2007年5月31日

「老刀烏白講」網頁完成台文「正字化」

根據教育部的台語建議用字,「老刀烏白講」全部的文章已經完成台文正字化。目前只賰較早的文章猶未正字化,有閒我會分階段來處理這件代誌。

教育部公布第 1 批「臺灣閩南語推薦用字」

雖然猶有一寡爭議,教育部佇昨日公布第 1 批「臺灣閩南語推薦用字」攏總 300 个字佮「臺灣閩南語漢字之選用原則」。照教育部發表的新聞稿看來,後擺應該會閣再公布第 2 批用字。本網站「老刀烏白講」部落格的文章,以後會儘量配合採用教育部公告的「推薦用字」。

【老刀偷偷仔講】這篇已經採用教育部的推薦用字,你敢有看出來佮「老刀烏白講」較早的文章有啥無仝?

2007年5月30日

蘋果推出 iTunes 7.2 新版

iTunes 這个老刀定定愛用的音樂管理軟體,蘋果公司今日已經推出予 Mac OS X 佮 Windows 二款系統專用的 7.2 版更新。這个新推出的版本,主要是增加試聽佮購買 iTunes Plus 音樂的功能,這是一个新的高品質、而且無 DRM 版權保護限制的音樂檔案(由參與的音樂公司提供)。

另外,目前 iTunes 7.2 的 Windows 版本,已經佮 Windows Vista 相容,舊版的衝突應該已經解決。

2007年5月19日

5/18 老地方冰果室聚會紀錄

DSC_0013.JPG
(designluh、新朋友賀先生攏點一酐啤魯對啉)

這擺因為加班較晏到 Le Park Cafe 參加老地方冰果室聚會的關係,所以無翕外濟相片、嘛無佇店內傷久。毋閣我也是整理了一寡相片傳去我的 Flickr 相簿,歡迎大家有盈來去參觀啊。

相關的紀錄佮討論,請參考:
我的 flick 相簿(攏總 40 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年5月8日

5/04 老地方冰果室聚會紀錄

DSC_0855.JPG
(倒手爿開始:Woodyman、星星王子、阿鑫、老刀、Docomo)

對占星術誠有研究的演㙯界名人「星星王子」頭一擺來參加老地方冰果室定期聚會,捀著伊的福氣,Le Park Cafe 足久無遮鬧熱啊。另外,頂禮拜無啉著黑麥仔啤嚕的朋友,老蔡猶閣再補請一擺,所以老刀嘛真好運,會當連紲啉二擺。

這擺來參加聚會的新朋友,有 Sean「包仔」佮 Andy、小朱兄妹。其他嘛有暢銷書作者「進藤光」、五樣,固定班底的阿清、詹姆士、老恩、 agclub 等人,予這禮拜五暗時的 Le Park Cafe 聚會仝款精彩。

2007年5月5日

Pidgin 2.0.0 正式版推出!

幾冬來的 beta 試驗已經結束,Pidgin【粉鳥】2.0.0 終於推出正式版。較早叫做 "Gaim" 的 Pidgin 這擺會改名,主要是因為佮 AOL (American On-Line) 有法律糾紛的緣故。想當時 Gaim 的推出,就是欲做 AIM (AOL Instant Messenger) 的相容軟體,但 "AIM" 這个名已經先予 AOL 註冊使用,所以 "Gaim" 名字的正當性一直受著 AOL 挑戰。為著避免以後可能發生的官司,Gaim 頂個月終於改名叫做【粉鳥】Pidgin。

這是一个整合 AIM、MSN、Yahoo、IRC、Google Talk…… 等真濟網路開講協定的軟體。有了 Pidgin,你就免佇電腦桌面開一大堆窗仔(只開一个 Pidgin 就好)。你若是有想欲佮網友做伙開講,毋免懷疑,緊掠來用吧!