2007年8月11日

8/10 老地方冰果室聚會紀錄

(頂圖:電腦變做畫板,網友「搖搖」畫出有藝術感的作品)

這禮拜來參加老地方冰果室聚會的朋友實在誠濟,佇我十點離開的時陣,猶有 Paper、Ivy 一寡人入場。Joan 想欲請我教伊幾步 Excel 的秘訣,但是伊咧無盈開講,希望後擺有機會會使來收 Joan 做學生。怪醫這禮拜本來欲去翕天星,無奈天氣毋好,結果嘛紮著伊的 Canon EOS 5D 專業數位相機佮 Canon EF 85mm f/1.2 人像名鏡專工來參加這擺聚會。

另外,音樂家超然兄後禮拜三就欲轉去米國,祝福伊有快樂的旅途。

相關的紀錄佮討論,請參考:
我的 flick 相簿(攏總 47 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年8月7日

Mac 改顯示卡技術資訊站:The Mac Elite Wiki

Mac 一直予人高貴的印象;除了外觀、品質「高貴」以外,顯示卡這款硬體零件嘛實在有夠「高貴」。

會記得今年 1 月的時陣,老刀捌介紹「改裝 PowerMac G3/G4/G5 顯示卡一定愛看耶 Strangedogs Wiki」 這篇文章。這个 wiki 網站,幾個月來定定攏有增加上新的資料佮新的顯示卡韌體予人掠轉去改卡使用。所以你若嫌 PowerMac G3/G4/G5 抑是 Mac Pro 的顯示卡效能傷差,想欲換卡來提升畫圖效能,透過這个網站提供的韌體來共較俗的 PC 顯示卡灌入 Mac 韌體,就會當予你用上少的費用得著上大的效益。

最近 Strangedogs 這隻「怪狗」Wiki 網站佮伊的討論版,因為網域受著駭客「釘孤枝」的關係,正式宣布攏總搬去 The Mac Elite 繼續替逐家服務。你若是進前已經共 Strangedogs 加入瀏覽器書籤(佇 Internet Explorer 叫做「我的最愛」),請趕緊來變更伊的網址做 http://themacelite.wikidot.com/

「老刀烏白講」正手爿「推薦網站」對今日開始,嘛配合更新 The Mac Elite 的網址聯結。

2007年8月3日

產品測試評析:Zippy RF-722 / IOGEAR GKM531RC 無線鍵盤滑鼠組合


Zippy RF-722

IOGEAR GKM531RC

最近老刀佇老地方冰果室的聚會中,擋不住好友老蔡 (Alex Tsai) 拜託閣再拜託,只好答應伊來寫無線鍵盤/滑鼠組合產品的試用心得,分別是 Zippy RF-722IOGEAR GKM531RC 2 款產品。試驗的內容包括產品配件、手感佮佇 Windows XP 下跤的使用心得、優缺點進行分析等等。

雖然這二款產品攏是針對 Windows 環境所設計,但老刀按照慣例,佇 Fedora 7 Linux 佮 Mac OS X 作業系統內底,進行「規格以外」的功能測試。測試過程中發現,雖然 Windows 佮 Apple 鍵盤排列無啥仝款,但 Apple 鍵盤專用的特殊功能按鍵(親像 Command【蘋果鍵】、Option、音量、退片、筆電用的螢幕亮度控制),佇 Windows 鍵盤竟然攏有相對應的按鍵。所以若是共高貴的 Apple 鍵盤換做其他價錢公道、手感猶閣較好的 Windows 鍵盤來代替使用,嘛是有可能的代誌。

有興趣的朋友,觀迎來看這篇精彩的特別報導

7/27 老地方冰果室聚會紀錄

(燦哥過生日,特別來翕相做紀念)

這禮拜的老地方冰果室聚會,因為拄著朋友燦哥過生日,燦哥、燦嫂特別紮來雞卵糕來佮大家鬥鬧熱。為著欲予我食著雞卵糕,平常是佮我一來一走「交接班」的燦哥特別提早入來,真正予我足感動啊!

另外,mikap、Esther、paper、Joan 之弟、閣有吳先生父女一寡頭一擺來的新朋友,順紲做伙來共燦哥祝壽。

相關的紀錄佮討論,請參考:

我的 flick 相簿(攏總 50 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明