾代 PowerBook G4 記憶體插座故障的問題,蘋果公司最近更新了怹的 PowerBook G4 主機板延長保固計畫

萬一你的 PowerBook G4 若是佇 2005 年 1~4 月出廠(機身序號對 W8503xxxxxx 開始,到 W8518xxxxxx),而且發生下跤的問題:
  • 電腦無法度開機,而且「睏眠」燈號一直閃熠中間發出 3 个嗶聲。
  • 插入 2 支記憶體的時陣,只有掠著其中 1 支的容量。
  • 系統效果嚴重降低(因為只有掠著 1 支記憶體的關係)。
就愛趕緊送去離你上近的蘋果維修站去換主機板啊。

這是全球性的維修計畫,而且購買 2 冬內的 PowerBook G4 攏會當應用這个計畫,無論是毋是已經超過原來的保固期間。進一步的說明,請看蘋果公司維修計畫網頁的說明。

2008年6月26日

微軟共 Windows XP 支援服務延長到 2014 年

來自這篇報導微軟公司終於有聽著逐家的要求,答應欲延長提供 Windows XP 安全性更新的支援服務到 2014 年 4 月。但是將欲佇今年 6 月底停止販賣 Windows XP 的計畫並無改變;也就是講,到時等市面上 Windows XP(包括零售版佮隨機版)的庫存銷煞了後,到時人客就只存 Windows Vista 會當選擇啊。

最近若有計畫欲買新 PC,抑是想欲佇 Mac 頂頭灌 Windows XP 的朋友,上好趁月底進前去搶一套轉來用啊。

2008年6月25日

拆掉 Apple MacBook Air SuperDrive 改內接

吸入式光碟機佇零售市場應該是罕得看著的產品。但是因為 Apple 除了 Mac Pro 以外的電腦攏有用著伊,若拄著光碟機歹去,抑是想欲共 combo 換機變做 SuperDrive 的時陣,這款零件並無好找啊(尤是是掛蘋果牌子的)。所以國外這篇報導,就是提 Apple MacBook Air SuperDrive 來開刀,拆出內底 12.5 mm 厚度的光碟機,改鬥入去 MacBook Pro 17" 內底(大部分的 PowerBook G4 應該嘛會當用這台光碟機)。毋閣原作者有講著:MacBook Pro 15" 佮 MacBook 所用的光碟機需要較薄小可仔 (9.5mm) 的型體,想欲改裝的朋友一定愛注意。

看著阿啄仔這篇文章了後,老刀連鞭就去 Yahoo!奇摩拍賣查看敢有人咧出貨。毋看便罷,看甲心肝頭的擽蟲又閣沓沓仔咧振動啊,哈哈。

2008年6月24日

Mac 硬碟敢有需要做「磁碟重組」?

相信這擺這个題目,應該是有經驗的 Windows 使用者拄使用 Mac 上定定問著的問題之一。可能是親像這款新的用戶愈來愈濟,所以蘋果公司就整理這个問題,囥佇怹上新的技術支援文件內底。
這篇文件,大約說明了為何 Mac OS 擴充格式 (HFS+) 毋免做磁碟重組的幾个理由:
  • HFS+ 格式會盡量避免占用硬碟內底捌記錄過資料的所在,以避免仝 1 个檔案分散佇幾若位。嘛因為這幾年出產的硬碟空間實在傷大,一般來講除了你的硬碟空間已經得欲客滿,硬碟資料並傷濟機會去寫入記錄過資料的所在。【6/25 老刀按:幾个月前「陳冠希事件」會來發生,就是 Mac OS X 袂共資料寫入去捌予其他資料(也就是「精彩影片)占用過的所在所引起。毋知影蘋果公司敢愛負道義責任?】
  • Mac OS X 10.2 以後的磁碟卷宗有「延遲寫入」(delayed allocation) 的功能。拄著有一寡小檔案欲記錄的時陣,會累積到一个量以上才做一擺寫入去較大的記錄區,所以嘛誠少會拄著檔案分散的問題。
  • 檔案分散的情形,定定發生佇已經加添新資料佇存在的檔案頂頭。所以一寡較新應用軟體佇設計階段就會考慮著這个狀況,共資料檔案規个重寫佇別位;而且對 Mac OS X 10.3 (Panther) 開始,系統已經有自動重組小檔案的功能,所以嘛會當減少發生檔案分散的機會。
  • 這陣電腦佮硬碟本身攏有配備快取記憶體,會當減少讀寫硬碟的機會;按呢檔案分散對降低整體效能的影響,就會使減到上低。
萬一你的硬碟空間若是已經無夠用,建議先備份重要資料佇外接硬碟、重灌一擺 Mac OS X,然後閣再共備份的資料拷貝轉來,嘛是會當得著磁碟重組的目的;抑是利用其他廠商推出的磁碟重組工具軟體較省事,但是愛另外傳小可仔費用來購買。

2008年6月21日

瀏覽器擂台戰:Firefox 3 對 Opera 9.5,佮 Safari 3.1.2 for Windows 更新

這幾日幾个瀏覽器廠商的動作實在嘛誠濟。Opera 9.5 頂禮拜才推出無偌久,這禮拜 Firefox 3.0 嘛紲來推出,最近 CNet 就對這 2 款瀏覽器的性能(速度佮記憶空間)做了比賽。試驗的方法,是先共這 2 个瀏覽器「淨身」(卸掉所有的 plug-ins),然後開 15 个頁面標籤來做比較:
  • 完成 SunSpider JavaScript 試驗的時間:Firefox 5,500 ms/Opera 7,280 ms(Firefox 勝)
  • 開 15 頁占用記憶體的空間:Firefox 127 MB/Opera 117 MB(Opera 勝)
看來是半斤八兩,各有優點啊。

另外,蘋果公司共怹的 Safari for Windows 做了安全性的更新,推出 3.1.2 版

2008年6月20日

Firefox 3.0 大當機?

(頂圖:Firefox 3.0 當機死翹翹)


我想,這禮拜電腦界上熱門的話題應該就是 Firefox 終於結束試驗,正式來推出第 3.0 版。我公司的 PC 佮厝內的 iMac 嘛攏已經共 Firefox 升級好勢。毋過佇厝內的另一台 Windows PC 升級 Firefox 雖然安裝有成功,但一直無法度執行(會跳出頂懸的圖)。進前 Firefox 3.0 beta 佮 RC 版佇這台 PC 使用攏是正常,顛倒正式版竟然會出這款問題,真是有夠奇怪!

萬一你嘛老刀仝款歹運,Firefox 嘛發生這款的代誌,決定欲成立「Firefox 當機【枵飽吵】自救會」的時陣,一定愛報我知影哦!

【6/21 補充】老刀已經共 Firefox 3 死翹翹的問題找出來呀。原因是進前佇舊版 Firefox 所安裝的附加元件咧創空。解決的方式是:

  1. 先共 Firefox 3 刣掉(控制台 -> 新增或移除程式)。
  2. 拍開「檔案總管」,入去共 "C:\Program Files\Mozilla Firefox" 內底的物件攏總拖入去「資源回收筒」結果掞掉。
  3. 重新安裝 Firefox 3。

2008年6月18日

共 iMac 娶入門

因為老刀身邊對 2001 年就服務到今的古董 PowerMac G4/733 已經有 7 歲啊,一寡新軟體無法度使用實在予老刀誠頭痛。所以當蘋果公司佇今 (2008) 年 4 月發表採用 Intel Core 2 Duo (Penryn) 處理器的新款 iMac 了後,老刀就一直有計畫想欲共古董 G4 退休(請參考這篇報導)。

自從頂禮拜老刀下決心去蘋果優仕訂 iMac 了後,終於佇禮拜日共數想真久的 iMac 迎娶入門啊。感謝頭家 Randal 鬥相共,共內接硬碟換做 500 GB、RAM 嘛加到 4 GB(有意思換硬碟的朋友,服務費用請佮櫃檯參詳)。對老刀來講,已經是有夠實用啊。

老刀嘛共開箱的過程翕做相片,囥佇 Flickr 翕相簿內底。歡迎逐家入來參觀啊。最後,這擺逐家有開箱相片看,愛感謝朋友兼好厝邊 qv90 共伊的 Canon IXUS 85 IS 借予老刀翕相,踮這个所在共伊說一聲多謝。

2008年6月14日

歇禮拜,來聽歌:老刀精選 (12) - "High on You" by Survivor

真久無來共逐家介紹我所愛的搖滾歌曲矣。除了這段時間禮拜日較無閒以外,老刀家己貧惰嘛是有加減啦。拄好前幾工朋友「金屬頭」佇遮留字講著進前介紹 Def Leppard 的代誌,老刀才驚覺竟然已經 2 个月無閣再介紹歌曲啊!明仔載欲迎接新買的 iMac 轉來厝來,看來嘛是愛閣舞規工。所以就趁這陣禮拜六暗時,來介紹 Survivor 這个老刀誠佮意的搖滾團體予逐家欣賞。

Survivor 是佇 1977 成立的米國 AOR (Album-Oriented Rock/Radio) 搖滾團。這个團吉他手 Frankie Sullivan、鍵盤手 Jim Peterik(現此時已經離團)為中心,歌路行 hard rock 的路線。一開始 Survivor 並無受著傷濟人注意,毋過怹世命中的貴人,米國 Hollywood 的動作巨星 Sylvester Stallone 聽著怹第 2 塊專輯的單曲 "Poor Man's Son" 了後驚為天人,加上 "Survivor" 這个團名佮伊主演 Rocky(洛基)系列影片的性質嘛有四配,所以特別邀請當時猶無啥出名的 Survivor 寫一調仝款歌路的作品,來予 Rocky III 做電影主題曲,就是後來逐家攏知影的 "Eye of the Tiger" 啦!隨著 Rocky III 影片大賣,主題曲 "Eye of the Tiger" 嘛變做是怹的招牌曲。捀著 Rocky 電影的福氣,怹第 3 塊專輯嘛號名做 Eye of the Tiger,一路升到米國專輯榜第 2 名的位置,是一塊誠成功的作品。

可惜怹紲來 1983 年發表的專輯 Caught in the Game 成績普普,就佇予人懷疑怹是毋是「1 片團體」(老刀按:「1 片歌星」、「1 片團體」佇台灣親像特別濟啊,呵呵)的時陣,1984 年新主唱 Jimi Jamison 的加入,替 Survivor 帶來後壁幾年的好光景。第 5 塊專輯 Vital Signs 再度共逐家證明,毋免靠 Rocky 電影,怹仝款會當做出好作品。我這擺欲介紹的歌曲,就是選自 Vital Signs 內底單曲的 "High on You",佇 1985 年春天得著米國排行第 8 名的好成績。這調歌的 MV 佇下跤:



另外,因為 Survivor 的團員一直咧變動,所以老刀就無詳細寫出啊。想欲瞭解 Survivor 的歷史佮作品,會使參考:
  • Survivor 官方網站,佇內底會當試聽 Survivor 全部專輯的所有歌曲(Real/WMA 格式)。當然囉,想欲有閣較好的音質,去買死豬 (CD) 來聽就著啦。
  • Wikipedia 內底嘛對 Survivor 做了真詳細的介紹,佮意怹的朋友,應該愛入去讀看覓。

2008年6月13日

蘋果阿露米(鋁)鍵盤佇 Boot Camp 下跤的對應

蘋果公司今日推出一篇新的技術支援文件,有關蘋果鍵盤佇 Boot Camp 下跤(抑是直接提去 PC 鬥來用)的特殊功能,終於有了正式的官方支援。親像 PC 鍵盤的 "PrintScreen" 對應佇 fn + shift +F11 等,建議 PC/Mac 攏有咧用的朋友,趕緊印落來參考。

另外,這篇文件可惜並無提著這陣時行的「多媒體」PC 鍵盤所加出來物件,親像「音量大」、「音量小」、「靜音」對應的情形(有心欲試的朋友,會當家己試看覓),希望蘋果後一版文章改寫的時陣,會當來共伊收入。

2008年6月12日

6/13 老地方冰果室聚會通知

雖然阿啄仔講新曆 13 拄著禮拜五並毋是好吉兆,但是老地方冰果室佇 Le Park Cafe 舉辦的例行聚會,是予鄧老闆最後一擺共逐家服務。因為未來的人生規劃,鄧老闆決心欲共心愛的 Le Park Cafe 交予有仝款理念的朋友繼續經營。想欲來去找舊頭家開講的朋友,6/13 的例行聚會是你最後的機會啊。

鄧老闆佮牽手佩珊小姐,到時陣會準備一寡水酒、點心佮眾朋友分享,當做是拜別朋友的留念。想欲了解進一步的消息,會當來參考老地方冰果室交流區的相關討論

老刀訂 iMac

老刀做了一个重大決定:終於欲予服務 7 冬的 PowerMac G4/733 退休,改換新款的 20" iMac 2.4 GHz規格佇遮)。想起當初時,這台 G4/733 是用「血汗」所換來的(熟似老刀的朋友,應該攏聽我講過這段故事),惜情、惜物的老刀一想著遮,嘛是有小可仔毋甘啦。

昨日來去八德路的蘋果優仕訂新電腦,現此時怹推出「加 999 箍新台票共 RAM 灌甲飽 (4 GB)」的活動,實在有夠贊。想欲換機的朋友會使來參考看覓。另外,我嘛決定共 iMac 出機所附的 250 GB 硬碟換做 500 GB,按呢會較實用。毋閣老刀因為最近較無盈,只好佮優仕約束欲佇禮拜日領機,想欲看開箱文的朋友,請閣再稍等幾工。

2008年6月10日

WWDC 2008

這擺蘋果一如預料,佇「2008 年全球開發者研討會」(World-Wide Developers' Conference (WWDC), 2008) 發表新版的 iPhone 3G(有烏、白 2 款外殼)、iPhone SDK 佮 iPhone 2.0 軟體。因為進前相關消息已經佇產業內底流傳誠久,這擺發表產品予人的驚喜,並無像較早遐爾大啊。

蘋果公司嘛宣布後一版系統 Mac OS X 10.6 (Snow Leopard) 的相關消息,到今為止已經知影的特點有:
  1. Mail、Address Book、iCal 有支援 Microsoft Exchange Server 2007。
  2. Grand Central,會當共多核心 CPU 的性能完全發揮。
  3. 64 位元系統,上大會當支援到 16 TB 的記憶空間。
  4. QuickTime X。
  5. OpenCL (Open Compute Library),利用 GPU 優良的性能,負擔一部分原本是 CPU 愛做的工作,予軟體的執行速度猶閣較緊、較順。
另外,蘋果公司嘛推出 QuickTime 7.5 更新,雖然表面上是修正一寡安全性的問題,但我認為蘋果發表這个版本的主要用途,佇咧支援新款的 iPhone 3G 佮 iPhone 2.0 軟體頂頭。

2008年6月8日

台北 2008 國際電腦展場(南港展覽館)直擊

這擺台北 2008 國際電腦展 (Computex Taipei 2008) 分做世貿 1、2 館佮南港展覽館(1樓、4樓)3 位同時舉辦,嘛是今年 3 月南港展覽館開幕以來,所舉辦的頭一場電腦、3C 類展覽。因為地緣的關係,這擺老刀 6/07 禮拜六早起特別來去南港展覽館參觀。

這擺國際電腦展覽的訴求,是針對國外客戶大宗採買的展覽(所以嘛有一寡阿啄仔廠商來遮擺擔),6/07 當日雖然有對民眾開放參觀,但並直接販賣產品,所以雖然看袂著親像 7 月、12 月電腦展彼款親像菜市仔的鬧熱。事實上,老刀認為按呢的參觀品質,才真正算做是有夠國際水準的商展。

因為這工下晡老刀另外有代誌欲辦,時間所限的關係並無翕偌濟相片,但是展示場的媠姑娘嘛是有翕著一寡啦。想欲來看媠的朋友,會當來遮參考:

這擺展覽所翕的相片(攏總 38 張)

2008年6月6日

重建 iTunes 音樂資料庫

今日蘋果公司更新「重建 iTunes 音樂資料庫」的技術支援文件,簡單來講,方法是:
  1. 共 iTunes 音樂檔案夾內底的 "iTunes Music Library.xml" 拷貝一份佇桌面。
  2. 刣掉 iTunes 音樂檔案夾內底的 "iTunes Library" 檔案。
  3. 拍開 iTunes,佇「檔案」選單內底找到 「輸入…」(Import),目標選佇桌面頂懸的 "iTunes Music Library.xml"。
蘋果公司的原文佇遮

2008年6月5日

Mac OS X 的 Kernel Panic

佇 Unix、Linux 這款的作業系統內底,為著欲幫助開發者瞭解系統的安全性佮穩定性,佇作業系統袂當回復的錯誤(也就是逐家咧講的「當機」,大部分的情形是系統收著無正確的指令、抑是應該愛正確處理的動作紲來執行失敗等)發生進前的最後一刻,會來顯示一寡有用的參數,親像處理器的暫存器數值、錯誤發生的記憶體位址……等資料,以方便開發者找出問題佇佗位。電腦用詞共這个「袂當回復的錯誤」叫做 "kernel panic"。

Kernel panic 會來發生,定定是因為使用著歹去抑是無相容的硬體、軟體所造成(親像,插入歹去的記憶體模組)的,這个名詞的來源,是因為這个予系統「著驚」(panic) 的錯誤是對核心 (kernel) 發起的。另外,因為 kernel panic 的顯示的參數對大部分使用者並無啥物意義(因為伊本來就是設計欲予開發者看的),可能是避免使用者看甲「著驚」,蘋果公司就共 kernel panic 重新包裝,變做下跤這个畫面:

Kernel Panic of Mac OS X


就是逐家咧講的「四國語言」畫面啦。後擺你若看著這个畫面,千萬毋通閣再著驚啊!

蘋果公司最近整理了 Mac OS X 10.0-10.5 系統的 kernel panic 相關說明,有興趣的朋友,會當來這个所在參考。

2008年6月4日

Mac OS X 設定 Windows 檔案分享(官方版)

佇 Mac OS X 下跤,這个問題應該算是 FAQ (Frequently Asked Questions) 等級的水準。你可能嘛已經知影按怎設定,而且已經使用誠久啊。蘋果官方最近更新技術支援文件資料庫,並且共這个問題的解決方式囥佇遮。你若是拄開始用 Mac OS X 的生手,抑是試半晡攏設定袂好勢的朋友,會使來參考看覓。

2008年6月3日

Mac OS X 10.5.3 已經共 SCSI 硬碟讀寫的問題修整好勢

舊年老刀捌報導過 Adaptec PowerDomain SCSI 卡佇 Leopard 閣再回春的消息。毋閣有時陣佇 Mac OS X 10.5 (Leopard) 下跤掠著的 SCSI 硬碟,只會使讀資料 (read-only),並無法度寫入。

來自 Accelerate Your Mac 的這篇消息講著,上新 Mac OS X 10.5.3 已經解決這个問題。猶有咧用舊的 Adaptec SCSI 卡的朋友,會當來試看覓啊。當然囉,驅動程式你愛家己對 Adaptec 網站掠來灌啦!

2008年6月2日

MAME OS X (1) - 古董𨑨迌物的新救星

你若親像老刀仝款,是有一寡年歲的「老伙仔」,細漢的時陣應該攏加減仔有耍過擺踮路邊、店頭的落銀角機仔(投幣式機台)。少年時代的老刀,毋知影予老爸、老母拍過幾擺,拼死嘛欲落銀角仔入去內底啊,哈哈。曾經陪老刀度過少年日子的經典,親像古早(1980 年前後)的「青蛙過街」(frogger) 一直是老刀永遠無法度放袂記得的最愛,其他猶有「小蜜蜂」(Galaga)、「坦克大戰」(Tank Battalion)、小可近期(1990 年前後)的「泡泡龍」(Bubble Bobble)、「快打旋風」(Street Fighters) 等等。遮爾濟物仔,這時想起來實在會予人擋袂牢想欲大戰伊 300 回合才會甘願。

熟似老刀的朋友應該嘛知影,老刀足濟冬以前,捌寫過 MAME 系列模擬器佇電腦耍這寡古董𨑨迌物仔的文章(親像這篇 MacMAME 使用者指南漢譯本)。幾年後的 2008 年,較早使用的 MacMAME 對 2006 年以後,就無閣再無推出新版(最後一个版本是 0.103u2)。相對 4-6 禮拜就更新一擺主要版本的 MAME,現此時已經出到 0.125 版),這嘛表示已經有真濟 MAME 系列支援的古董𨑨迌物仔無法度佇 Mac OS X 頂懸進行矣。

好佳哉隨著 MAME OS X 計畫的出世,已經解決頂頭的狀況。佮 MAME 官方授權移植的 MacMAME 無仝款的所在是,MAME OS X 完全是 Mac 程式員 Dave Dribin 家己發起的計畫,為著欲看著心愛的古董𨑨迌物仔佇 Mac 重現,只好重新來過一擺。嘛是因為按呢,MAME OS X 會當利用著 Mac OS X 的特點,親像「核心影像」(Core Image) 等等,來予 MAME OS X 有比 MacMAME 閣較贊的畫面處理。

廢話減講,請趕緊來去 MAME OS X 計畫網站掠 MAMEOSX-0.124.dmg 轉來。解開了後就共伊囥佇「應用程式」檔案夾內底,然後共掠來的 ROM 佮 samples 檔案囥佇:/使用者檔案夾/資源庫/Application Support/MAME OS X/ 的「ROMs」、「Sound Samples」2 个檔案夾內底,就會當拍開 MAME OS X 來𨑨迌啊!

最後附一張 MAME OS X 的圖面,當然是我上愛的 frogger 畫面:

frogger

話講倒轉來,MAME OS X 到底欲按怎使用?因為時間的關係,老刀暫且講到遮,其他紲待後擺閣再來講吧,敬請期待。

2008年6月1日

5/30 老地方冰果室聚會紀錄

這擺老地方冰果室禮拜五暗時的例行聚會,因為落大雨的關係,我難得駛車來參加聚會。本來是有想欲共 iBook 提出來去 Le Park Cafe 上網,可惜佇出門進前更新 OS X 10.5.3 失敗,變做無法度開機,只好共伊囥佇厝內歇睏啊。

對大陸轉來的 Clara,提著「XO 豬肉乾」佮一寡點心來予逐家分享;另外嘛有真久無來的阿鑫、文森佮新朋友雅玲、五樣、阿錦佮查某朋友 Kelly、Alex Tsai、詹姆士等人來參加。雖然外口落著大雨,但是逐家佇 Le Park Cafe 2 樓嘛是誠歡喜來開講啦!

相關的影像佮文字紀錄,請參考:

我的 flick 相簿(攏總 43 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年5月31日

幾个有關 SSD 硬碟的新聞

來自 PC World 的這篇報導講著,希捷 (Seagate) 公司的執行長 Bill Watkins 透露怹的第 1 个 SSD 硬碟產品將佇明年上市(嘛順紲透露講,怹的 2 TB 硬碟嘛欲佇明年推出),毋閣推出日期佮價數偌濟並無進一步宣布。

另外這篇來自 vnunet 的報導英特爾 (Intel)、美光 (Micron) 2 間公司將佇今 (2008) 年後半年推出 34 nm(奈米)製程的 32 Gb NAND 多層晶片。Intel 的 NAND 產品事業群的行銷主任 Pete Hazen 補充講,有了這片目前是全世界上小的 NAND 來共 SSD 硬碟肚量加倍,連鞭就會當來突破 256 GB。老刀認為,嫌講 SSD 硬碟腹肚無夠大粒的人,會使考慮共喙窒起來呀。

2008年5月27日

ATX 電源改予 PowerMac G3/G4 使用

相信大部分的使用者攏會同意,蘋果公司的 PowerMac G3/G4 是真「粗勇」的電腦。毋閣萬一若拄著電源歹去的時陣,足貴的修理費用,絕對會予代誌變甲足大條啊!

Accelerate Your Mac 今日介紹的 ATXG4 網站,應該是真濟 PowerMac G3/G4 使用者之福。這个網站內底提供真豐富的資料,教逐家按怎共 PC 的 ATX 電源改裝予 PowerMac G3/G4 使用,順紲予你的錢袋仔莫變傷薄,這款站長實在有夠好心啊。另外,站長伊家己嘛有做 ATX -> PowerMac G3/G4 電源的轉接線咧賣,可惜並無對米國以外的所在出貨。毋知影佇米國的朋友,敢有興趣來發起集體購買?

教育部母語(閩南語、客家語、馬祖福州語)創作獎徵稿

現此時教育部國語會當咧舉辦母語創作獎徵稿活動,到 2008 年 6 月 15 日為止。創作獎分做閩南語、客家語、馬祖福州語 3 款,對象有「教師組」、「大專院校學生組」佮「社會組」3 種。另外,邀稿的文類分做「詩」、「散文」佮「小說戲劇」3 款。

想欲進一步瞭解活動消息,抑是有興趣參加徵稿的朋友,歡迎共報名簡章掠轉來參考:

老刀鐵馬遊記 (2) - 基隆河汐止、內湖段

頂禮拜騎了五堵、汐止這短短一段基隆河邊了後,紲落來老刀頂禮拜六家己一人順著基隆河邊,騎入去台北市練跤腿力。雖然沿途風景真媠,但因為並無啥人咧騎的關係,白鷺鷥等一寡水鳥徛踮河邊掠魚仔,飛來飛去並無予人驚擾。所以這擺老刀就一爿沓沓仔騎車,一爿來欣賞景色、毋免驚去撞著別人啊。

佮較早租車騎淡水河的經驗比起來,基隆河的風景猶閣較媠,毋閣可能是知名度不如淡水河跤踏車道的關係,來遮騎車的人加足少。大部分的時間,老刀頭前、後壁攏無看著人,實在有「千山我獨行,不必相送」【老刀註:這是港片「楚留香」的歌詞尾句】的氣勢啊!哈哈。

這擺老刀沿路所翕的相片攏囥佇遮

2008年5月25日

5/23 老地方冰果室聚會紀錄

這擺老地方冰果室逐禮拜五暗時舉辦的例行聚會,因為老蔡進前就有放風聲講,上奇公司(真濟款數位畫圖軟/硬體設備的國內專業代理商)的 Sylvia 黃經理欲來展示 Wacom Cintiq 12WX 液晶數位板,結果一寡誠久無看著的朋友,這擺就攏總出來「全員集合」!

老刀佮較早幾擺聚會仝款,佇 7 點左右入場。毋過來到 Le Park Cafe 2 樓的時陣,現場就已經足鬧熱啊。足久無看著的朋友,親像將欲升大學的「資訊少年」魏藥、掠影專家大牛哥、浮爺、拄出冊的暢銷作者五樣,猶閣有小白小姐(聽伊講欲換新頭路啊,所以會當來參加這擺聚會)、喵小相 (heyer)、貓頭兄、「大雄哥」佮 2 位古錐的查某囝、jimmy1019、paper,加上定定出現的「固定班底」阿清、詹姆士、木村、阿錦(佮朋友 Kelly 鬥陣)、aks,以及活動發起人老蔡等人,予這擺聚會變做是鬧熱的老地方同窗會啊。

當然老刀袂使錯過這个機會,趕緊來翕一寡相片予無緣參加的朋友欣羨一下。

相關的影像佮文字紀錄,請參考:

我的 flick 相簿(攏總 53 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2008年5月24日

AMD-ATI 推出顯示卡驅動程式 Catalyst 8.5

AMD-ATI 拄共怹的 Windows/Linux 顯示卡驅動程式 (Catalyst) 更新到 8.5 版。你的電腦若有 ATI Radeon 9500 抑是閣較新的顯示卡,就會當來升級這个版本(包括透過 Boot Camp 咧使用 Windows 的 Mac 用戶)。新的 8.5 版主要是增加影音方面的支援,親像:
  1. 支援 480i、480p、1080p24 模式。
  2. 支援 SECAM TV 視訊輸出。
  3. 非標準 TV 模式的 HDMI 音訊。
  4. 支援 Windows XP SP3。
  5. 提升顯示效能,特別是咧耍𨑨迌物的時陣。
  6. 修正一寡舊版驅動程式所發見的問題。
想欲詳細進一步了解 Catalyst 8.5 改進啥物的朋友,會使來參考伊的 Release Note:

2008年5月23日

水冷、恬恬袂吵的 PowerMac G4 (MDD)

第尾代的 PowerMac G4 鏡面機種 (MDD) 因為有袂歹的性能佮好的擴充性,所以一寡用戶猶毋敢改換 Intel 處理器的新機種。毋閣 MDD 親像「蠓仔踮耳空邊飛來飛去」的風扇運轉聲,實在是予人無啥爽快的使用經驗。

Accelerate Your Mac 貼出一篇水冷式的 PowerPC G4 CPU 散熱組合樣品的相片,這組水冷式的套件是 Danger Den 當咧開發的新產品。雖然猶袂開始賣,但是聽怹說鬥好了後,規組電腦上吵的部件變做是 nVidia 顯示卡頂懸的小風扇,但是音量並袂超過 30 dB。看起來 CPU 降溫予風扇停止,對消除運轉噪音來講,應該是有效的治本方法。

這篇報導佇遮。猶咧使用 MDD 的朋友,會使考慮買一組來鬥看覓。

2008年5月22日

Office 2007 明年將欲支援 ODF 佮 PDF

來自 ComputerWorld 的報導微軟公司昨日正式宣布,怹預定欲佇 2009 年前半年推出的 Office 2007 Service Pack 2 (SP2) 將欲支援 ODF (Open Document Format for Office Applications) 佮 Adobe 的 PDF 文件格式。到時陣 PDF 1.5、PDF/A、ODF (Version 1.1) 佮 XPS(XML Paper Specification,這是微軟公司制定、親像 PDF 仝款的可攜文件格式)攏會收入佇 Office 2007 支援的文件名單內底。

微軟公司這个動作,無形中嘛夯懸 ODFOffice Open XML 這 2 種開放格式文件的競爭。ODF 是昇陽公司 (Sun Microsystems, Inc.) 佮 IBM 做伙提出的開放文件格式。佇 2006 年 5 月,ODF 已經予 ISO 接受變做國際標準;Open XML 是 2007 年 4 月才予 ISO 接受。毋閣微軟公司並無講欲原生支援 (natively support) ODF 格式,到時陣可能會提供轉譯工具,提供 ODF 佮 Open XML 格式的互相轉換。

另外,其實 Office 2007 佇開發階段就有支援 PDF,但當時因為制訂 PDF 格式的 Adobe 公司反對,結果微軟決定共 PDF 佮 XPS 的支援囥踮一邊。現此時 PDF 嘛已經變做 ISO 標準,PDF 佮 XPS 的支援終於會當來宣布「解禁」。

對手陣營之一的 IBM 公開表示講,這代表使用 ODF 文件已經愈來愈受著重視,怹支持微軟公司的決定。

2008年5月21日

Seagate Showcase 產品線,拍入家庭數位影音市場

希捷 (Seagate) 公司佇米國 NCTA (National Cable & Telecommunications Association) 舉辦的 2008 年有線電視展示會發表新的 Showcase 產品線,搭配數位錄影機做伙使用,會當大大延長影片放送的時間;另外,摩托羅拉 (Motorola) 嘛頭先發表有 e-SATA 支援的高畫質 (HD) 數位錄影機,拄好佮支援 e-SATA 的 Seagate Showcase 鬥對擔。

Showcase 提供上濟 1 TB 的超大空間,會使錄 200 點鐘的高畫質 HD 影片,抑是 1000 點鐘的標準畫質電視節目。為著欲應付高畫質的即時影音錄影的需要,Seagate 採用怹最近發表的 Pipeline HD 家族的硬碟佇 Showcase 內底,予你有「囥踮床邊看影片」的安靜,嘛兼顧省電,佮仝時間處理 12 个高畫質資料流 (HD stream) 的強大功能。Showcase 已經得著 Windows Vista 的認證。

預定將佇 2008 年第 3 季開始販售的 Seagate Showcase 有 250/500/750/1000 GB 的空間,用戶會使選擇欲買 USB 2.0 抑是 e-SATA 的型體。想欲進一步了解的朋友,會使來參考Seagate Showcase 的新聞稿

2008年5月19日

老刀鐵馬遊記:五堵、汐止基隆河段

老刀較早有幾擺佮厝邊、朋友做伙去台北市租跤踏車遊淡水河,運動兼練腿力,顛倒佇厝附近的汐止自行車道毋捌去試騎過。其實五堵、汐止佇基隆河邊的跤踏車道,佇舊年底就已經佮台北市南港、內湖段相接;所以對五堵火車頭後壁開始,順基隆河一直騎落去,就會當一路騎經過圓山仔到關渡接淡水河。紲落來看是欲向北會使繼續騎到淡水,抑是向南騎對永和,攏總會使。

這禮拜六早時室友去上班的時陣,老刀想講反正一人顧厝嘛是無聊,所以就共跤踏車牽出來四界踅啊。這擺對起點五堵火車頭開始,騎汐止這段的基隆河段大約只有 2 公里,反正是欲度時間,老刀並無急欲騎煞,這擺終於舉起翕相機,一爿騎、一爿翕相。所以才有頂頭的相片予逐家觀賞啦!

這擺所翕的相片攏總囥佇 Flickr 相簿內底,歡迎逐家有盈入來參觀啊。

2008年5月16日

Captain FTP 5.3 + Crowznest 2.0 新組合

Captain FTP Crowznest
(頂圖:「海賊船長」Captain FTP 佮好兄弟「烏鴉岫」Crowznest)

昨日老刀收著德國 Xnet 公司來批通知講,怹公司真受歡迎的「海賊船長」Captain FTP for Mac OS X 已經推出 5.3 版。這个新版主要是配合 Xnet 另外推出的「烏鴉岫」Crowznest 2.0 的新功能所製造。

若有咧做網站的朋友,應該會同意 Crowznest 2.0 搭配 Captain FTP 是上贊的組合。Crowznest 是一个隨時監督你電腦(本機)佮伺服器(遠端)狀態的小工具。透過 Crowznest,你會當指定本機檔案夾 (Hot Folder) 佮佗幾个遠端伺服器目錄 (Remote Folder) 欲「仝步對應」。後擺當你指定的 Hot Folder 內容有變動(親像修改、刣掉內底的檔案,抑是共其他檔案搬入這个檔案夾內底)的時陣,Crowznest 就會自動透過 Captain FTP 上傳去 Remote Folder 做仝步的變更。雖然 Crowznest 1.x 是搭配 Captain FTP 4.5 以後的版本做伙使用的免費軟體,但是新的 Crowznest 2.0 改做愛付 11 箍米金購買的選擇工具。

另外,Captain FTP 5.3 嘛有修正幾个佇舊版本已經發見的問題。Captain FTP 5.3 定價 29 箍米金,免費試用期是 14 日。試用期滿了後,若欲閣再繼續使用 Captain FTP,就愛付費購買。舊版 Captain FTP 5.x 的用戶攏會使免費升級到 5.3 版。

2008年5月15日

Fedora 9 已經安裝好勢(Compiz 初體驗)

Fedora 9 Desktop

現此時老刀已經共 Fedora 9 安裝好勢。人講「有圖有真相」,就搭 1 張螢幕圖片予逐家參考看覓!全新的 Compiz 螢幕特效真正是真趣味、好耍,親像用視窗拍開、關掉佮輸入法拍字的組字框攏有「淡入淡出」的效果;視窗「移動」佮「最大化」有親像布丁按呢跳咧跳咧,真是誠有看頭啊。而且老刀用入門級的 ATI Radeon 9550 顯示卡表現就已經有夠水準(不只順,猶閣無「毛邊」),可見 Compiz 應該無用掉傷濟系統資源(想欲看 Compiz 的螢幕畫面,會使來這个所在參考)。

當然系統除了媠以外,嘛是愛有實用啦。新的 Fedora 9 用起來佮 Fedora 8 的感覺差不多,毋閣新功能這陣我猶袂用著偌濟。老刀有盈會沓沓仔試,若有啥物新發現,一定閣再共逐家報告。

【補充:佮較早仝款,Fedora 9 有提供予 i386、x86_64(Intel、AMD 等相容處理器專用的 PC,包括新款使用 Intel 處理器的 Mac電腦)、ppc(PowerPC G3/G4/G5 處理器專用)3 个作業平台的版本。想欲試的朋友,一定愛掠予著啊!】