2007年12月30日

歇禮拜,來聽歌:老刀精選(5) - "We're Not Gonna Take It" by Twisted Sister

1980s 的搖滾音樂,真正是啥物貨攏有的黃金年代。雖然如此,嘛有一寡較受著家長、教育家批評、爭議性真大的題目。其中 Twisted Sister 應該是上受著批評的團體之一,嘛是老刀這擺欲介紹予逐家的主題。

雖然 Twisted Sister 是以主唱 Dee Snider 為主體、1973 年佇美國紐約成立的搖滾團體,但是佮大部分美國團體無仝款,怹是佇英國出名了後才紅倒轉來米國的。受著 Black SabbathAlice CooperMotörhead 影響真深的 Twisted Sister,1982 年佇英國發表第 1 片 LP 專輯 Under The Blade,連鞭就受著注意,但是 1984 年發表第 3 塊專輯 Stay Hungry,才是商業上得著真正成功的作品;這擺欲介紹予逐家的 "We're Not Gonna Take It" 就是這塊專輯的主打歌曲。

這調歌推出的時陣拄好是 MTV 頻道當咧起步,"We're Not Gonna Take It" 起頭以少年囡仔反抗暴君老爸(由 Mark Metcalf 飾演),講出 "I Wanna Rock" 的心聲,佇 MTV 電視台強力放送了後,無偌久就受著青少年非常大的歡迎佮家長十分不滿的抗議。另外,"I Wanna Rock" 嘛是 Stay Hungry 專輯另一調主打歌曲,仝款邀請 Mark Metcalf 演出 MV 內底,遭受學生反抗的高中先生(老師)角色。這 2 片 MV 發表了後,Twisted Sister 一直受著教育界佮學生家長的強烈批評,嘛種下 3 年後 (1987) Twister Sister 解散的遠因。

這个故事性受著誠大爭議的 MV 佇遮:


"We're Not Gonna Take It" 單曲佇 Billboard Hot 100 得著第 21 名的好成績,嘛是 Twisted Sister 唯一進入 Top 40 的作品。因為 "We're Not Gonna Take It" 予真濟電影、電視節目引用作片中插曲,所以這調超過 30 歲的歌到今猶會使定定聽著,說伊搖滾經典應該是無過分矣。

最後,老刀欲請逐家觀賞 Michael Jackson 這枝 "Black or White" MV,頭前劇情的部分,佮 "We're Not Gonna Take It" 是毋是攏差不多啊?哈哈。

2007年12月29日

新款阿露米 (鋁) iMac 拆機升級 DIY

蘋果新款的阿露米 iMac (20"、24") 媠媠的外形,外口完全看袂著任何一粒螺絲,加上伊有水準以上的效能,連老刀嘛足想欲搬一台囥厝內底啊。所以有關 iMac 的消息,我攏會特別注意。

想欲共手頭的新款阿露米 iMac 改裝硬體、記憶體但是毋知影按怎拆機器的人,請照過來遮!根據 Amfiteater Portal 這篇升級 1 TB 硬碟佮 4 GB RAM 的頂級教學文章,你就會當家己輕鬆升級啦。欲拆阿露米 iMac 需要 TORX T4、T6、T8 的特殊家私頭仔,好佳哉佇台北光華商場、打狗(高雄)長明街誠濟電子用品店內底應該買會著。另外,嘛需要特別處理拆落來的鏡面玻璃(親像這款,會當用這猶閣較好)萬一若處理無好去予破去,代誌就大條啊,哈哈。

最後祝福逐家動手升級攏會使順利成功。 :)

2007年12月28日

一兼二顧,美觀、效能攏總顧著的 MacPower M9-S2H 硬碟外接盒


你若是有一寡使用年資的 Mac user ,相信對 MacPower(原形研發)的產品應該加減有聽過。 MacPower 佇 Mac 相關週邊的市場頂懸已經經營十外冬,怹的產品定定以特別的造形設計而且佮 Mac 外型四配的特色出名,怹產品的性能也有一定的水準。

老刀幾日前收著一个 MacPower M9-S2H 硬碟外接盒的樣品,伊是支援 eSATA/USB 2.0 雙傳輸介面的高級品,而且伊的寸尺拄好會使佮 Mac mini 相塔,真是一點仔攏袂占桌頂空間。經過試用的結果,老刀發見這台外接盒除了有支援外接 eSATA 開機 (Mac OS X) 以外,另外嘛有 USB 集線器 (hub) 的附帶功能。按照慣例,老刀已經共試用的心得囥佇下跤這幾个網站:
歡迎逐家入去觀看我的試用結果。

Fedora 8 (x86_64) 安裝 Adobe Flash Player

Adobe Flash Player 雖然有推出 Linux 的版本,但 Adobe(包括較早的 Macromedia)幾冬來只有 32 位元的版本 (i386)。對誠濟為著系統效能,選擇安裝 64 位元版本 (x86_64) Linux 系統的用戶來講,愛一直忍受無法度觀看 Flash 網頁的不便。佇 Adobe 猶袂推出 Flash Player 的 x86_64 版本進前,其實是有解決的步數。
  1. 步數 1:安裝並改用 i386 版的 Firefox 看網頁,然後去 Adobe 網站掠 Flash Player 來安裝。這步並毋是老刀欲介紹的重點。
  2. 步數 2:透過 nspluginwrapper,予 Firefox (x86_64) 直接使用 32 位元版的瀏覽器 plugin。
nspluginwrapper 其實推出已經有一段時間啊。以前愛用終端機 (terminal) 拍入 Linux 指令,共 plugin 搬入特定的位置,實在無啥方便。相信大部分使用 Linux 的人佮老刀仝款,攏有安裝 GNOME 抑是 KDE 媠媠的前端介面,老刀就以安裝 GNOME 的 Fedora 8 為例,介紹按怎解決問題的撇步。

  • 頭先,進入「新增/移除軟體」,確定你的電腦有安裝 nspluginwrapper,若無,就共 nspluginwrapper 的 i386、x86_64 版本攏共拍勾,然後點「套用」(會凍參考圖 1)。
圖 1 安裝 nspluginwrapper
  • 安裝 Adobe Flash Player。請入去 Adobe Flash Player 的安裝網頁,安裝 Linux 的版本。Adobe 有提供 3 款選擇,選下跤 YUM 這款(圖 2),掠落 adobe-release-i386-1.0-1.noarch.rpm 套件。
圖 2 掠 Adobe Flash Player (YUM)
  • 安裝 adobe-release-i386-1.0-1.noarch.rpm 套件(滑鼠點 2 擺共伊拍開)。安裝了後,請閣再進入「新增/移除軟體」,你應該就會當看著 "flash-plugin" 這个項目。共伊拍勾、選「套用」了後,Fedora 就會自動去 Adobe 網站掠 Flash Player 本體。
圖 3 共 Flash-plugin 拍勾
  • 入去你的 Firefox,佇網址列拍入 about:plugins 檢查瀏覽器支援的 plugin 名單,若有看著 "Shockwave Flash",就表示你已經安裝成功,會使利用你的 Firefox (x86_64) 觀看 Flash 網頁啊。
圖 4 安裝成功!

2007年12月27日

古董 G4 Mac 電腦安裝 Leopard 再探:修改 Open Firmware

關於採用 PowerPC G4 處理器的古董電腦安裝 Mac OS 10.5 (Leopard) 的步數真濟,進前嘛有誠濟人討論過(有興趣的朋友,歡迎來複習老刀佇較早介紹幾款安裝 Leopard 的步數)。上讚的代誌是,幾工前已經有人推出 LeopardAssist 軟體,會使幫助你「毋免頭殼痛」佇古董 G4 安裝 Leopard,伊採用修改 Open Firmware 的步數,佮較早老刀提供的步數無仝款。老刀個人認為,因為這个步數免閣再用外接硬碟做 .dmg,嘛毋免先佇別台電腦鬥入 Leopard 系統閣再共硬碟徙入來,所以應該是目前上讚的升級撇步。

LeopardAssist 軟體其實是根據 Dylan McDermond 這個月初佇 LowEndMac 發表的 "Faking Out the Leopard Installer with Open Firmware" 這篇文章做出來的軟體。利用修改 G4 Mac 電腦的 Open Firmware 內底關於 G4 CPU 速度的紀錄來騙過 Leopard 安裝程式的檢查,達到成功安裝系統的目的。

下跤就是修改 Open Firmware 安裝 Leopard 系統的完整步數:
1. Command+Option+O+F 開機,予 Mac 進入 Open Firmware。
2. 囥入 Mac OS X 10.5 安裝光碟 DVD。
3. 修改電腦內底關於 G4 CPU 速度的紀錄,「欺騙」工作時脈是 867 MHz(就會使通過 Leopard 安裝程式的檢查);拍入下跤的指令,愛注意英文字母大小寫佮空格愛完全仝款。

單 G4 處理器的步數:
dev /cpus/PowerPC,G4@0
d# 867000000 encode-int " clock-frequency" property
boot cd:,\\:tbxi

雙 G4 處理器的步數:
dev /cpus/PowerPC,G4@0
d# 867000000 encode-int " clock-frequency" property
dev /cpus/PowerPC,G4@1
d# 867000000 encode-int " clock-frequency" property
boot cd:,\\:tbxi

4. 繼續安裝你的 Leopard 系統。

愛注意一點:頂懸這个「欺騙」安裝程式的步數,並袂當增加你電腦的速度。而且佇鬥入 Leopard、重新開機了後,「關於這台 Mac」顯示的速度就會回復真正的數字矣。

2007年12月25日

Cnet 編輯推薦 2007 年上讚的桌頂產品

年底又閣欲到啊,這擺你準備欲買啥物獎品犒賞家己,抑是當做禮品送予上愛的親友?

Cnet 這擺為逐家評選 2007 年上適合擺佇桌頂的電腦佮週邊裝置,其中 Apple iMac 以總分 8.2(滿分 10 分)的高分得著第 7 名、電腦類第 4 名,總評「特優」(Excellent) 的成績。評語是「超級高雅的新設計、堅固的配置,予新款的蘋果 iMac 可能比起任何一款進前推出的 Mac 閣較有 PC 市場的競爭力。除非你是足愛「拍電動」抑是熱愛升級硬體的人,若無阮實在找無建議你莫選伊當做你後一台桌頂電腦的理由」。

另外,Mac mini 得著 6.7 分的「好」(Good) 總評。評語是:「雖然 Mac mini 猶是上細台的桌頂電腦,但是 Dell 佮 HP 競爭對手的產品已經共差距縮小,而且怹有提供擴充的空間,價錢嘛閣較俗。你的目的若是欲節省桌頂空間,這點 Mac mini 是勝利者;若想欲得著價錢佮性能的平衡,就會當來考慮其他較讚的選擇」。

2007年12月23日

歇禮拜,來聽歌:老刀精選 (4) - "You Shoot Me All Night Long" by AC/DC

熟似老刀的人攏知影:我除了𨑨迌電腦以外,本身嘛是搖滾迷。「老刀烏白講」搬來 blogger 已經過 2 个月,其實佇這段時間內底,老刀一直攏想欲介紹一寡經典搖滾予逐家。趁今日較有盈,就來為逐家介紹 AC/DC 這个老刀真正欣賞的澳洲國寶團體。

AC/DC 佇 1973 年澳洲雪梨成立,創團的時陣,是由 Angus Young(主吉他)、Malcolm Young(節奏吉他)兄弟為主體,加上 Dave Evans(主唱)、Larry Van Kriedt(貝斯)、Colin Burgess(鼓)組合而成,但是除了 Young 兄弟以外的團員是換袂煞,一直到 1974 年 9 月 Bon Scott(主唱)、1975 年 Phil Rudd(鼓)、1977 年 Cliff Williams(貝斯)加入了後,團員才固定落來。毋過真可惜 Bon Scott 佇 1980 年中毒身亡,接替伊到今的主唱是 Brian Johnson。

這擺老刀欲介紹的 "You Shoot Me All Night Long" 是 AC/DC 的招牌歌之一,這調歌有 2 个版本。頭先是 1980 年 7 月發行單曲,收錄佇 1980 年 Back in Black 這塊全世界有史以來銷售量第 2 濟的專輯(世界紀錄賣上濟的專輯是 Michael Jackson 的 Thriller),嘛是 Brian Johnson 入團加入製作的第一片。6 年後發行的 Who Made Who 專輯又閣再收錄這條歌,佇 1986 年 5 月再度發表。下跤這支 MV 是 1986 年的版本。



因為這調歌曲實在傷過有名,所以有誠濟出名的歌星、團體翻唱過,包括 Aerosmith、Céline Dion、Hayseed Dixie、Shania Twain、Tori Amos、Melissa Etheridge 等,Wikipedia(維基百科)有介紹 "You Shoot Me All Night Long" 這調歌的歷史佮 AC/DC 團體的專文,歡迎來參考看覓。

另外,想欲了解老刀較早介紹過的經典歌曲,請入來我的舊版部落格觀賞。

2007年12月22日

AMD 推出 ATI Catalyst 7.12 顯示卡驅動程式 (for XP/Vista)

就佇 2 日前 nVidia 推出上新的 ForceWare 169 驅動程式了後,AMD 今日嘛推出予 Windows XP/Vista 使用的 ATI Catalyst 7.12 顯示卡驅動程式。雖然伊是予 Windows 用的,但透過 Boot Camp 執行 Windows 系統的 Mac(主要是採用 AMD-ATI 圖形處理器 (GPU) 的 MacBook Pro、iMac)使用者,仝款會當來升級。

想欲知影 7.12 新版驅動程式改進了啥物,請參考怹的 Release Note。佮以前的版本無仝的所在是,這版內底嘛有附 2 个新物件:Steam(有一寡電動𨑨迌物仔會用著的 3D 畫面處理函式庫)佮 Catalyst Registration(註冊你的 Catalyst,予 AMD 提供怹的原廠技術支援)。敢欲安裝這 2 个物件,用戶會使佇安裝程式 (Catalyst Setup) 內底自由選擇。

2007年12月20日

Quick Tip of the Week:實用的「私密瀏覽」

蘋果公司網站有推出一个叫做 "Quick Tip of the Week" 的單元,逐禮拜攏會派出一个 Genius Bar 的專家介紹一个撇步。這禮拜怹介紹 Safari 的「私密瀏覽」(Private Browsing),老刀感覺這真正是足實用的功能。

一般咧瀏覽網頁的時陣,瀏覽器會記錄你所用的帳號、密碼、cookies 等物件,予你後擺閣登入仝一个網站的時陣,就免閣拍入仝款的資料。雖然方便,但你若當咧使用公用電腦,而且欲用你專用的帳號密碼「登入」重要網站,親像購物網站、網路銀行,抑是 Gmail、MSN 收批等,你可能毋愛予電腦記錄遮濟物件佇內底,避免漏洩家己的重要資料。「私密瀏覽」就是專門對付這款狀況的功能;也就是講,若拍開「私密瀏覽」了後,Safari 就袂去記錄你瀏覽網頁過程所用的帳號、密碼佮 cookies 等私密資料。但是你若結束(關掉)Safari 了後閣再重開 Safari,就會回復正常的瀏覽功能(除非你閣再拍開「私密瀏覽」)。下跤 Safari 現出「私密瀏覽」的警告文字,拄好會當來說明伊的用途。


想欲看媠姑娘仔 Kristin 親身為你解說「私密瀏覽」的功效嗎?請入來遮看

2007年12月18日

簡單易用的車用免持聽筒 -- Just Mobile Bluetune Solo


台灣本土的廠商 Mobis Technology 專營行動電子週邊配件的「Just Mobile」自有品牌相關商品,幾年落來已經建立誠讚的名聲。老刀自從為大家報導怹的 Just Mobile Gum彼篇報導佇遮)了後,這擺再度得著 Just Mobile Bluetune Solo 車用免持聽筒樣品的試用機會。按照慣例,當然愛予逐家知影我的使用心得。

這篇使用心得(正體漢文),已經佇下跤網站仝步放送:

蘋果釋出「安全性更新 2007-009」

蘋果公司今日釋出予 Mac OS X 10.4.11/10.5.1 使用的上新版系統安全性更新 2007-009,請用「系統偏好設定」的「軟體更新」予電腦自動掠落來安裝。這擺 2007-009 更新的物件寫佇下跤:
  • Address Book
  • CFNetwork
  • ColorSync
  • Core Foundation
  • CUPS
  • Desktop Services
  • Flash Player Plug-in(老刀按:這是 Adobe 上新發表的 Flash Player 9.0 Update 3)
  • GNU Tar
  • iChat
  • IO Storage Family
  • Launch Services
  • Mail
  • perl
  • python
  • Quick Look
  • ruby
  • Safari & RSS
  • Samba/SMB
  • Shockwave Plug-in
  • Software Update
  • Spin Tracer
  • Spotlight
  • tcpdump
  • XQuery
這一步的說明,請參考蘋果公司的技術支援文件

2007年12月16日

用 Pocket PC 讀寫 Office 2007 檔案

自從微軟推出 Office 2007 了後,佮怹的 Windows Vista 仝款,逐家升級的呼聲並無講像怹的預料遐大,至少老刀本人佮一寡朋友並無幾人改換新版。但若是收著 Office 2007 格式檔案的時陣,想欲解開來用嘛是真傷腦筋的代誌啊。

為著欲推動 Office 2007 的檔案格式,微軟除了推出 File Format Converter(有予 MacWindows 使用的版本)以外,微軟嘛有推出 Office Mobile 6.1 更新(免費升級),予 Windows Mobile 5.0/6.0 的 Pocket PC 用戶會當來讀寫 Office 2007 檔案新格式。


(頂圖:Office Mobile 6.1 換新圖示)


(頂圖:Word Mobile 6.1 的版權畫面)

安裝 Office Mobile 6.1 了後,Excel Mobile 編寫的檔案只會使存做 Excel 2007 活頁簿 (.xlsx) 佮範本 (.xltx)、但是 Word Mobile 編寫的檔案會予你選擇存 Word 97-2003 文件 (.doc) 抑是 Word 2007 的 (.docx) 格式,親像下跤的圖:


(頂圖:Excel Mobile 6.1 的存檔格式)


(頂圖:Word Mobile 6.1 的存檔格式)

Office Mobile 6.1 存檔的 Office 2007 檔案格式(docx, .xlsx 等),老刀用 File Format Converter 配合 Office 2003 這禮拜一路試驗落來,攏無拄著問題,所以特別佇遮寫了這篇報導。你若有需要佇 Pocket PC 讀寫 Office 2007 格式的檔案,就請共你的 Office Mobile 升級到 6.1 版吧!

Office Mobile 6.1 猶閣有包括其他的改進:
  • 增強佇 Excel Mobile 內底檢視圖表的感受。
  • 佇 PowerPoint Mobile 內底檢視 SmartArt 的能力。
  • 對壓縮的 (.zip) 資料夾檢視佮解壓縮檔案的能力。

2007年12月15日

12/14 暗時火燒厝現場直擊,台北市長安東路


天欲烏進前,辦公室傳出一陣燒歹物件的臭味,而且臭味是愈來愈厚,想講敢是辦公室的電腦燒歹去啊?趕緊共電腦關起來,但是臭味猶原佇咧並無散去。這陣外口已經聽著水龍車聲音愈來愈大聲啊。

因為老刀實在是予水龍車吵甲無心上班,趕緊攄了下班卡、攑著身邊的 Nikon D70s 翕相機行落樓跤,發見長安東路對面大樓當咧火燒厝,頭前幾排攏是水龍車、救護車佮救難車啊!

因為現場已經予警察封街,老刀徛佇火燒厝對面,第一時間搶佇記者頭先翕相紀錄的相片攏佇遮,我有看著消防隊夯擔架共人送出來(這款代誌就毋免我翕相啊),希望怹一切平安。阿彌陀佛,善哉善哉。

2007年12月14日

蘋果釋出 QuickTime 7.3.1 更新檔

蘋果公司佇今日推出 QuickTime 的 7.3.1 更新版,特別為這个軟體修正了一寡安全性的弱點。蘋果公司建議所有的 QuickTime 用戶趕緊來升級。

請按照你當咧用的系統,掠適合的更新檔來安裝:

2007年12月12日

備份 iTunes 音樂檔案夾去外接碟的撇步

佇 11/27 老刀為大家介紹共 iTunes 音樂資料庫徙位的實用功能以後,蘋果公司最近又閣公布「備份 iTunes 音樂檔案夾去外接碟」的技術支援文件,老刀感覺應該有誠濟人會需要這个功能,所以節錄重要的部分佮逐家分享。步數寫佇下跤:

第 1 階段:統整資料庫。這个部分佮 11/27 彼篇文章內容差不多,設定的畫面嘛仝款,只是項目有淡薄仔無仝款。
  • 打開 iTunes 偏好設定(佇 Windows 版內底請點「編輯 -> 喜好設定」)。
  • 點「進階」、「一般」標籤(親像下跤的圖),共「歌曲加到資料庫時,將其檔案拷貝至 iTunes Music 檔案夾」拍勾了後,閣再點「好」(Windows 版叫做「確定」)結束 iTunes 偏好設定視窗。

(頂圖:iTunes 偏好設定)
  • 點「進階」選單內底的「統整資料庫」。

第 2 階段:拷貝音樂檔案夾去外接碟。
  • 共 iTunes 結束。
  • 確認你的 iTunes Music 檔案夾的位置。Mac OS X 版的預設位置是佇 "/Users/(你的使用者名稱)/Music"、Windows 版的預設位置是佇 "\Documents and Settings\(你的使用者名稱)\My Documents\My Music\" 內底。若毋知影 iTunes Music 檔案夾佇啥物所在,請入去「iTunes 偏好設定」(請參考頂懸的圖)就會使查著。
  • 共 iTunes Music 檔案夾圖像(圖示)拖入去外接碟就好。你可能愛等一寡時間才會使共檔案夾所有的物件拷貝完成:音樂檔案夾愈大,拷貝的時間就愛愈久。

Captain FTP 5.2 新版上市

德國公司 Xnet 昨日正式推出了 Captain FTP 5.2。佮較早的版本比起來,這擺增加的新功能有:
  • 比較檔案。
  • 用 Leopard 的功能編輯檔案。
  • SFTP 伺服器的文字檔案處理。
  • 這陣已經會使用任何一款文字編輯器 (text editor) 來編輯遠端伺服器頂懸的文字檔案。
  • 會當匯入 Fetch 5.x 的捷徑 (shortcut)。
另外新版嘛有針對 Captain FTP 佇 Leopard 系統內底發生下跤的程式錯誤,做了修正:
  • 新增項目入去「喜愛項目」的問題。
  • 「快速連接」當機。
  • 結束 Captain FTP 的時陣,有一半擺會當機。
  • 滑鼠右鍵點選檔案,並無共伊加入「光碟燒錄管理」。
  • 介面局部修正。
當然,Captain FTP 5.2 新版內底仝款有包括我所做的「漢文版」。Captain FTP 5.2 定價 25 箍美金,有 14 日的免費試用期間。若有任何意見,歡迎共老刀反映啊。

老刀嘛歡迎你去觀看朋友阿鑫的推薦

2007年12月11日

MS Office for Windows 嘛有 File Format Converter

(頂圖:Word 2003 增加了 Word 2007 相容的檔案類型)

相信足濟人已經知影,微軟公司為著欲推廣新的檔案格式、予怹的 Office 2007 for Windows 趕緊變做主流軟體,已經有推出予 MS Office 2004 for Mac 專用的 File Format Converter (Beta)。其實怹嘛有另外一套專門予 Windows 版 Office 2003/2002 (XP)/2000 專用的 File Format Converter

安裝 File Format Converter 了後,佇 Word 2003「開啟舊檔」抑是「另存新檔」對話方塊內底的「檔案類型」下拉式功能表就會出現「Word 2007 文件」佮「Word 2007 巨集啟用的文件」2 个項目(親像頂頭的圖)。老刀建議你掠落來安裝,另日若拄著朋友送來 Word 2007 文件檔的時陣,就會使開起來用啊。

因為身邊的朋友無人咧使用 Office 2007 的關係,File Format Converter 的相容性到底按怎,老刀並無試過。歡迎有體驗過的朋友留字予老刀知影你的試驗心得。

2007年12月10日

12/07 老地方冰果室聚會紀錄

這擺老地方冰果室的聚會應該是這 2 个月以來上鬧熱的一擺。一開始新朋友 wujs900 就紮伊的 MacBook 來報到。我看著伊的 iTunes 內底一大堆搖滾歌,才知影伊佮老刀仝款攏是搖滾迷啊。聽講伊不只有咧𨑨迌吉他,而且伊上佮意的吉他手是 Richie Kotzen,實在是難得拄著的知音啊,期待後擺會當聽著 wujs900 練團的 demo 錄音。

隨後阿清、老蔡、詹姆士、錦爺、超哥超嫂翁某、Bianca、brianwuu、元智大學來的孫同學、香港羅先生佮西施犬 wei-wei、真久無出現的Jerry.、對北京轉來的 chester.yu、這陣咧做兵的五樣佮朋友、A-PO 一个接一个出現佇 Le Park Cafe,到老刀 10 點離開的時陣猶拄著 ivy 佮趴后 Miel 當欲入場,真是有夠鬧熱啊。

相關的紀錄佮討論,請參考:
我的 flick 相簿(攏總 45 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

利用 Office Outlook 2003/2007 收發 Hotmail

(頂圖:安裝 Outlook Connector 的 Outlook 2003)

有朋友共老刀通知講,微軟最近推出新版的 Outlook Connector,會當佇 Windows 下跤離線收/發 Hotmail 信箱的批;老刀安裝試用的結果真是滿意,所以嘛報這个好空予你知影。佇 Outlook 2003 安裝 Outlook Connector 了後,功能表加一个 "Outlook Connector"(參考頂懸的圖),只要內底拍入 Hotmail 的電子郵件信箱,著會使收/發 Hotmail 的批啊。

另外,若無欲用 Office Outlook,利用附佇 Windows 內底的 Outlook Express 收發 Hotmail 的批嘛是真好的選擇(毋免另外安裝 Outlook Connector)。可惜 Outlook Express 只會使用來收/發電子郵件佮新聞群組,並無整合其他的功能,所以老刀佇 Windows 寫批較慣勢用 Office Outlook 來做(因為公司內底只有 Windows PC 會當用;上好是分配一台 Mac 予我用著毋免遮爾麻煩啦,哈哈)。

2007年12月8日

Adobe 釋出 CS3 系列上新的軟體 Soundbooth CS3 試用版

Adobe 的 CS3 家族軟體,親像 AcrobatPhotoshop CS3Illustrator CS3 一直攏受著誠濟朋友愛用。CS3 家族上新的軟體 Soundbooth CS3 是用佇處理電影、視訊抑是 Flash 專案內底的音訊,特別會當予你刣掉錄音雜訊、修飾配音、自訂音樂佮聲音特效。

這套定價 199 箍美金的 Adobe Soundbooth CS3 英文版這陣已經釋出,有需要的朋友,會使免費掠落來試用

Google Mac Developer Playground 開幕啟用

你可能已經知影,Google 的 Google Code 平台提供開放原始碼 (Open Source) 程式設計者建立軟體開發專案一个好用的環境,包括我逐日咧使用的 OpenVanilla「香草輸入法框架」的大本營嘛已經佇幾個月前就徙位來遮。

最近 Google 整理怹員工當咧進行(聽說 Google 為著鼓勵員工創作開發,予員工 20% 的工作時間自由開發其他【佮 Google 業務無關的】軟體,實在有夠讚)的各種軟體開發專案,共有關 Mac 的專案另外成立一个 Google Mac Developer Playground 專區(字面上的意思就是「Mac 軟體開發者的𨑨迌房間」),方便逐家使用。Google Mac Developer Playground 頭先精選出 StatzGDataMacFuseDisk for iPhoneCoverStoryQuartz Composer Patches 攏總 6 个專案。有興趣的朋友,歡迎去掠來參考試用。

2007年12月7日

Adobe 推出 Camera RAW 4.3.1 更新

Adode 今日推出了上新的 Camera RAW 4.3.1 更新版。根據 Adobe 網站的說明,這版已經修正頂一版讀取 Nikon D100 的壓縮原始檔的時陣發生錯誤的問題,嘛修正對 Olympus E-3 原始檔的支援。

新版嘛增加支援幾款新相機:
  • Canon EOS 1Ds Mark III
  • Canon PowerShot G9
  • Nikon D3
  • Nikon D300
  • Olympus E-3
  • Olympus SP-560 UZ
  • Panasonic DMC-L10
另外有一點愛特別注意:Adobe Camera RAW 只有支援怹上新軟體(親像 Photoshop CS3、Photoshop Elements 4.0(只適合予 Mac 電腦用)、Photoshop Elements 6.0 及 Premiere Elements 3.0 的 Camera Raw 增效模組),佮較早的版袂合。請參考下跤的說明(引自 Adobe 的 Camera Raw 4.3.1 readme 文件):
新版 Camera Raw 增效模組將取代原本安裝在 Photoshop CS3、Photoshop Elements 4.0 (僅適用於 Mac 電腦)、Photoshop Elements 6.0 及 Premiere Elements 3.0 的 Camera Raw 增效模組。

Camera Raw 4.3 增效模組與 Photoshop CS3 以前的 Photoshop 軟體、或 Photoshop Elements 5.0 (用於 Windows) 和 Photoshop Elements 4.01 (用於 Mac) 以前的 Photoshop Elements 軟體並不相容。

Photoshop Elements 3.0 用戶可使用的 Camera Raw 增效模組最新版本為 Camera Raw 3.6。Photoshop Elements 4.0 Windows 的 Camera Raw 增效模組最新版本為 Camera Raw 3.7。Photoshop CS3 和 Adobe Creative Suite 3:

在 Mac 或 Windows® 上自動安裝:
1. 從「說明」選單中選取「更新...」。
2. 遵循螢幕上的對話方塊下載並安裝最新可用的 Camera Raw 更新。

2007年12月5日

舊掃瞄器的新救星:TWAIN SANE Interface for MacOS X

相信有足濟人已經知影,大部分掃瞄器廠商推出新產品的時陣,只有針對 Windows 寫驅動程式;考慮著市場、成本,除了幾款高級機種以外,廠商並無保證會推出 Mac OS X/Linux 驅動程式。尤其這幾冬新機種一直出來,廠商甚至已經無閣再支援「超齡」的舊掃瞄器,連伊的 Windows XP/Vista 驅動程式嘛無推出。

為著欲予掃瞄器會使普遍使用佇所有的電腦系統,有一寡使用者、程式員社群發起了 SANE(取 "Scanner Access Now Easy" 的意思)開放原始碼計畫。雖然 SANE 上早是佇 Linux 開發出來,但是這陣已經有移植去 BeOSMac OS XOS/2,甚至是 Windows 頂懸的版本。其中 Mac OS X 的移植版有配合予 10.3 (Panther)、10.4 (Tiger) 佮 10.5 (Leopard) 使用的 3 款版本。

若想欲安裝 TWAIN SANE Interface for MacOS X,請入去怹的網站掠落下跤這幾个檔案(按照你的系統,去掠適合的版本),而且按照順序安裝就會使啊。
  • libusb.pkg
  • sane-backends.pkg
  • twain-sane-interface.pkg
  • sane-preference-pane.pkg
想欲查看 SANE 敢有支援你的掃瞄機,會使參考這个所在

適用中古機的 Apple Hardware Test 光碟映像下載

Mac 出貨的時陣,蘋果公司攏會佇包裝內底附一片 Apple Hardware Test (AHT) 光碟片,來予你家己檢查電腦硬體是毋是有出狀況。雖然你有可能一世人攏袂用著 AHT 光碟,但是萬一你的 Mac 拄著問題的時陣,這片光碟應該就是你頭一个用來診斷、治療電腦的仙丹妙藥。

最近蘋果公司釋出一寡採用 PowerPC 處理器中古機種的 AHT 光碟映像(dmg 格式),而且是最後的上新版(親像怹提供的 AHT for PowerMac G4 版本是 1.2.6,比我原來附佇 PowerMac G4/733 內底的 AHT 1.2.3 閣較新)。老刀建議猶咧使用中古機種的舊用戶,攏應該掠落來重燒一片 AHT 死豬 (CD),預防發生萬一的時陣會使來救急使用。

這擺提供下載的 AHT 光碟映像種類,包括下跤幾款:
  1. Apple Hardware Test 1.2.4 (iBook)
  2. Apple Hardware Test v1.2.2 (iMac/eMac)
  3. Apple Hardware Test v1.2.6 (Power Mac G4)
  4. Apple Hardware Test v1.1 (Power Mac G4 Cube)
  5. Apple Hardware Test v1.2.3 (PowerBook G3 (FireWire)/G4)
  6. Apple Hardware Test v1.0 (Xserve)
想欲掠落 AHT 光碟映像、抑是想欲知影進一步消息的朋友,請參考蘋果公司網站的相關說明

2007年12月4日

口愛20000拍,敬請來投老刀一票


老刀禮拜日佇台北參觀資訊月展的時陣,拄著 Sony 當咧募集 Cybershot T2「口愛 20000 拍」活動。可能是老刀生做傷過緣投的關係,「Cybershot 姑娘仔」一看著我就邀請我來做伙翕相。頂懸這張相片囥佇「口愛20000拍」投票區(編號:17120),歡迎大家加入老刀「應援團」(後援會)的一員,趕緊投落你的神聖一票,你家己就有機會趁著一台 Sony Cybershot T2 哦!

【更新】再瀏覽「口愛20000」活動網頁的時陣,發見竟然有表情閣卡讚的口愛相片「隱藏版」!毋相信嗎?有圖有真相,相片佇遮啦:

網址佇 http://event.jk2u.com/cybershot_t2/gallery_vote_pink.php?fno=17119。奇怪的代誌是這張相片頂頭登記的名是 "t2",是按怎毋是我「老刀」啊?

2007 年台北資訊月展直擊


媠姑娘佇會場
原由 Gontera 上載
這擺 2007 年台北資訊月展覽,相信逐家已經對電視、網路看著真濟報導啊。佮頂擺仝款,老刀嘛去翕一寡媠姑娘的相片來予大家觀賞。但可惜老刀因為需要一台 LCD 螢幕予家己使用,有任務在身的關係,所以無翕傷濟,請大家多多包涵啊。媠姑娘的相片攏佇遮

另外,我最後決定娶 ViewSonic VX2235wm-5 入門;老刀共新娘仔褪衫(開箱)的過程翕做相片,有興趣的朋友,歡迎入來我的相簿參觀啊。

2007年12月3日

好空報你知:Flickr 的年終送禮方案

歲末送耶誕禮的時刻又閣來啦。廣受誠濟朋友愛用的網路相簿服務 Flickr 嘛推出年終送禮方案:今日起到 2008 年 1 月 31 日為止,只要你購買一年份的 Flickr Pro 帳號送予親朋好友,送禮的你嘛會當得著 3 個月免費的 Flickr Pro 帳號。

另外,今日升級 Flickr Pro 帳號的用戶,會使免費得著 10 張 Moo 卡片。機會難得,欲買趁緊啊。

11/30 老地方冰果室聚會紀錄

頂禮擺五暗時舉辦的老地方冰果室的定期聚會仝款有夠鬧熱,頭先三立台灣台「在台灣的故事」的主持人阿斗兄慷慨借我三套搖滾紀錄片 DVD。隨後老蔡提來新測試品欲予阿斗兄試用(結果請看相片)、一段時間無看著人的喵小相、JamesCooper、老恩、燦哥,猶有新朋友:元智大學的孫同學佮伊的同學對中壢趕來赴會、固定班底阿清、香港羅先生佮西施犬 wei-wei,做伙過一个有意思的暗暝。

另外,嘛有 ross_tt 拜託老蔡帶來伊的訂婚禮餅來佮逐家分享。祝福怹翁某佇打狗(高雄)百年好合、永浴愛河(做伙跳愛……毋是,是遊愛河啦,哈哈)。

相關的紀錄佮討論,請參考:
我的 flick 相簿(攏總 64 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年12月1日

Mac OS X 10.5 內建支援的印表機表列

印表機想欲佇 Mac OS X 下跤列印永遠是一个重要的議題,因為市面上看著的印表機百百種,雖然差不多攏總支援 Windows,但是老刀建議你購買進前一定愛「看予清、認予明」做好功課;若去買著無支援 Mac OS X 的印表機,就是白開冤枉錢的悲劇啊。

蘋果公司最近更新怹的 Mac OS X 10.5 內建支援的印表機表列。Mac OS X 光碟內底除了有附各印表機廠商提供的驅動程式以外,另外嘛有附 Gutenprint,這是一个支援數百款印表機的開放原始碼驅動程式集合。

你的印表機若不幸無佇頂頭的表列內底,老刀建議你趕緊抄落印表機的牌子、型體番號了後,試下跤的步數:
  1. 去原廠的網站,檢查怹是毋是有另外提供上新的驅動程式。若有,就緊去掠來安裝,然後你的印表機應該就會使佇 Mac OS X 下跤列印文件啊。
  2. 若是你的運氣誠歹,原廠無推出適合你印表機的 Mac OS X 驅動程式的時陣,趕緊安裝頂懸講著的 Gutenprint 代替(Gutenprint 支援的印表機表列佇遮),印表機有可能會損失一寡功能無法度使用(部分功能猶袂予 Gutenprint 支援的關係)。
  3. 萬一你的運氣猶閣較歹,連 Gutenprint 嘛無支援你的印表機,就用 Gutenprint 選一台你的印表機會當相容的機種、模式(雷射印表機的使用手冊應該會有說明。若是英文對你袂講傷難,建議你去原廠網站掠英文使用手冊;台灣本地出產的中文版手冊定定會「偷工減料」,減寫一寡重要的技術資料),若欲知影相容的機種、模式,緊去查印表機的使用手冊。你的印表機會損失閣卡濟的功能無法度用。
  4. 你的運氣實在袂當閣再歹啊,查無相容模式的時陣,選用 Mac OS X 抑是 Gutenprint 的通用 PCL、PostScript 驅動程式做最後的拍拼(只存基本低品質的列印功能)。
  5. 若頂頭的步數攏總無法度,歹勢,老刀嘛無能為力啊;去另外買一台印表機來用吧!

Canon 推出 EOS-1D Mark III 韌體 1.1.3 更新

Canon 推出 EOS 40D 韌體更新才無幾日,紲落來閣再推出 EOS-1D Mark III 翕相機的 1.1.3 版韌體更新。根據 Canon 網站的說明,新版韌體有下跤的改進:
  1. 使用高速 SD 記憶卡的時陣,會當閣再增加傳輸速度。
  2. 修正一个快門無法度釋放的狀況。
  3. 改善一寡特定狀況的自動對焦 (AF) 追蹤。
  4. 修正西班牙文、韓文選單介面的錯誤。
Canon 有提供 Windows 佮 Mac OS X 二款韌體更新程式,請佇 Canon 網站下跤拍入 EOS-1D Mark III 的機身序號,就會使進入掠落韌體的專屬網頁。另外,請檢查你的韌體,這个 1.1.3 韌體新版是予 1.1.1 佮較早版本的韌體更新之用;你的韌體若已經是 1.1.3 版,就無必要閣再更新啊。

2007年11月29日

增加新單元:留字條予老刀

老刀開始佇遮烏白講,到今已經有一个外月啊。這段時間內底,定定有朋友提供新的意見予我,嘛有人共我鼓勵,請老刀一定愛堅持落去、繼續維持這个台語網站。逐家的熱情真正使人感動。

為著欲予逐家方便留落意見,我已經開一个「留字條予老刀」新功能佇正手爿的所在。逐家若有任何意見抑是想欲共我聯絡,攏歡迎去遐留字,我會佇上短的時間來答復你。

Intel 更新推出 C++、Fortran 編譯器 10.1 版

古早老刀佇學校讀冊的時陣足愛寫電腦程式,畢業了後原本有想欲做專職的程式員,但可惜因為一寡原因袂當如意。雖然我已經超過 10 冬無閣再寫程式,但如今猶非常關心程式開發工具的消息。Intel 佇這禮拜三共怹支援 Windows、Linux、Mac OS X 三款平台的 C++ 佮 Fortran 編譯器更新到 10.1 版。想欲進一步了解的朋友,請參考 Intel 網站的產品介紹

按照 Intel 的說明,Mac OS X 版本的 Intel C++Fortran 支援蘋果公司上新的技術,包括整合 XCode 3.0、支援 Intel 多核心處理器等(若無支援 Intel 家己的處理器產品,就真正愛拍尻川啊,呵呵)。想欲佇 Leopard 下跤開發最佳化的多核心、多執行緒應用程式,利用怹上新的 API 佮附佇內底的工具程式應該是誠好的選擇。

補充一下:包括 AdobeAutodesk 等一寡大軟體商,嘛攏是 Intel 編譯器的客戶喔。

2007年11月28日

Flickr 開始提供「世界熱點」、「地圖」2 个新功能

Flickr 是 Yahoo(雅虎)提供的線上翕相簿管理服務;老刀佮全世界幾百萬人仝款,攏是 Flickr 的愛用者。最近 Flickr 根據怹網站內底數千萬張記錄地理位置 (geotagged) 的相片,推出了「世界熱點」佮「地圖」2 个新功能。

(頂圖:flickr「世界熱點」)

世界熱點」這个功能會當予你佇 Flickr 頂懸遊覽任何國家、城市佮特定場所。只要拍入你想欲觀賞相片的所在(親像頂圖的「花蓮市」),Flickr 會自動替你整理當地所翕的相片,你所需要的只是一張一張觀賞就好。

(頂圖:flickr 新版「地圖」)

新版「地圖」會使予你佇 Flickr 頂懸「環遊世界」。就親像伊的名仝款,你只要對地圖點一下,Flickr 就會自動整理當地所翕的相片,方便你瀏覽。

若有進一步的問題,請參考 Flickr 對這 2 个新功能的說明

蘋果推出第 5 代 iPod 韌體 1.2.3 更新

有第 5 代 iPod 的朋友請注意。你的 iPod 韌體版本若是 1.2.2 而且你的 iPod 無顯示囥佇內底的歌曲抑是其他內容,請更新你的韌體到 1.2.3 就會回復正常顯示。想欲更新的朋友,請參考蘋果公司技術支援文件的說明。

蘋果公司特別說明講,韌體 1.2.2 只是無顯示一寡內容,並袂造成用戶的資料損失;更新到 1.2.3 以後,進前看無著的資料就會閣浮出來。

2007年11月27日

共 iTunes 音樂資料庫徙去別位的方法

相信包括你我在內的足濟朋友已經共 iTunes 設定做預設的音樂播放程式。iTunes 音樂資料庫的位置一般是固定佇使用者檔案夾的「音樂」(Windows 版的 iTunes 音樂資料庫佇「我的文件\我的音樂」)內底,雖然方便,但拄著需要共音樂資料庫徙位的時陣(親像欲拷貝一份音樂資料庫去外接硬碟,方便重灌系統了後閣再拷貝轉來),不止是音樂本身,包括你的「喜好程度」評等佮「播放列表」若會當改設去新的位置,就是一位方便的代誌。

最近蘋果公司公布的技術支援文件(有分 Mac 版Windows 版 2 篇),有說明變更音樂資料庫所在的方法。老刀來佮步數寫踮下跤:
第 1 階段:
  • 進入 iTunes 的「偏好設定」(Windows 版的 iTunes 請進入「編輯」->「喜好設定」),點「進階」標籤下跤的「一般」,共「保持 iTunes Music 檔案夾的整理狀態」拍勾了後,選「好」(Windows 版請選「確定」),如圖。
  • 留淡薄仔時間予 iTunes 整理你的音樂。
(Mac 版本 iTunes「偏好設定」)
(Windows 版本的 iTunes「喜好設定」)

第 2 階段:
  • 閣再進入 iTunes「偏好設定」(Windows 版是「喜好設定」)的「進階」標籤,點正手爿的「更改」。
  • 替「音樂資料庫」檔案夾指定新所在。
  • 選 iTines「進階」選單的「統整資料庫」。
(Mac 版 iTunes 的「進階」選單列)

(Windows 版 iTunes 「進階」功能表)
  • 你的電腦應該會出現下跤的警告,毋免驚,共伊「統整」落去著好。
  • 共舊的音樂資料庫徙去「垃圾筒」(Windows 的「資源回收筒」)清掉。

2007年11月26日

11/25 台北木柵、貓空遊記

這日因為室友講伊足想欲去木柵、貓空看動物坐流籠,所以 2 人就駛車來去𨑨迌囉,順煞紮「卡美拉」(翕相機)佮一寡鏡頭出門翕動物佮風景。可惜受著風颱接近的關係,天氣無講偌好;雨落傷大的時陣,「卡美拉」就只好收起來,所以相片無翕誠濟。雖然如此,講起來老刀嘛算運氣誠好,有翕著一寡「真歹拄著」、「機會難得」的趣味相片予逐家觀賞。
(頂圖:Slow and Easy 沓沓仔來)

這 2 隻大鳥「嘿咻」真久,老刀徛佇怹邊仔有 5 分鐘,離開的時陣猶閣袂分開。無偌久了後,閣佇別區翕著下跤這張:
(頂圖:這 2 隻駱駝無知影咧創啥)

大家看看笑一个就好。

參觀動物園了後,來去附近的流籠站坐流籠去貓空。但假日排隊的人實在有夠濟啊,估計超過 1,000 人排隊佇老刀頭前,為著欲坐流籠煞來排 2 點鐘隊,心內毋知影暗譙幾擺啊!雨連鞭落連鞭停,害我毋敢共卡美拉佮鏡頭夯出來,所以無翕著有淡薄啊恐怖的排隊。
(頂圖:坐車進前佇貓空站掠影紀念)

上予人歡喜的是,老刀佇半空中拄著難得的彩虹,趕緊補了下跤這張相片:
(頂圖:流籠頂頭的彩虹)

來到貓空,腹肚早就枵啊。佮室友 2 人叫「洪師父」紅燒牛肉麵來食飽了後,佇附近散步兼運動。但一想著愛閣排誠長的隊轉去動物園站,跤尾就閣冷起來。後來決定先坐遊園巴士來去指南宮參觀,去指南宮站坐流籠是正確的決定,因為攏總毋免排隊:人到隨坐,就毋免加受罪。

最後用這張指南宮的篙仔燈,當做這篇遊記的結束。

Canon EOS 40D 韌體更新 1.0.5

Canon 最近更新怹的 EOS 40D 單眼數位相機的韌體,版本是 1.0.5。根據 Canon 的說明,新韌體重要的修正的部分佇下跤:
  1. 若對「自動電源關閉」狀態回復來放送相片,會對頂擺電源關閉當時的彼張相片繼續進行。
  2. 遙控翕相的時陣,液晶螢幕會連鞭佇相片翕落當時現出所翕的影像。
  3. 修正韓文、西班牙文語言介面的錯誤。
  4. 修正佇一寡列印系統無法度列印的問題。
  5. 修正少數狀況下跤,會發生相片影像編號跳號的問題。
有想欲更新的朋友,請來遮參考 Canon 網頁的說明

2007年11月24日

11/23 老地方冰果室聚會紀錄

這擺老地方冰果室的聚會真是鬧熱,頭先到的超哥終於如願等著伊一直想欲愛的 Kyocera 翕相機、山富旅行社的領隊 felix、後禮拜將欲轉去法國的 auplume、老蔡、觀音媽 Bianca、來請教問題的 Brianwuu(我共伊鬥解決 Excel 無正常的問題)、香港羅先生佮西施犬 weiwei、使用 Sony Alpha 翕相機的牛哥、最近換新頭路的小白,固定班底的帥木村、詹姆士、錦爺,猶閣有一寡其他無記著的朋友等等,做伙過了趣味的一暗。

相關的紀錄佮討論,請參考:
我的 flick 相簿(攏總 42 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年11月23日

【致謝】「老刀烏白講」新部落格已經滿月啊!

本部落格頂個月對 Yahoo 的舊版搬來到遮,到今已經滿月啊。這个月來老刀逐日收集一寡佮本地各大網站無仝款 Mac 新聞,希望予逐家用無仝款的角度來看 Mac 佮 Linux 的新聞。雖然辛苦,但是嘛收著真濟朋友予我正面肯定,老刀除了感謝逐家支持以外,嘛請逐家有盈愛定定轉來看我的文章。

另外除了繼續提供新文章以外,若有時間,我嘛會沓沓仔共較早佇 Yahoo 舊版「老刀烏白講」的文章貼來新版這爿。舊版文章搬過來了後,發表時間我會參考較早舊版文章的發表時間做修正,所以並袂有「舊聞變新聞」的狀況;到時陣若欲看較早的文章,會當利用正手爿「blog 存檔」點選 10 月以前的文章就會使啊。 :)

Mac OS X 10.5 取得 Unix 03 認證

來自 Macworld 的消息The Open Group 佇這禮拜宣布蘋果公司的 Mac OS X 10.5 (Leopard)Mac OS X 10.5 Server 已經通過怹的 Unix 03 標準認證。

The Open Group 是認證作業系統產品是毋是符合上新 Unix 標準的協會組織。按照怹的新聞稿,Mac OS X 是頭一个取得認證的 BSD Unix 作業系統衍生產品。其他已經通過 Unix 03 認證的廠商,有富士通 (Fujitsu)、IBM、惠普 (HP) 佮昇陽 (Sun Microsystems) 幾間大公司。

2007年11月22日

nVidia GeForce 6x00/7x00 AGP 顯示卡 + Leopard 開機延遲的解藥

自從頂擺老刀報導溫度感應單元是 PowerMac G4 + nVidia 顯示卡佇 Leopard 系統開機足久的凶手了後,過無偌久,The Mac Elite 網站就已經推出「修正版」的韌體提供予眾人掠

這个「修正版」的韌體,其實是共原來韌體碼內底關於溫度控制的部分刣掉,其他部分並無變動。雖然經過修改了後的 nVidia 顯示卡佇 Leopard 開機的速度會變緊(毋免閣再等 2 分鐘以上),但是有可能會發生顯示卡 GPU 過熱、無穩定的潛在問題(因為顯示卡無閣再測 GPU 溫度的關係)。

所以敢欲修正 nVidia 顯示卡韌體,只存 2 點會當考慮:
  1. 無修正:開機等較久,但是顯示卡 GPU 保證穩定、袂過熱。
  2. 修正後:開機免閣等,但顯示卡 GPU 有過熱的可能性。
真是「一兼袂當二顧」啊!

你若決定欲修正 nVidia 顯示卡的韌體,老刀請你動手進前一定愛讀詳細怹的教學文件,以免共你幾千箍買來的顯示卡創歹。

2007年11月21日

USB 週邊裝置的紲命丹 (2) - Just Mobile Gum

最近老刀收著朋友寄來一批樣品,希望我會當鬥相共來測試一下。其中一个產品是 Just Mobile Gum,這條外形親像「樹奶糖」的物件,原來佮老刀較早介紹的 Macally JBoxMini 仝款,攏是一粒 USB 外接電池啊。
這篇試用心得(華文)老刀已經寫好勢,嘛轉貼佇下跤 3 个網址同步放送。歡迎大家來去參觀指教:
  1. 老地方冰果室
  2. 敗家網 byja.com
  3. 黑秀網

2007年11月20日

OpenVanilla 0.8.0 行列輸入法的臭蟲

OpenVanilla (OV) 0.8.0 推出以來,比較早的版本閣較穩定,而且有提供一个全新設計的使用介面,使用起來真正予人感覺美觀、方便。但是這幾日老刀使用落來,無意中發見 OpenVanilla 0.8.0 的「行列輸入法」二級簡碼有的設計上的問題。

使用 OV 0.8.0 行列輸入法二級簡碼(也就是拍入二個字鍵)的時陣,選字窗內會出現一寡「□」(表示「無這字」),但若是拍毋著字,去選著遐不存在的「假重覆字」時,OV 即會將「□」當做是所選的字送出。

頂圖是用 OV 行列拍入 1-2-(猶著是鍵盤的 "as")時的畫面,這个時陣若是去拍著 "3" 以後的數字,OV 0.8.0 著會共「□」送出(按照行列輸入法的規格書定義,是袂使共「□」當做是重覆字送出);這個錯誤佇 OV 0.7.2 版的行列輸入法並無發生。

老刀已經正式共 OV 發展小組送出報告,希望怹會當佇上緊的時間內修正這个問題。

2007年11月19日

11/16 MacFansClub 麥客迷聚會影像紀錄


好朋友美童 (prettyboy)、阿鑫發起的麥客迷俱樂部聚會,11/16 終於佇優仕 2 樓鬧熱舉辦。除了 OIKOS 生活網的名嘴 Paul Huang 特別對米國轉來台灣捧場以外,逐家足久無拄著的 OIKOS 第一代站主小梅子 (macdog) 嘛意外出現佇會場,算做是另外一个驚喜。當然,另外一齣好戲,著是 dorami 的反串秀啊。

這場聚會會使來順利舉辦,愛特別感謝優仕頭家 Randal 提供遮爾讚的場所,尤其是提供無限量啉甲爽的海尼根佮各式飲料,來予逐家做伙鬧熱。聽說伊為著欲準備這擺聚會,咖啡機前一暝特別拆落來洗清氣,實在有夠辛苦。所以愛特別共伊講一聲多謝。

老刀佇這擺聚會所翕的相片已經攏總囥佇 flickr 相簿啊,想欲觀賞其他朋友所翕的相片,請來去阿鑫的相簿美童的相簿
:)

2007年11月18日

Adaptec PowerDomain SCSI 卡佇 Leopard 閣再回春

你手頭敢有舊式的 Adaptec PowerDomain SCSI 卡?免急欲共伊清去殺,因為較早 Mac OS X 10.4 (Tiger) 毋是無閣再支援,就是支援性誠歹的 Adaptec PowerDomain SCSI 卡,佇 Mac OS X 10.5 (Leopard) 內底重灌「上新版」(其實 Adaptec 已經誠久無閣再出)的驅動程式了後,就有可能會閣再回春啊。

老刀共會當掠落驅動程式的 Adaptec PowerDomain SCSI 卡,整理佇下跤:
SCSI 全名叫做 "Small Computer System Interface",是一个普遍使用佇電腦週邊裝置的介面標準。蘋果公司佇電腦產品引進 SCSI 是佇 1986 年的 Macintosh Plus 電腦,到今已經超過 20 冬。

2007年11月16日

蘋果系統更新第 2 彈:Mac OS X 10.5.1、10.5.1 Server 更新

佇昨日蘋果公司推出 Mac OS X 10.4.11 佮一大攤系統佮軟體更新了後,怹今日繼續推出 Mac OS X 10.5.1 佮伺服器版本 10.5.1 Server 二个新系統版本更新。

根據蘋果公司公布的資料文件,新的 Mac OS X 10.5.1 修正包括 Airport、Back to My Mac、磁碟工具程式、iCal、Mail、網路連線、列印、安全性佮防火牆、系統佮 Finder、Time Machine 等功能。想欲更新的朋友請來遮掠更新檔,抑是利用系統「軟體更新」予電腦自動完成更新。

蘋果嘛仝步推出 Mac OS X 10.5.1 Server 更新,包括 Server Preferences、NetBoot、Open Directory、SMB 檔案服務等,想欲更新的朋友,會使來遮掠更新檔

2007年11月15日

蘋果推出一大堆軟體更新

今日蘋果推出包括 Mac OS X 10.4.11、安全性更新 2007-008 佮一大攤軟體產品的更新包。Mac OS X 10.4.11 的更新檔,有包括改善系統的穩定性、相容性佮安全更新,另外也附送上新的 Safari 3 瀏覽器。
安全性更新 2007-008 修正 AppleRAID、bind、CoreFoundation、Flash Player Plug-in 佮 Foundation 系統元件的安全性,嘛有包括上一版 (2007-007) 安全更新的項目。其他的軟體更新包,攏總有下跤幾款:有需要的朋友,歡迎您點頂懸連結參考蘋果公司的更新說明,順紲掠新版來更新;抑是直接用「軟體更新」予 Mac OS X 自動做更新嘛是會使。

2007年11月14日

關於 nVidia GeForce 6/7x00 AGP 顯示卡 + PowerMac G4 佇 Leopard 開機等真久的問題

想欲予古董 PowerMac G4 有較好的螢幕效果,換一片較好、有支援核心影像 (Core Image) 的顯示卡配合 Mac OS X 10.4 (Tiger)、10.5 (Leopard) 使用,算做是較好的作法。毋閣予人失望的代誌是,PowerMac G4 佇 Tiger 系統是顯示卡效能之王的 nVidia GeForce 6x00/7x00 產品,佇新的 Leopard 系統下跤,竟然有開機愛等誠久(2 分鐘以上)的問題存在。

根據 The Mac Elite 討論版的說明,這是因為蘋果公司 G4 電腦無支援 nVidia 顯示卡頂頭的「溫度感應單元」,愛等待 2 分鐘以上予溫度感應單元啟動的關係(這嘛是 nVidia 顯示卡「接單螢幕會失眠【無法度「睡眠」】、但是接雙螢幕顛倒正常」的罪魁)。佇蘋果公司猶袂修正這个問題進前,你會使做的代誌只有:
  1. 等待:培養你的耐性,戆戆仔等待 2 分鐘以上,予 PowerMac G4 開機。
  2. 嘛是等待【閣較久】:等待蘋果推出 Leopard 更新(蘋果公司並無說明解決這个問題的進一步消息)。
  3. 家己修改 nVidia 顯示卡的韌體,跳過溫度控制的部分(這需要一寡技術)。
  4. 【1/1/2008 補充】刣掉 /System/Library/Extensions/AppleHWSensor.kext,予 Leopard 啟動的時陣跳過包括「溫度感應單元」在內的硬體偵測(請參考這篇報導)。
受著影響的顯示卡,攏總有 nVidia GeForce 6200、6600、6600GT、6800、6800GS/GT/Ultra、7800GS。另外 PowerMac G5 的使用者毋免煩惱,因為佇 G5 頂頭並袂發生仝款的代誌。

2007年11月13日

PowerMac G4 CPU 升級卡佇 Leopard 安裝的撇步

PowerMac G4 桌頂型電腦不但穩定,而且伊拆裝硬體零件的方便性一直受著足濟人的歡迎,這嘛是一寡人毋敢換機的原因之一(目前蘋果咧上市的產品中,只有 Mac Pro 有仝款的方便性)。隨著 Mac OS X 10.5 (Leopard) 系統的推出,一寡較早期推出的古董 G4 機種按照「官方講法」,已經無法度安裝 Leopard 啊(破解的步數請看進前的報導)。想欲安裝 Leopard 佇舊 PowerMac G4 電腦內底,順紲提升電腦運作的效率,換一片速度較緊的 G4 CPU 升級卡應該是較好的選擇。

生產 G4 升級卡的廠商有真濟間,其中較有名的廠商按英文字母排列有 DayStar Technology (XLR8)、FastMacGigaDesignsNewer TechnologyOther World Computing (OWC)、Powerlogix(已經予 OWC 併購)佮 Sonnet Technologies。升級卡產品百百款,到底愛按怎選遮會當選著適合佇 Leopard 使用的升級卡?老刀蒐集一寡國外的資料,你若拍算想欲買一片 G4 CPU 升級卡,抑是已經買升級卡、但毋知影按怎設定遮會使安裝 Leopard,請你一定愛看下跤的介紹。
  1. 隨著你的機板外頻無仝(100 MHz、133 MHz),你愛先知影 PowerMac G4 機板的匯流排速度是偌濟(會使佇「系統描述」的「硬體」項目內底查著)。親像老刀的 PowerMac G4/733 (Quicksilver) 電腦來講,匯流排速度是 133 MHz、CPU 工作頻率是 733 MHz、倍頻是 5.5 (133×5.5 = 733)。
  2. 受著 Leopard 安裝程式的限制,G4 CPU升級卡工作頻率一定愛佇 867 MHz 以上。另外,請你參考升級卡廠商網站的產品介紹網頁,查明升級卡佇 100 MHz 佮 133 MHz 匯流排對應的 CPU 工作頻率、倍頻。以 OWC 的 Mercury Extreme G4/1.2 GHz 升級卡來講,100 MHz 佮 133 MHz 匯流排的工作頻率攏是 1,200 MHz。所以佇 100 MHz 匯流排的倍頻是 12 (1,200 = 100×12)、佇 133 MHz 匯流排的倍頻是 9 (1,200 = 133×9)。
  3. 一旦鎖定你想欲愛的升級卡速度了後,請入去升級卡廠商網站掠伊的產品說明書(PDF 檔)轉來看(總比事後買毋著型體,欲吼無目屎較好)。一寡升級卡型體需要你家己調整 CPU 倍頻(說明書會寫著),老刀建議你買這款。另外利用軟體控制倍頻的升級卡(親像 Powerlogix 有一部分型體屬於這款),老刀就佮無建議(有倍頻調整的問題,請看後壁的說明)。
  4. 一寡倍頻毋是整數的 CPU 倍頻,佇 PowerMac G4「關於這台 Mac」佮「系統描述」內底會有誤判的情形,雖然並袂影響 CPU 的表現,但是會因為未當通過 Leopard 安裝程式的 CPU 速度檢驗,紲來造成安裝失敗。舉例來講,FastMac G4/1.53 GHz 升級卡的倍頻是 11.5 (1533 = 133×11.5),雖然鬥佇 PowerMac G4 內底會當發揮伊應該有的工作頻率 (1.53 GHz),但是佇 Mac OS X 10.4「關於這台 Mac」內底表示的數字只有 "133 MHz"(這是因為上早期 G4 CPU 佮後期超過 1.0 GHz 的 G4 CPU 倍頻跳線 (jumper) 設定仝款的關係)。你若是拄著本來超過 867 MHz 的升級卡,因為電腦誤判 CPU 倍頻(變做比 867 MHz 較少)變做無法度安裝 Leopard 的時陣,請減級調整 CPU 升級卡的倍頻予變「整數」(親像 11.5 倍減降級變做 11 倍),就會使安裝 Lepoard 啊。然後安裝好勢了後,閣再共倍頻調整轉來原來的數字就大功告成。
希望頂懸的介紹,對你選購、調整 G4 升級卡有小可仔幫助。啥物?看無?就當做我咧烏白講啦,哈哈!

2007年11月10日

11/09 老地方冰果室聚會紀錄

(頂圖倒手爿起:燦哥、老刀、老蔡,後壁彼人是香港羅先生)

這擺老地方冰果室的聚會真是「好戲佇後頭」來形容。

一開始只有真久無看著人影的喵小相 (heyer) 留戀佇「魔獸世界」內底,佮老刀徛咧鬥看。隨後足久無來的燦哥 (JamesChang)、頭一擺來的 Joseph Huang 做伙出現(聽燦哥開釋 Joan Baez、Lobo 的老歌,實在有夠讚;老刀嘛共怹 2 人介紹一寡搖滾經典以歌會友),預告欲佮老蔡 (Alex Tsai) 來一場同學會。然後香港羅先生、詹姆士、錦爺、Joan、法國來的 auplume 先後到場,另外閣有 Brian 等 2 个新朋友到場。另外猶有一寡佇會場外口的朋友,真是鬧熱。

可惜因為老刀的翕相機電池無電的關係,這擺只翕落 7 張相片做為紀錄。

相關的紀錄佮討論,請參考:
我的 flick 相簿(攏總 7 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年11月9日

Fedora 8 降臨世間!

(頂圖:Fedora 8 的 GNOME 2.20 螢幕畫面)

受著足濟朋友愛用(包括老刀家己嘛咧使用),嘛一直是 Linux 系統重要 distribution 的 Fedora,今日按照預定的進度推出了第 8 版,提供用戶 3 款選擇(x86、x86_64、ppc)。

新版本的推出,除了代表修正舊版錯誤以外,嘛加添一寡予人期待的新功能。老刀為你整理 Fedora 8 重要的新功能,有下跤幾款:
  1. 按照硬體量身訂製的變身款 (spins) 數量有閣再增加,親像會當用一片死豬 (CD) 抑是一支 USB 隨身碟開機的版本等等。詳細的 spins 清單佮說明,請參考 http://spins.fedoraproject.org/
  2. 提供 GNOME 2.20、KDE 3.5.8 二款操作介面。
  3. 包括 BigBoard 提供的「線上桌面」(Online desktop),這差不多是 Dashbaord widgets(佇Mac OS X 內底)佮 Google Desktop 的綜合體。
  4. 採用 PulseAudio 做為新系統的音效處理單元。
  5. 包括 CodecBuddy,會當予你放送真濟款開放格式的多媒體檔案。
  6. 「冰紅茶」(IcedTea)。這是全新的開放原始碼 Java 環境,而且有提供瀏覽器 plug-in。「冰紅茶」有 x86、x86_64 二款版本(讚啦!64 位元系統終於會使觀賞 Java 網頁啊);佇 Fedora 8 ppc 版本頂懸,GCJ 猶原是內定的 Java 環境。
  7. OpenOffice.org 2.3。
  8. 改善 x86、x86_64 二款版本的電源管理功能。
  9. SELinux 提供數項安全性的設定方式佮新功能,特別適合使用佇導覽解說機 (kiosk) 頂頭。
  10. glibc 函式庫增加支援 SHA256、SHA512 雜湊運算法。
  11. Eclipse 3.3 (Europa) 程式發展平台。
  12. 系統核心 (kernel) 使用 2.6.23 版。
閣較詳細的介紹,請參考 Fedora 8 Release Note。另外,後一个版本的 Fedora 9 開發計畫,嘛已經佇仝日起動

2007年11月8日

iChatUSBCam 支援 Mac OS X 10.5 (Leopard)

雖然 Mac OS X 內底有提供一寡仔 USB webcam(網路掠影機)的驅動程式,但是支援的型體實在傷少,而且嘛無包括台灣市面上定定看著的型體。你若想欲利用蘋果無支援的 USB webcam 佇 iChat 佮朋友視訊開講,除了愛另外安裝驅動程式(webcam 原廠若無提供,老刀建議你用 macam 代替)以外,你嘛需要 iChatUSBCam

根據 Ecamm Network 公司提供的消息,iChatUSBCam 上新版 (2.2.3) 有支援 Leopard。所以你若已經升級 Leopard、安裝 webcam 驅動程式了後,請緊去 Ecamm Network 公司網站掠 iChatUSBCam 2.2.3 試用版轉來安裝就會使啦!

你若是 iChatUSBCam 的註冊使用者,請來去這个所在,拍入 e-mail 了後,就會使掠著上新的正式版。

Captain FTP 5.1 更新 (5.1030)

拄收著 Xnet 來批通知講,Captain FTP 已經針對佇 Mac OS X 10.5 (Leopard) 新系統發見的問題,推出了 5.1030 修正版。你若是 Captain FTP 5.0 佮 5.1 版(有加買升級保證)的用戶,歡迎去掠轉來更新

2007年11月6日

古董 G4 飼花豹(安裝 Leopard)幾款步數的整理

蘋果公司佇怹的 Mac OS X 10.5 (Leopard) 新系統產品網頁寫著,硬體需求是「Mac 電腦,配備 Intel、PowerPC G5 或 PowerPC G4 (867MHz 或速度更快) 處理器」,設定只會當予 867 MHz 以上的 G4、G5 佮 Intel CPU 安裝,所以老刀的「古董」G4 已經無予蘋果官方「正式」支援。你若是想欲古董 G4 頂頭「用強」,雖然用 Leopard 安裝光碟會使開機,但連鞭就會出現下跤這个畫面:


你若想欲用古董 G4 飼花豹(鬥入 Leopard),其實猶閣有法度。老刀這幾日看了國內、國外的相關報導,為大家整理佇下跤:

步數一:請參考朋友阿鑫「麥客迷俱樂部」提供的方式
  1. 利用一台符合蘋果硬體要求的 G4 電腦(為著相容性,無建議用 G5;Intel 處理器是絕對袂使矣)安裝 Leopard。
  2. 共拄才鬥好的10.5系統,利用「工具程式 / 磁碟工具程式」的「回復」選項,拷貝到 FireWire (IEEE1394) 外接碟去,然後修理伊的權限!這个裝著 Leopard 的外接碟就會當接去古董 G4 開機啊!
步數二:朋友「CA-賢」佇 Mobile01 發表的方式(其他提供仝款步數的國外網站有 MashlandMacRumors 論壇Tidbits 等)
  1. 利用「工具程式 / 磁碟工具程式」,先共 Leopard 安裝光碟轉做一份 .dmg 檔佇 FireWire (IEEE1394) 外接碟內底。
  2. 拍開這个 .dmg 檔,佇伊的「/Volumes/Mac OS X Install DVD/System/Installation/Packages/」位置內底,揣著叫做 OSInstall.mpkg 的檔案。
  3. 修改 OSInstall.mpkg 內底叫做 "Distribution" 的檔案(你若毋知影欲按怎改,會使參考這个所在),共「檢查 BadMachine」的原始碼刣掉。另外,Mashland 有提供伊改好的 OSInstall.mpkg 檔案,建議家己去伊遐掠來替換就好,毋免你家己改甲半死【老刀按:我較佮意 Mashland 的步數,共字串 "866000000" 改做 "0" 著好, 因為全部刣掉了後,電腦就袂去檢查包括 G3 在內的舊機種;事實上 G3 佮較早的電腦無法度成功完成 Leopard 的安裝(會當機),所以建議愛保留檢查 BadMachine 的部分,只共字串替換就好,按呢 G3 佮較早的電腦才會列入 BadMachine,毋准伊繼續安裝】。
  4. 直接用這个外接碟開機,來安裝 Leopard。
基本上頂懸 2 款步數,只是會當予你安裝 Leopard 爾爾;這个系統提供一寡新功能佮特殊效果,型體傷舊的古董 G4 毋是走了傷慢,就是袂當完全表現。所以你若是 PowerMac G4 的用戶,老刀建議你上好去換一片有支援 CoreImage「核心影像」的顯示卡(親像 ATI Radeon 9800 Pro 抑是 nVidia GeForce 6800 這款)。另外,若想欲提升 Leopard 佇 G4 的速度,用速度較緊的 G4 CPU 升級卡替換原來的 G4 CPU 才是正途矣!

步數三:買一片速度較緊(超過 867 MHz)的 G4 CPU 升級卡,替換原來的 G4 CPU。

(限於時間關係先寫到遮,我連鞭會閣補充調整 G4 升級卡的內文)

【1/1/2008 補充】步數四:佇 2007 年底,有人發表修改 Open Firmware 的新步數。有興趣的朋友,歡迎來參考我另外一篇報導

2007年11月3日

11/02 老地方冰果室聚會紀錄

(頂圖:足久無來的 Jerry.,後壁食暗頓彼人是木村)

這擺老地方冰果室逐禮拜五暗時佇 Le Park Cafe 舉辦的例行聚會,有真久無出現的 Jerry.、Ivy,嘛有新朋友 Oscarchao 紮伊頂禮拜拄買的 MacBook 來到現場尋求逐家來「救火」,予伊會使利用 Mac OS X 內底的 Boot Camp 灌 Windows XP。Le Park Cafe 二樓這暗已經變做是社區電腦教學中心。

相關的紀錄佮討論,請參考:
我的 flick 相簿(攏總 13 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年11月1日

Apple MacBook/MacBook Pro 硬體規格更新

今日蘋果公司共怹 MacBookMacBook Pro 產品線的硬體規格做了更新。

這擺更新的重點,就是 MacBook 終於採用佮 MacBook Pro 仝款的 Intel Santa Rosa 晶片組(主記憶體總數會當支援到 4 GB),顯示晶片對原來的 GMA 950 升級換做 GMA X3100(顯示記憶體需要 144-160 MB,佮主記憶體共同使用)。MacBook 提供 3 款規格:
  1. Intel Core 2 Duo 2.0GHz 處理器、1 GB RAM、13 吋鏡面螢幕、80GB 硬碟、Combo 光碟機的白色款:38,900 箍新台票(白色外殼)。
  2. Intel Core 2 Duo 2.2GHz 處理器、1 GB RAM、13 吋鏡面螢幕、120GB 硬碟、SuperDrive(DVD 燒錄機)白色款:45,900 箍新台票(白色外殼)。
  3. Intel Core 2 Duo 2.2GHz 處理器、1 GB RAM、13 吋鏡面螢幕、160GB 硬碟、SuperDrive(DVD 燒錄機)黑色款:52,900 箍新台票。
關於 MacBook 的詳細規格 ,請參考蘋果公司網站的說明。

另外,MacBook Pro 規格做了一寡更新:頂級機種使用的 Intel Core 2 Duo 2.4 GHz 處理器,會使貼錢換做閣卡高級的 2.6 GHz 處理器。

Mac OS X 10.4 Boot Camp 過期按怎刣掉?

採用 Intel 處理器的 Mac 電腦的優勢之一,就是會當予你製作 Boot Camp 硬碟分割來安裝 Windows XP/Vista。Boot Camp 1.x beta 已經佇 2007 年 9 月 30 日到期(袂使閣再使用),正式版的 Boot Camp 2.0 是附佇 Mac OS X 10.5 (Leopard) 內底的附屬元件。

你若咧繼續用 Mac OS X 10.4 (Tiger),而且最近並無升級到 Mac OS X 10.5 (Leopard) 的計畫,根據蘋果官方公布的資料,會當教您按怎刣掉較早製作的過期 Boot Camp 硬碟分割區,共原來 Boot Camp (Windows) 占掉的硬碟空間討倒轉來。請參考下跤的步數:
  1. 拍開「日期與時間」偏好設定,確定「自動設定日期與時間」並無拍勾。
  2. 家己設定時鐘日期到 2007 年 9 月 30 日以前。
  3. 點「儲存」。
  4. 拍開 "Boot Camp Assistant Beta"(佇「應用程式 / 工具程式」內底)。
  5. 點 "Restore the startup disk to a single volume" 然後點 "Continue"。
  6. 點 "Restore"。
  7. 拍入您的密碼了後,點 "OK"。
  8. 等待 Boot Camp Assistant Beta 共你的 Windows 分割刣掉了後,點 "Restart" 重新開機。
  9. 閣再拍開「日期與時間」偏好設定,共「自動設定日期與時間」拍勾,抑是家己設定時鐘(拍入正確的時間)嘛會使。
你若是已經咧使用 Mac OS X 10.5 (Leopard),毋免經過頂懸的步數,就會當簡單刣掉 Boot Camp (Windows) 硬碟分割。

2007年10月31日

Leopard Dev Center 開店!

隨著 Mac OS X 10.5 (Leopard) 推出了後,蘋果公司除了前後佇 10 月底推出 XCode 3.0、2.5 二套軟體開發工具,為著欲鼓勵軟體開發者加速進行 Leopard 軟體的開發工作,嘛作伙推出了 Leopard Dev Center(Leopard 開發中心)網站,網址是 http://developer.apple.com/leopard/devcenter/。

這个網站提供了開發 Leopard 軟體所需要的軟體工具、教學指引、技術文件、原始碼範例……足濟實用的資料,而且完全免費提供予 Apple Develop Connection (ADC) 會員掠落來使用,真是開發軟體的寶庫。

雖然加入 ADC 會員毋免任何費用,但是 ADC 網站嘛有提供付費的 Premier、Select 2 種會員等級。這 2 種會員會當佇遮掠上新版的 Mac OS X 轉來使用。

2007年10月30日

對「𨑨迌」二字,論 Safari 的 unicode 支援

原來的字句佇遮:http://knife-tw.blogspot.com/2007/10/fedora-8-werewolf-10.html,請看其中老刀的留字。

「有盈愛定定來𨑨迌啊」這句,若用 Mac OS X 10.4.10 (Tiger) 內定的 Safari 2.0.4 (419.3) 瀏覽器看頂懸網址的字句,會變做「有盈愛定定來 ��迌啊」;也就是講,「𨑨」(U+28468) 這个字竟然變做 unicode(統一碼,又稱「標準萬國碼」)的 UTF-16 編碼 "��"(換做 16 進位是 ��);但改換用 Firefox 2.0.0.8 for Mac 看這句就完全正常。可見 Safari 對 unicode 的支援猶有問題。

查「𨑨」這字 (��) 是收錄佇 unicode 3.1 字集;「迌」 (迌) 是 unicode 2.0 範圍的漢字。因為 Mac OS X 10.4 (Tiger) 內底的 Safari 2.0.4 (419.3) 會當顯示「迌」,所以這版 Safari 2.0.4 (419.3) 的 unicode 支援應該只有到 unicode 2.0 的「中古」水準;但是 Safari 3.0.3 beta (522.12.1) 就會當正確顯示這 2 字。聽講 Mac OS X 10.5 (Leopard) 的 Safari 嘛會使正確顯示「𨑨迌」,但是老刀的古董電腦傷舊,並無法度親身安裝試驗。

另外,老刀佇 Windows XP(有另外安裝微軟新細明體更新套件,若是安裝支援 unicode 3.1 的字型嘛仝款)下跤用 Internet Explorer 7.0 佮 Firefox 2.0.0.8 看這篇文章,嘛是會使正常顯示「𨑨迌」二字。毋知影「𨑨迌」是啥貨?「𨑨迌」音讀做 "tshit-tho",就是「普通話」的「遊玩」啦!

【老刀註】「𨑨」這字的型體是「辶」頂頭加一个「日」,你的電腦萬一若袂當正常顯示這字,應該知影我咧講啥才著

2007年10月29日

Fedora 8 (werewolf) 距離正式釋出只賰最後 10 日

對較早的 Red Hat Linux 一直到這陣的 Fedora,這个 Linux distribution 版本一直足受著逐家重視,使用者數目嘛一直維持佇各家 Linux distributions 的前幾名。自從 Fedora 計畫開始進行以來,一直以穩定的速度,逐年推出 1~2 个新版。就佇逐家熱烈討論 Mac OS X 10.5 (Leopard) 新版推出的話題中間,毋知影有偌濟人注意著,按照計畫進行的 Fedora Linux 嘛將欲佇米國東部時間 11 月初 8 早時 10 點釋出第 8 版;已經恬恬仔倒數誠久的 Fedora 官方網站終於進入最後 10 日。

Fedora 按照電腦的中央處理器 (CPU) 無仝,攏總推出 3 款:使用 Intel x86 系列相容處理器的 i386 版、支援 64 位元 Intel EM64T 指令集的 x86_64 版,猶閣有予 PowerPC G3、G4、G5 處理器專用的 PPC 版。Fedora 除了支援 PC 以外,嘛會使安裝佇 Mac 內底(按照你所使用的處理器,去掠適合版本來安裝)。

10/26 老地方冰果室聚會紀錄

(頂圖:ag 共對香港來、佇台灣食頭路的羅先生展示伊的最近作品)

老地方冰果室逐禮拜五暗時佇台北、高雄攏有固定舉辦充滿人情味的小型聚會,按照慣例,老刀參加佇 Le Park Cafe 舉辦的台北場。雖然這擺來參加的朋友無比頂擺較濟,但是蹛佇法國的 auplume 拄好利用轉來台灣度一个月假的機會,佮朋友來做伙鬥鬧熱。其他重點包括:香港羅先生答應欲來替 OpenVanilla 寫英文版手冊(lukhnos,你敢有聽著?)、Alex Tsai 講「敗家網」未來的發展等等,總講一句,嘛是充滿驚喜的聚會。

相關的紀錄佮討論,請參考:
我的 flick 相簿(攏總 32 張相片)
較早翕相的 Le Park Cafe 聚會紀錄
這擺聚會的相關討論
老地方冰果室 Le Park Cafe 禮拜五暗時定期聚會的說明

2007年10月28日

iGetter 2.5 for Windows(國際版)即日開放下載

老刀佇 10 月 25 日為逐家搶先報導 iGetter 2.5 for Windows 推出的消息,彼陣只有提供「英文版」一款。今日 Presenta Ltd. 已經共包括正體漢文在內的「國際版」釋出。有興趣的朋友,歡迎來去 iGetter 官方網站掠來安裝。

2007年10月27日

OpenVanilla for iPhone 計畫猶袂成形,特此澄清

自從老刀佇本部落格佮老地方冰果室仝步公布 OpenVanilla (OV) for iPhone 報導以來,受著真濟朋友來關心;但是真無彩,後續的代誌袂當盡如人意。老刀收著 OV 計畫主持人 lukhnos 來批表示,OV for iPhone 計畫這時陣猶袂成形,進前的消息證實是誤傳。若造成你的不便,老刀佇遮共你講一聲失禮。

2007年10月26日

OpenVanilla for Mac「香草輸入法框架」0.8.0 版正式推出!

毋予 Mac OS X 10.5 上市的新聞獨行,OpenVanilla for Mac「香草輸入法」嘛趁這个時陣推出 0.8.0 新版來鬥鬧熱。新的 0.8.0 版有下跤的新功能佮改進:
  1. 強化視覺介面設計。
  2. 新版的酷音輸入法模組,增加詞彙數量,並修正舊版幾个錯誤。
  3. 行列輸入法萬用字元支援。
  4. 泛用輸入法萬用字元支援(愛手動設定啟用,請參考網站上的手冊)
  5. 日文輸入法支援(UIM-Anthy模組),請先下載安裝 MacUIM,了後就會當佇 OpenVanilla 內底使用。
另外,配合 10.5 新系統的推出,這擺 OpenVanilla for Mac 有推出予 Mac OS X 10.4 (Tiger)Mac OS X 10.5 (Leopard) 專用的 2 款專用版。你若是使用 OpenVanilla 中間發見任何問題,歡迎來遮留落你的狀況,予作者群替你解決。

Mac OS X 10.5 (Leopard) 今日下晡 6 點正式上市!

佇 2005 年 4 月 Mac OS X 10.4 (Tiger) 上市了後的 2 冬半,蘋果公司新一代的作業系統 Mac OS X 10.5 (Leopard) 終於佇今日下晡 6 點全球開賣!

這擺推出的新系統佮前一版 Mac OS X 10.4 (Tiger) 比較,攏總增加 316 个新功能,予人看甲霧煞煞,蘋果公司真是誠意十足啊,但是硬體上低的要求嘛大大增加,限定愛「配備 Intel、PowerPC G5 抑者是 PowerPC G4 (867MHz 速度以上)處理器」的 Mac 電腦。雖然老刀的古董 PowerMac G4/733 佮 iBook G4/800 攏袂當滿足這个要求,但是敢會當安裝成功,嘛愛試了後才會知影;老刀會閣來共逐家報告安裝的結果。

按照蘋果公司的「Mac OS X Leopard Up-to-Date 升級方案」,你若是佇 2007 年 10 月 1 日以後購買符合申購資格的電腦而且無隨附 Mac OS X 10.5 Leopard 佇包裝內底,攏會使佇 2007 年 12 月 29 日前(訂購單必須愛佇 2008 年 1 月 4 日進前寄出抑是傳真)利用這个方案,來升級你的系統到 10.5。

2007年10月25日

iGetter 2.5 for Windows 推出!

雖然 iGetter 是 Mac OS X 系統下跤誠受歡迎的續傳下載軟體之一,但是無偌濟人知影伊其實嘛有 Windows 版。今日收著 Presenta Ltd. 公司的新聞稿通知講,(將近 2 冬無動無靜的)iGetter for Windows 已經推出新的 2.5 版,除了共一寡進前 Mac 版提供的功能收入之外,猶閣有支援 Windows Vista 佮加添新功能。當然老刀身為 iGetter 正體漢文的翻譯者,嘛已經完成伊的漢文化,正式版的 2.5 正體漢文版應該這幾日就會提供下載(目前 iGetter for Windows 2.5 只有開放英文版;正體漢文版上新版是 2.0.1)。

新的 iGetter 2.5 for Windows 有下跤的新功能:

  1. 新增支援 Windows Vista。
  2. 新增「下載規則」功能。會當來共新增下載的資料按照指定的條件,自動排列入去無仝款的資料夾(老刀註:iGetter 2.6 for Mac 以後的版本有提供這功能)
  3. 新增多媒體檔案的預覽功能(老刀註:iGetter 2.2 for Mac 以後的版本有提供這个功能)
  4. 新增支援 Internet ExplorerFirefoxSeaMonkey 連線階段的 cookies,會使予你對親像 adobe.com 這款以階段驗證為基礎的網站掠落資料(老刀註:iGetter 2.6 for Mac 以後的版本有提供這功能)
  5. 新增特別的 %FILE% 參數予指定的防毒軟體使用。使用這个參數的時陣,會自動用下載檔案的路徑代替。
  6. 修正「站台管理員」表列超過 100 个檔案的時陣,造成無正常顯示的錯誤。
  7. 其他的修正佮改善。

iGetter (for Windows/Mac) 定價 25 箍美金。雖然無註冊 iGetter 嘛是會當無限期免費試用,但是逐擺拍開 iGetter 就會出現 15 秒的版權宣告,一旦你註冊了後,版權宣告就袂閣再出現啊。若想欲瞭解 iGetter 進一步的介紹,請參考這个所在(漢文)。

2007年10月24日

OpenVanilla for iPhone?

OpenVanilla 香草輸入法框架 (OV) 提供數十種正體、簡體漢文的輸入法,一直受著誠濟朋友支持佮愛用(老刀嘛是其中一个)。足濟人已經知影 OV 有予 Mac OS X、Windows 使用的版本,另外 Linux 版嘛咧進行中。

iPhone 自從 Apple 推出以後一直無提供漢文輸入法,除了等待明年「亞洲版」iPhone 發表以外,敢攏無其他辦法會使來拍漢字?未來已經有解決的方法啦!根據 OV 計畫主持人 lukhnos 表示,OV 已經共 「iPhone 支援」列入怹的計畫內底,而且已經完成「OV注音」佇 iPhone 的初版。這對已經買著 iPhone 的使用者來講,絕對是天大的好消息。(老刀收著 lukhnos 出面澄清講,怹並無發起 OV for iPhone 計畫的拍算)

佇老刀寫這篇文章目前的時陣,「OV 注音」for iPhone 佇咧內部試驗的階段,猶袂無正式推出。

2007年10月23日

海賊船長閣再出帆,Captain FTP 5.1 正式推出!

今日收著 Captain FTP 開發小組的來批,通知講新的 5.1 版已經正式推出。你若欲體驗 Captain FTP 5.1 的強大功能,歡迎去 Captain FTP 官方網站下載新版轉來用。

Captain FTP 是 Mac OS X 下跤真受歡迎的 FTP 軟體。這擺推出的 5.1 新版的上大的改進,是「光碟燒錄管理」(Burn Disc Manager) 會當予你用親像 ToastNero 的方式,直接共下載檔案規批燒入 CD/DVD。雖然「光碟燒錄管理」並無提供「拷貝光碟」的功能,但一般用著上濟的「資料光碟」燒錄已經會使直接佇 Captain FTP 5.1 內底做,真是足方便的代誌。

(頂圖:Captain FTP 5.1 的「光碟燒錄管理」)

新的 5.1 版除了增加「光碟燒錄管理」以外,其他的新功能包括:

  1. 「選擇性同步」予使用者對「同步」項目內底,刪除檔案/檔案夾。
  2. 抹除光碟片的資料。
  3. 支援 iDisk:使用預先設定的選項組合,成功連接至 iDisk。

另外,5.1 版嘛修正「Webdav 處理非 ASCII 文字檔案」佮「iDisk 連線」的問題。


2007年10月22日

「老刀烏白講」較早的文章攏佇「Yahoo 奇摩部落格」

這个「老刀烏白講」部落格是對「Yahoo奇摩部落格」搬來。若欲看「老刀烏白講」較早的文章,歡迎來參考我佇舊版「老刀烏白講」網頁發表的內容。

【益智推理】老白 PowerMac G3 的奇怪遭遇(下集)

頂個月老刀寫這篇【上集】了後,過無外久就因為親人往生(阿彌陀佛),愛定定請喪假轉去處理代誌,所以一直無盈寫【下集】。好佳哉代誌已經處理煞,趁猶會記的時陣趕緊來公布答案:

因為頂篇講著「系統運作無正常的慢,滑鼠不時出現七色彩球游標。連『拍入密碼』遐簡單的動作仝款愛等半晡」,按照過去的經驗,應該是硬碟無正常。所以老刀共化解的步數攏總寫佇下跤:
  1. 共硬碟拆出來,鬥入去另外一台 Windows PC 內底。
  2. hddguru.com 提供的 Hard Disk Low Level Format Tool 2.36 來共硬碟做 Low-Level Format。
  3. 鬥轉去 PowerMac G3 用「磁碟工具程式」重新做 HFS+ 分割區。
  4. 閣再重灌 Mac OS X 佮其他應用軟體。
以上就是老刀的報導,你敢有臆著?

最後補充一點,網路頂懸有真濟專門做 Low-Level Format 的免費軟體;hddguru.com 提供的工具,是我試過較好用的其中一款。你嘛會使掠其他仝款用途的軟體來代替。

2007年10月13日

頭先來看 Captain FTP 5.1 的新功能

(頂圖:Captain FTP 5.1 新功能之一:燒錄 CD/DVD 光碟)

Captain FTP 是 Mac OS X 下跤誠受歡迎的 FTP 軟體。最近老刀收著 Captain FTP 開發小組(老刀是組員兼正體漢文翻譯者)寄來的 5.1 測試版,發現這是一个予人歡喜的版本。新的 Burn Disc Manager 會使予你用親像 ToastNero 的方式,直接共下載檔案規批燒入 CD/DVD。雖然 Burn Disc Manager 並無提供「拷貝光碟」的功能,但一般使用上濟的「資料光碟」燒錄已經會當直接佇 Captain FTP 5.1 內底做,真是足方便的代誌。

新的 5.1 版除了增加 Burn Disc Manager 以外,其他的新功能包括:
  1. 「選擇性同步」予使用者對「同步」項目內底,刪除檔案/檔案夾。
  2. 抹除光碟片的資料。
  3. 支援 iDisc support:使用預先設定的選項組合,成功連接至 iDisc。
另外,5.1 版嘛修正「Webdav 處理非 ASCII 文字檔案」佮「iDisc 連線」的問題,敬請期待!